Read Kodava ಆದ್ಯತ್‌ರ ಪುಸ್ತಕ 14 Bible Online

ಆದ್ಯತ್‌ರ ಪುಸ್ತಕ 14 - Kodava bible

ಆದ್ಯತ್‌ರ ಪುಸ್ತಕ 14

¹ಶಿನಾರ್‌ಕ್‌ ರಾಜನಾಯಿತ್‌ಂಜ ಅಮ್ರಾಫೆಲನು, ಎಲ್ಲಜಾರ್‌ಕ್‌ ರಾಜನಾಯಿತ್‌ಂಜ ಅರಿಯೋಕನು, ಎಲಾಮ್ರ ರಾಜನಾನ ಕೆದೊರ್ಲಗೋಮರನು, ಗೋಯಿಮ್ರ ರಾಜನಾನ ತಿದ್ಗಾಲನು ಇಂಜ ದಿವಸತ್‌ಲ್,

²ಈ ನಾಲ್‌ ರಾಜಂಗಳು ಇಕ್ಕ ಉಪ್ಪ್‌ರ ಕಡಲ್‌ ಆಯಿತುಳ್ಳ ಸಿದ್ದೀಮ್‌ ತಗ್ಗ್‌ಲ್‌ ಕೂಡ್‌ನ ಸೊದೋಮ್ರ ರಾಜನಾನ ಬೆರಗ, ಗೊಮೋರ್‌ ರಾಜನಾನ ಬಿರ್ಶಗ, ಅದ್ಮಾಹದರ ರಾಜನಾನ ಶಿನಾಬ, ಚೆಬೋಯೀಮಿನ ರಾಜನಾನ ಶೆಮೇಬರ, ಬೇಲಗಿರ ಎಣ್ಣ್‌ಚೇಂಗಿ ಚೋಗರಂಡ ರಾಜ, ಈಂಗಡ ಕೂಡೆ ಯುದ್ದ ಮಾಡ್‌ಚಿ.

⁴ಇದಂಡ ಮಿಂಞ ಈಂಗ ಪನ್ನೆರಂಡ್‌ ಕಾಲ ಕೆದೊರ್ಲಗೋಮರಂಗ್‌ ಸೇವೆ ಮಾಡಿತ್, ಪದಿಮೂಂದನೆ ಕಾಲತ್‌ಲ್‌ ತಿರುಗಿ ಬುದ್ದತ್.

⁵ಪದಿನಾಲನೆ ಕಾಲತ್‌ಲ್‌ ಕೆದೊರ್ಲಗೊಮೋರ ಪಿಂಞ ಅಂವೊಂಡ ಕೂಡೆ ಕೂಡಿತ್‌ಂಜ ರಾಜಂಗ ಬಂದಿತ್‌ ಅಷ್ಟರೋತ್‌ ಕರ್‌ನಯಿಮಿಲ್‌ಲ್‌ ಇಂಜ ರೆಫಾಯರಂಗಳ, ಹಾಮಿಲ್‌ಲ್‌ ಇಂಜ ಜೂಜ್ಯರನ, ಶಾವೆಕಿರ್ಯಾತಯಿಮಿಲ್‌ಲ್‌ ಇಂಜ ಏಮಿಯರಳ ಚೋಪ್‌ಚಿಟ್ಟಿತ್.

⁶ಇದಲ್ಲತೆ ಸೇಯಿ ಎಣ್ಣುವ ಕುಂದಲ್‌ ವಾಸ ಮಾಡಿಯಂಡಿಂಜ ಹೋರಿ ಎಣ್ಣುವ ಜನಳ, ಅಲ್ಲಿಯೇ ಚೋಪ್‌ಚಿಟ್ಟಿತ್‌ ಮಣಬೂಮಿರ ಪಕ್ಕತ್‌ಲುಳ್ಳ ಏಲ್ಪಾರಾಕತ್ತನೆ ಓಡಿಚಿಟ್ಟತ್.

