Read Kodava ಆದ್ಯತ್‌ರ ಪುಸ್ತಕ 22 Bible Online

ಆದ್ಯತ್‌ರ ಪುಸ್ತಕ 22 - Kodava bible

ಆದ್ಯತ್‌ರ ಪುಸ್ತಕ 22

¹ಈ ಕಾರ್ಯಯೆಲ್ಲ ಆನ ಪಿಂಞ, ದೇವ ಅಬ್ರಹಾಮಂಡ ನಂಬಿಕೆನ ಪರೀಕ್ಷೆ ಮಾಡ್‌ಚಿ; ಅದ್‌ ಎನ್ನನೆ ಎಣ್ಣ್‌ಚೇಂಗಿ, ದೇವ: ಅಬ್ರಹಾಮನೇಂದ್‌ ಕಾಕ್‌ಚಿ. ಅದ್‌ಂಗ್‌ ಅಬ್ರಹಾಮ: ಅಕ್ಕು, ನಾನ್‌ ಇಲ್ಲಿಯೇ ಉಳ್ಳಂದ್‌ ಎಣ್ಣ್‌ಚಿ.

²ಅಕ್ಕ ದೇವ: ನೀಡ ಒರೇ ಮೋಂವೊನ, ಅಕ್ಕು, ನೀನ್‌ ದುಂಬ ಪ್ರೀತಿ ಮಾಡುವ ಇಸಾಕನ ಮೊರಿಯ ಎಣ್ಣುವ ದೇಶಕ್‌ ಕಾಕಿಯಂಡ್‌ ಪೋ. ಅಲ್ಲಿ ನಾನ್‌ ನೀಕ್‌ ಎಣ್ಣ್‌ವ ಒರ್‌ ಕುಂದ್ರ ಮೇಲೆ ಅಂವೊನ ದಹನ ಬಲಿಯಾಯಿತ್‌ ಅರ್ಪಿಚಿಡಂಡೂಂದ್‌ ಎಣ್ಣ್‌ಚಿ.

³ಅಕ್ಕ ಅಬ್ರಹಾಮ ಪೊಲಾಕ ಬೆರಿಯ ಎದ್ದಿತ್, ತಾಂಡ ಕತ್ತೆರ ಮೇಲೆ ಸಾಮಾನತ್‌ನ ಕೆಟ್ಟಿತ್, ತಾಂಡ ಕೂಡೆ ದಂಡ್‌ ಆಳ್‌ವಳ ಪಿಂಞ ಇಸಾಕನ ಕಾಕಿಯಂಡ್, ಅಲ್ಲಿಂಜ ದಹನ ಬಲಿಕ್‌ ಪುಳ್ಳಿನ ತುಂಡ್‌ ಮಾಡಿಯಂಡ್‌ ದೇವ ಎಣ್ಣ್‌ನ ಜಾಗಕ್‌ ಪೊರ್‌ಟತ್.

⁴ಅಯಿಂಗ ಪ್ರಯಾಣ ಮಾಡ್‌ನ ಮೂಂದ್‌ನೆ ದಿವಸತ್‌ಲ್‌ ಅಬ್ರಹಾಮ ಕಣ್ಣೆಡ್‌ತಿತ್‌ ನೋಟಿತ್‌ ದೂರತ್‌ಲ್‌ ಆ ಜಾಗತ್‌ನ ಕಂಡತ್.

⁵ಅಕ್ಕ ಅಬ್ರಹಾಮ ತಾಂಡ ಆಳ್‌ವಳ ನೋಟಿತ್: ನಿಂಗ ಕತ್ತೆರ ಕೂಡೆ ಇಲ್ಲಿಯೇ ಇರಿ. ನಾನು, ನಾಡ ಮೋಂವೊನು ಆ ಜಾಗಕ್‌ ಪೋಯಿತ್‌ ಆರಾದನೆ ಮಾಡಿತ್‌ ತಿರಿತ್‌ ನಿಂಗಡ ಪಕ್ಕ ಬಪ್ಪಾಂದ್‌ ಎಣ್ಣ್‌ಚಿ.

