Read Kodava ಆದ್ಯತ್‌ರ ಪುಸ್ತಕ 18 Bible Online

ಆದ್ಯತ್‌ರ ಪುಸ್ತಕ 18 - Kodava bible

ಆದ್ಯತ್‌ರ ಪುಸ್ತಕ 18

¹ಪಿಂಞ ಅಬ್ರಹಾಮ ಮಜ್ಜಣ ನೇರತ್‌ಲ್‌ ತಾಂಡ ಗುಡಾರತ್‌ರ ಪಡಿಲ್‌ ಅಳ್‌ತಿತ್‌ ಇಪ್ಪಕ, ಯೆಹೋವ ಮಮ್ರೆ ತೋಟತ್‌ರ ಪಕ್ಕತ್‌ ಅಂವೊಂಗ್‌ ಕಾಂಬ್‌ಚಿಟ್ಟತ್.

²ಅದ್‌ ಎನ್ನನೆ ಎಣ್ಣ್‌ಚೇಂಗಿ, ಅಬ್ರಹಾಮ ಕಣ್ಣೆಡ್‌ತಿತ್‌ ನೋಟ್‌ವಕ, ಮೂಂದ್‌ ಆಣಾಳ್‌ವ ಅಂವೊಂಡ ಪಕ್ಕತ್‌ಲ್‌ ನಿಂದಿತುಳ್ಳದ್‌ನ ಕಂಡತ್. ಅಂವೊ ಎದ್ದಿತ್‌ ಅಯಿಂಗಳ ಸ್ವೀಕಾರ ಮಾಡ್‌ವಕಾಯಿತ್‌ ಓಡಿಪೋಯಿತ್‌ ಅಯಿಂಗಡ ಮಿಂಞತ್‌ ಅಡ್ಡ ಬುದ್ದಿತ್:

³ಸ್ವಾಮಿ, ನೀಡ ಕಣ್ಣ್‌ಲ್, ನಾಕ್‍ ದಯೆ ಕ್‌ಟ್ಟ್‌ಚೇಂಗಿ ನಾಡ ಗುಡಾರಕ್‌ ಬಕ್ಕತೆ ಮಿಂಞಕ್‌ ಪೋಕತಿ.

⁴ಚೆನ್ನ ನೀರ್‌ ಎಡ್‌ತಂಡ್‌ ಬಪ್ಪಕ್‌ ಎಣ್ಣುವಿ, ನಿಂಗ ಕಾಲ್‌ನ ಕತ್ತಿತ್, ಈ ಮರತ್‌ರ ಅಡಿಲ್‌ ಆರಾಮ್‌ ಮಾಡಿಯೊಳಿ.

⁵ನಿಂಗ ಈ ಸೇವಕಂಡ ಪಕ್ಕ ಬಂದಂಗ್, ನಿಂಗ ತಿಂಬಕ್‌ ನಾನ್‌ ಚೆನ್ನ ಒಟ್ಟಿ ಎಡ್‌ತಂಡ್‌ ಬಪ್ಪಿ. ನಿಂಗ ಚೆನ್ನ ಸುದಾರಿಚಿಟ್ಟಂಡ್‌ ಮಿಂಞಕ್‌ ಪೋಯೀಂದ್‌ ಎಣ್ಣ್‌ವಕ, ಅಯಿಂಗ: ನೀನ್‌ ಎಣ್ಣ್‌ನನೆಕೆ ಮಾಡ್‍ೕಂದ್‌ ಎಣ್ಣ್‌ಚಿ.

⁶ಅಕ್ಕ ಅಬ್ರಹಾಮ ಬೆರಿಯ ಗುಡಾರಕ್‌ ಓಡಿಪೋಯಿತ್‌ ಸಾರಳಂಗ್: ನೀನ್‌ ಬೆರಿಯ ಮೂಂದ್‌ ಸೇರ್‌ ಚಾಯಿ ಉಳ್ಳ ಪೊಡಿನ ಎಡ್‌ತ್‌ ಕಲ್ಕಿತ್‌ ಒಟ್ಟಿ ತಯಾರ್‌ ಮಾಡ್‍ೕಂದ್‌ ಎಣ್ಣ್‌ಚಿ.