⁷ಅಲ್ಲಿಂಜ ಅಯಿಂಗ ತಿರಿತ್‌ ಬಪ್ಪಕ ಕಾದೇಶ್‍ ಎಣ್ಣುವ ಎನ್ಮಿಷ್ಪಾಟಿಕ್‌ ಬಂತ್‌ ಅಮಾಲೇಕ್ಯಂಗಡ ಎಲ್ಲಾ ದೇಶತ್‌ನ, ಹಚಚೋನ್‌ ತಾಮರ್‌ಲ್‌ ವಾಸ ಮಾಡಿಯಡಿಂಜ ಅಮೋರಿಯರ ಸಹ ಗೆದ್ದತ್.

⁸ಅಕ್ಕ ಸೊದೋಮಂಡ ರಾಜನು, ಗೋಮರಂಡ ರಾಜನು, ಅದ್ಮಾಹಂಡ ರಾಜನು, ಚೆಬೋಯಿಮಂಡ ರಾಜನು, ಚೋಗರ್‌ ಎಣ್ಣುವ ಬೇಲಗ್‌ಂಡ ರಾಜನು ಪೊರ್‌ಟಿತ್‌ ಸಿದ್ದೀಮ್‌ ತಗ್ಗ್‌ಲ್‌ ಯದ್ದ ಮಾಡ್‌ಚಿ.

⁹ಏಲಾಮಿರ ರಾಜನಾನ ಕೆದೊರ್ಲಗೋಮರ್‌ಂಡ ಕೂಡೆಯು, ಗೋಯಮ್ರ ರಾಜನಾನ ತಿದ್ಗಾಲಂಡ ಕೂಡೆಯು, ಶಿನಾರಿರ ರಾಜನಾನ ಅಮ್ರಾಫೆಲಂಡ ಕೂಡೆಯು, ಎಲ್ಲಸಾರಿರ ರಾಜನಾನ ಅರಿಯೋಕಂಡ ಕೂಡೆಯು ಯುದ್ದ ಮಾಡುವಕ್‌ ಪೊರ್‌ಟಿತ್, ಆ ಅಂಜ್ ರಾಜಂಗಡ ಕೂಡೆ ಈ ನಾಲ್‌ ರಾಜಂಗ ಯುದ್ದ ಮಾಡ್‌ಚಿ.

¹⁰ಆಚೇಂಗಿ ಸಿದ್ದೀಮ್‌ ತಗ್ಗ್‌ಲ್‌ ತಾರ್‌ರ ಗುಂಡಿ ದುಂಬ್‌ನದಾಯಿತ್‌ಂಜತ್. ಸೊದೋಮ್‌ ಗೊಮೋರತ್‌ರ ರಾಜಂಗ ಓಡಿ ಪೋಪಕ ಚೆನ್ನ ಜನ ಆ ಗುಂಡಿರ ಒಳಕ್‌ ಬುದ್ದಿತ್‌ ಚತ್ತತ್. ಬಾಕಿವುಳ್ಳಯಿಂಗ ಕುಂದ್‌ಕ್‌ ಓಡಿ ಪೋಚಿ.

¹¹ಬಯ್ಯ ಗೆದ್ದಯಿಂಗ ಸೊದೋಮ್‌ ಪಿಂಞ ಗೊಮೋರ ಪಟ್ಟಣತ್‌ಲ್‌ ಇಂಜ ಎಲ್ಲಾ ಆಸ್ತಿನ ಪಿಂಞ ಬೊಳೆನೆಲ್ಲ ಎಡ್‌ತಂಡ್‌ ಪೋಚಿ.

¹²ಅಮ್ರಾಮಂಡ ತಮ್ಮಣಂಡ ಮೋಂವೊನಾನ ಲೋಟ ಸೊದೋಮ್‌ಲ್‌ ವಾಸಮಾಡಿಯಂಡಿಂಜನಗುಂಡ್, ಅಂವೊಂನ, ಅಂವೊಂಡ ಆಸ್ತಿನ ಸಹ ಎಡ್‌ತಂಡ್‌ ಪೋಚಿ.

