Read Kivunjo New Testament 1999 Ulogo 19 Bible Online

Ulogo 19 - Kivunjo New Testament 1999 bible

Ulogo 19

¹Numa ya isho ngaicho ṟui cha ṟui lya kyisanzionyi kya wandu wafoi, ṟui lying'anyi ruwewu, lyechigamba, “Haleluya; wukyiṟo na kyiṟumi na pfinya nyi sha Mndumii Ruwa oṙu.

²Cha kyipfa njia tsakye tseanduya nyi tsa loi na tsa wusumganyi; kyipfa naanduya iṟai lyilya lying'anyi lyilenyamaṟa uruka kui wuṟui wolyo, na ilyiolotsia ngapo kyipfa lyilewaaga waṟundi wakye.”

³Wakagamba lya kawi, “Haleluya. Na mtsu o mṟi-cho okyeṙo na wuye mṟasa mlungana na mlungana.”

⁴Na wameeku walya makumi gawi na waana, na walya waana wai na moo, wakaterewa na iindia Ruwa, aṙamie halya kyitimenyi kya mng'ano, wechigamba, “Amen, Haleluya.”

⁵Ṟui lyikawuka halya kyitimenyi kya mng'ano lyechigamba, “Ṟumishenyi Ruwa oṙu, lanyoe waṟundi wakye woose, nyoe mumwowuye na imwindia, watutu na wang'anyi.”

⁶Ngaicho ṟui cha ṟui lya kyisanzionyi kying'anyi, na cha ṟui lya mṟinga ufoi, na cha ṟui lya ikuṟuṟuma lyiwoṙe pfinya, lyechigamba, “Haleluya; cha kyipfa Mndumii Ruwa oṙu, Mopfinya, nachilyia.

⁷Luchihiyo, lukape ngulyilyi na ngoru, luenengye Ruwa kyiṟumi kyakye; cha kyipfa wolyi wo Kyiondo kya Ruwa womwafukyia, na mka okye amkuṟeyeṟa.

⁸Na oe namṟikye nguwo tsa uwiṟo tsiaka-aka, cha kyipfa nguwo ngyicha nyi mawuto ga wusumganyi ga wandu wa Ruwa.”

⁹Na oe kangyiwia, “Ṟeia, wagusu walya wawalage na shelyenyi sha wolyi wo Kyiondo kya Ruwa.” Kangyiwia, “Maṙeṙo-ga nyi mbonyi tsa loi tsa Ruwa.”

¹⁰Na inyi ngaoloka mbele ya maṙende gakye, kundu ngyimterewe na imwindia. Kangyiwia, “Molawute kuṙi. Inyi nyi mongari opfo na o wana wa wama wapfo wawoṙe wuṟingyishi wo Yesu. Terewa na iindia Ruwa.” Cha kyipfa wuṟingyishi wo Yesu nyiwo mumuyo o ionguo shisuku.

¹¹Numa ya iho ngawona mapuchi gaseia, na farasi ya uwiṟo, na ulya aiṙamilyie, ekyelago Msimiri na O-loi, na oe kui wusumganyi nekyeanduya na ikapana shiṙa.

¹²Na meso gakye gawei cha ulumi lo moṙo, na mṙoenyi kokye naweṟee maṟikoso gafoi; na oe nawoṙe rina lyilyiṟeie, kulawoṙe mndu alyiichi sile oe amonyi.

¹³Na oe naṟee nguwo ingyilolomikye samunyi, na rina lyakye nyi Ṙeṙo lya Ruwa.

¹⁴Na poo lya asikari wakyeri ruwewu wakamwosha, waṙamilyie farasi tsa uwiṟo na iṟaa nguwo ngyicha, ngyiilyi.

¹⁵Na ushu luohi lokyewuka ṙumbunyi kokye kundu nakape nalo masanga. Na oe nechiwalyisa kui upoi lo kyichakari, na oe naichuma indo lyekamia mpfinyo ya nyashi ya Ruwa Mopfinya.

¹⁶Na oe nawoṙe rina lyilyiṟeie nguwonyi yakye na uwahenyi lokye: “MANGYI O WAMANGYI, NA MNDUMII O WANDUMII.”

¹⁷Numa ya iho ngawona malaika umwi agoṟokyi mnengyeṟinyi. Kafiiṟa na ṟui lying'anyi, echiwia shileye shoose shekyerunduka ruwewu, “Nnjonyi mukooyane na shelya shifoi sha Ruwa.

¹⁸Muiṙime ilya nyama ya wamangyi, na nyama ya wasongoru wa asikari wa shiṙa, na nyama ya wandu waṟango, nyama ya farasi, na ya wandu waṙamilyie farasi-tso, na nyama ya wandu woose, watumo na walawachilyie nyi kyindo kyoose, watutu na wang'anyi.”

¹⁹Numa ya iho ngawona indo-lyo, na wamangyi wa uruka na mapoo gawo ga asikari, wasanzie handu hamwi ikapana shiṙa na ulya aṙamilyie farasi iya ya uwiṟo, lyingyi-se na mapoo gakye ga asikari.

²⁰Indo lyilya lyikawoṙo, na moonguo shisuku ulya o wongo hamwi nalyo, ulya alewuta shindo-sho sha maṟiyisho mbele yalyo, shilya alelemba nasho wandu walya waleambilyia kyindo kyilya kyeloṟa kye wo nyi wa indo-lyo, na walya waleterewa na iindia ifano lyalyo. Wewawi wakawiyitso wai na moo iruwenyi lya moṙo lyekyeaka kui kyipiriti.

²¹Na walya waletsugaa walewoogo kui ushu lo ulya aweṙamilyie farasi iya, ushu luwukyie ṙumbunyi kokye. Na shileye shoose shikaiguṙa kui nyama tsawo.