Read Kodava ಆದ್ಯತ್‌ರ ಪುಸ್ತಕ 16 Bible Online

ಆದ್ಯತ್‌ರ ಪುಸ್ತಕ 16 - Kodava bible

ಆದ್ಯತ್‌ರ ಪುಸ್ತಕ 16

¹ಅಮ್ರಾಮಂಡ ಪೊಣ್ಣ್‌ ಆನ ಸಾರಯಳ್‌ಕ್‌ ಮಕ್ಕಯಿಂಜ್‌ತ್‌ಲ್ಲೆ. ಐಗ್ತುಪ ದೇಶಕ್‌ ಕೂಡ್‌ನ ಹಾಗರ ಎಣ್ಣುವ ಒರ್‌ ಅಡಿಯಾಳ್‌ ಪಣಿಕಾರ್ತಿ ಅವಕ್‌ ಇಂಜತ್.

²ಇನ್ನನೆ ಇಪ್ಪಕ ಸಾರಯ ಅಬ್ರಾಮಂಗ್: ಯೆಹೋವ ನಾಕ್‍ ಮಕ್ಕ ಪೆರುವ ಬಾಗ್ಯತ್‌ಂಜ ತಡುತಿತುಂಡ್; ನೀನ್‌ ನಾಡ ಪಣಿಕಾರ್ತಿಯಾನ ಹಾಗರಂಡ ಕೂಡೆ ಕೂಡಿಯ. ಒರ್‌ ಸಮಯ ಅವಳಗುಂಡ್‌ ನಾಕ್‍ ಮಕ್ಕ ಆಕೂಂದ್‌ ಎಣ್ಣ್‌ಚಿ. ಅಬ್ರಾಮ ಅವಡ ತಕ್ಕ್‌ಕ್‌ ಒತ್ತಂಡತ್.

³ಅಬ್ರಾಮ ಪತ್ತ್‌ ಕಾಲ ಕಾನಾನ್‌ ದೇಶತ್‌ಲ್‌ ವಾಸಯಿಂಜ ಪಿಂಞ, ಅಂವೊಂಡ ಪೊಣ್ಣ್‌ ಸಾರಯ ಐಗುಪ್ತ ದೇಶಕ್‌ ಕೂಡ್‌ನ ತಾಂಡ ಪಣಿಕಾರ್ತಿಯಾನ ಹಾಗರಳ ಕಾಕಿತ್‌ ತಾಂಡ ವಡಿಯಂಗ್‌ ಪೊಣ್ಣಾಯಿತ್‌ ಒಪ್ಪ್‌ಚಿಟ್ಟತ್.

⁴ಅಂವೊ ಹಾಗರಂಡ ಕೂಡೆ ಕೂಡ್‌ವಕ ಅವ ಕೆಲಕಾರ್ತಿ ಆಚಿ. ತಾನ್‌ ಕುಳುಮೆಕಾರ್ತಿ ಆಚೀಂದ್‌ ಗೊತ್ತಾನ ಪಿಂಞ ಅವ ಸಾರಾಯಳ ಕಮ್ಮಿಯಾಯಿತ್‌ ಕಾಂಬಕ್‌ ಸುರುಮಾಡ್‌ಚಿ.

⁵ಅಕ್ಕ ಸಾರಯ ಅಬ್ರಾಮಂಗ್: ನಾಡ ಗೋಳ್‌ಕ್‌ ನೀನೇ ಕಾರಣ; ನಾಡ ಪಣಿಕಾರ್ತಿನ ನೀಕ್‌ ಪೊಣ್ಣಾಯಿತ್‌ ಒಪ್ಪ್‌ಚಿಟ್ಟ. ಅವ ಕುಳುಮೆಕಾರ್ತಿ ಆಚೀಂದ್‌ ಅವಕ್‌ ಗೊತ್ತಾನ ಪಿಂಞ ನನ್ನ ಕಮ್ಮಿಯಾಯಿತ್‌ ಕಾಂಬಕ್‌ ಸುರು ಮಾಡಿತುಂಡ್. ಯೆಹೋವ ನೀಕು ನಾಕು ನ್ಯಾಯತ್‍ೕಕಡ್‍ೕಂದ್‌ ಎಣ್ಣ್‌ಚಿ.

⁶ಅದ್‌ಂಗ್‌ ಅಬ್ರಾಮ ಸಾರಾಯಳ ನೋಟಿತ್: ನೀಡ ಪಣಿಕಾರ್ತಿ ನೀಡ ಕೈಲ್‌ ಉಂಡ್, ನೀಡ ಮನಸ್ಸ್‌ಕ್ ಬಂದನೆಕೆ ನೀನ್‌ ಅವಕ್‌ ಮಾಡ್‍ೕಂದ್‌ ಎಣ್ಣ್‌ಚಿ. ಅಕ್ಕ ಸಾರಯ ಅವಳ ದುಂಬ ಕಠಿಣವಾಯಿತ್‌ ನಡ್‌ತ್‌ವಕ, ಹಾಗರ ಅವಡಲ್ಲಿಂಜ ಓಡಿ ಪೋಚಿ.

⁷ಯೆಹೋವಂಡ ದೂತ ಅವಳ ಮಣಬೂಮಿಲ್‌ ಶೂರಿ ಎಣ್ಣುವ ಊರ್‌ಕ್‌ ಪೋಪ ಬಟ್ಟೆಲ್‌ ಉಳ್ಳ ಬುಗ್ಗೆರ ಪಕ್ಕ ಇಪ್ಪಕ ಕಂಡತ್.

