Read Kodava ಆದ್ಯತ್‌ರ ಪುಸ್ತಕ 11 Bible Online

ಆದ್ಯತ್‌ರ ಪುಸ್ತಕ 11 - Kodava bible

ಆದ್ಯತ್‌ರ ಪುಸ್ತಕ 11

¹ಒರ್‌ ಕಾಲತ್‌ಲ್‌ ಈ ಲೋಕತ್‌ಲ್‌ ಇಂಜ ಜನ ಎಲ್ಲಾರು ಒರೇ ಬಾಷೆನ ಪಿಂಞ ತಕ್ಕ್‌ನ ಪರಿಯುವಯಿಂಜತ್.

²ಜನ ಕ್‍ೕಕ್‌ ದಿಕ್ಕ್‌ಯಿಂಜ ಪ್ರಯಾಣ ಮಾಡ್‌ವಕ ಶಿನಾರ್‌ ದೇಶತ್‌ರ ಯಾರೆನ ಕಂಡಿತ್‌ ಅಲ್ಲಿಯೇ ವಾಸ ಮಾಡ್‌ವಕ್‌ ಸುರು ಮಾಡ್‌ಚಿ.

³ಅಕ್ಕ ಅಯಿಂಗ: ಬಾರಿ, ನಂಗ ಚಾಯಿತೆ ಚುಟ್ಟಿತ್‌ ಇಟ್ಟಿಗೆ ಮಾಡನಾಂದ್‌ ಅಯಿಂಗಡಡೆಲ್‌ ತಕ್ಕ್‌ ಪರ್ಂದತ್. (ಈ ಸೀಮೆಲ್‌ ಜನ ಕಲ್ಲ್‌ಕ್‌ ಬದ್‌ಲ್‌ ಇಟ್ಟಿಗೆಯು, ಒಕ್ಕಚೆ ಕೂಟಿ ಬೆಪ್ಪಕ್‌ ತಾರು ಉಪಯೋಗಿಚಿಡುವಯಿಂಜತ್.)

⁴ಇಂಞು ಅಯಿಂಗ: ನಂಗ ಬೂಮಿರ ಮೇಲೆ ಚದುರಿ ಪೋಕತನೆಕೆ ಒರ್‌ ಪಟ್ಟಣತ್‌ನ ಕೆಟ್ಟನ, ಬಾನತ್‍ನ ಮುಟ್ಟ್‌ವಚ್ಚಕ್‌ ಒರ್‌ ಗೋಪುರತ್‌ನ ಕೆಟ್ಟಿತ್‌ ಬಲ್ಯ ಪೆದ ಎಡ್‌ಕನಾಂದ್‌ ತಕ್ಕ್‌ ಪರ್ಂದತ್.

⁵ಆಚೇಂಗಿ ಯೆಹೋವ, ಮನುಷ್ಯಂಗ ಕೆಟ್ಟಿಯಂಡ್‌ ಇಂಜ ಆ ಪಟ್ಟಣ ಪಿಂಞ ಗೋಪುರತ್‌ನ ಕಾಂಬಕ್‌ ಇಳ್‌ಂಜಿ ಬಾತ್.

⁶ಪಿಂಞ ಯೆಹೋವ: ನೋಟ್! ಈಂಗೆಲ್ಲಾ ಒರೇ ಜನವಾಯಿತ್‌ ಒರೇ ತಕ್ಕ್‌ ಪರ್‌ಂದಂಡ್‌ ಇದ್‌ನ ಮಾಡ್‌ವಕ್‌ ಸುರು ಮಾಡಿತುಂಡ್. ಇಂಞು, ಅಯಿಂಗ ಗೇನ ಮಾಡ್‌ನದ್‌ನ ಮಾಡವಕ್‌ ಅಯಿಂಗಕ್‌ ಅಸಾದ್ಯವಾನದ್‌ ಒಂದೂ ಇಪ್ಪುಲೆಂದ್‌ ಗೇನಮಾಡಿಯಂಡುಂಡ್.

⁷ಬಾರಿ, ನಂಗ ಪೋಯಿತ್‌ ಅಯಿಂಗಡಲ್ಲಿ ಒಬ್ಬಂಡ ತಕ್ಕ್‌ ಇಂಞೊಬ್ಬಂಗ್‌ ಅರ್ತ ಆಕತನೆಕೆ ಅಯಿಂಗಡ ಬಾಷೆನ ತಾರಮಾರ ಮಾಡನಾಂದ್‌ ಎಣ್ಣ್‌ಚಿ.

