Read Kodava ಆದ್ಯತ್‌ರ ಪುಸ್ತಕ 21 Bible Online

ಆದ್ಯತ್‌ರ ಪುಸ್ತಕ 21 - Kodava bible

ಆದ್ಯತ್‌ರ ಪುಸ್ತಕ 21

¹ಯೆಹೋವ ಎಣ್ಣ್‌ನನೆಕೆ ಅಂವೊ ಸಾರಳಡ ಮೇಲೆ ಕನಿಕರ ಕಾಟ್‌ಚಿ. ಯೆಹೋವ ಅವಕ್‌ ಕೊಡ್‌ತ ತಕ್ಕ್‌ನ ನೆರವೇರಿಚಿಟ್ಟತ್.

²ಅಬ್ರಹಾಮ ವಯಸ್ಸಾಯಿತ್‌ಪ್ಪಕ ಸಾರಳ ಕುಳುಮೆಕಾರ್ತಿಯಾಯಿತ್, ಯೆಹೋವನಾನ ದೇವ ನೇಮಿಚಿಟ್ಟ ಕಾಲತ್‌ಲ್‌ ಒರ್‌ ಕ್‌ಣ್ಣ ಕುಂಞಿನ ಪೆತ್ತ್‌ತ್.

³ಅಕ್ಕ ಅಬ್ರಹಾಮ, ಸಾರಳ ಅಂವೊಂಗ್‌ ಪೆತ್ತ ಮೋಂವೊಂಗ್‌ ಇಸಾಕಾಂದ್‌ ಪೆದ ಬೆಚ್ಚತ್.

⁴ತಾಂಡ ಮೋಂವೊನಾನ ಇಸಾಕ ಪುಟ್ಟ್‌ನ ಎಟ್ಟನೇ ದಿವಸತ್, ಅಬ್ರಹಾಮ ದೇವ ಅಂವೊಂಗ್‌ ಆಜ್ಞೆ ಮಾಡ್‌ನ ಪ್ರಕಾರ, ಇಸಾಕಂಗ್‌ ಸುನ್ನತಿ ಮಾಡ್‌ಚಿ.

⁵ತಾಂಡ ಮೋಂವೊನಾನ ಇಸಾಕ ಪುಟ್ಟ್‌ವಕ ಅಬ್ರಹಾಮಂಗ್‌ ನೂರ್‌ ವಯಸ್ ಆಯಿತ್‌ಂಜತ್.

⁶ಅಕ್ಕ ಸಾರಳ: ದೇವ ನನ್ನ ಕುಶಿಲ್‌ ತೆಳಿಪನೆಕೆ ಮಾಡ್‌ಚಿ. ಈ ವಿಷಯತ್‌ನ ಕ್‍ೕಪಯಿಂಗೆಲ್ಲ ನಾಡ ಕೂಡೆ ಕುಶಿಲ್‌ ತೆಳಿಪ.

⁷ಸಾರಳು ಮಕ್ಕಕ್‌ ಮೊಲೆಪಾಲ್‌ ಕೊಡ್‌ಪಾಂದ್‌ ಅಬ್ರಹಾಮಂಗ್‌ ದಾರೇಂಗಿ ಎಣ್ಣ್‌ವಕ್‌ ಸಾದ್ಯತೆ ಇಂಜತಾ? ಆಚೇಂಗಿಯು ಅಬ್ರಹಾಮಂಡ ವಯಸ್ಸಾನ ಕಾಲತ್‌ಲ್‌ ಒರ್‌ ಮೋಂವೊನ ಪೆತ್ತ್‌ ಕೊಡ್‌ತಿಯೇಂದ್‌ ಎಣ್ಣ್‌ಚಿ.

⁸ಆ ಕುಂಞಿ ಬೊಳ್‌ಂದಿತ್‌ ಮೊಲೆಕುಡಿಪದ್‌ನ ಬುಟ್ಟತ್. ಆ ದಿವಸತ್‌ಲ್‌ ಅಬ್ರಹಾಮ ಬಲ್ಯ ಗದ್ದಾಳ ಮಾಡ್‌ಚಿ.

⁹ಒರ್‌ ದಿವಸ, ಐಗುಪ್ತ ದೇಶಕ್‌ ಕೂಡ್‌ನ ಹಾಗರ ಅಬ್ರಹಾಮಂಗ್‌ ಪೆತ್ತ ಮೋಂವೊ ಹೀಯಾಳ್‌ಚಿಡ್‌ವದ್‌ನ ಸಾರಳ ಕಂಡಿತ್,

¹⁰ಅಬ್ರಹಾಮನ ನೋಟಿತ್: ಆ ಪಣಿಕಾರ್ತಿನ ಪಿಂಞ ಅವಡ ಮೋಂವೊನ ಇಲ್ಲಿಂಜ ಓಡ್‌ಚಿಡ್. ಅವಡ ಮೋಂವೊ ಏದ್‌ ಕಾಲಕು ನಾಡ ಮೋಂವೊ ಇಸಾಕಂಡ ಕೂಡೆ ಬಾದ್ಯತೆಕಾರನಾತಿಪ್ಪಲೇಂದ್‌ ಎಣ್ಣ್‌ಚಿ.

