Read Kodava ಆದ್ಯತ್‌ರ ಪುಸ್ತಕ 27 Bible Online

ಆದ್ಯತ್‌ರ ಪುಸ್ತಕ 27 - Kodava bible

ಆದ್ಯತ್‌ರ ಪುಸ್ತಕ 27

¹ಇಸಾಕಂಗ್‌ ದುಂಬ ವಯಸ್ಸ್‌ ಆನಗುಂಡ್‌ ಕಣ್ಣ್‌ ಕಾಂಗತನೆಕೆ ಆಚಿ. ಅಕ್ಕ ಒರ್‌ ಸಮಯತ್‌ಲ್‌ ಇಸಾಕ ತಾಂಡ ಪೆರಿಯ ಮೋಂವೊನಾನ ಏಸಾವನ ಕಾಕಿತ್: ನಾಡ ಮೋನೇಂದ್‌ ಕಾಕ್‌ಚಿ. ಅದ್‌ಂಗ್‌ ಏಸಾವ: ನಾನ್‌ ಇಲ್ಲಿ ಉಳ್ಳಂದ್‌ ಎಣ್ಣ್‌ಚಿ.

²ಇಸಾಕ ಅಂವೊಂಗ್: ನಾಕ್‍ ವಯಸಾಯಿ ಪೋಚಿ. ನಾನ್‌ ಎಕ್ಕ ಚಾವ್‌ ಬಪ್ಪಾಂದ್‌ ಗೊತ್ತಿಲ್ಲೆ.

³ಆನಗುಂಡ್‌ ನೀನ್, ನೀಡ ಬಿಲ್ಲ್‌ಬಾಣತ್‌ನ ಎಡ್‌ತಂಡ್‌ ಕಾಡ್‌ಕ್‌ ಪೋಯಿತ್‌ ನಾಕಾಯಿತ್‌ ಬೋಟೆಯಾಡ್.

⁴ಅನ್ನನೆ ಬೋಟೆಯರ್ಚಿಲ್‌ ನಾಕ್‍ ಕುಸಿ ಆಪನೆಕೆ ಅಡಿಗೆ ಮಾಡಿತ್‌ ಎಡ್‌ತಂಡ್‌ ಬಾ. ನಾನ್‌ ಅದ್‌ನ ಉಂಡಿತ್‌ ನಾನ್‌ ಚಾವಕ್‌ ಮಿಂಞ ನಾಡ ಆತ್ಮತ್‌ಂಜ ನಿನ್ನ ಆಶೀರ್ವಾದ ಮಾಡ್‌ವೀಂದ್‌ ಎಣ್ಣ್‌ಚಿ.

⁵ಆಚೇಂಗಿ ಅಯಿಂಗ ತಕ್ಕ್‌ ಪರ್‌ಂದಂಡ್‌ ಇಂಜದ್‌ನ ರೆಬೆಕ್ಕ ಕ್‍ೕಟಂಡಿಂಜತ್. ಏಸಾವ ಬೋಟೆ ಆಡುವಕ್‌ ಕಾಡ್‌ಕ್‌ ಪೋಚಿ.

⁶ಅಕ್ಕ ರೆಬೆಕ್ಕ ಅವಡ ಮೋಂವೊನಾನ ಯಾಕೋಬನ ಕಾಕಿತ್: ನೋಟ್, ನೀಡ ಪಪ್ಪ ನೀಡ ಅಣ್ಣ ಏಸಾವನ ಕಾಕಿತ್:

⁷ನೀನ್‌ ಬೋಟೆಕ್‌ ಪೋಯಿತ್‌ ನಾಕ್‍ ಕಾಡ್‌ ಯರ್ಚಿಲ್‌ ರಸತ್‌ ಅಡಿಗೆ ಮಾಡಿ ತಾ. ನಾನ್‌ ಅದ್‌ನ ಉಂಡಿತ್, ನಾಕ್‍ ಚಾವ್‌ ಬಪ್ಪಕ್‌ ಮಿಂಞ ನಾನ್‌ ನಿನ್ನ ಯೆಹೋವಂಡ ಪೆದತ್‌ಲ್‌ ಆಶೀರ್ವಾದ ಮಾಡ್‌ವೀಂದ್‌ ಏಸಾವಂಗ್‌ ಎಣ್ಣ್‌ವದ್‌ನ ನಾನ್‌ ಕ್‍ೕಟ.