⁸ಅನ್ನನೆ ಮಾಡಿತ್, ಯೆಹೋವ ಅಯಿಂಗಳೆಲ್ಲ ಈ ಲೋಕತ್‌ರ ಎಲ್ಲಾ ಜಾಗತ್‌ಲ್‌ ಚದ್‍ರ್‍ಚಿಟ್ಟತ್. ಅಯಿಂಗ ಆ ಪಟ್ಟಣ ಕೆಟ್ಟ್‌ವದ್‌ನ ನಿಪ್ಪ್‌ಚಿಟ್ಟತ್.

⁹[8]ಈ ಲೋಕತ್‌ಲ್‌ ಇಂಜ ಬಾಷೆನ ಯೆಹೋವ ಅಲ್ಲಿ ತಾರಮಾರ ಮಾಡ್‍ನಗುಂಡ್, ಆ ಪಟ್ಟಣಕ್‌ ಬಾಬೆಲ್‍ೕಂದ್‌ ಪೆದ ಬಾತ್. ಯೆಹೋವ ಅಯಿಂಗಳೆಲ್ಲ ಈ ಲೋಕತ್‌ರ ಎಲ್ಲಾ ಜಾಗತ್‌ಲ್‌ ಚದ್‍ರ್‍ಚಿಟ್ಟತ್.

¹⁰ಇದ್‌ ಶೇಮ್‌ಂಡ ವಂಶಾವಳಿ. ಜಲಪ್ರಳಯ ಉಂಟಾಯಿತ್‌ ದಂಡ್‌ ಕಾಲ ಆನ ಪಿಂಞ ಶೇಮ್‌ಕ್‌ ನೂರ್‌ ವಯಸ್ಸ್‌ ಇಪ್ಪಕ ಅರ್ಪಕ್ಷದ ಪುಟ್ಟ್‌ಚಿ.

¹¹ಅರ್ಪಕ್ಷದ ಪುಟ್ಟ್‌ನ ಪಿಂಞ ಶೇಮ್‌ ಇಂಞು ಅಂಞೂರ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

¹²ಅರ್ಪಕ್ಷದಕ್‌ ನುಪ್ಪತಂಜಿ ವಯಸ್ಸ್‌ ಇಪ್ಪಕ ಶೆಲಹ ಪುಟ್ಟ್‌ಚಿ.

¹³ಶೆಲಹ ಪುಟ್ಟ್‌ನ ಪಿಂಞ ಅರ್ಪಕ್ಷದ ಇಂಞು ನಾನೂಟ್ಯ ಮೂಂದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

¹⁴ಶೆಲಹಂಗ್‌ ನುಪ್ಪದ್‌ ವಯಸ್ಸ್‌ ಇಪ್ಪಕ ಎಬರ ಪುಟ್ಟ್‌ಚಿ.

¹⁵ಎಬರ ಪುಟ್ಟ್‌ನ ಪಿಂಞ ಶೆಲಹ ಇಂಞು ನಾನೂಟ್ಯ ಮೂಂದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

¹⁶ಎಬರಂಗ್‌ ನುಪ್ಪದ್‌ ನಾಲ್‌ ವಯಸ್ಸ್‌ ಇಪ್ಪಕ ಪೆಲೆಗ ಪುಟ್ಟ್‌ಚಿ.

¹⁷ಪೆಲೆಗ ಪುಟ್ಟ್‌ನ ಪಿಂಞ ಎಬರ ಇಂಞು ನಾನೂಟ್ಯ ನುಪ್ಪದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

¹⁸ಪೆಲೆಗಂಗ್‌ ನುಪ್ಪದ್‌ ವಯಸ್ಸ್‌ ಇಪ್ಪಕ ರೆಗೂವ ಪುಟ್ಟ್‌ಚಿ.

¹⁹ರೆಗೂವ ಪುಟ್ಟ್‌ನ ಪಿಂಞ ಪೆಲೆಗ ಇಂಞು ಇರ್‌ನೂಟ್ಯ ಒಯಿಂಬದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

²⁰ರೆಗೂವಂಗ್‌ ನುಪ್ಪದಂಡ್‌ ವಯಸ್ಸ್‌ ಇಪ್ಪಕ ಸೆರೂಗ ಪುಟ್ಟ್‌ಚಿ.

²¹ಸೆರೂಗ ಪುಟ್ಟ್‌ನ ಪಿಂಞ ರೆಗೂವ ಇಂಞು ಇರ್‌ನೂಟ್ಯ ಏಳ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

²²ಸೆರೂಗಂಗ್‌ ನುಪ್ಪದ್‌ ವಯಸ್ಸ್‌ ಇಪ್ಪಕ ನಾಹೋರ ಪುಟ್ಟ್‌ಚಿ.

