Read Kodava ಆದ್ಯತ್‌ರ ಪುಸ್ತಕ 19 Bible Online

ಆದ್ಯತ್‌ರ ಪುಸ್ತಕ 19 - Kodava bible

ಆದ್ಯತ್‌ರ ಪುಸ್ತಕ 19

¹ಬಯಿಟಾಪಕ ಆ ದಂಡ್‌ ದೂತಂಗಳೂ ಸೊದೋಮ್‌ ಪಟ್ಟಣಕ್‌ ಬಾತ್. ಆ ಸಮಯತ್‌ಲ್‌ ಸೊದೋಮ್‌ ಪಟ್ಟಣತ್‌ರ ಪಡಿರ ಪಕ್ಕ ಲೋಟ ಅಳ್‌ತಂಡಿಂಜತ್. ಅಂವೊ ಅಯಿಂಗಳ ಕಾಂಬಕ ಎದ್ದಿತ್‌ ಅಯಿಂಗಡ ಮಿಂಞತ್‌ ಮಂಡೆ ಬಗ್ಗಿಚಿಟ್ಟಿತ್:

²ಸ್ವಾಮಿಯಳೇ, ದಯಬೆಚ್ಚಿತ್‌ ನಾಡ ಮನೆಕ್‌ ಬಾರಿ. ನಿಂಗಡ ಕಾಲ್‌ನ ಕತ್ತಿತ್, ಇಂದ್‌ ಬಯಿಟ್ ಅಲ್ಲೇ ಒಳಿಂಜಿತ್, ಪೊಲಾಕ ಎದ್ದಿತ್‌ ನಿಂಗಡ ಬಟ್ಟೆಲ್‌ ಪೋಯೀಂದ್‌ ಎಣ್ಣ್‌ಚಿ. ಅದ್‌ಂಗ್‌ ಆ ದೇವದೂತಂಗ: ಇಲ್ಲೆ, ನಂಗ ಪೋಪ ಬಟ್ಟೆಲ್, ಬೀದೀಲ್‌ ಬಯಿಟ್ ಕಯಿಪಾಂದ್‌ ಎಣ್ಣ್‌ಚಿ.

³ಆಚೇಂಗಿ ಲೋಟ ಅಯಿಂಗಳ ದುಂಬ ಒತ್ತಾಯ ಮಾಡ್‌ಚಿ. ಅದ್‌ಂಗ್‌ ಅಯಿಂಗ ಅಂವೊಂಡ ಕೂಡೆ ಅಂವೊಂಡ ಮನೆಕ್‌ ಪೋಚಿ. ಅಂವೊ ಪುಳಿಯಿಲ್ಲತ ಒಟ್ಟಿನ ಕೂಡ ಗದ್ದಾಳ ತಯಾರ್‌ ಮಾಡಿತ್‌ ಅಯಿಂಗಕ್‌ ಕೊಡ್‌ತತ್. ಅಯಿಂಗ ಅದನ ಉಂಡತ್.

⁴ಅಯಿಂಗ ವರ್ವಕ್‌ ಮಿಂಞ, ಸೋದೋಮ್‌ ಪಟ್ಟಣತ್‌ರ ಎಲ್ಲಾ ಬಾಗತ್‌ಂಜ ಬಾಲ್ಯಕಾರ ಮಕ್ಕಯಿಂಜ ಪುಡ್‌ಚಿತ್‌ ವಯಸ್ಸಾನಯಿಂಗಕತ್ತನೆ ಎಲ್ಲಾ ಆಣಾಳ್‌ವಳು ಬಂದಿತ್‌ ಅಂವೊಂಡ ಮನೆರ ಸುತ್ತ್‌ಲ್‌ ನಿಂದತ್.

⁵ಅಯಿಂಗೆಲ್ಲಾರು ಲೋಟನ ಜೋರಾಯಿತ್‌ ಕಾಕಿತ್: ಇಂದ್‌ ಬಯಿಟ್ ನೀಡ ಮನೆಲ್ ಒಳಿಯೊಕ್‌ ಬಂದಿತುಳ್ಳ ಆಣಾಳ್‌ವ ಎಲ್ಲಿ? ಅಯಿಂಗಳ ಪೊರಮೆ ಕಾಕಿಯಂಡ್‌ ಬಾ, ಅಯಿಂಗಡ ಕೂಡೆ ನಂಗ ಬುದ್ದಂಡೂಂದ್‌ ಎಣ್ಣ್‌ಚಿ.