⁷ಅಲ್ಲಿಂಜ ಅಬ್ರಹಾಮ ಕೊಟ್ಟ್‌ಕ್‌ ಓಡಿಪೋಯಿತ್, ಓರ್‌ ನಲ್ಲ ಕಡ್‌ಚಿನ ಪುಡಿಚಿತ್‌ ತಾಂಡ ಆಳ್‌ಕ್‌ ಕೊಡ್‌ತತ್. ಅಂವೊ ಅದ್‌ನ ಬೆರಿಯ ಅಡಿಗೆ ತಯಾರ್‌ ಮಾಡ್‌ಚಿ.

⁸ಅಲ್ಲಿಂಜ ಅಬ್ರಹಾಮ ಪಾಲ್‌ ಮೋರ್‌ ಪಿಂಞ ಅಡಿಗೆ ತಯಾರ್‌ ಮಾಡ್‌ನ ಯರ್ಚಿ ಎಲ್ಲಾನ ಕೊಂಡ ಬಂದಿತ್‌ ಅಯಿಂಗಡ ಮಿಂಞತ್‌ ಬೆಚ್ಚತ್; ಅಯಿಂಗ ತಿಂಬಕ ಅಬ್ರಹಾಮ ಅಲ್ಲಿಯೇ ಮರತ್‌ರ ಅಡಿಲ್‌ ನಿಂದಂಡಿಂಜತ್.

⁹ಅಲ್ಲಿಂಜ ಅಯಿಂಗ ಅಂವೊಂಗ್: ನೀಡ ಪೊಣ್ಣ್‌ ಸಾರಳ ಎಲ್ಲಿಯಾಂದ್‌ ಕ್‍ೕಪಕ, ಅದಾ, ಗುಡಾರತ್‌ಲ್‌ ಉಂಡ್‍ೕಂದ್‌ ಎಣ್ಣ್‌ಚಿ.

¹⁰ಅಕ್ಕ ಅಯಿಂಗಡಲ್ಲಿ ಒಬ್ಬ: ನಾನ್‌ ಕಂಡಿತವಾಯಿತು ಬಪ್ಪ ಕಾಲ ಈ ಸಮಯತ್‌ಲ್‌ ನೀಡಲ್ಲಿಕ್‌ ಬಪ್ಪಿ; ಅಕ್ಕ ನೀಡ ಪೊಣ್ಣ್‌ ಸಾರಳಂಗ್‌ ಒರ್‌ ಮೋಂವೊ ಇಪ್ಪಾಂದ್‌ ಎಣ್ಣ್‌ಚಿ. ಸಾರಳ ಅಂವೊಂಡ ಬಯ್ಯತ್‌ ಗುಡಾರತ್‌ರ ಪಡಿರ ಬರಿಲ್‌ ನಿಂದಂಡ್‌ ಈ ತಕ್ಕ್‌ನ ಕ್‍ೕಟಡಿಂಜತ್.

¹¹ಅಬ್ರಹಾಮ ಪಿಂಞ ಸಾರಳಂಗ್‌ ದುಂಬ ವಯಸ್ಸಾಯಿತ್‌ಂಜನಗುಂಡ್‌ ಅವಕ್‌ ಮಕ್ಕ ಆಪ ಕಾಲ ದಾಟಿ ಪೋಯಿತ್‌ಂಜತ್.

¹²ಅದ್‌ಂಗ್‌ ಸಾರಳ ಅವಡ ಮನಸ್ಸ್‌ರ ಒಳ್‌ಲ್‌ ತೆಳ್‌ಚಿತ್: ನಾನ್‌ ಮುದುಕಿಯು, ನಾಡ ವಡಿಯ ಪಣ್ಣ್‌ ಮುದುಕನು ಆಯಿತ್‌ಪ್ಪಕ ನಾಕೆಲ್ಲಿಂಜ ಆ ಸುಖಾಂದ್‌ ಎಣ್ಣ್‌ಚಿ.

