Read Kodava ಆದ್ಯತ್‌ರ ಪುಸ್ತಕ 25 Bible Online

ಆದ್ಯತ್‌ರ ಪುಸ್ತಕ 25 - Kodava bible

ಆದ್ಯತ್‌ರ ಪುಸ್ತಕ 25

¹ಅಬ್ರಹಾಮ ಪುನಃ ಕೆಟೂರ ಎಣ್ಣುವವಳ ಮಂಗಲ ಕಯಿಚಂಡತ್.

²ಅವ ಅಂವೊಂಗ್‌ ಜಿಮ್ರಾನ, ಯೊಕ್ಷಾನ, ಮೆದಾನ, ಮಿದ್ಯಾನ, ಇಷ್ಬಾಕ, ಶೂಹ ಎಣ್ಣುವಯಿಂಗಳ ಪೆತ್ತತ್.

³ಯೊಕ್ಷಾನ, ಶೆಬಾ ಪಿಂಞ ದೆದಾನ ಎಣ್ಣುವಯಿಂಗಕ್‌ ಅಪ್ಪನಾಯಿತ್‌ಂಜತ್. ದೆದಾನಂಡ ಕ್‌ಣ್ಣ ಮಕ್ಕ, ಅಶ್ಶೂರ್ಯಯಂಗ, ಲೆಟೂಶ್ಯಂಗ ಪಿಂಞ ಲೆಯುಮ್ಯಂಗ ಎಣ್ಣುವಯಿಂಗಳೇ.

⁴ಮಿದ್ಯಾನಂಡ ಕ್‌ಣ್ಣ ಮಕ್ಕ ಗೇಫಾ, ಗೇಫೆರ್, ಹನೋಕ, ಅಬೀದಾ, ಎಲ್ದಾಯ ಎಣ್ಣುವಯಿಂಗಳೇ. ಈಂಗೆಲ್ಲಾ ಕೆಟೂರಳಂಡ ಮಕ್ಕ ಆಯಿತ್‌ಂಜತ್.

⁵ಅಬ್ರಹಾಮ ತಾಂಡ ಎಲ್ಲಾ ಆಸ್ತಿನ ಇಸಾಕಂಗ್‌ ಕೊಡ್‌ತತ್.

⁶ಅಬ್ರಹಾಮ ಬದ್‌ಕಿಯಂಡಿಪ್ಪ ಕಾಲತ್‌ಲೇ, ತಾಂಡ ಉಪ ಪೊಣ್ಣ್‌ಕ್ ಪುಟ್ಟ್‌ನ ಕ್‌ಣ್ಣ್‌ ಮಕ್ಕಕ್‌ ಇನಾಮ್‌ನ ಕೊಡ್‌ತಿತ್‌ ತಾಂಡ ಮೋಂವೊ ಇಸಾಕಡಿಂಜ ಕ್‍ೕಕ್‌ ದಿಕ್ಕ್‌ಲ್‌ ಕ್‍ೕಕ್‌ ದೇಶಕ್‌ ಅಯಿಚತ್.

⁷ಅಬ್ರಹಾಮ ನೂಟ್ಯ ಎಳುವತಂಜ್ ಕಾಲ ಬದ್‌ಕ್‌ಚಿ.

⁸ಅಂವೊ ದುಂಬ ವಯಸ್ಸಾಯಿತ್‌ ಪ್ರಾಣ ಬುಟ್ಟಿತ್‌ ತಾಂಡ ಜನತ್‌ರ ಕೂಡೆ ಕೂಡ್‌ಚಿ.

⁹ಅಂವೊಂಡ ಮಕ್ಕಳಾನ ಇಸಾಕ ಪಿಂಞ ಇಷ್ಮಾಯೇಲ ಹಿತ್ತಿಯನಾನ ಚೋಹರಂಡ ಮೋಂವೊನಾನ ಎಫ್ರೋನಂಡ ಬೂಮಿಲ್‌ ಉಳ್ಳ ಮಕ್ಪೇಲ ಎಣ್ಣುವ ಗುವೆಲ್‌ ಅಂವೊನ ಪೂತತ್. ಅದ್‌ ಮಮ್ರೆಕ್‌ ಪಕ್ಕತ್‌ ಇಂಜತ್.

¹⁰ಈ ಬೂಮಿನ ಅಬ್ರಹಾಮ ಹಿತ್ತಿಯರಯಿಂಗಡಯಿಂಜ ಕ್ರಯಕ್‌ ಎಡ್‌ತಿತ್‌ಂಜತ್. ಈ ಜಾಗತ್‌ಲ್‌ ಅಬ್ರಹಾಮನ ಪಿಂಞ ಅಂವೊಂಡ ಪೊಣ್ಣ್‌ ಸಾರಳನ ಪೂತತ್.