⁶ಅಕ್ಕ ಲೋಟ ಪೊರಮೆ ಬಂದಿತ್‌ ಅಂವೊಂಡ ಬಯ್ಯತ್‌ ಪಡಿನ ಇಟ್ಟಿತ್, ಅಯಿಂಗಡ ಪಕ್ಕ ಪೋಯಿತ್:

⁷ಅಣ್ಣತಮ್ಮಣಂಗಳೇ, ದಯಬೆಚ್ಚಿತ್‌ ಇಂತ ಕ್‍ೕಡಾನ ಕಾರ್ಯತ್‌ನ ಮಾಡತೀಂದ್‌ ಲೋಟ ಅಯಿಂಗಳ ಬೋಡ್‌ಚಿ.

⁸ನೋಟಿ, ಆಣಾಳ್‌ವಡ ಕೂಡ ಬುದ್ದತ ದಂಡ್‌ ಮೂಡಿ ಮಕ್ಕ ನಾಕ್‍ ಉಂಡ್. ಅಯಿಂಗಳ ನಾನ್‌ ಪೊರಮೆ ಕಾಕಿಯಂಡ್‌ ಬಪ್ಪಿ. ನಿಂಗ ಅಯಿಂಗಕ್‌ ಎಂತ ಬೋಂಡಿಯೇಂಗಿಯು ಮಾಡಿ. ಆಚೇಂಗಿ ಈಂಗ ನಾಡ ಬೆಂದ್‌ಕ, ಅಯಿಂಗಳ ನಾನ್‌ ಕಾಪಾಡಂಡು, ಅಯಿಂಗಕ್‌ ಒಂದು ಮಾಡತೀಂದ್‌ ಎಣ್ಣ್‌ಚಿ.

⁹ಅದ್‌ಂಗ್‌ ಅಯಿಂಗ: ನಂಗಕ್‌ ಬಟ್ಟೆ ಬುಡ್. ಇಂವೊ ನಂಗಡಲ್ಲಿಕ್‌ ಪರದೇಶಿಯಾಯಿತ್‌ ಬಾತ್. ಇಕ್ಕ ಇಂವೊ ನಂಗಕ್‌ ನ್ಯಾಯ ತಕ್ಕ್‌ ಪರಿಯುವಕ್‌ ಬಂದಂಡುಂಡ್. ಇಕ್ಕ ಅಯಿಂಗಕ್‌ ಮಾಡುವ ಕ್‍ೕಡ್‌ಕಿಂಜ ನೀಕ್‌ ದುಂಬ ಕ್‍ೕಡ್‌ ಮಾಡ್‌ವಾಂದ್‌ ಎಣ್ಣಿತ್, ಲೋಟನ ತಳ್ಳಿಯಂಡ್‌ ಮನೆರ ಪಡಿನ ಒಡೆಪಕ್‌ ಬಾತ್.

¹⁰ಆಚೇಂಗಿ ಒಳ್‍ಲ್‍ಯಿಂಜ ಆ ದಂಡ್‌ ದೇವದೂತಂಗ ಪೊರಮೆ ಕೈ ನೀಟ್ಟಿತ್, ಲೋಟನ ಒಳ್‌ಕ್‌ ಬಲ್‌ಚಿತ್‌ ಪಡಿನ ಇಟ್ಟತ್.

¹¹ಅದ್‌ಲ್ಲತೆ ಮನೆರ ಪೊರಮೆ ನಿಂದಿತ್‌ಂಜ ಬಾಲ್ಯಕಾರಂಗ ಪಿಂಞ ಬಲ್ಯಯಿಂಗಕ್‌ ಮನೆರ ಪಡಿನ ಕಾಂಗತನೆಕೆ, ಅಯಿಂಗಡ ಕಣ್ಣ್‌ನ ಕುರುಡ್‌ ಮಾಡ್‌ಚಿ.

¹²ಅಕ್ಕ ಆ ದೂತಂಗ ಲೋಟಂಗ್: ಇಲ್ಲಿ ನೀಡ ಜನ ಇಂಞು ದಾರೇಂಗಿ ಉಂಡಾ? ನೀಡ ಮೈಮಂಗ, ಕ್‌ಣ್ಣ ಮಕ್ಕ, ಮೂಡಿ ಮಕ್ಕ ಇಲ್ಲೆ ಇಂಞು ದಾರೇಂಗಿ ಉಂಡಾ? ಅನ್ನನೆ ಇಂಜತೇಂಗಿ ಅಯಿಂಗಳ ಇಕ್ಕಲೆ ಪೊರಮೆ ಕಾಕಿಯಂಡ್‌ ಪೋಂದ್‌ ಎಣ್ಣ್‌ಚಿ.