¹³ಅಕ್ಕ ಯೆಹೋವ ಅಬ್ರಹಾಮನ ನೋಟಿತ್: ಎನ್ನಂಗ್‌ ಸಾರಳ ತೆಳ್‌ಚತ್, ತಾನ್‌ ಮುದುಕಿ, ನಾಕ್‍ ಕುಂಞಿನ ಪೆರುವಕ್‌ ಕಯ್ಯುವಾಂದ್‌ ಎಣ್ಣಿಯಂಡುಂಡ್‌ಂದ್‌ ಎಣ್ಣ್‌ಚಿ?

¹⁴ಯೆಹೋವಂಗ್‌ ಕಯ್ಯತ್ತದ್‌ ಎಂತದೇಂಗಿ ಉಂಡಾ? ನಾನ್‌ ಎಣ್ಣ್‌ನನೆಕೆ ಬಪ್ಪ ಕಾಲತ್‌ ಇದೇ ಸಮಯಕ್‌ ತಿರಿತ್‌ ಬಪ್ಪಿ; ಅಕ್ಕ ಸಾರಳಂಗ್‌ ಒರ್‌ ಮೋಂವೊ ಇಪ್ಪಾಂದ್‌ ಎಣ್ಣ್‌ಚಿ.

¹⁵ಸಾರಳಂಗ್‌ ಪೋಡಿಯಾಯಿತ್‌ ನಾನ್‌ ತೆಳ್‌ಚಿತ್‌ಲ್ಲೇಂದ್‌ ಎಣ್ಣ್‌ಚಿ. ಅದಂಗ್‌ ಅಂವೊ: ಅನ್ನನೆ ಅಲ್ಲ, ನೀನ್‌ ನೇರಾಯಿತು ತೆಳ್‌ಚಿಯಾಂದ್‌ ಎಣ್ಣ್‌ಚಿ.

¹⁶ಅಕ್ಕ ಆ ಆಣಾಳ್‌ವ ಎದ್ದಿತ್‌ ಸೋದೋಮ್‌ ಪಟ್ಟಣತ್‌ರ ಕಡೆಕ್‌ ನೋಟ್‌ಚಿ. ಅಯಿಂಗ ಪೋಪಕ ಅಯಿಂಗಡ ಕೂಡೆ ಅಬ್ರಹಾಮನು ಅಯಿಂಗಳ ಬುಟ್ಟಿತ್‌ ಬಪ್ಪಕ್‌ ಪೋಚಿ.

¹⁷ಅಕ್ಕ ಯೆಹೋವ: ಅಬ್ರಹಾಮ ಬಲ್ಯ ಶಕ್ತಿವಂತ ಜನಾಂಗಳಾಪನಗುಂಡ್, ಈ ಬೂಮಿಲ್‌ ಉಳ್ಳ ಎಲ್ಲಾ ಜನಾಂಗ ಅಂವೊಂಡ ಮೂಲಕ ಆಶೀರ್ವಾದ ಪೊಂದುವಗುಂಡ್, ನಾನ್‌ ಮಾಡುವಕುಳ್ಳದ್‌ನ ಅಬ್ರಹಾಮಡಿಂಜ ಮುಚ್ಚಿಬೆಕ್ಕಂಡುವಾ?

¹⁹ಯೆಹೋವ ಅಬ್ರಹಾಮಂಗ್‌ ಎಣ್ಣ್‌ನದ್‌ನ ನೆರವೇರಿಚಿಡುವಕಾಯಿತ್‌ ಅಂವೊ ತಾಂಡ ಮಕ್ಕಕು, ಅಂವೊಂಡ ಬಯ್ಯ ಬಪ್ಪ ಅಂವೊಂಡ ಮನೆಕಾರಕು ಇನ್ನನೆ ಎಣ್ಣುವಕ್‌ ಗೊತ್ತ್‌ಮಾಡಿಯೆ: ಅದ್‌ ಎನ್ನನೆ ಎಣ್ಣ್‌ಚೇಂಗಿ, ನಿಂಗ ನೀತಿರ ಪಿಂಞ ನ್ಯಾಯತ್‌ರ ಪ್ರಕಾರ ನಡ್‌ಕಂಡೂಂದ್‌ ಆಜ್ಞೆ ಮಾಡುವಾಂದ್‌ ನಾಕ್‍ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ.