⁸ಆನಗುಂಡ್, ನಾಡ ಮೋನೇ, ನಾನ್‌ ಎಣ್ಣ್‌ವನೆಕೆ ನೀನ್‌ ಮಾಡ್.

⁹ನಂಗಡ ಕೊಟ್ಟ್‌ಕ್‌ ಪೋಯಿತ್‌ ನಲ್ಲ ದಂಡ್‌ ಆಡ್‌ ಕುಟ್ಟಿಯಳ ಎಡ್‌ತಂಡ್‌ ಬಾ. ನಾನ್‌ ಅದ್‌ನ ನೀಡ ಪಪ್ಪಂಗ್‌ ಕುಶಿ ಆಪನೆಕೆ ಅಡಿಗೆ ಮಾಡಿ ತಪ್ಪಿ.

¹⁰ಅದ್‌ನ ನೀನ್‌ ಎಡ್‌ತಂಡ್‌ ಪೋಯಿತ್‌ ನೀಡ ಪಪ್ಪಂಗ್‌ ಕೊಡ್. ಅಕ್ಕ ಅಂವೊ ಅದ್‌ನ ತಿಂದಿತ್‌ ಚಾವಕ್‌ ಮಿಂಞ ನಿನ್ನ ಆಶೀರ್ವಾದ ಮಾಡುವಾಂದ್‌ ಎಣ್ಣ್‌ಚಿ.

¹¹ಅದ್‌ಂಗ್‌ ಯಾಕೋಬ ತಾಂಡ ಅವ್ವ ರೆಬೆಕ್ಕಂಗ್: ನಾಡ ಅಣ್ಣನಾನ ಏಸಾವಂಡ ಮೇಲ್‌ಲ್‌ ದುಂಬ ರೋಮ ಉಂಡ್, ಆಚೇಂಗಿ ನಾಡ ಮೇಲ್‌ಲ್‌ ರೋಮ ಇಲ್ಲೆ.

¹²ಒರ್‌ ಸಮಯ ನಾಡ ಪಪ್ಪ ನನ್ನ ಮುಟ್ಟಿತ್‌ ನೋಟ್‌ಚೇಂಗಿ, ನಾನ್‌ ಅಂವೊನ ಮೋಸ ಮಾಡಿಯಂಡುಳ್ಳಂದ್‌ ಗೇನ ಮಾಡಿತ್, ನನ್ನ ಆಶೀರ್ವಾದ ಮಾಡುವ ಬದ್‌ಲ್‌ ಶಾಪ ಇಡ್‌ವ ಅಲ್ಲಾಂದ್‌ ಎಣ್ಣ್‌ಚಿ.

¹³ಅದ್‌ಂಗ್‌ ಅಂವೊಂಡ ಅವ್ವ: ನಾಡ ಮೋನೇ, ಅನ್ನನೆ ನೀಡ ಅಪ್ಪ ನೀಕ್‌ ಶಾಪ ಇಟ್ಟತೇಂಗಿ, ಆ ಶಾಪ ನಾಡ ಮೇಲೆ ಬರಡ್. ನೀನ್‌ ನಾಡ ತಕ್ಕ್‌ನ ಮಾತ್‌ರ ಕ್‍ೕಳ್. ನೀನ್‌ ಪೋಯಿತ್‌ ಅದ್‌ನೆಲ್ಲ ನಾಕ್‍ ಕೊಂಡ ಬಾಂದ್‌ ಎಣ್ಣ್‌ಚಿ.

¹⁴ಅಂವೊ ಪೋಯಿತ್‌ ಅದ್‌ನ ಕೊಂಡ್‌ ಬಂದಿತ್‌ ಅಂವೊಂಡ ಅವ್ವಂಡ ಪಕ್ಕ ಕೊಡ್‌ತತ್. ಅಂವೊಂಡ ಅವ್ವ ಅಂವೊಂಡ ಅಪ್ಪಂಗ್‌ ಕುಶಿಯಾನ ನಲ್ಲ ರಸವುಳ್ಳ ಅಡಿಗೆ ತಯಾರ್‌ ಮಾಡ್‌ಚಿ.