¹¹ತಾಂಡ ಮೋಂವೊಂಡ ವಿಷಯತ್‌ ಎಣ್ಣ್‌ನ ಈ ಕಾರ್ಯ ಅಬ್ರಹಾಮನ ದುಂಬ ಬೇಜಾರ್‌ ಮಾಡ್‌ಚಿ.

¹²ಆಚೇಂಗಿ ದೇವ ಅಂವೊಂಗ್: ನೀನ್‌ ಆ ಮೋಂವೊಂಡ ಪಿಂಞ ಆ ಪಣಿಕಾರ್ತಿರ ವಿಷಯತ್‌ ಬೇಜಾರ್‌ ಮಾಡಂಡ. ನೀಡ ಮೋಂವೊ ಇಸಾಕಂಡ ಮೂಲಕ ಪುಟ್ಟ್‌ವಯಿಂಗಳೇ ನೀಡ ಸಂತಾನಕ್‌ ಲೆಕ್ಕ ಆಪ. ಆನಗುಂಡ್‌ ಸಾರಳ ಎಣ್ಣ್‌ವನೆಕೆ ಮಾಡ್‍ೕಂದ್‌ ಎಣ್ಣ್‌ಚಿ.

¹³ಹಾಗರಂಡ ಮೋಂವೊನು ನೀಡ ಮೋಂವೊ ಆನಂಗ್, ಅಂವೊಂಡ ಸಂತಾನತ್‌ನ ಸಹ ನಾನ್‌ ಬಲ್ಯ ಜನಾಂಗವಾಯಿತ್‌ ಮಾಡ್‌ವೀಂದ್‌ ಎಣ್ಣ್‌ಚಿ.

¹⁴ಪಿತ್ಯಾಂದ್‌ ಪೊಲಾಕ ಅಬ್ರಹಾಮ ಬೆರಿಯ ಎದ್ದಿತ್, ಚೆನ್ನ ಆಹಾರ ಪಿಂಞ ಒರ್‌ ಚರ್ಮತ್‌ಲ್‌ ಮಾಡ್‌ನ ಚೀಲತ್‌ ನೀರ್‌ನ ಎಡ್‌ತಿತ್‌ ಹಾಗರಂಡ ನಿಪ್ಪ್‌ಕ್‌ ಕೆಟ್ಟಿತ್, ಅವಡ ಮೋಂವೊನ ಸಹ ಅವಡ ಪಕ್ಕ ಒಪ್ಪ್‌ಚಿಟ್ಟಿತ್‌ ಅವಳ ಅಯಿಚಿ ಕೊಡ್‌ತತ್. ಅವ ಅಲ್ಲಿಂಜ ಪೋಯಿತ್‌ ಬೇರ್ಷೆಬ ಎಣ್ಣುವ ಮಣಬೂಮಿಲ್‌ ತಿರ್‌ಗಾಡ್‌ಚಿ.

¹⁵ಚರ್ಮತ್‌ಲ್‌ ಮಾಡ್‌ನ ಚೀಲತ್‌ಲ್‌ ಇಂಜ ನೀರ್‌ ತ್‍ೕಂದದು, ಅವಡ ಮೋಂವೊನ ಒರ್‌ ಪೊದೆರ ನಳತ್‌ ಇಟ್ಟಿತ್:

¹⁶ಈ ಕುಂಞಿ ಚಾವದ್‌ನ ನಾನ್‌ ನೋಟೊಕಯ್ಯುಲೇಂದ್‌ ಚೆನ್ನ ದೂರತ್‌ಲ್‌ ಪೋಯಿತ್‌ ಅಳ್‌ತಿತ್‌ ಜೋರಾಯಿತ್‌ ಮೊರ್‌ಟತ್.

¹⁷ಆ ಕ್‌ಣ್ಣಂಡ ಮೊರೆನ ದೇವ ಕ್‍ೕಟತ್. ದೇವದೂತ ಬಾನತ್‌ಂಜ ಹಾಗರನ ಕಾಕಿತ್: ಹಾಗರಳೇ, ನೀಕ್‌ ಎಂತ ಆಚಿ? ಬೊತ್ತತೆ, ಆ ಕ್‌ಣ್ಣ ಬುದ್ದಂಡಲ್ಲಿಂಜ ಮೊರ್‌ಡೊದ್‌ನ ದೇವ ಕ್‍ೕಟತ್.

