Read Kodava ಆದ್ಯತ್‌ರ ಪುಸ್ತಕ 15 Bible Online

ಆದ್ಯತ್‌ರ ಪುಸ್ತಕ 15 - Kodava bible

ಆದ್ಯತ್‌ರ ಪುಸ್ತಕ 15

¹ಈ ಘಟನೆಯೆಲ್ಲಾ ಆನ ಪಿಂಞ ಅಬ್ರಾಮಂಗ್‌ ಯೆಹೋವ ದರ್ಶನತ್‌ಲ್‌ ಬಂದಿತ್: ಅಬ್ರಾಮನೇ ನೀನ್‌ ಬೊತ್ತತೆ; ನಾನ್‌ ನೀಕ್‌ ಎದೆತಟ್ಟ್‌ ಆಯಿತ್‌ಪ್ಪಿ. ನೀಡ ಬಹುಮಾನ ಬಲ್ಯದಾಯಿತ್‌ಪ್ಪಾಂದ್‌ ಎಣ್ಣ್‌ಚಿ.

²ಅದ್‌ಂಗ್‌ ಅಬ್ರಾಮ: ಓ ಯೆಹೋವನಾನ ದೇವನೇ, ನಾಕ್‍ ಎಂತ ತಪ್ಪಿಯಾ? ನಾಕ್‍ ಮಕ್ಕ ಇಲ್ಲತೆ ಉಂಡಲ್ಲಾ? ನಾಡ ಆಸ್ತಿಯೆಲ್ಲ ನಾಡ ಮನೆರ ಆಳಾನ ದಮಸ್ಕ ಊರ್‌ಕ್‌ ಕೂಡ್‌ನ ಎಲೀಯೆಜರಂಗ್‌ ಪಾಲ್‌ ಆಪಲ್ಲಾಂದ್‌ ಎಣ್ಣ್‌ಚಿ.

³ಇಂಞು ಅಬ್ರಾಮ: ನೀನ್‌ ನಾಕ್‍ ಸಂತಾನತ್‌ನ ತಂದಿತ್‌ಲ್ಲೆ; ನಾಡ ಮೆನೆಲ್‌ ಪುಟ್ಟ್‌ನ ಒರ್‌ ಆಳ್‌ ನಾಡ ಆಸ್ತಿಕ್‌ ಬಾದ್ಯಸ್ತನಾಪ್ಪಾಂದ್‌ ಅಬ್ರಾಮ ಎಣ್ಣ್‌ಚಿ.

⁴ಅಕ್ಕ ಯೆಹೋವಂಡ ತಕ್ಕ್‌ ಅಂವೊಂಗ್‌ ಬಂದಿತ್: ನೀಡ ಆಳ್‌ ನೀಕ್‌ ಬಾದ್ಯಸ್ತನಾಪುಲೆ, ನೀಡ ಪೊಟ್ಟೆಲ್‌ ಪುಟ್ಟ್‌ವಂವೊನೇ ನೀಕ್‌ ಬಾದ್ಯಸ್ತನಾಪ್ಪಾಂದ್‌ ಎಣ್ಣ್‌ಚಿ.

⁵ದೇವ ಅಬ್ರಾಮನ ಪೊರಮೆ ಕಾಕಿಯಂಡ್‌ ಬಂದಿತ್: ಬಾನತ್‍ನ ನೋಟ್, ಅಲ್ಲಿ ಉಳ್ಳ ಬಾನತ್‌ ಮೀನ್ನ ಲೆಕ್ಕ ಮಾಡುವಕ್‌ ನೀಕ್‌ ಕಯ್ಯುವದಾಚೇಂಗಿ ನೀನ್‌ ಲೆಕ್ಕಮಾಡ್; ನೀಡ ಸಂತಾನವು ಇನ್ನನೆ ಇಪ್ಪಾಂದ್‌ ಎಣ್ಣ್‌ಚಿ.

⁶ಅಬ್ರಾಮ ಯೆಹೋವನ ನಂಬ್‌ಚಿ; ಯೆಹೋವ ಅಂವೊಂಡ ನಂಬಿಕೆನ ನೋಟಿತ್‌ ಅಂವೊನ ನೀತಿವಂತಂವೋಂದ್‌ ಲೆಕ್ಕ ಮಾಡ್‌ಚಿ.