⁸ಅಕ್ಕ ಆ ದೇವದೂತ: ಸಾರಯಡ ಪಾಣಿಕಾರ್ತಿಯಾನ ಹಾಗರಳೇ, ನೀನ್‌ ಎಲ್ಲಿಂಜ ಬಂದಂಡುಳ್ಳಿಯಾ, ಎಲ್ಲಿಕ್‌ ಪೊರ್‌ಟಿತುಳ್ಳಿಯಾಂದ್‌ ಕ್‍ೕಟತ್. ಅದ್‌ಂಗ್‌ ಅವ: ನಾಡ ಎಜಮಾನಿಯಾನ ಸಾರಯಡಿಂಜ ಓಡಿಪೋಯಂಡುಳ್ಳಂದ್‌ ಎಣ್ಣ್‌ಚಿ.

⁹ಅದ್‌ಂಗ್‌ ಯೆಹೋವಂಡ ದೇವದೂತ ಅವಕ್: ನೀನ್‌ ನೀಡ ಎಜಮಾನಿರ ಪಕ್ಕ ತಿರಿತ್‌ ಪೋ. ಅವಡ ಅದಿಕಾರಕ್‌ ತಗ್ಗಿತ್‌ ನಡೇಂದ್‌ ಎಣ್ಣ್‌ಚಿ.

¹⁰ಇಂಞು ಯೆಹೋವಂಡ ದೂತ ಹಾಗರನ ನೋಟಿತ್: ನೀಡ ಸಂತಾನತ್‌ನ ಬಲ್ಯದ್‌ ಮಾಡುವಿ; ಅದ್‌ ಬಲ್ಯದಾಯಿತ್‌ ಲೆಕ್ಕ ಮಾಡುವಕ್‌ ಕಯ್ಯತಚ್ಚಕ್‌ ಇಪ್ಪಾಂದ್‌ ಎಣ್ಣ್‌ಚಿ.

¹¹ಅಲ್ಲಿಂಜ ಪುನಃ ದೇವದೂತ ಅವಕ್: ನೀನ್‌ ಇಕ್ಕ ಕುಳುಮೆಕಾರ್ತಿಯಾಯಿತ್‌ ಉಳ್ಳಿಯ, ನೀನ್‌ ಒರ್‌ ಕ್‌ಣ್ಣ ಕುಂಞಿನ ಪೆರುವಿಯ. ಯೆಹೋವ ನೀಡ ಕಷ್ಟತ್‌ರ ಮೊರೆನ ಕ್‍ೕಟನಗುಂಡ್‌ ಆ ಕುಂಞಿಕ್‌ ಇಷ್ಮಾಯೇಲ್‌ಂದ್‌[11] ಪೆದ ಬೆಕ್ಕಂಡು.

¹²ಅಂವೊ ಕಾಡ್‌ ಕತ್ತೆರನೆಕೆ ಇಪ್ಪ! ಅಂವೊ ಎಲ್ಲಾಡ ಮೇಲೆ ಕೈ ಮಾಡುವ. ಅನ್ನನೆ ಅಂವೊಂಗ್‌ ಎಲ್ಲಾರು ಕೈ ಮಾಡುವ. ತಾಂಡ ಅಣ್ಣತಮ್ಮಣಂಗಕ್‌ ವಿರೋದವಾಯಿತ್‌ ಜೀವನಮಾಡುವಾಂದ್‌ ಎಣ್ಣಿತ್‌ ಪೋಚಿ.

¹³ಅದ್‌ಂಗ್‌ ಹಾಗರ: ನನ್ನ ನೋಟ್‌ವಂವೊನ ನಾನ್‌ ಸಹ ನೋಟ್‌ನಲ್ಲಾಂದ್‌ ಎಣ್ಣಿತ್, ತಾಂಡ ಕೂಡೆ ತಕ್ಕ್‌ ಪರ್‌ಂದ ಯೆಹೋವಂಗ್‌ ನೀನ್‌ ನನ್ನ ಕಾಂಬ ದೇವಾಂದ್‌ ಪೆದ ಬೆಚ್ಚತ್.

¹⁴ಆನಗುಂಡ್‌ ಅಲ್ಲಿಯಿಂಜ ಆ ಕಣತರೆಕ್‌ ಲಹೈರೋಯಿಂದ್‌[12] ಪೆದಬಾತ್; ಅದ್‌ ಕಾದೇಶಿಕು ಬೆರೆದಿಕು ಮದ್ಯತ್‌ಲ್‌ ಉಂಡ್.

¹⁵ಹಾಗರ ಅಬ್ರಾಮಂಗ್‌ ಒರ್‌ ಮೋಂವೊನ ಪೆತ್ತತ್; ಅಬ್ರಾಮ ಹಾಗರ ಪೆತ್ತ ಮೋಂವೊಂಗ್‌ ಇಷ್ಮಾಯೇಲ್‌ಂದ್‌ ಪೆದ ಬೆಚ್ಚತ್.

¹⁶ಇಷ್ಮಾಯೇಲ್‌ ಪುಟ್ಟ್‌ವಕ ಅಬ್ರಾಮಂಗ್‌ ಎಂಬತ್ತಾರ್‌ ಕಾಲ ವಯಸ್ಸಾಯಿತ್‌ಂಜತ್.