¹³ಅಯಿಂಗಡಲ್ಲಿ ತಪ್ಪ್‌ಚಿಟ್ಟ ಒಬ್ಬ ಇಬ್ರಿಯನಾನ ಅಮ್ರಾಮಂಡ ಪಕ್ಕ ಬಂದಿತ್‌ ಇದ್‌ನ ಎಣ್ಣ್‌ಚಿ. ಅಕ್ಕ ಅಬ್ರಾಮ ಅಮೋರಿಯನಾನ ಮಮ್ರೆಯಂಡ ತೋಪ್ರ ಪಕ್ಕತ್‌ಲ್‌ ವಾಸಮಾಡಿಯಂಡಿಂಜತ್. ಮಮ್ರೆಯಂಗ್‌ ಎಷ್ಕೋಲ ಪಿಂಞ ಆನೇರ ಎಣ್ಣುವ ಬೆಂದ್‌ಕ ಇಂಜತ್. ಈ ದಂಡಾಳ್‌ಕು ಅಬ್ರಾಮಂಗು ಒಪ್ಪಂದ ಇಂಜತ್.

¹⁴ಅಬ್ರಾಮಂಗ್‌ ತಾಂಡ ತಮ್ಮಣಂಡ ಮೋಂವೊನಾನ ಲೋಟನ ಪುಡಿಚಿತ್‍ೕಂದ್‌ ಗೊತ್ತಾನ ಪಿಂಞ ತಾಂಡ ಮನೆಲ್ಲೇ ಪುಟ್ಟಿ ಬೊಳ್‌ಂದ ಯುದ್ದ ಮಾಡುವಕ್ಕುಳ್ಳ ಮುನ್ನೂಟ್ಯ ಪದ್‌ನೆಟ್ಟ್‌ ಜನಡ ಪಡೆನ ತಯಾರ್‌ ಮಾಡಿತ್, ಅಯಿಂಗ ಪೊರ್‌ಟಿತ್‌ ಆ ರಾಜಂಗಳ ದಾನೂರ್‌ಕತ್ತನೆಕೆ ಓಡಿಚಿಟ್ಟಂಡ್‌ ಪೋಚಿ.

¹⁵ಬಯಿಟ್ ನೇರತ್‌ಲ್‌ ಅಂವೊನ ಪಿಂಞ ಅಂವೊಂಡ ಸೇವಕಂಗಳ ಬೋರೆ ಬೋರೆ ಗುಂಪಾಯಿತ್‌ ಮಾಡಿತ್‌ ಎಲ್ಲಾ ದಿಕ್ಕ್‌ಯಿಂಜ ಆಕ್ರಮಣ ಮಾಡ್‌ಚಿ. ಅಯಿಂಗಳ ದಮಸ್ಕ ಪಟ್ಟಣತ್‌ರ ಬಡಕ್‌ ದಿಕ್ಕ್‌ಲ್‌ ಉಳ್ಳ ಹೋಬಾ ಊರ್‌ಕತ್ತನೆ ದೌತಿಯಂಡ್‌ ಪೋಚಿ.

¹⁶ಅಬ್ರಾಮ ಎಲ್ಲಾ ಸಾಮಾನ್‌ತ್‌ನ ಪುನಃ ಎಡ್‌ತಂಡ್‌ ಬಾತ್. ತಾಂಡ ತಮ್ಮಣಂಡ ಮೋಂವೊನಾನ ಲೋಟನ, ಅಂವೊಂಡ ಆಸ್ತಿನ, ಪೊಣ್ಣಾಳ್‌ವಳ ಪಿಂಞ ಬೋರೆ ಜನಳ ಸಹ ಪುನಃ ಕೂಟಿಯಂಡ್‌ ಬಾತ್.

¹⁷ಅಬ್ರಾಮ ಕೆದೊರ್ಲಗೋಮರನ, ಅಂವೊಂಡ ಕೂಡೆ ಇಂಜ ರಾಜಂಗಳ ಚೋಪ್‌ಚಿಟ್ಟಿತ್‌ ವಾಪಸ್ ಬಪ್ಪಕ, ಸೊದೋಮ್ರ ರಾಜ ಪೊರ್‌ಟಿತ್, ರಾಜಂಡ ಯಾರೆ ಎಣ್ಣುವ ಶಾವೆ ಯಾರೆರಕತ್ತನೆ ಅಬ್ರಾಮನ ಕಾಂಬಕಾಯಿತ್‌ ಪೋಚಿ.