¹⁵ಅಲ್ಲಿಂಜ ರೆಬೆಕ್ಕ, ತಾಂಡ ಪಕ್ಕ ಇಂಜ ಪೆರಿಯ ಮೋಂವೊನಾನ ಏಸಾವಂಡ ನಲ್ಲ ಬಟ್ಟೆನ ಎಡ್‌ತಿತ್‌ ತಾಂಡ ಚೆರಿಯ ಮೋಂವೊನಾನ ಯಾಕೋಬಂಗ್‌ ಇಟ್ಟತ್.

¹⁶ಪಿಂಞ ಅವ ಆ ಆಡ್‌ರ ಚರ್ಮತ್‌ನ ಯಾಕೋಬಂಡ ಕೈಕು, ರೋಮ ಇಲ್ಲತ ತೊಂಡೆಕು ಸುತ್ತ್‌ಚಿ.

¹⁷ಅಕ್ಕ ಅವ ಮಾಡ್‌ನ ನಲ್ಲ ರಸವುಳ್ಳ ಅಡಿಗೆನ ಪಿಂಞ ಒಟ್ಟಿನ ತಾಂಡ ಮೋಂವೊನಾನ ಯಾಕೋಬಂಡ ಕೈಲ್‌ ಕೊಡ್‌ತತ್.

¹⁸ಅಂವೊ ಅಪ್ಪಂಡ ಪಕ್ಕ ಪೋಯಿತ್: ಪಪ್ಪಾಂದ್‌ ಕಾಕ್‌ಚಿ. ಅದ್‌ಂಗ್‌ ಇಸಾಕ: ನಾನ್‌ ಇಲ್ಲೇ ಉಳ್ಳ, ನೀನ್‌ ದಾರ್‌ ಮೋಂವೊನೇಂದ್‌ ಕ್‍ೕಟತ್.

¹⁹ಯಾಕೋಬ ಅಂವೊಂಗ್: ನಾನ್‌ ನೀಡ ಪೆರಿಯ ಮೋಂವೊನಾನ ಏಸಾವ. ನೀನ್‌ ನಾಕ್‍ ಎಣ್ಣ್‌ನನೆಕೆ ನಾನ್‌ ಮಾಡಿತುಳ್ಳ. ನೀನ್‌ ಎದ್ದಿತ್‌ ಅಳ್‌ತಿತ್, ಈ ಬೋಟೆ ಆಡಿತ್‌ ಎಡ್‌ತ ಬಂದ ಯರ್ಚಿನ ಉಂಡಿತ್‌ ನಾಕ್‍ ಆಶೀರ್ವಾದ ಮಾಡ್‍ೕಂದ್‌ ಎಣ್ಣ್‌ಚಿ.

²⁰ಅಕ್ಕ ಇಸಾಕ: ನಾಡ ಮೋನೇ, ನೀಕ್‌ ಇಚ್ಚಕ್‌ ಬೆರಿಯ ಎನ್ನನೆ ಕ್‌ಟ್ಟ್‌ಚೀಂದ್‌ ಕ್‍ೕಟತ್. ಅಕ್ಕ ಯಾಕೋಬ: ನೀಡ ಯೆಹೋವ ನಾನ್‌ ಪೋನ ಬಟ್ಟೆಲ್‌ ನಾಡ ಮಿಂಞತ್‌ ಬಪ್ಪನೆಕೆ ಮಾಡ್‌ಚೀಂದ್‌ ಎಣ್ಣ್‌ಚಿ.

²¹ಇಸಾಕ ಯಾಕೋಬಂಗ್: ನಾಡ ಮೋನೇ, ನಾಡ ಪಕ್ಕ ಬಾ. ನೀನ್‌ ನಾಡ ಮೋಂವೊ ಏಸಾವಂದ್‌ ನಾನ್‌ ಮುಟ್ಟಿತ್‌ ಅರಿಂಜೋವೀಂದ್‌ ಎಣ್ಣ್‌ಚಿ.