¹³ಎನ್ನಂಗೆಣ್ಣ್‌ಚೇಂಗಿ, ನಂಗ ಈ ಜಾಗತ್‌ನ ಪೂರ್ತಿಯಾಯಿತ್‌ ನಾಶ ಮಾಡುವ. ಈಂಗಕ್‌ ವಿರೋದವಾಯಿತ್‌ ಬಲ್ಯ ಮೊರೆ ಯೆಹೋವಂಗ್‌ ಮುಟ್ಟ್‌ನಗುಂಡ್‌ ಈಂಗಳ ನಾಶಮಾಡುವಕಾಯಿತ್‌ ನಂಗಳ ಅಯಿಚಿತ್‍ೕಂದ್‌ ಎಣ್ಣ್‌ಚಿ.

¹⁴ಅಕ್ಕ ಲೋಟ ಪೊರಮೆ ಪೋಯಿತ್‌ ತಾಂಡ ಮೂಡಿ ಮಕ್ಕಕ್‌ ಗೊತ್ತ್‌ಮಾಡ್‌ನ ಮೈಮಂಗಡ ಪಕ್ಕ ಪೋಯಿತ್: ನಿಂಗ ಎದ್ದಿತ್‌ ಈ ಜಾಗತ್‌ನ ಬುಟ್ಟಿತ್‌ ಪೋಯಿರಿ. ಯೆಹೋವ ಈ ಪಟ್ಟಣತ್‌ನ ನಾಶಮಾಡ್‌ವಕ್‌ ಉಂಡ್‍ೕಂದ್‌ ಎಣ್ಣ್‌ಚಿ. ಆಚೇಂಗಿ ಅಯಿಂಗ ಲೋಟ ತಮಾಶಿ ಮಾಡಿಯಂಡುಂಡ್‍ೕಂದ್‌ ಗೇನ ಮಾಡ್‌ಚಿ.

¹⁵ಪೊಲಾಕ ಆಪಕ್‌ ಮಿಂಞ ಆ ದೂತಂಗ ಲೋಟಂಗ್: ನೀನ್‌ ಏಳ್, ನೀಡ ಪೊಣ್ಣ್‌ನ ಪಿಂಞ ನೀಡ ದಂಡ್‌ ಮೂಡಿ ಮಕ್ಕಳ ಬೆರಿಯ ಕಾಕಿಯಂಡ್‌ ಪೋ; ಇಲ್ಲತಪೋಚೇಂಗಿ ನೀನೂ ಈ ಪಟ್ಟಣತ್‌ರ ಮೇಲೆ ಬಪ್ಪ ದಂಡನೆಲ್‌ ನಾಶ ಆಯಿ ಪೋಪಿಯಾಂದ್‌ ಎಣ್ಣಿತ್‌ ಅಂವೊನ ಅವಸರ ಪಡ್‌ತ್‌ಚಿ.

¹⁶ಅಂವೊ ತಡಮಾಡ್‌ವಕ ಯೆಹೋವ ಅಯಿಂಗಡ ಮೇಲೆ ಕರುಣೆ ಕಾಟ್‌ನಂಗ್‌ ಆ ದೇವದೂತಂಗ ಅಂವೊಂಡ ಕೈಯಿನ, ಅಂವೊಂಡ ಪೊಣ್ಣ್‌ರ ಕೈಯಿನ, ಅಂವೊಂಡ ದಂಡ್‌ ಮೂಡಿ ಮಕ್ಕಡ ಕೈಯಿನ ಪುಡಿಚಿತ್, ಅಯಿಂಗಳ ಪಟ್ಟಣತ್‌ರ ಪೊರಮೆ ಕಾಕಿಯಂಡ್‌ ಪೋಯಿತ್‌ ಬುಟ್ಟ್‌ರ್‌ತ್.

