Read Kivunjo New Testament 1999 Ulogo 8 Bible Online

Ulogo 8 - Kivunjo New Testament 1999 bible

Ulogo 8

¹Na kyiyeri alefunja kyindo kya mfungaaṙe kyeloṟa monyi o kyitapu-kyo, ruwewu kukotsia sau cha kyiyeri kya dakyika makumi gaṟaaṟu.

²Na inyi ngawona malaika walya mfungaaṙe wekyegoṟoka mbele ya Ruwa, nawo wakaenengo maganda mfungaaṙe.

³Na malaika ungyi kacha kagoṟoka mbele ya mesa ya Mndumii, awoṙe kyindo kya sahapu kyekoṟia uvumba, kaenengo uvumba lufoi, kundu naluwikyie hamwi na shiterewo sha wandu wa Ruwa woose mesenyi ya Mndumii ya sahapu, ikyeri mbele ya kyitima kya mng'ano.

⁴Na mtsu o uvumba lulya ukoṙo mbele ya Ruwa hamwi na shiterewo sha wandu wa Ruwa, iwuka mawokonyi ga malaika.

⁵Na malaika-cho kaira kyindo kyilya kyekoṟia uvumba, kakyiichuṟa moṙo o mesa ya Mndumii, kauwiyitsa urukyenyi, kukowaṙa ikuṟuṟuma na ṟui na mbawa na kyiriinza.

⁶Na malaika walya mfungaaṙe wawoṙe maganda mfungaaṙe wakaloṟa cha ilyi wakuṟeyeṟie igakapa.

⁷Malaika o kuwooka kakapa iganda, kukokapa mvuo ya magoe na moṙo shilonganyi na samu, shikawiyitso urukyenyi. Ura lumwi lo uruka kyiiṙi kya ngyuura tsiṟaaṟu lukosenekyia, na ura lungyi lo mashiṙi kyiiṙi kya ngyuura tsiṟaaṟu lukosenekyia, na maṟa mawishi goose gakasenekyia.

⁸Malaika o kawi kakapa iganda, na kyindo kyikyeri cha fumvu lying'anyi lyiaka moṙo, kyikawiyitso ipalyipalyinyi. Ura lumwi kyiiṙi kya ngyuura tsiṟaaṟu tsa ipalyipalyi lukowa samu.

⁹Kyifunjoe kyimwi kyiiṙi kya shifunjoe shiṟaaṟu sha shindo shii na moo sha ipalyipalyinyi shikapfa. Kyifunjoe kyimwi kyiiṙi kya shifunjoe shiṟaaṟu sha shindo shekyeiṙa mṟingyenyi cha melyi kyikanyamaṟo.

¹⁰Malaika o kaṟaaṟu kakapa iganda, nyenyeri ing'anyi ikaoloka iwuka ruwewu, iweaka cha taa. Ikaoloka kyifunjoenyi kyimwi kyiiṙi kya shifunjoe shiṟaaṟu sha mapichi, na shokyenyi tsa mṟinga.

¹¹Na rina lya nyenyeri-yo nyi Isuka. Na kyifunjoe kyimwi kyiiṙi kya shifunjoe shiṟaaṟu sha mṟinga kyikasuka, na wandu wafoi walenyo mṟinga-cho wakapfa, cha kyipfa ulesuka.

¹²Malaika o kaana kakapa iganda, kyifunjoe kyimwi kyiiṙi kya shifunjoe shiṟaaṟu sha mnengyeṟi kyikakapo, na kyifunjoe kyimwi kyiiṙi kya shifunjoe shiṟaaṟu sha mori, na kyifunjoe kyimwi kyiiṙi kya shifunjoe shiṟaaṟu sha nyenyeri, kundu kyifunjoe-kyo kyiwaṙe meema, kyingoto kyilawookye kyifunjoe kyacho kya kaṟaaṟu, maa kyio.

¹³Numa ya iho ngawona na iicho mbeṟo irunduka ruwewu, yechigamba na ṟui lying'anyi, “Ochia, ochia, ochia walya wekyekaa urukyenyi! Kyipfa kya maṟui gatsugae ga maganda ga malaika gaṟaaṟu, wakuṟeyeṟie igakapa.”