²⁰ಇದಲ್ಲತೆ ಯೆಹೋವ: ಸೊದೋಮ್‌ ಗೊಮೋರತ್‌ರ ಜನ ಬಾರೀ ಮೋಸವಾನಯಿಂಗಾಂದು, ಅಯಿಂಗಡ ಪಾಪ ಬಾರಿ ಕ್ರೂರವಾನದ್‍ೕಂದು ನಾಕ್‍ ಗೊತ್ತಾಚಿ.

²¹ಆನಗುಂಡ್, ನಾನ್‌ ಇಳ್‌ಂಜಿ ಪೋಯಿತ್‌ ನಾನ್‌ ಕ್‍ೕಟ ಕ್‌ಟ್ಟ ಸುದ್ದಿಯೆಲ್ಲ ನೇರಾಂದ್‌ ನೋಟಿತ್‌ ಬಪ್ಪಿ. ಅಕ್ಕ ನಾಕ್‍ ಸತ್ಯ ಗೊತ್ತಾಪಾಂದ್‌ ಎಣ್ಣ್‌ಚಿ.

²²ಅಕ್ಕ ಆ ಆಣಾಳ್‌ವ ಸೊದೋಮ್ರ ಕಡೆಕ್‌ ಪೋಚಿ. ಆಚೇಂಗಿ, ಅಬ್ರಹಾಮ ಇಂಞು ಯೆಹೋವಂಡ ಮಿಂಞತ್‌ ನಿಂದಂಡಿಂಜತ್.

²³ಅಕ್ಕ ಅಬ್ರಹಾಮ ಇಂಞು ಪಕ್ಕ ಬಂದಿತ್: ನೀನ್‌ ದುಷ್ಟಂಗಡ ಕೂಡೆ ನೀತಿವಂತಯಿಂಗಳ ಸಹ ನಾಶ ಮಾಡ್‌ವಿಯಾಂದ್‌ ಕ್‍ೕಟತ್.

²⁴ಒರ್‌ ಸಮಯ ಆ ಪಟ್ಟಣತ್‌ಲ್‌ ಐಂಬದ್‌ ನೀತಿವಂತಯಿಂಗ ಉಂಡೇಂಗಿ, ನಾಶ ಮಾಡ್‌ವಿಯಾ? ನೀನ್‌ ಆ ಐಂಬದ್‌ ಜನಕಾಯಿತ್‌ ಕಾಪಾಡತೆ ಆ ಜಾಗತ್‌ನ ನಾಶ ಮಾಡ್‌ವಿಯಾ?

²⁵ನೀನ್‌ ನೇರಾಯಿತು ದುಷ್ಟಂಗಡ ಕೂಡೆ ನೀತಿವಂತಯಿಂಗಳ ನಾಶ ಮಾಡುಲೆ. ನೀನ್‌ ಎನ್ನನೆ ದುಷ್ಟಂಗಳ ಪಿಂಞ ನೀತಿವಂತಯಿಂಗಳ ಒರೇ ಲೆಕ್ಕತ್‌ ನೋಟ್‌ವಕಯ್ಯು. ನೀನ್‌ ನೇರಾಯಿತು ಅನ್ನನೆ ಮಾಡುಲೆ! ಬೂಮಿರ ನ್ಯಾಯಾದಿಪತಿ ನ್ಯಾಯವಾನದ್‌ನೇ ಮಾಡುವಲ್ಲಾಂದ್‌ ಎಣ್ಣ್‌ಚಿ.

²⁶ಅಕ್ಕ ಯೆಹೋವ: ನಾನ್‌ ಸೊದೋಮ್‌ಲ್‌ ಐಂಬದ್‌ ನೀತಿವಂತಯಿಂಗಳ ಕಂಡತೇಂಗಿ, ಅಯಿಂಗಕಾಯಿತ್‌ ಆ ಇಡೀ ಜಾಗತ್‌ನ ಕಾಪಾಡುವೀಂದ್‌ ಎಣ್ಣ್‌ಚಿ.

²⁷ಅದ್‌ಂಗ್‌ ಅಬ್ರಹಾಮ: ನಾನ್‌ ಬರೀ ದೂಳು ಬೂದಿಯು ಆಯಿತ್‌ಂಜತೇಂಗಿಯು, ಯೆಹೋವಂಡ ಕೂಡೆ ತಕ್ಕ್‌ ಪರಿಯುವಕ್‌ ದೈರ್ಯ ಎಡ್‌ತಿತುಳ್ಳ.