⁷ಇಂಞು ಅಂವೊ ಅಬ್ರಾಮಂಗ್: ಈ ದೇಶತ್‌ನ ನೀಕ್‌ ತಪ್ಪಕಾಯಿತ್, ನಿನ್ನ ಊರ್‌ ಎಣ್ಣುವ ಕಲ್ದೀಯರ ಪಟ್ಟಣತ್‌ಂಜ ಕಾಕಿಯಂಡ್‌ ಬಂದ ಯೆಹೋವ ನಾನೇಂದ್‌ ಎಣ್ಣ್‌ಚಿ.

⁸ಆಚೇಂಗಿ ಅಬ್ರಾಮ: ಓ ಯೆಹೋವಾನಾನ ಯೆಹೋವನೇ, ನಾನೇ ಇದ್‌ಂಗ್‌ ಬಾದ್ಯಸ್ತನಾಪೀಂದ್‌ ನಾಕ್‍ ಎನ್ನನೆ ಗೊತ್ತಾಪಾಂದ್‌ ಕ್‍ೕಟತ್.

⁹ಅದ್‌ಂಗ್‌ ಯೆಹೋವ ಅಬ್ರಾಮಂಗ್: ನೀನ್‌ ಮೂಂದ್‌ ವಯಸ್ಸ್‌ರ ಕಡ್‌ಚಿ, ಮೂಂದ್‌ ವಯಸ್ಸ್‌ರ ಪೊಣ್ಣಾಡ್, ಮೂಂದ್‌ ವಯಸ್ಸ್‌ರ ಟಗರ್, ಮೂಂದ್‌ ವಯಸ್ಸ್‌ರ ಬೆಳವಕ್ಕಿನ ಪಿಂಞ ಮರಿ ಪಾರಿವಾಳತ್‌ನ ನಾಡ ಪಕ್ಕ ಎಡ್‌ತಂಡ್‌ ಬಾಂದ್‌ ಎಣ್ಣ್‌ಚಿ.

¹⁰ಅಬ್ರಾಮ ಇದ್‌ನೆಲ್ಲ ಕೊಂಡ ಬಂದಿತ್‌ ಪ್ರತಿಯೊಂದನ ದಂಡ್‌ ತುಂಡ್‌ ಮಾಡಿತ್, ಒಂದಂಡ ವಿರುದ್ದ ಇಂಞೊಂದನ ಬೆಚ್ಚಿತ್‌ ಅಟ್ಟ್‌ಚಿ. ಆಚೇಂಗಿ ಪಕ್ಷಿಯಳ ತುಂಡ್‌ ಮಾಡಿತ್‌ಲ್ಲೆ.

¹¹ಅಲ್ಲಿ ಚಾವ್‌ ತಡಿನ ತಿಂಬಕ್‌ ಪದ್ದ್‌ವ ಪಾರಿಯಂಡ್‌ ಬಪ್ಪಕ ಅಬ್ರಾಮ ಅದನೆಲ್ಲಾ ಓಡಿಚಿಟ್ಟತ್.

¹²ಬಯಿಟ್ ಆಯಂಡ್‌ ಬಪ್ಪಕ ಅಬ್ರಾಮಂಗ್‌ ನಲ್ಲ ವರ್‌ಕ್‌ ಪತ್ತ್‌ಚಿ. ಬಲ್ಯ ಇರ್‌ಟ್ ಅಂವೊನ ಮುಚ್ಚುವಕ ಅಂವೊಂಗ್‌ ದುಂಬ ಪೋಡಿಯಾಚಿ.

¹³ಅಕ್ಕ ಯೆಹೋವ ಅಂವೊಂಗ್: ನೀಡ ಸಂತಾನ ಅನ್ಯ ದೇಶತ್‌ಲ್‌ ಪರದೇಶಿಯಾಯಿತ್‌ ಇಂಜಿತ್, ಆ ದೇಶತ್‌ರ ಜನಕ್‌ ಅಡಿಯಾಳಾಯಿತ್‌ ಇಪ್ಪಾಂದು, ಅಯಿಂಗಡಿಂಜ ನಾನ್ನೂರ್‌ ಕಾಲ ದುಂಬ ಕಷ್ಟಪಡುವಾಂದು ನೀನ್‌ ಚಾಯಿತೆ ಅರಿಯಂಡು.