⁶ಅಕ್ಕ ಅಬ್ರಹಾಮ ದಹನ ಬಲಿಕ್‌ ಬೋಂಡಿಯಾನ ಪುಳ್ಳಿನ ತಾಂಡ ಮೋಂವೊ ಇಸಾಕಂಡ ಮೇಲೆ ಬೆಚ್ಚಿತ್, ತಾಂಡ ಕೈಯಿಲ್‌ ತಿತ್ತ್‌ನ ಪಿಂಞ ಕತ್ತಿನ ಪುಡಿಚ್ಚಂಡ್‌ ದಂಡಾಳು ಒಕ್ಕಚೆ ಪೊರ್‌ಟತ್.

⁷ಅಕ್ಕ ಇಸಾಕ ತಾಂಡ ಅಪ್ಪನಾನ ಅಬ್ರಹಾಮನ ನೋಟಿತ್: ಅಪ್ಪನೇಂದ್‌ ಕಾಕ್‌ಚಿ. ಅದ್‌ಂಗ್‌ ಅಬ್ರಹಾಮ: ಎಂತ ಮೋಂವೊನೇಂದ್‌ ಕ್‍ೕಟತ್. ಅಕ್ಕ ಇಸಾಕ: ಇದಾ, ನಂಗಡ ಪಕ್ಕ ತಿತ್ತ್‌ ಪಿಂಞ ಪುಳ್ಳಿ ಉಂಡ್, ಆಚೇಂಗಿ ದಹನ ಬಲಿಕ್‌ ಕೊರಿ ಎಲ್ಲಿ ಉಂಡ್‍ೕಂದ್‌ ಕ್‍ೕಟತ್.

⁸ಅದ್‌ಂಗ್‌ ಅಬ್ರಹಾಮ: ನಾಡ ಮೋನೇ, ದೇವ ತಾನೆ ದಹನ ಬಲಿಕ್‌ ಬೋಂಡಿಯಾನ ಕೊರಿನ ನಂಗಕ್‌ ತಪ್ಪಾಂದ್‌ ಎಣ್ಣ್‌ಚಿ; ಪಿಂಞ ದಂಡಾಳು ಒಕ್ಕಚೆ ಪೋಯಿತ್,

⁹ದೇವ ಎಣ್ಣ್‌ನ ಜಾಗಕ್‌ ಎತ್ತ್‌ಚಿ. ಅಲ್ಲಿ ಅಬ್ರಹಾಮ ಒರ್‌ ಬಲಿಪೀಠತ್‌ನ ತಯಾರ್‌ ಮಾಡಿತ್, ಪುಳ್ಳಿನ ಅಡ್‌ಕಿತ್, ತಾಂಡ ಮೋಂವೊನಾನ ಇಸಾಕಂಡ ಕೈಕಾಲ್‌ನ ಕೆಟ್ಟಿತ್, ಅಂವೊನ ಬಲಿಪೀಠತ್‌ರ ಮೇಲೆ ಇಟ್ಟತ್.

¹⁰ಪಿಂಞ ಅಬ್ರಹಾಮ ತಾಂಡ ಮೋಂವೊನ ಕೆತ್ತ್‌ವಕಾಯಿತ್‌ ತಾಂಡ ಕೈಯಿನ ನ್‍ೕಟಿತ್, ಕತ್ತಿನ ಎಡ್‍ತತ್.

¹¹ಅಕ್ಕ ಯೆಹೋವಂಡ ದೂತ ಪರಲೋಕತ್‌ಂಜ: ಅಬ್ರಹಾಮನೇ, ಅಬ್ರಹಾಮನೇಂದ್‌ ಕಾಕ್‌ಚಿ. ಅಕ್ಕ ಅಂವೊ: ನಾನ್‌ ಇಲ್ಲಿಯೇ ಉಳ್ಳಂದ್‌ ಜವಾಬ್ ಕೊಡ್‌ತತ್.