¹⁸ನೀನ್‌ ಎದ್ದಿತ್‌ ಅಂವೊನ ಸಮಾದಾನ ಮಾಡ್. ನಾನ್‌ ಅಂವೊನ ಬಲ್ಯ ಜನಾಂಗವಾಯಿತ್‌ ಮಾಡ್‌ವೀಂದ್‌ ಎಣ್ಣ್‌ಚಿ.

¹⁹ದೇವ ಅವಡ ಕಣ್ಣ್‌ನ ತೊರ್‌ಂದತ್. ಅಕ್ಕ ಅವ ಅಲ್ಲಿ ಒರ್‌ ಕಣತರೆನ ಕಂಡಿತ್, ಅವ ಪೋಯಿತ್‌ ಚರ್ಮತ್‌ರ ಚೀಲತ್‌ಲ್‌ ನೀರ್‌ನ ತುಂಬಿಚಿಟ್ಟಂಡ್‌ ಬಂತ್‌ ಆ ಕ್‌ಣ್ಣಂಗ್‌ ಕುಡಿಪಕ್‌ ಕೊಡ್‌ತತ್.

²⁰ದೇವ ಆ ಕ್‌ಣ್ಣಂಡ ಕೂಡೆ ಇಂಜತ್. ಅಂವೊ ಬೊಳ್‌ಂದಿತ್, ಮಣಬೂಮಿಲ್‌ ವಾಸಮಾಡಿತ್‌ ಸಾಮರ್ಥ್ಯನಾನ ಬಿಲ್ಲ್‌ಕಾರನಾಚಿ.

²¹ಅಂವೊ ಪಾರಾನ ಎಣ್ಣುವ ಮಣಬೂಮಿಲ್‌ ವಾಸ ಮಾಡಿಯಂಡಿಪ್ಪಕ, ಅಂವೊಂಡ ಅವ್ವ ಐಗುಪ್ತ ದೇಶಕ್‌ ಕೂಡ್‌ನ ಒರ್‌ ಮೂಡಿನ ಅಂವೊಂಗ್‌ ಮಂಗಲ ಕಯಿಚತ್.

²²ಒರ್‌ ದಿವಸ ಅಬೀಮೆಲೆಕನು, ಅಂವೊಂಡ ಸೇನಾದಿಪತಿಯಾನ ಫೀಕೋಲ ಎಣ್ಣುವಂವೊನು ಅಬ್ರಹಾಮನ ನೋಟಿತ್: ನೀನ್‌ ಮಾಡ್‌ವ ಎಲ್ಲಾ ವಿಷಯತ್‌ಲು ದೇವ ನೀಡ ಕೂಡೆ ಉಂಡ್.

²³ಆನಗುಂಡ್‌ ನೀನ್‌ ನಾಕು, ನಾಡ ಮೋಂವೊಂಗು ಪಿಂಞ ನಾಡ ಸಂದಾನಕು ಅನ್ಯಾಯ ಮಾಡತೆ. ನಾನ್‌ ನೀಕ್‌ ದಯೆ ಮಾಡ್‌ನನೆಕೆ, ನೀನ್‌ ನಾಕು, ನೀನ್‌ ಮಾಸಮಾಡಿಯಂಡುಳ್ಳ ಈ ದೇಶಕು, ದಯೆ ಮಾಡ್‌ವಿಯಾಂದ್‌ ಇಲ್ಲಿ ದೇವಡ ಪೆದತ್‌ಲ್‌ ನಾಕ್‍ ಆಣೆ ಮಾಡ್‍ೕಂದ್‌ ಎಣ್ಣ್‌ಚಿ.

²⁴ಅದ್‌ಂಗ್‌ ಅಬ್ರಹಾಮ: ಅನ್ನನೆ ಆಣೆ ಮಾಡ್‌ವೀಂದ್‌ ಎಣ್ಣ್‌ಚಿ.

²⁵ಅಕ್ಕ ಅಬ್ರಹಾಮ ಅಬೀಮೆಲೆಕಂಡ ಆಳ್‌ವ ಕಣತರೆನ ಒತ್ತಾಯ ಮಾಡಿತ್‌ ಅಯಿಂಗಕ್‌ ಸ್ವಂತವಾಯಿತ್‌ ಮಾಡಿಯಂಡ ವಿಷಯತ್‌ನ ಪುಕಾರ್‌ ಎಣ್ಣ್‌ಚಿ.