¹⁴ಈಂಗ ಅಡಿಯಾಳಾಯಿತ್‌ ಇಪ್ಪ ದೇಶತ್‌ನ ನಾನ್‌ ನ್ಯಾಯತೀರ್‌ಪ್‌ ಮಾಡುವಿ; ಪಿಂಞ ಅಯಿಂಗ ದುಂಬ ಆಸ್ತಿ ಉಳ್ಳಯಿಂಗಳಾಯಿತ್‌ ಅಲ್ಲಿಂಜ ಪೊರಮೆ ಬಪ್ಪ.

¹⁵ಆಚೇಂಗಿ ನೀನ್‌ ಸಮಾದಾನತ್‌ಲ್‌ ನೀಡ ಮುತ್ತಜ್ಜಂಗಡ ಪಕ್ಕ ಪೋಪಿಯ. ಪಣ್ಣ್‌ ಮುದುಕ ಆನ ಪಿಂಞ ನಿನ್ನ ಪೂಪ.

¹⁶ನೀಡ ಸಂತಾನತ್‌ರ ನಾಲನೆ ವಂಶತ್‌ರಯಿಂಗ ಈ ಜಾಗಕ್‌ ತಿರಿತ್‌ ಬಪ್ಪ; ಎನ್ನಂಗೆಣ್ಣ್‌ಚೇಂಗಿ ಅಮೋರಿಯಂಗಡ ದುಷ್ಟತನ ಇಂಞು ಪೂರ್ತಿ ಆಯಿತ್‌ಲ್ಲೇಂದ್‌ ಎಣ್ಣ್‌ಚಿ.

¹⁷ಸೂರ್ಯ ಮುಳ್‌ಗಿತ್‌ ಇರ್‌ಟ್ ಆನಪಿಂಞ, ಪೊಗೆಯಾಡಿಯಂಡಿಂಜ ಒಲೆಯು, ತಿತ್ತ್‌ ಕತ್ತಿಯಂಡಿಂಜ ತೂಡು ಅಟ್ಟಿತ್‌ಂಜ ಯರ್ಚಿ ತುಂಡ್‌ರ ಮದ್ಯತ್‌ ಬಪ್ಪದ್‌ನ ಅಬ್ರಾಮ ಕಂಡತ್.

¹⁸ಅನ್ನನೆ ಆ ದಿವಸತ್‌ಲ್‌ ಯೆಹೋವ ಅಮ್ರಾಮಂಡ ಕೂಡೆ ಒಪ್ಪಂದ ಮಾಡಿತ್: ಐಗ್ತುಪ ದೇಶತ್‌ರ ಪೊಳೆಯಿಂಜ ಪುಡ್‌ಚಿತ್‌ ಯೂಫ್ರೇಟೀಸ್ ಬಲ್ಯ ಪೊಳೆಕತ್ತನೆಕ್‌ ಉಳ್ಳ ಎಲ್ಲಾನ ಪಿಂಞ

¹⁹ಕೇನಿಯಂಗ, ಕೆನಿಜೀಯಂಗ, ಕದ್ಮೋನಿಯಂಗ,

²⁰ಹಿತ್ತಿಯಂಗ, ಪೆರಿಜೀಯಂಗ, ರೆಫಾಯಂಗ,

²¹ಅಮೋರಿಯಂಗ, ಕಾನಾನ್ಯಯಂಗ ಗಿರ್‌ಗಾಷಿಯಂಗ ಯೆಬೂಸಿಯಂಗೆಲ್ಲಾ ವಾಸಮಾಡಿಯಂಡುಳ್ಳ ದೇಶತ್‌ನ ಕೊಡ್‌ತಿತುಳ್‍ೕಂದ್‌ ಎಣ್ಣ್‌ಚಿ.