Read Kodava ಆದ್ಯತ್‌ರ ಪುಸ್ತಕ 13 Bible Online

ಆದ್ಯತ್‌ರ ಪುಸ್ತಕ 13 - Kodava bible

ಆದ್ಯತ್‌ರ ಪುಸ್ತಕ 13

¹ಅಲ್ಲಿಂಜ ಅಬ್ರಾಮ ತಾಂಡ ಪೊಣ್ಣ್‌ನ, ಅಂವೊಂಗ್‌ ಇಂಜ ಎಲ್ಲಾನ ಪಿಂಞ ಅಂವೊಂಡ ಕೂಡೆ ಲೋಟನ ಕಾಕಿಯಂಡ್‌ ಐಗುಪ್ತ ದೇಶತ್‌ನ ಬುಟ್ಟಿತ್‌ ನೆಗೆವ್‌ ಪ್ರಾಂತ್ಯಕ್‌ ಪೋಚಿ.

²ಇಕ್ಕ ಅಬ್ರಾಮ ದುಂಬ ಐಶ್ವರ್ಯವಂತಂವೊನಾಯಿತ್‌ಂಜಿತ್, ಅಂವೊಂಗ್‌ ಎತ್ತ್‌ಕಡ್‌ಚಿಯ, ಬೊಳ್ಳಿ ಪಿಂಞ ಪೊನ್ನ್‌ ಇಂಜತ್.

³ಅಂವೊ ನೆಗೆವ್‌ ಊರ್‌ನ ಬುಟ್ಟಿತ್‌ ಒರ್‌ ಜಾಗತ್‌ಂಜ ಇಂಞೊರ್‌ ಜಾಗಕ್‌ ಪೋಯಂಡ್‌ ಬೇತೇಲ್ಕತ್ತನೆ, ಮಿಂಞ ಬೇತೇಲ್ಕು ಆಯಿಕ್‌ ಮದ್ಯತ್‌ಲ್‌ ಇಂಜ ಗುಡಾರಕ್‌ ಬಾತ್.

⁴ಮಿಂಞ ಅಲ್ಲಿಯೇ ಅಬ್ರಾಮ ಯೆಹೋವಂಗ್‌ ಬಲಿಪೀಠ ಕೆಟ್ಟಿತ್‌ಂಜತ್. ಇಕ್ಕ ಅಬ್ರಾಮ ಪುನಃ ದೇವಡ ಪೆದ ಎಣ್ಣಿತ್‌ ಆರಾದನೆ ಮಾಡ್‌ಚಿ.

⁵ಅಮ್ರಾಮಂಡ ಕೂಡೆ ಪ್ರಯಾಣ ಮಾಡಿಯಂಡಿಂಜ ಲೋಟಂಗ್‌ ಸಹ, ಬೋಂಡ್‌ಯಚ್ಚಕ್‌ ಕೊರಿ ಎತ್ತ್‌ಕಡ್‌ಚಿಯ ಪಿಂಞ ಗುಡಾರ ಇಂಜತ್.

⁶ಆಚೇಂಗಿ ಅಯಿಂಗ ದಂಡಾಳ್‌ರ ಆಸ್ತಿ ದುಂಬ ಇಂಜನಗುಂಡ್‌ ಅಯಿಂಗ ದಂಡಾಳು ಒಕ್ಕಚೆ ವಾಸ ಮಾಡ್‌ವಕ್‌ ಜಾಗ ಪೋರತೆ ಆಚಿ.

⁷ಇದ್‌ನಗುಂಡ್‌ ಅಮ್ರಾಮಂಡ ಎತ್ತ್‌ ಕಾಪಯಿಂಗಕು ಲೋಟಂಡ ಎತ್ತ್‌ ಕಾಪಾಯಿಂಗಕು ತಕರಾರ್‌ ಸುರು ಆಚಿ. ಇದ್‌ಲ್ಲತೆ ಆ ಕಾಲತ್‌ಲ್‌ ಕಾನಾನ್ಯರ ಜನ ಪಿಂಞ ಪರಿಜೀಯರಯಿಂಗ ಆ ದೇಶತ್‌ಲ್‌ ವಾಸಮಾಡಿಯಂಡಿಂಜತ್.

⁸ಆನಗುಂಡ್‌ ಅಬ್ರಾಮ ಲೋಟಂಗ್: ನಾಕು ನೀಕು, ನಾಡ ಎತ್ತ್‌ ಕಾಪಯಿಂಗಕು ನೀಡ ಎತ್ತ್‌ ಕಾಪಯಿಂಗಕು ತಕರಾರ್‌ ಬೋಂಡ. ಎಚ್ಚಕಾಚೇಂಗಿಯು ನಂಗ ಬೆಂದ್‌ಕ ಅಲ್ಲ!

⁹ಈ ಊರ್‌ ಎಲ್ಲಾ ನೀಡ ಮಿಂಞತ್‌ಲ್‌ ಉಂಡಲ್ಲ? ನಂಗ ಬೋರೆ ಬೋರೆ ಪೋಕನ. ನೀನ್‌ ಎಡ್‌ತ್‌ ಬರಿ ಪೋಚೇಂಗಿ ನಾನ್‌ ಬಲ್‌ತ್‌ ಬರಿಕ್‌ ಪೋಪಿ. ನೀನ್‌ ಬಲ್‌ತ್‌ ಬರಿ ಪೋಚೇಂಗಿ ನಾನ್‌ ಎಡ್‌ತ್‌ ಬರಿಕ್‌ ಪೋಪೀಂದ್‌ ಎಣ್ಣ್‌ಚಿ.