²²ಅಕ್ಕ ಯಾಕೋಬ ತಾಂಡ ಅಪ್ಪಂಡ ಪಕ್ಕ ಬಾತ್. ಇಸಾಕ ಅಂವೊನ ಮುಟ್ಟಿತ್: ಸ್ವರ ಯಾಕೋಬಂಡದ್, ಆಚೇಂಗಿ ಕೈ ಏಸಾವಂಡ ಕೈಯಿಂದ್‌ ಎಣ್ಣ್‌ಚಿ.

²³ಅಂವೊಂಡ ಕೈ ಅಂವೊಂಡ ಅಣ್ಣ ಏಸಾವಂಡ ಕೈರನೆಕೆ ರೋಮಯಿಂಜನಗುಂಡ್, ಅಂವೊ ದಾರ್‌ಂದ್‌ ಗೊತ್ತಿಲ್ಲತೆ ಇಸಾಕ ಯಾಕೋಬನ ಆಶೀರ್ವಾದ ಮಾಡ್‌ವಕ್‌ ತಯಾರ್‌ ಆಯಿತ್,

²⁴ಅಂವೊ: ನೀನ್‌ ನೇರಾಯಿತು ನಾಡ ಮೋಂವೊ ಏಸಾವಾಂದ್‌ ಕ್‍ೕಟತ್. ಅದ್‌ಂಗ್‌ ಯಾಕೋಬ: ಅಕ್ಕು ನಾನೇಂದ್‌ ಎಣ್ಣ್‌ಚಿ.

²⁵ಅಲ್ಲಿಂಜ ಇಸಾಕ: ನಾಡ ಮೋನೇ, ನೀನ್‌ ಎಡ್‌ತ ಬಂದ ಬೋಟೆಯರ್ಚಿನ ನಾಡ ಪಕ್ಕ ಎಡ್‌ತ ಬಾ. ನಾನ್‌ ಅದ್‌ನ ಉಂಡಿತ್‌ ನಿನ್ನ ಆಶೀರ್ವಾದ ಮಾಡ್‌ವೀಂದ್‌ ಎಣ್ಣ್‌ಚಿ. ಯಾಕೋಬ ಇಸಾಕಂಗ್‌ ಮಾಡ್‌ನ ಅಡಿಗೆನ ಉಂಬಕ್‌ ಕೊಡ್‌ತತ್. ಇಸಾಕ ಅದ್‌ನ ತಿಂದತ್. ಪಿಂಞ ಯಾಕೋವ ದ್ರಾಕ್ಷಿರಸತ್‌ನ ಸಹ ಕೋಂಡಬಾತ್, ಅಂವೊ ಎಡ್‌ತ ಬಂದ ದ್ರಾಕ್ಷಿರಸತ್‌ನ ಕುಡಿಚತ್.

²⁶ಅಲ್ಲಿಂಜ ಅಂವೊಂಡ ಅಪ್ಪನಾನ ಇಸಾಕ ಅಂವೊಂಗ್: ಮೋನೇ, ನೀನ್‌ ನಾಡ ಪಕ್ಕ ಬಂದಿತ್‌ ನಾಕ್‍ ಒರ್‌ ಮುತ್ತ್‌ ಕೊಡ್‌ಂದ್‌ ಎಣ್ಣ್‌ಚಿ.

²⁷ಅಂವೊ ಪಕ್ಕ ಬಂದಿತ್‌ ಅಂವೊಂಗ್‌ ಮುತ್ತ್‌ [20]ಕೊಡ್‌ತತ್. ಅಕ್ಕ ಇಸಾಕ ಬಟ್ಟೆರ ವಾಸನೆನ ಮೂಸಿ ನೋಟಿತ್: ಇದಾ, ನಾಡ ಮೋಂವೊಂಡ ಮೇಲೆ ಬಂದಂಡುಳ್ಳ ವಾಸನೆ ಯೆಹೋವ ಆಶೀರ್ವಾದ ಮಾಡಿತುಳ್ಳ ಬೇಲ್‌ರ ವಾಸನೆರನೆಕೆ ಉಂಡ್.