²⁸ಒರ್‌ ಸಮಯ ಬರೀ ನಾಪತಂಜಿ ನೀತಿವಂತಯಿಂಗ ಉಂಡೇಂಗಿ? ಆ ಅಂಜ್ ಜನ ಕಮ್ಮಿ ಆನಂಗ್‌ ಆ ಪಟ್ಟಣತ್‌ನ ನಾಶ ಮಾಡ್‌ವಿಯಾಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ನಾನ್‌ ನಾಪತಂಜಿ ನೀತಿವಂತಯಿಂಗಳ ಅಲ್ಲಿ ಕಂಡತೇಂಗಿ ಆ ಪಟ್ಟಣತ್‌ನ ನಾಶ ಮಾಡುಲೇಂದ್‌ ಎಣ್ಣ್‌ಚಿ.

²⁹ಪುನಃ ಅಬ್ರಹಾಮ ತಾಂಡ ಕೋರಿಕೆನ ಇಟ್ಟಿತ್: ಒರ್‌ ಸಮಯ ಅಲ್ಲಿ ಬರೀ ನಾಪದ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ಆ ನಾಪದ್‌ ನೀತಿವಂತಯಿಂಗಕಾಯಿತ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ.

³⁰ಅಕ್ಕ ಅಬ್ರಹಾಮ: ಯೆಹೋವನೇ, ದಯಬೆಚ್ಚಿತ್‌ ಚೆಡಿಮಾಡಿಯೊತೆ; ಒರ್‌ ಸಮಯ ಅಲ್ಲಿ ಬರೀ ನುಪ್ಪದ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ನಾನ್‌ ನುಪ್ಪದ್‌ ನೀತಿವಂತಯಿಂಗಳ ಅಲ್ಲಿ ಕಂಡತೇಂಗಿ ಆ ಪಟ್ಟಣತ್‌ನ ನಾಶ ಮಾಡುಲೇಂದ್‌ ಎಣ್ಣ್‌ಚಿ.

³¹ಅದ್‌ಂಗ್‌ ಅಬ್ರಹಾಮ: ನಾನ್‌ ಯೆಹೋವಂಡ ಕೂಡೆ ತಕ್ಕ್‌ ಪರಿಯುವಕ್‌ ದೈರ್ಯ ಎಡ್‌ತಂಗ್‌ ತಕ್ಕ್‌ ಪರಿಯುವಿ. ಒರ್‌ ಸಮಯ ಅಲ್ಲಿ ಬರೀ ಇರ್ವದ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ಆ ಇರ್ವದ್‌ ನೀತಿವಂತಯಿಂಗಕಾಯಿತ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ.

³²ಅದ್‌ಂಗ್‌ ಅಬ್ರಹಾಮ: ಯೆಹೋವನೇ, ದಯಬೆಚ್ಚಿತ್‌ ಚೆಡಿಮಾಡಿಯೊತೆ. ಇಂಞು ಒರ್‌ ಕುರಿ ಮಾತ್‌ರ ನಾನ್‌ ತಕ್ಕ್‌ ಪರಿಯುವಿ. ಒರ್‌ ಸಮಯ ಅಲ್ಲಿ ಬರೀ ಪತ್ತ್‌ ನೀತಿವಂತಯಿಂಗ ಉಂಡೇಂಗೀಂದ್‌ ಕ್‍ೕಟತ್. ಅದ್‌ಂಗ್‌ ಯೆಹೋವ: ಆ ಪತ್ತ್‌ ನೀತಿವಂತಯಿಂಗಕಾಯಿತ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ.

³³ಅಬ್ರಹಾಮಂಡ ಕೂಡೆ ತಕ್ಕ್‌ ಪರ್‌ಂದ ಪಿಂಞ ಯೆಹೋವ ತಾಂಡ ಬಟ್ಟೆಲ್‌ ಪೋಚಿ. ಅಬ್ರಹಾಮನು ತಾಂಡ ಗುಡಾರಕ್‌ ತಿರಿತ್‌ ಬಾತ್.