¹²ಆ ದೂತ ಅಂವೊಂಗ್: ನೀಡ ಮೋಂವೊಂಡ ಮೇಲೆ ಕೈ ಇಡತೆ. ಅಂವೊನ ಒಂದು ಮಾಡತೆ; ನೀನ್‌ ಅಂವೊನ ನೀಡ ಮೋಂವೋಂದ್, ನೀಡ ಒರೇ ಮೋಂವೋಂದ್‌ ಸಹ ನೋಟತೆ, ನಾಕಾಯಿತ್‌ ಬಲಿಕೊಡ್‌ಪಕ್‌ ಒಪ್ಪಿಚಿಟ್ಟಗುಂಡ್, ನೀನ್‌ ಯೆಹೋವಂಗ್‌ ಬೊತ್ತ್‌ವಿಯಾಂದ್‌ ಇಕ್ಕ ನಾಕ್‍ ಗೊತ್ತಾಚಿ.

¹³ಅಬ್ರಹಾಮ ಕಣ್ಣೆಡ್‌ತಿತ್‌ ನೋಟ್‌ವಕ ತಾಂಡ ಬೆಂಬರತ್‌ಲ್, ತಾಂಡ ಕೊಂಬ್ ಪೊದೆಲ್‌ ಚಿಕ್ಕಿತುಳ್ಳ ಒರ್‌ ಟಗರ್‌ನ ಕಂಡತ್. ಅಕ್ಕ ಅಬ್ರಹಾಮ ಪೋಯಿತ್, ಆ ಟಗರ್‌ನ ಪುಡ್‌ಚಿತ್‌ ತಾಂಡ ಮೋಂವೊಂಡ ಬದ್‌ಲ್‌ ಅದ್‌ನ ಬಲಿ ಕೊಡ್‌ತತ್.

¹⁴ಅಬ್ರಹಾಮ ಆ ಜಾಗಕ್‌ ಯೆಹೋವಯೀರೆ[17] ಎಣ್ಣಿಯಂಡ್‌ ಪೆದ ಬೆಚ್ಚತ್. ಯೆಹೋವಂಡ ಕುಂದ್‌ಲ್‌ ನಂಗಕ್‌ ಬೋಂಡಿಯಾನದ್‌ನ ತಪ್ಪ ಎಣ್ಣಿಯಂಡ್‌ ಇಕ್ಕಲು ಜನ ಎಣ್ಣುವ.

¹⁵ಯೆಹೋವಂಡ ದೂತ ಪರಲೋಕತ್‌ಂಜ ದಂಡನೆ ಕುರಿ ಅಬ್ರಹಾಮನ ಕಾಕಿತ್:

¹⁶ನೀನ್‌ ಅಂವೊನ ನೀಡ ಮೋಂವೋಂದ್‌ ನೋಟತೆ, ನೀಡ ಒರೇ ಮೋಂವೋಂದ್‌ ಸಹ ನೋಟತೆ, ಅಂವೊನ ಒಪ್ಪ್‌ಚಿಟ್ಟಿತ್‌ ಈ ಕಾರ್ಯತ್‌ನ ಮಾಡ್‍ನಗುಂಡ್,

¹⁷ನಾನ್‌ ನಿನ್ನ ನೇರಾಯಿತು ಆಶೀರ್ವಾದ ಮಾಡಿತ್, ನೀಡ ಸಂತಾನತ್‌ನ ಬಾನತ್‌ ಮೀನ್‌ರನೆಕೆಯು, ಕಡಕರೆಲ್‌ ಉಳ್ಳ ಮಣತ್‌ರನೆಕೆಯು ಲೆಕ್ಕ ಮಾಡುವಕಯ್ಯತಚ್ಚಕ್‌ ಆಪನೆಕೆ ಮಾಡುವಿ. ನೀಡ ಸಂತಾನಕಾರಂಗ ಅಯಿಂಗಡ ಶತ್‌ರುವಳ ಚೋಪ್‌ಚಿಡುವಾಂದು,