²⁸ದೇವ ನೀಕ್‌ ಸ್ವರ್‌ಗತ್‌ಂಜ ಮಂಜ್‌ನ, ದಾರಳವಾಯಿತ್‌ ಬೂಮಿರ ಬೊಳೆನ, ದುಂಬ ಕಾಳ್‌ನ ಪಿಂಞ ದ್ರಾಕ್ಷಿರಸತ್‌ನ ತರಡ್.

²⁹ಎಲ್ಲಾ ಜನ ನೀಕ್‌ ಸೇವೆ ಮಾಡಿತ್, ಜನಾಂಗ ನೀಕ್‌ ಅಡ್ಡ ಬುದ್ದಿತ್‌ ಕೊಂಡಾಡಡ್. ನೀಡ ಅಣ್ಣತಮ್ಮಣಂಗಕ್‌ ನೀನೆ ಯಜಮಾನನಾಯಿತ್‌ ಇಪ್ಪಿಯ. ನೀಡ ಅವ್ವಂಡ ಮಕ್ಕ ಎಲ್ಲಾರು ನೀಕ್‌ ಅಡ್ಡ ಬೂವಡ್. ನೀಕ್‌ ಶಾಪ ಇಡುವಯಿಂಗಕ್‌ ಶಾಪ ಕ್‌ಟ್ಟ್‌ವ. ನೀಕ್‌ ಆಶೀರ್ವಾದ ಮಾಡುವಯಿಂಗಕ್‌ ಆಶೀರ್ವಾದ ಕ್‌ಟ್ಟ್‌ವಾಂದ್‌ ಎಣ್ಣಿತ್‌ ಅಂವೊನ ಆಶೀರ್ವಾದ ಮಾಡ್‌ಚಿ.

³⁰ಇಸಾಕ ಯಾಕೋಬನ ಆಶೀರ್ವಾದ ಮಾಡಿತ್‌ ಅಂವೊ ಅಲ್ಲಿಂಜ ಪೊರ್‌ಟಿತಾನ ಚೆನ್ನ ಪಿಂಞ, ಅಂವೊಂಡ ಅಣ್ಣನಾನ ಏಸಾವ ಬೋಟೆಕ್‌ ಪೋಯಿತ್‌ ತಿರಿತ್‌ ಬಾತ್.

³¹ಏಸಾವ ಸಹ ತಾಂಡ ಅಪ್ಪಂಗ್‌ ಕುಶಿ ಆಪನೆಕೆ ರುಚೀರ ಆಹಾರತ್‌ನ ತಯಾರ್‌ ಮಾಡಿತ್, ತಾಂಡ ಅಪ್ಪಂಡ ಪಕ್ಕ ಎಡ್‌ತಂಡ್‌ ಬಂತ್, ಅಪ್ಪನ ನೋಟಿತ್: ಪಪ್ಪ, ನೀನ್‌ ಎದ್ದಿತ್, ನೀಡ ಮೋಂವೊನಾನ ನಾನ್‌ ಬೋಟೆ ಆಡಿತ್‌ ಎಡ್‌ತ ಬಂದ ಯರ್ಚಿನ ಉಂಡಿತ್‌ ನನ್ನ ಆಶೀರ್ವಾದ ಮಾಡ್‍ೕಂದ್‌ ಎಣ್ಣ್‌ಚಿ.

³²ಅಕ್ಕನಕೆ, ಅಂವೊಂಡ ಅಪ್ಪನಾನ ಇಸಾಕ: ನೀನ್‌ ದಾರ್‌ಂದ್‌ ಕ್‍ೕಟತ್. ಅದ್‌ಂಗ್‌ ಅಂವೊ: ನಾನ್‌ ನೀಡ ಪೆರಿಯ ಮೋಂವೊನಾನ ಏಸಾವಾಂದ್‌ ಎಣ್ಣ್‌ಚಿ.