¹⁷ಅಯಿಂಗಳ ಪೊರಮೆ ಕಾಕಿಯಂಡ ಪೋಯಿತ್‌ ಬುಟ್ಟಿತಾನ ಪಿಂಞ ಒಬ್ಬ ದೇವದೂತ: ನಿಂಗಡ ಪ್ರಾಣತ್‌ನ ಬಚಾವ್‌ ಮಾಡ್‌ವಕಾಯಿತ್‌ ಓಡಿ ಪೋಯಿ. ನಿಂಗ ಬಯ್ಯಕ್‌ ತಿರಿತ್‌ ನೋಟತಿ; ಈ ಸಮತಟ್ಟ್‌ ಬೂಮಿಲ್‌ ಎಲ್ಲಿಯೂ ನಿಕ್ಕತೆ ಕುಂದ್‌ಕ್‌ ಓಡಿಪೋಯಿರಿ. ಇಲ್ಲತಪೋಚೇಂಗಿ ನಿಂಗಳು ನಾಶ ಆಯಿ ಪೋಪಿರಾಂದ್‌ ಎಣ್ಣ್‌ಚಿ.

¹⁸ಅದ್‌ಂಗ್‌ ಲೋಟ: ಅಯ್ಯೋ, ದಯಬೆಚ್ಚಿತ್‌ ಅದ್‌ ಕಯ್ಯುಲೆ ಸ್ವಾಮಿ,

¹⁹ನೀನ್‌ ನಾಡ ಮೇಲೆ ಕರುಣೆ ಕಾಟಿತ್‌ ನಾಡ ಜೀವತ್‌ನ ಬಚಾವ್‌ ಮಾಡ್‌ನದ್‌ ನಾಕ್‍ ಬಲ್ಯ ಸಹಾಯ ಆಚಿ. ಆಚೇಂಗಿ ಆ ಕುಂದ್‌ಕ್‌ ಓಡಿ ಪೋಪಕ್‌ ನಾಕ್‍ ಕಯ್ಯುಲೆ. ಅದ್‌ ಬಾರಿ ದೂರ ಉಂಡ್. ನಾನ್‌ ಅಲ್ಲಿಕ್‌ ಎತ್ತ್‌ವಕ್‌ ಮಿಂಞಲೆ ಈ ಪಟ್ಟಣನಾಶ ಆಪ, ಅನ್ನನೆ ನಾನು ಚತ್ತ್‌ ಪೋಪೀಂದ್‌ ಎಣ್ಣ್‌ಚಿ.

²⁰ನೋಟಿ, ಇಲ್ಲಿ ಪಕ್ಕತ್‌ಲ್‌ ಒರ್‌ ಊರ್‌ ಉಂಡ್. ದಯಬೆಚ್ಚಿತ್‌ ನನ್ನ ಅಲ್ಲಿಕ್‌ ಪೋಪಕ್‌ ಬುಡ್. ಅದ್‌ ಚೆರಿಯದಾಯಿತ್‌ ಉಂಡಲ್ಲ? ನಾಡ ಪ್ರಾಣ ಉಳಿಯುವಾಂದ್‌ ಎಣ್ಣ್‌ಚಿ.

²¹ಅದ್‌ಂಗ್‌ ದೇವದೂತ: ಸರಿ, ನೀನ್‌ ಕ್‍ೕಟನೆಕೆ ಆ ಚೆರಿಯ ಊರ್‌ನ ನಾನ್‌ ನಾಶ ಮಾಡುಲೇಂದ್‌ ಎಣ್ಣ್‌ಚಿ.

²²ಆಚೇಂಗಿ ಬೆರಿಯ ಅಲ್ಲಿಕ್‌ ಓಡಿ ಪೋಯಿತ್‌ ಬಚಾವ್‌ ಮಾಡಿಯ. ನೀನ್‌ ಅಲ್ಲಿ ಎತ್ತ್‌ವಕತ್ತನೆ ನಾನ್‌ ಒಂದು ಮಾಡ್‌ವಕ್‌ ಕಯ್ಯುಲೇಂದ್‌ ಎಣ್ಣ್‌ಚಿ. ಇದ್‌ನಗುಂಡ್‌ ಆ ಊರ್‌ಕ್‌ ಚೋಗಾರ್‌ಂದ್‌ ಪೆದ ಕ್‌ಟ್ಟ್‌ಚಿ.

²³ಲೋಟ ಚೋಗರ್‌ಕ್‌ ಎತ್ತ್‌ವಕ, ಸೂರ್ಯ ಉದಿಚಿತಿಂಜತ್.

²⁴ಅಕ್ಕ ಯೆಹೋವ ಸೊದೋಮ್‌ ಗೊಮೋರತ್‌ರ ಮೇಲೆ ಗಂಧಕ ಪಿಂಞ ತಿತ್ತ್‌ರ ಮಳೆನೆ ಪೊಜ್ಜತ್.