¹¹ಅಬ್ರಹಾಮ ಚತ್ತ್‌ ಪೋನ ಪಿಂಞ ದೇವ ಅಂವೊಂಡ ಮೋಂವೊ ಇಸಾಕನ ಆಶೀರ್ವಾದ ಮಾಡ್‌ಚಿ. ಅಂವೊ ಲಹೈರೋಯಿ ಎಣ್ಣುವ ಕಣತರೆರ ಪಕ್ಕತ್‌ಲ್‌ ವಾಸಮಾಡಿಯಂಡಿಂಜತ್.

¹²ಇದ್‌ ಅಬ್ರಹಾಮಂಗ್‌ ಸಾರಳಂಡ ಪಣಿಕಾರ್ತಿಯಾನ ಐಗುಪ್ತ ದೇಶಕ್‌ ಕೂಡ್‌ನ ಹಾಗರಕ್‌ ಪುಟ್ಟ್‌ನ ಇಷ್ಮಾಯೇಲಂಡ ವಂಶಾವಳಿ.

¹³ಇದ್‌ ಇಷ್ಮಾಯೇಲಂಡ ಮಕ್ಕಕು, ಅಯಿಂಗಡಿಂಜ ಪುಟ್ಟ್‌ನ ಕುಲತ್‌ರ ಪ್ರಕಾರ ಉಳ್ಳ ಪೆದ. ಇಷ್ಮಾಯೇಲಂಡ ಪೆರಿಯ ಮೋಂವೊಂಡ ಪೆದ ನೆಬಾಯೋತ, ಅಲ್ಲಿಂಜ ಪುಟ್ಟ್‌ನಂವೊ ಕೇದರ, ಅದ್ಬಯೇಲ, ಮಿಬ್ಸಾಮ,

¹⁴ಮಿಷ್ಮಾ, ದೂಮಾ, ಮಸ್ಸಾ,

¹⁵ಹದದ, ತೇಮಾ, ಯಟೂರ, ನಾಫೀಷ, ಕೇದ್ಮಾ ಎಣ್ಣುವಯಿಂಗಳೇ.

¹⁶ತಂಗಡ ಊರ್‌ಲ್‌ ಪಿಂಞ ಗುಡಾರತ್‌ಲ್‌ ವಾಸಮಾಡಿಯಂಡಿಂಜ ತಂಗಡ ಮಕ್ಕಕ್‌ ಪನ್ನರೆಂಡ್‌ ರಾಜಕುಮಾರಂಗಳಾನ ಇಷ್ಮಾಯೇಲಂಡ ಕ್‌ಣ್ಣ ಮಕ್ಕ ಈಂಗಳೇ, ಇದೇ ಈಂಗಡ ಪೆದವು ಆಪ.

¹⁷ಇಷ್ಮಾಯೇಲ ನೂಟ್ಯ ನುಪ್ಪತ್‍ೕಳ್‌ ಕಾಲ ಬದ್‌ಕ್‌ಚಿ. ಆ ವಯಸ್ಸ್‌ಲ್‌ ಅಂವೊ ಚತ್ತಿತ್, ತಾಂಡ ಜನತ್‌ರ ಕೂಡೆ ಕೂಡ್‌ಚಿ.

¹⁸ಇಷ್ಮಾಯೇಲಂಡ ಸಂತಾನ ಹವೀಲಯಿಂಜ ಐಗುಪ್ತ ದೇಶಕ್‌ ಎದಿಕೆ ಅಶ್ಯೂರಿಕ್‌ ಪೋಪ ಬಟ್ಟೆಲ್‌ ಉಳ್ಳ ಶೂರಿಕತ್ತನೆ ವಾಸ ಇಂಜತ್. ಇದ್‌ ಇಷ್ಮಾಯೇಲ ಅಂವೊಂಡ ಅಣ್ಣತಮ್ಮಣಂಗಡ ಮಿಂಞತ್‌ ವಾಸ ಮಾಡ್‌ನ ಬೂಮಿ.

¹⁹ಅಬ್ರಹಾಮಂಡ ಮೊಂವೊನಾನ ಇಸಾಕಂಡ ವಂಶಾವಳಿ. ಅಬ್ರಹಾಮ ಇಸಾಕನ ಪೆತ್ತತ್.