²⁶ಅದ್‌ಂಗ್‌ ಅಬೀಮೆಲೆಕ: ಈ ಕಾರ್ಯತ್‌ನ ದಾರ್‌ ಮಾಡಿಯೇಂದ್‌ ನಾಕ್‍ ಗೊತ್ತ್‌ಲ್ಲೆ. ನೀನ್‌ ಸಹ ಈ ವಿಷಯತ್‌ನ ಮಿಂಞಲೇ ನಾಕ್‍ ಎಣ್ಣಿತ್‌ಲ್ಲೆ. ಇಂದ್‌ಕತ್ತನೆ ಈ ವಿಷಯತ್‌ನ ನಾನ್‌ ಕ್‍ೕಟಿತೇ ಇಲ್ಲೇಂದ್‌ ಎಣ್ಣ್‌ಚಿ.

²⁷ಅಕ್ಕ ಅಬ್ರಹಾಮ ಎತ್ತ್‌ಕಡ್‌ಚಿಯಳ ಎಡ್‌ತಂಡ್‌ ಬಂತ್‌ ಅಬೀಮೆಲೆಕಂಗ್‌ ಕೊಡ್‌ತತ್. ಇನ್ನನೆ ಅಯಿಂಗ ದಂಡಾಳು ಒಪ್ಪಂದ ಮಾಡಿಯಂಡತ್.

²⁸ಅಲ್ಲಿಂಜ ಅಬ್ರಹಾಮ ಕೊರಿಯಡ ಗುಡ್ಡೆಯಿಂಜ ಏಳ್‌ ಪೊಣ್ಣ್‌ ಕೊರಿಯಳ ಬೋರೆ ಬೆಚ್ಚತ್.

²⁹ಅಕ್ಕ ಅಬೀಮೆಲೆಕ: ನೀನ್‌ ಎನ್ನಂಗ್‌ ಈ ಏಳ್‌ ಚಿಪ್ಪಿ ಪೊಣ್ಣ್‌ ಕೊರಿಯಳ ಬೋರೆಯಾಯಿತ್‌ ನಿಪ್ಪಿಚಿಟ್ಟಿಯಾಂದ್‌ ಕ್‍ೕಟತ್.

³⁰ಅದ್‌ಂಗ್‌ ಅಬ್ರಹಾಮ: ಈ ಕಣತರೆನ ತೋಡ್‌ಚಿಟ್ಟಂವೊ ನಾನೇಂದ್‌ ಎಣ್ಣ್‌ವಕ್‌ ಸಾಕ್ಷಿಯಾಯಿತ್‌ ಈ ಏಳ್‌ ಪೊಣ್ಣ್‌ ಕೊರಿಯಳ ನಾಡ ಕೈಯಿಂಜ ನೀನ್‌ ದಯೆಬೆಚ್ಚಿತ್‌ ಎಡ್‌ತ್ತಾಂದ್‌ ಎಣ್ಣ್‌ಚಿ.

³¹ಅಯಿಂಗ ದಂಡಾಳು ಅಲ್ಲಿಯೇ ಆಣೆ ಮಾಡ್‌ನಗುಂಡ್‌ ಆ ಜಾಗಕ್‌ ಬೇರ್ಷಬ[16] ಎಣ್ಣಿಯಂಡ್‌ ಪೆದ ಬಾತ್.

³²ಬೇರ್ಷಬತ್‌ಲ್‌ ಅಯಿಂಗ ಒಪ್ಪಂದತ್‌ನ ಮಾಡಿತಾನದು, ಅಬೀಮೆಲೆಕ ಪಿಂಞ ಅಂವೊಂಡ ಸೇನಾದಿಪತಿಯಾನ ಫೀಕೋಲ ಎದ್ದಿತ್‌ ಫಿಲಿಷ್ಟಿಯ ಜನತ್‌ರ ದೇಶಕ್‌ ಪುನಃ ಪೊರಟ್ ಪೋಚಿ.

³³ಅಬ್ರಹಾಮ ಬೆರ್ಷೆಬತ್‌ಲ್‌ ಒರ್‌ ವಿಶೇಷವಾನ ಮರತ್‌ನ ನೆಟ್ಟಿತ್, ಕಾಲಕಾಲಕು ಇಪ್ಪ ಯೆಹೋವನಾನ ದೇವನ ಆರಾದನೆ ಮಾಡ್‌ಚಿ.

³⁴ಪಿಂಞ ಅಬ್ರಹಾಮ ಸುಮಾರ್‌ ಕಾಲ ಫಿಲಿಷ್ಟಿಯರಡ ದೇಶತ್‌ಲ್‌ ವಾಸ ಮಾಡ್‌ಚಿ.