¹⁰ಲೋಟ ಕಣ್ಣೆಡ್‌ತಿತ್‌ ನೋಟ್‌ವಕ ಯೋರ್ದನ್‌ ಯಾರೆಯಿಂಜ ಚೋಗರ್‌ ಎಣ್ಣುವ ಊರ್‌ಕ್‌ ಪೋಪ ಬಟ್ಟೆಕತ್ತನೆ ಫಲವತ್ತಾನ ಜಾಗಾಂದ್‌ ಕಂಡತ್. ಇದ್‌ ಯೆಹೋವ ಸೊದೋಮ್‌ ಪಿಂಞ ಗೊಮೋರ ಪಟ್ಟಣತ್‌ನ ನಾಶಮಾಡುವಕ್‌ ಮಿಂಞ ಯೆಹೋವಂಡ ತೋಟತ್‌ರನಕೆಯು, ಐಗುಪ್ತ ದೇಶತ್‌ರನೆಕೆಯು ಇಂಜತ್.

¹¹ಆನಗುಂಡ್‌ ಲೋಟ ಯೊರ್ದನ್‌ ಯಾರೆನ ತ್‍ೕರ ಆರಿಚಿಟ್ಟಂಡ್‌ ಕ್‍ೕಕ್‌ ದಿಕ್ಕ್‌ಲ್‌ ಪೊರ್‌ಟಿತ್‌ ಪೋಚಿ. ಇನ್ನನೆ ಅಯಿಂಗ ಬೋರೆ ಬೋರೆಯಾಯಿತ್‌ ಪೋಚಿ.

¹²ಅಬ್ರಾಮ ಕಾನಾನ್‌ ದೇಶತ್‌ಲ್‌ ಒಳ್‌ಂಜತ್; ಲೋಟ ಯೊರ್ದನ್‌ ಪಕ್ಕತ್‌ಲುಳ್ಳ ಯಾರೆನ್‌ಲ್‌ ಉಳ್ಳ ಚೆನ್ನ ಪಟ್ಟಣತ್‌ಲ್‌ ವಾಸ ಮಾಡಿತ್‌ ಸೋದೋಮ್‌ ಪಟ್ಟಣಕ್‌ ಪೋಪ ಬಟ್ಟೆಲ್‌ ಗುಡಾರ ಇಟ್ಟತ್.

¹³ಆಚೇಂಗಿ ಸೊದೋಮ್‌ ಪಟ್ಟಣತ್‌ರ ಜನ ಯೆಹೋವಂಡ ಮಿಂಞತ್‌ ಬಾರಿ ದುಷ್ಟಂಗಳು ಪಿಂಞ ಪಾಪ ಮಾಡುವಯಿಂಗಳಾಯಿತ್‌ಂಜತ್.

¹⁴ಲೋಟ ಅಬ್ರಾಮನ ಬುಟ್ಟಿತ್‌ ಪೋನ ಪಿಂಞ, ಯೆಹೋವ ಅಬ್ರಾಮಂಗ್: ನೀನ್‌ ಉಳ್ಳ ಜಾಗತ್‌ಂಜ ನೀಕ್‌ ಕಣ್ಣೆಟ್ಟುವ ಜಾಗಕತ್ತನೆ ಬಡಕ್, ತೆಕ್ಕ್, ಕ್‍ೕಕ್‌ ಪಿಂಞ ಪಡ್‌ಞಾರ್‌ ದಿಕ್ಕ್‌ಲ್‌ ಕಣ್ಣೆಡ್‌ತಿತ್‌ ನೋಟ್.

¹⁵ನೀನ್‌ ನೋಟ್‌ವ ಈ ಬೂಮಿನೆಲ್ಲಾ ನಾನ್‌ ನೀಕು ನೀಡ ಸಂತಾನಕ್‌ ಕಾಲಕಾಲಕ್‌ ಇಪ್ಪನೆಕೆ ತಪ್ಪಿ.

¹⁶ನೀಡ ಸಂತಾನತ್‌ನ ಬೂಮಿರ ದೂಳ್‌ರಚ್ಚಕ್‌ ಬಲ್ಯದ್‌ ಮಾಡುವಿ. ಒಬ್ಬಂಗ್‌ ಬೂಮಿರ ದೂಳ್‌ನ ಲೆಕ್ಕ ಮಾಡುವಕ್‌ ಕಯ್ಯುವದಾಚೇಂಗಿ, ನೀಡ ಸಂತಾನತ್‌ನ ಸಹ ಲೆಕ್ಕ ಮಾಡುವಕ್‌ ಕಯ್ಯು.

¹⁷ನೀನ್‌ ಎದ್ದಿತ್, ಈ ದೇಶತ್‌ರ ಉದ್ದಕು ಅಗಲಕು ನಡಪಿಯ; ನಾನ್‌ ಅದ್‌ನ ನೀಕ್‌ ತಪ್ಪೀಂದ್‌ ಎಣ್ಣ್‌ಚಿ.

¹⁸ಪಿಂಞ ಅಬ್ರಾಮ ತಾಂಡ ಗುಡಾರತ್‌ನ ಹೆಬ್ರೋನ್‌ಲ್‌ ಉಳ್ಳ ಮಮ್ರೆಯಂಡ ತೋಪ್ರ ಪಕ್ಕತ್‌ಲ್‌ ಇಟ್ಟಿತ್, ಯೆಹೋವಂಗ್‌ ಅಲ್ಲಿ ಓರ್‌ ಬಲಿಪೀಠತ್‌ನ ಕೆಟ್ಟ್‌ಚಿ.