¹⁸ನೀನ್‌ ನಾಡ ತಕ್ಕ್‌ಕ್‌ ತಗ್ಗಿತ್‌ ನಡ್‌ಂದಗುಂಡ್‌ ನೀಡ ಸಂತಾನತ್‌ರ ಮೂಲಕ ಈ ಬೂಮಿಲ್‌ ಉಳ್ಳ ಎಲ್ಲಾ ಜನಾಂಗಳು ಆಶೀರ್ವಾದ ಪೊಂದುವಾಂದು ಯೆಹೋವ ಅಂವೊಂಡ ಮೇಲೆ ಆಣೆ ಮಾಡಿತ್‌ ಎಣ್ಣಿಚೀಂದ್‌ ಎಣ್ಣ್‌ಚಿ.

¹⁹ಅಲ್ಲಿಂಜ ಅಬ್ರಹಾಮ ತಾಂಡ ಆಳ್‌ವಡ ಪಕ್ಕ ತಿರಿತ್‌ ಬಾತ್. ಅಯಿಂಗೆಲ್ಲಾರು ಬೇರ್ಷೆಬಕ್‌ ಪೊರ್‌ಟತ್; ಅಬ್ರಹಾಮ ಬೇರ್ಷೆಬಲ್‌ ವಾಸ ಮಾಡ್‌ಚಿ.

²⁰ಈ ಕಾರ್ಯಯೆಲ್ಲ ಆನ ಪಿಂಞ, ತಾಂಡ ತಮ್ಮಣ ಆನ ನಾಹೋರಂಗ್‌ ಅಂವೊಂಡ ಪೋಣ್ಣ್‌ ಮಿಲ್ಕಂಡ ಮೂಲಕ ಕ್‌ಣ್ಣ ಮಕ್ಕ ಪುಟ್ಟ್‌ಚೀಂದ್‌ ಅಬ್ರಹಾಂಗ್‌ ಸುದ್ದಿ ಮುಟ್ಟ್‌ಚಿ.

²¹ಅಯಿಂಗ ದಾರ್‌ ಎಣ್ಣ್‌ಚೇಂಗಿ, ಆದ್ಯ ಪುಟ್ಟ್‌ನಂವೊಂಡ ಪೆದ ಊಚ್, ಇಂವೊಂಡ ತಮ್ಮಣಂಡ ಪೆದ ಬೂಚ್, ಅರಾಮಂಡ ಅಪ್ಪನಾನ ಕೆಮೂವೇಲ,

²²ಕೆಸೆದ, ಹಜೋ, ಪಿಲ್ದಾಷ, ಇದ್‌ಲಾಫ, ಬೆತೂವೇಲ ಎಣ್ಣುವಯಿಂಗಳೇ.

²³ರೆಬೆಕ್ಕ ಬೆತೂವೇಲಂಗ್‌ ಪುಟ್ಟ್‌ನವ. ಈ ಎಟ್ಟ್‌ ಮಕ್ಕಳ ಅಬ್ರಹಾಮಂಡ ತಮ್ಮಣಾನ ನಾಹೋರಂಗ್‌ ಮಿಲ್ಕ ಪೆತ್ತತ್.

²⁴ಇದ್‌ಲ್ಲತೆ, ಅಂವೊಂಡ ಉಪ ಪೊಣ್ಣಾನ ರೂಮ ಸಹ ಟೆಬಹ, ಗಹಮ, ತಹಷ, ಮಾಕಾ ಎಣ್ಣುವ ನಾಲ್‌ ಮಕ್ಕಳ ಪೆತ್ತತ್.