¹⁸ಉನ್ನತವಾನ ದೇವಡ ಯಾಜಕನಾಯಿತ್‌ಂಜ ಸಾಲೇಮಿರ ರಾಜನಾನ ಮೆಲ್ಕೀಚೆದೆಕ ಸಹ ಒಟ್ಟಿನ ಪಿಂಞ ದ್ರಾಕ್ಷಿರಸತ್‌ನ ಅಬ್ರಾಮಂಗ್‌ ಕೊಂಡಬಾತ್.

¹⁹ಅಂವೊ ಅಬ್ರಾಮಂಗ್: ಬಾನ ಬೂಮಿ ಉಂಟ್‌ಮಾಡ್‌ನ ಉನ್ನತವಾನ ದೇವಡ ಆಶೀರ್ವಾದ ಅಬ್ರಾಮಂಗ್‌ ಇರಡ್‍ೕಂದ್‌ ಆಶೀರ್ವಾದ ಮಾಡ್‌ಚಿ.

²⁰ನೀಡ ಶತ್‌ರುವಳ ನೀಡ ಕೈಕ್‌ ಒಪ್ಪ್‌ಚಿಟ್ಟ ಉನ್ನತವಾನ ದೇವಂಗ್‌ ಸ್ತೋತ್‌ರಾಂದ್‌ ಎಣ್ಣ್‌ಚಿ. ಅಲ್ಲಿಂಜ ಅಬ್ರಾಮ ತಾನ್‌ ಗೆದ್ದಿತ್‌ ಕೊಂಡಬಂದ ಎಲ್ಲಾ ಸಾಮಾನತ್‌ಲ್‌ ಪತ್ತ್‌ಲ್‌ ಒರ್‌ ಬಾಗತ್‌ನ ಅಂವೊಂಗ್‌ ಕೊಡ್‌ತತ್.

²¹ಸೊದೋಮ್ರ ರಾಜ ಅಬ್ರಾಮಂಗ್: ನೀನ್‌ ಸೆರೆಪುಡ್‌ಚ ಜನಳ ನಾಕ್‍ ಒಪ್ಪ್‌ಚಿಡ್. ನೀನ್‌ ಕೊಂಡಬಂದ ಆಸ್ತಿನ ನೀನೆ ಬೆಚ್ಚಾಂದ್‌ ಎಣ್ಣ್‌ಚಿ.

²²ಅದ್‌ಂಗ್‌ ಅಬ್ರಾಮ ಸೊದೋಮ್ರ ರಾಜಂಗ್: ಅಬ್ರಾಮನ ಐಶ್ವರ್ಯವಂತಂವೊನಾಯಿತ್‌ ಮಾಡಿಯೇಂದ್‌ ನೀನ್‌ ಎಣ್ಣತನೆಕೆ ನಾನ್‌ ಒರ್‌ ನೂಲ್‌ನ ಆಡ್, ಎಕ್ಕಡತ್‌ರ ಬಾರನ್ನಾಡ್‌ ನೀಕ್‌ ಉಳ್ಳ ಒಂದ್‌ನ ಸಹ ನಾನ್‌ ಎಡ್‌ಪುಲೇಂದು, ಬಾನ ಬೂಮಿನ ಉಂಟ್ ಮಾಡ್‌ನ ಉನ್ನತವಾನ ದೇವನಾನ ಯೆಹೋವಂಡ ಕಡೆಕ್‌ ನಾಡ ಕೈಯಿನ ಎಡ್‌ತಿತ್‌ ಪ್ರಮಾಣ ಮಾಡಿಯೆ.

²⁴ಈ ಆಳ್‌ವ ತಿಂದಾನ ಬುಟ್ಟಿತ್‌ ನಾಕ್‍ ಒಂದು ಬೋಂಡ. ಆಚೇಂಗಿ, ನಾಡ ಕೂಡೆ ಬಂದ ಆನೇರ, ಎಷ್ಕೋಲ ಮಮ್ರೆಯಂಗಕ್‌ ಬಂದ ಪಾಲ್‌ನ ಅಯಿಂಗಕ್‌ ಕೊಡ್‌ತ್‌ರ್‌ಂದ್‌ ಎಣ್ಣ್‌ಚಿ.