²⁰ಇಸಾಕ ರೆಬೆಕ್ಕಳ ಮಂಗಲ ಕಯಿಪಕ ಅಂವೊಂಗ್‌ ನಾಪದ್‌ ವಯಸ್ಸಾಯಿತ್‌ಂಜತ್. ಇವ ಪದ್ದನ್‌ ಅರಾಮ್‌ ಎಣ್ಣುವ ಸಿರಿಯ ದೇಶಕ್‌ ಕೂಡ್‌ನಂವೊನಾನ ಬೆತೂವೇಲಂಗ್‌ ಮೋವಳು, ಸಿರಿಯ ದೇಶಕ್‌ ಕೂಡ್‌ನಂವೊನಾನ ಲಾಬಾನಂಡ ತಂಗೆಯು ಆಯಿತ್‌ಂಜತ್.

²¹ಅವಕ್‌ ಮಕ್ಕ ಇಂಜಿತ್‌ಲ್ಲೆ, ಆಂಗ್‌ ಇಸಾಕ ಅವಕಾಯಿತ್, ಯೆಹೋವನ ಬೋಡಿಯಂಡತ್. ಯೆಹೋವ ಅಂವೊಂಡ ಪ್ರಾರ್ಥನೆನ ಕ್‍ೕಟ್‌ತ್. ಅಂವೊಂಡ ಪೊಣ್ಣ್‌ ರೆಬೆಕ್ಕ ಕುಳುಮೆಕಾರ್ತಿ ಆಚಿ.

²²ಆಚೇಂಗಿ, ಅವಡ ಕೆಲತ್‌ಲ್‌ ಕುಂಞಿಯ ಒಂದಂಗೊಂದ್‌ ನೂಕಿಯಂಡಿಪ್ಪಕ, ಅವ: ನಾಕ್‍ ಎನ್ನಂಗ್‌ ಇನ್ನನೆ ಆಯಂಡುಂಡ್‍ೕಂದ್‌ ಯೆಹೋವನ ಕ್‍ೕಪಕ್‌ ಪೋಚಿ.

²³ಯೆಹೋವ ಅವಕ್: ನೀಡ ಕೆಲತ್‌ಲ್‌ ದಂಡ್‌ ಜನಾಂಗ ಉಂಡ್; ದಂಡ್‌ ಜನಾಂಗ ನೀಡ ಕೆಲತ್‌ಂಜ ಬೋರೆ ಬೋರೆ ಆಯಿಪೋಪ. ಅದ್‌ಲ್‌ ಒಬ್ಬ ಇಂಞೊಬ್ಬಕಿಂಜಿ ಬಲಶಾಲಿ ಆಯಿತ್‌ಪ್ಪ. ಪೆರಿಯಂವೊ ಚೆರಿಯವಂಗ್‌ ಸೇವೆ ಮಾಡ್‌ವಾಂದ್‌ ಎಣ್ಣ್‌ಚಿ.

²⁴ಅವಕ್‌ ಪೆರುವ ಸಮಯ ಬಪ್ಪಕ ಎಣೆ ಮಕ್ಕಳ ಪೆತ್ತತ್.

²⁵ಮಿಂಞ ಪುಟ್ಟ್‌ನಂವೊ ಚೋಪಾಯಿತು, ಇಡಿ ದೇಹ ರೋಮತ್‌ಲ್‌ ಮಾಡ್‌ನ ಬಟ್ಟೆ ಇಟ್ಟಂಡುಳ್ಳಂವೊನೆಕೆಯು ಇಂಜತ್. ಅಂವೊಂಗ್‌ ಏಸಾವಾಂದ್‌ ಪೆದ ಬೆಚ್ಚತ್.

²⁶ದಂಡನೆ ಕುಂಞಿ ಏಸಾವಂಡ ಕಾಲ್‌ರ ಮುಡಿನ ಗಟ್ಟಿಯಾಯಿತ್‌ ಪುಡ್‌ಚಂಡ್‌ ಪುಟ್ಟ್‌ಚಿ. ಅಂವೊಂಗ್‌ ಯಾಕೋಬಾಂದ್‌ ಪೆದ ಬೆಚ್ಚತ್. ಈಂಗ ಪುಟ್ಟ್‌ವಕ ಇಸಾಕಂಗ್‌ ಅರ್ವದ್‌ ವಯಸ್ಸ್‌ ಆಯಿತ್‌ಂಜತ್.

²⁷ಆ ಕುಂಞಿಯ ಬಲ್ಯದಾನ ಪಿಂಞ ಏಸಾವ ನಲ್ಲ ಬೋಟೆಗಾರನಾಯಿತು, ಕಾಡ್‌ಲ್‌ ವಾಸಮಾಡ್‌ವಂವೊನಾಯಿತು ಇಂಜತ್. ಆಚೇಂಗಿ ಯಾಕೋಬ ದುಂಬ ಸಾದು ಮನುಷ್ಯನಾಯಿತು, ಗುಡಾರತ್‌ಲ್‌ ವಾಸಮಾಡ್‌ವಂವೊನಾಯಿತು ಇಂಜತ್.