²⁵ಅನ್ನನೆ ಅಲ್ಲಿ ಇಂಜ ಪಟ್ಟಣತ್‌ನೆಲ್ಲಾ, ಸಮತಟ್ಟ್‌ ಬೂಮಿಯೆಲ್ಲಾನ, ಅಲ್ಲಿ ಇಂಜ ಪಟ್ಟಣತ್‌ಲ್‌ ಜೀವಂತವಾಯಿತ್‌ಂಜ ಪ್ರತಿ ಮನುಷ್ಯನ ಪಿಂಞ ಬೂಮಿಲ್‌ ಬೊಳ್‌ಂದ ಬೊಳೆನ ಪೂರ್ತಿಯಾಯಿತ್‌ ನಾಶಮಾಡ್‌ಚಿ.

²⁶ಆಚೇಂಗಿ ಲೋಟಂಡ ಪೊಣ್ಣ್‌ ಅಂವೊಂಡ ಬೆಂಬರತ್‌ಲ್‌ ಬಂದಂಡಿಪ್ಪಕ ತಿರಿತ್‌ ನೋಟ್‌ನಂಗ್‌ ಅವ ಉಪ್ಪುರ ಕಂಬ ಆಚಿ.

²⁷ಪೊಲಾಕ ಅಬ್ರಹಾಮ ಬೆರಿಯ ಎದ್ದಿತ್‌ ತಾನ್‌ ಯೆಹೋವಂಡ ಮಿಂಞತ್‌ ನಿಂದ ಜಾಗಕ್‌ ಪುನಃ ಪೋಯಿತ್,

²⁸ಸೊದೋಮ್‌ ಗೊಮೋರ ಪಟ್ಟಣತ್‌ರ ಕಡೆಕು ಪಿಂಞ ಎಲ್ಲಾ ಸಮತಟ್ಟ್‌ ಬೂಮಿರ ಕಡೆಕು ನೋಟ್‌ವಕ, ಒರ್‌ ಪೊಗೆ ಕೊಳಪೆಯಿಂಜ ಬಪ್ಪ ಪೊಗೆರನೆಕೆ ಆ ಪಟ್ಟಣತ್‌ಂಜ ಪೊಗೆ ಬಪ್ಪದ್‌ನ ಕಂಡತ್.

²⁹ಆಚೇಂಗಿ, ಯೆಹೋವ ಆ ಸಮತಟ್ಟ್‌ ಬೂಮಿಲ್‌ ಉಳ್ಳ ಪಟ್ಟಣತ್‌ನೆಲ್ಲಾ ನಾಶಮಾಡುವಕ ಅಬ್ರಹಾಮಂಡ ಕೋರಿಕೆನ ಗೇನಮಾಡಿತ್, ಲೋಟ ವಾಸಮಾಡಿಯಂಡಿಂಜ ಪಟ್ಟಣಂಗಕ್‌ ಬಂದ ಕ್‍ೕಡಿಂಜ ಲೋಟ ತಪ್ಪಿಚಿಡ್‌ವನೆಕೆ ಅಂವೊನ ಅಯಿಚಿರ್‌ತ್.

³⁰ಪಂಞ ಲೋಟ ಚೋಗರ್‌ ಪಟ್ಟಣತ್‌ಲ್‌ ವಾಸಮಾಡ್‌ವಕ್‌ ಪೋಡಿಚಿಟ್ಟಂಡ್‌ ತಾಂಡ ದಂಡ್‌ ಮೂಡಿಮಕ್ಕಳ ಕಾಕಿಯಂಡ್‌ ಕುಂದ್‌ಲ್‌ ಉಳ್ಳ ಗುವೆಲ್‌ ವಾಸಮಾಡ್‌ಚಿ.

³¹ಇನ್ನನೆ ಇಪ್ಪಕ ಒರ್‌ ದಿವಸ ಲೋಟಂಡ ಪೆರಿಯ ಮೋವ ತಾಂಡ ತಂಗೆರ ಪಕ್ಕ: ನಂಗಡ ಅಪ್ಪಂಗ್‌ ದುಂಬ ವಯಸ್ಸಾಚಿ. ಈ ಲೋಕತ್‌ಲ್‌ ಎಲ್ಲೆಲ್ಲು ನಡ್‌ಪ ಪದ್ದತಿರ ಪ್ರಕಾರ ನಂಗಳ ಮಂಗಲ ಕಯಿಪಕ್‌ ಈ ಜಾಗತ್‌ಲ್‌ ಒರ್‌ ಆಣಾಳ್‌ ಸಹ ಇಲ್ಲೆ.