³³ಅಕ್ಕ ಇಸಾಕ ಬೊತ್ತಿತ್‌ ನಡ್‍ಗಿಯಂಡ್: ನೀನ್‌ ಬಪ್ಪಕಿಂಜಿ ಮಿಂಞ ಬೋಟೆಯಾಡಿತ್‌ ಎಡ್‌ತಂಡ್‌ ಬಂದಂವೊ ದಾರ್. ನೀನ್‌ ಬಪ್ಪಕಿಂಜ ಮಿಂಞ ಅದನೆಲ್ಲ ನಾನ್‌ ಉಂಡಿತ್‌ ಅಂವೊನ ಆಶೀರ್ವಾದ ಮಾಡ್‌ನನಲ್ಲ. ಅಕ್ಕು ಅಂವೊನೇ ಆಶೀರ್ವಾದ ಪಡ್‌ಂದಂವೊನಾಯಿತ್‌ ಇಪ್ಪಾಂದ್‌ ಎಣ್ಣ್‌ಚಿ.

³⁴ಏಸಾವ ತಾಂಡ ಅಪ್ಪಂಡ ತಕ್ಕ್‌ನ ಕ್‍ೕಟಿತ್, ದುಂಬ ದುಃಖ ಪಟ್ಟಿತ್, ದುಂಬ ಜೋರಾಯಿತ್‌ ಮೊರ್‌ಟಿತ್‌ ತಾಂಡ ಅಪ್ಪನ ನೋಟಿತ್: ಅಯ್ಯೋ ಪಪ್ಪಾ, ನನ್ನ ಸಹ ಆಶೀರ್ವಾದ ಮಾಡ್‍ೕಂದ್‌ ಬೋಡಿಯಂಡತ್.

³⁵ಅದ್‌ಂಗ್‌ ಇಸಾಕ: ನೀಡ ತಮ್ಮಣ ನನ್ನ ಮೋಸ ಮಾಡಿತ್, ನೀಡ ಆಶೀರ್ವಾದತ್‌ನ ಪಡ್‌ಂದತ್‌ಂದ್‌ ಎಣ್ಣ್‌ಚಿ.

³⁶ಅದ್‌ಂಗ್‌ ಏಸಾವ: ಯಾಕೋಬ ಎಣ್ಣುವ ಪೆದ ಅಂವೊಂಗ್‌ ಸೆರಿಯಾಯಿತ್‌ ಉಂಡ್. ದಂಡನೆ ಕುರಿ ಅಂವೊ ನಾಕ್‍ ಮೋಸ ಮಾಡಿರ್‌ತ್. ಮಿಂಞ ಒಮ್ಮ ನಾಡ ಕೈಯಿಂಜ ಪೆರಿಯ ಮೋಂವೋಂದ್‌ ಉಳ್ಳ ಪುಟ್ಟ್‌ನ ಹಕ್ಕ್‌ನ ಎಡ್‍ತಂಡತ್. ಇಕ್ಕ ನೋಟ್, ನಾಡ ಆಶೀರ್ವಾದತ್‌ನ ಸಹ ಎಡ್‍ತಂಡತ್. ನಾಕ್‍ ನೀನ್‌ ಒರ್‌ ಆಶೀರ್ವಾದತ್‌ನ ಸಹ ಬೆಚ್ಚಿತ್‌ಲ್ಲೆಯಾಂದ್‌ ಇಸಾಕನ ಕ್‍ೕಟತ್.

³⁷ಅದ್‌ಂಗ್‌ ಇಸಾಕ ಏಸಾವಂಗ್: ನಾಡ ಮೋನೇ, ಅಂವೊನ ನೀಕ್‌ ಯಜಮಾನನಾಯಿತ್‌ ಮಾಡಿಯೆ. ಅಂವೊಂಡ ಅಣ್ಣತಮ್ಮಣಂಗಳ ಅಂವೊಂಗ್‌ ಆಳಾಯಿತ್‌ ಇರಡ್‍ೕಂದ್‌ ಆಶೀರ್ವಾದ ಮಾಡಿಯೆ. ಅಂವೊಂಗ್‌ ಬೋಂಡಿಯಚ್ಚಕ್‌ ಕಾಳ್‌ ಪಿಂಞ ದ್ರಾಕ್ಷಿರಸ ಕ್‌ಟ್ಟಡ್‍ೕಂದ್‌ ಆಶೀರ್ವಾದ ಮಾಡಿಯೆ. ನೀಕ್‌ ತಪ್ಪಕ್‌ ನಾಡ ಪಕ್ಕ ಇಂಞು ಎಂತ ಬಾಕಿ ಉಂಡ್, ನಾನ್‌ ಎಂತ ಮಾಡಡ್‍ೕಂದ್‌ ಎಣ್ಣ್‌ಚಿ.