²⁸ಕಾಡ್‌ ಯರ್ಚಿ ಇಸಾಕಂಗ್‌ ದುಂಬ ಕುಶಿಯಾನಗುಂಡ್‌ ಅಂವೊ ಏಸಾವನ ಪ್ರೀತಿ ಮಾಡ್‌ಚಿ. ಆಚೇಂಗಿ ರೆಬೆಕ್ಕ ಯಾಕೋಬನ ಪ್ರೀತಿ ಮಾಡ್‌ಚಿ.

²⁹ಒರ್‌ ದಿವಸ ಯಾಕೋಬ ಚೋಪಾಯಿತುಳ್ಳ ರಸವುಳ್ಳ ಕರೀರ ಅಡಿಗೆ ಮಾಡಿಯಂಡಿಪ್ಪಕ ಏಸಾವ ಕಾಡಿಂಜ ದುಂಬ ಸುಸ್ತಾಯಿತ್‌ ಕೆಲಪೈಚಿತ್‌ ಮನೆಕ್‌ ಬಾತ್.

³⁰ಅಕ್ಕ ಏಸಾವ ಯಾಕೋಬಂಗ್: ನೀನ್‌ ಮಾಡ್‌ನ ಆ ಚೋಪಾಯಿತುಳ್ಳ ಆ ರಸವುಳ್ಳ ಕರಿನ ನಾಕ್‍ ಚೆನ್ನ ತಾಂದ್‌ ಕ್‍ೕಟತ್. (ಆಂಗಾಯಿತ್‌ ಏಸಾವಂಗ್‌ ಎದೋಮ[19] ಎಣ್ಣಿಯಂಡ್‌ ಪೆದ ಬಾತ್.)

³¹ಆಚೇಂಗಿ ಯಾಕೋಬ ಅಂವೊಂಗ್: ಮಿಂಞ ನೀನ್‌ ನೀಡ ಪೆರಿಯ ಮೋಂವೋಂದ್‌ ಉಳ್ಳ ಜನ್ಮ ಹಕ್ಕ್‌ನ ನಾಕ್‍ ಮಾರಿತ್‌ ಕೊಡ್‌ಪೀಂದ್‌ ಆಣೆ ಮಾಡಿತ್‌ ತಾಂದ್‌ ಎಣ್ಣ್‌ಚಿ.

³²ಅದ್‌ಂಗ್‌ ಏಸಾವ: ನೋಟ್, ನಾನ್‌ ಕೆಲಪೈಚಿತ್‌ ಚತ್ತ್‌ ಪೋಯಂಡುಳ್ಳ. ಪೆರಿಯ ಮೋಂವೋಂದ್‌ ಉಳ್ಳ ಹಕ್ಕ್‌ನ ಬೆಚ್ಚಂಡ್‌ ನಾಕ್‍ ಎಂತ ಪ್ರಯೋಜನಾಂದ್‌ ಎಣ್ಣ್‌ಚಿ.

³³ಅಕ್ಕ ಯಾಕೋಬ: ಅಂದಕ ನೀನ್‌ ಇಕ್ಕಲೆ ಆ ಹಕ್ಕ್‌ ನಾಡದ್‌ ಎಣ್ಣಿಯಂಡ್‌ ಆಣೆ ಮಾಡಿ ತಾಂದ್‌ ಎಣ್ಣ್‌ಚಿ. ಅದ್‌ಂಗ್‌ ಏಸಾವ ಆಣೆ ಮಾಡಿತ್, ಪೆರಿಯ ಮೋಂವೋಂದ್‌ ಉಳ್ಳ ತಾಂಡ ಜನ್ಮ ಹಕ್ಕ್‌ನ ಯಾಕೋಬಂಗ್‌ ಕೊಡ್‌ತ್‌ರ್‌ತ್.

³⁴ಅಕ್ಕ ಯಾಕೋಬ ಏಸಾವಂಗ್‌ ಒಟ್ಟಿನ ಪಿಂಞ ಕರಿನ ಕೊಡ್‌ತತ್. ಏಸಾವ ಅದ್‌ನ ತಿಂದಿತ್‌ ಕುಡ್‌ಚಿತ್‌ ಎದ್ದಿತ್‌ ಪೋಚಿ. ಇನ್ನನೆ ಅಂವೊ ತಾಂಡ ಜನ್ಮ ಹಕ್ಕ್‌ರ ವಿಷಯತ್‌ನ ಕಡೆಗಟ್ಟ್‌ಚಿ.