³²ಬಾ, ನಂಗ ಅಪ್ಪಂಗ್‌ ಕಳ್ಳ್ ಕುಡಿಪ್‌ಚಿಟ್ಟಿತ್‌ ಅಂವೊಂಡ ಕೂಡೆ ಬುದ್ದೋನ. ಅಕ್ಕ ನಂಗಕ್‌ ಮಕ್ಕ ಆಯಿತ್‌ ಅಪ್ಪನಗುಂಡ್‌ ಸಂತಾನತ್‌ನ ಉಳಿಚಿಡನಾಂದ್‌ ಎಣ್ಣ್‌ಚಿ.

³³ಆ ಬಯಿಟ್ ಅಯಿಂಗಡ ಅಪ್ಪಂಗ್‌ ಕಳ್ಳ್ ಕುಡಿಪ್‌ಚಿಟ್ಟಿತ್‌ ಪೆರಿಯ ಮೋವ ಅಂವೊಂಡ ಕೂಡೆ ಬುದ್ದಂಡತ್. ಅವ ಎಕ್ಕ ಬುದ್ದಂಡತೋ ಎಕ್ಕ ಎದ್ದಿತ್‌ ಪೋಚೋ ಅಂವೊಂಗ್‌ ಒಂದೂ ಗೊತ್ತಾಯಿತ್‌ಲ್ಲೆ.

³⁴ಪಿತ್ತಿಯಾಂದ್‌ ಪೆರಿಯವ ಚೆರಿಯವಕ್: ನಿನ್ನಾಂದ್‌ ಬಯಿಟ್ ನಾನ್‌ ಅಪ್ಪಂಡ ಕೂಡೆ ಬುದ್ದಿಯೆ. ಇಂದ್‌ ಬಯಿಟ್ ಅಂವೊಂಗ್‌ ಕಳ್ಳ್ ಕುಡಿಪ್‌ಚಿಡನ. ಅಲ್ಲಿಂಜ ನೀನ್‌ ಅಂವೊಂಡ ಕೂಡೆ ಪೋಯಿತ್‌ ಬುದ್ದ; ಇನ್ನನೆ ನಂಗಡ ಅಪ್ಪನಗುಂಡ್‌ ನಂಗಡ ಸಂತಾನತ್‌ನ ಉಳಿಚಿಡಂಗಾಂದ್‌ ಎಣ್ಣ್‌ಚಿ.

³⁵ಅಂದ್‌ ಬಯಿಟ್ ಅಯಿಂಗಡ ಅಪ್ಪಂಗ್‌ ಕಳ್ಳ್ ಕುಡಿಪ್‌ಚಿಟ್ಟಪಿಂಞ ಚೆರಿಯವ ಅಂವೊಂಡ ಕೂಡೆ ಬುದ್ದಂಡತ್. ಪುನಃ ಅವ ಎಕ್ಕ ಬುದ್ದಂಡತೋ ಎಕ್ಕ ಎದ್ದಿತ್‌ ಪೋಚೋ ಅಂವೊಂಗ್‌ ಒಂದೂ ಗೊತ್ತಾಯಿತ್‌ಲ್ಲೆ.

³⁶ಇನ್ನನೆ ಲೋಟಂಡ ಮೂಡಿ ಮಕ್ಕ ದಂಡಾಳು ತಂಗಡ ಅಪ್ಪಂಡಗುಂಡ್‌ ಕೆಲಕಾರ್ತಿಯಾಚಿ.

³⁷ಪೆರಿಯವ ಒರ್‌ ಕ್‌ಣ್ಣ ಕುಂಞನ ಪೆತ್ತಿತ್‌ ಅಂವೊಂಗ್‌ [14]ಮೋವಾಬ್ಂದ್‌ ಪೆದ ಬೆಚ್ಚತ್. ಇಲ್ಲಿಕತ್ತನೆ ಮೋವಾಬ್ಯರಯಿಂಗಕ್‌ ಇಂವೊನೇ ಕಾರೋಣ.

³⁸ಚೆರಿಯವ ಸಹ ಒರ್‌ ಕ್‌ಣ್ಣ ಕುಂಞಿನ ಪೆತ್ತಿತ್, ಅಂವೊಂಗ್‌ [15]ಬೆನಮ್ಮಿಂದ್‌ ಪೆದ ಬೆಚ್ಚತ್. ಇಲ್ಲಿಕತ್ತನೆ ಅಮ್ಮೋನ್ಯರಯಿಂಗಕ್‌ ಇಂವೊನೇ ಕಾರೋಣ.