²³ನಾಹೋರ ಪುಟ್ಟ್‌ನ ಪಿಂಞ ಸೆರೂಗ ಇಂಞು ಇರ್‌ನೂರ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

²⁴ನಾಹೋರಂಗ್‌ ಇರವತೊಯಿಂಬದ್‌ ವಯಸ್ಸ್‌ ಇಪ್ಪಕ ತೆರಹ ಪುಟ್ಟ್‌ಚಿ.

²⁵ತೆರಹ ಪುಟ್ಟ್‌ನ ಪಿಂಞ ನಾಹೋರ ಇಂಞು ನೂಟ್ಯ ಪತ್ತೊಯಿಂಬದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

²⁶ತೆರಹಂಗ್‌ ಎಳ್‌ವದ್‌ ವಯಸ್ಸ್‌ ಇಪ್ಪಕ ಅಬ್ರಾಮ, ನಾಹೋರ, ಹಾರಾನ ಎಣ್ಣುವ ಮಕ್ಕ ಪುಟ್ಟ್‌ಚಿ.

²⁷ಇದ್‌ ತೆರಹಂಡ ವಂಶಾವಳಿ. ತೆರಹಂಗ್‌ ಅಬ್ರಾಮ, ನಾಹೋರ, ಹಾರಾನ ಎಣ್ಣುವ ಮಕ್ಕ ಪುಟ್ಟ್‌ಚಿ. ಹಾರಾನಂಗ್‌ ಲೋಟ ಎಣ್ಣುವಂವೊ ಪುಟ್ಟ್‌ಚಿ.

²⁸ಹಾರಾನ ತಾನ್‌ ಪುಟ್ಟ್‌ನ ಊರ್‌ ಎಣ್ಣುವ ಕಲ್ದೀಯರಡ ದೇಶತ್‌ರ ಪಟ್ಟಣತ್‌ಲ್‌ ತಾಂಡ ಅಪ್ಪನಾನ ತೆರಹ ಇಂಞು ಬದಿಕಿತ್‌ಪ್ಪಕಲೇ ಚತ್ತತ್.

²⁹ಅಬ್ರಾಮ ಪಿಂಞ ನಾಹೋರ ಮಂಗಲ ಕಯಿಚಂಡತ್. ಅಮ್ರಾಮಂಡ ಪೊಣ್ಣ್‌ರ ಪೆದ ಸಾರಾಯ್, ನಾಹೋರಂಡ ಪೊಣ್ಣ್‌ರ ಪೆದ ಮಿಲ್ಕ. ಇವ ಹಾರಾನಂಡ ಮೋವ. ಹಾರಾನ ಮಿಲ್ಕ ಪಿಂಞ ಇಸ್ಕ ಎಣ್ಣುವ ಮೂಡಿ ಮಕ್ಕಕ್‌ ಅಪ್ಪನಾಯಿತ್‌ಂಜತ್.

³⁰ಸಾರಯ್‌ ಗೊಡ್ಡಿಯಾಯಿತ್‌ಂಜನಗುಂಡ್‌ ಅವಕ್‌ ಮಕ್ಕ ಇಂಜಿತ್‌ಲೆ.

³¹ತೆರಹ ತಾಂಡ ಮೊಂವೊ ಅಬ್ರಾಮನ, ತಾಂಡ ಕ್‌ರ್‌ಮೊಂವೊನಾನ ಹಾರಾನಂಡ ಮೊಂವೊನಾಯಿತ್‌ಂಜ ಲೋಟನ ಪಿಂಞ ಅಮ್ರಾಮಂಡ ಪೊಣ್ಣ್‌ ಸಾರಯಳ ಕೂಟಿಯಂಡ್‌ ಕಾನಾನ್‌ ದೇಶಕ್‌ ಪೋಂಡೂಂದ್‌ ಕಲ್ದೀಯರ್‌ಡ ಊರ್‌ ಎಣ್ಣುವ ಪಟ್ಟಣತ್‌ಂಜ ಪೊರ್‌ಟತ್. ಆಚೇಂಗಿ, ಅಯಿಂಗ ಹಾರಾನ್‌ ಪಟ್ಟಣಕ್‌ ಬಂದಿತ್‌ ಅಲ್ಲಿಯೇ ವಾಸಮಾಡ್‌ಚಿ.

³²ತೆರಹಂಗ್‌ ಇರ್‌ನೂಟ್ಯ ಅಂಜ್ ವಯಸ್ಸ್‌ ಇಪ್ಪಕ ಹಾರಾನ್‌ ಪಟ್ಟಣತ್‌ಲ್‌ ಚತ್ತತ್.