³⁸ಅಕ್ಕ ಏಸಾವ: ಅಯ್ಯೋ ಪಪ್ಪಾ, ನೀಡ ಪಕ್ಕ ಇದ್‌ ಒರೇ ಒರ್‌ ಆಶೀರ್ವಾದ ಮಾತ್‌ರ ಉಂಡಾಂದ್‌ ಜೋರಾಯಿತ್‌ ಮೊರ್‌ಟತ್.

³⁹ಅಂವೊಂಡ ಅಪ್ಪನಾನ ಇಸಾಕ ಅಂವೊಂಗ್: ಬೂಮಿರ ಬಲ್ಯ ಬೊಳೆಯಿಂಜ ಪಿಂಞ ಬಾನತ್‌ಂಜ ಮಂಜ್ ಕ್‌ಟ್ಟ್‌ತ ಜಾಗತ್‌ಲ್‌ ನೀನ್‌ ವಾಸ ಮಾಡುವಿಯಾಂದ್‌ ಎಣ್ಣ್‌ಚಿ.

⁴⁰ನೀನ್‌ ಬಾಳ್‌ನಗುಂಡ್‌ ಬದ್‌ಕುವಿಯ. ನೀನ್‌ ನೀಡ ತಮ್ಮಣನಂಗ್‌ ಸೇವೆ ಮಾಡ್‌ವಿಯ; ಆಚೇಂಗಿ, ನೀನ್‌ ದಂಗೆ ಏವಕ, ಅಂವೊಂಡ ಪುಡಿತತ್‌ಂಜ ಪಾರಾಪಿಯಾಂದ್‌ ಎಣ್ಣ್‌ಚಿ.

⁴¹ಅಂವೊಂಡ ಅಪ್ಪ ಯಾಕೋಬನ ಆಶೀರ್ವಾದ ಮಾಡ್‍ನಗುಂಡ್, ಅಂದಿಂಜ ಏಸಾವ, ಯಾಕೋಬಂಡ ಮೇಲೆ ಪಗೆ ಬೆಚ್ಚಂಡ್, ತಾಂಡ ಮನಸ್ಸ್‌ಲ್: ನಾಡ ಪಪ್ಪ ಬೆರಿಯ ಚತ್ತ್‌ ಪೋಪ. ಅಕ್ಕ ನಾನ್‌ ಯಾಕೋಬನ ಕೊಂದ್ರುವಾಂದ್‌ ಗೇನ ಎಣ್ಣ್‌ಚಿ.

⁴²ಪೆರಿಯ ಮೋಂವೊನಾನ ಏಸಾವ ಎಣ್ಣ್‌ನ ತಕ್ಕ್‌ ರೆಬೆಕ್ಕಂಗ್‌ ಗೊತ್ತಾಪಕ, ಅವ ಒಡನೆ ಯಾಕೋಬನ ಕಾಕಿತ್: ನೋಟ್, ನೀಡ ಅಣ್ಣ ನಿನ್ನ ಕೊಲ್ಲಂಡೂಂದ್‌ ಗೇನ ಮಾಡಿತ್‌ ಅಂವೊನ ಸಮಾದಾನ ಮಾಡಿಯಂಡತ್.

⁴³ಆನಗುಂಡ್‌ ನಾಡ ಮೋನೇ, ನಾನ್‌ ಎಣ್ಣ್‌ವನೆಕೆ ಮಾಡ್. ನೀನ್‌ ಇಕ್ಕಲೆ ಹಾರಾನ್‌ಲ್‌ ಉಳ್ಳ ನಾಡ ಅಣ್ಣ ಲಾಬಾನಂಡ ಪಕ್ಕ ಓಡಿಪೋ.

⁴⁴ನೀಡ ಅಣ್ಣಂಡ ಚೆಡಿ ಕಮ್ಮಿ ಆಕಣೆಕ್‌ ಚೆನ್ನ ಸಮಯ ನೀನ್‌ ಅಲ್ಲಿಯೇ ಇರ್.

⁴⁵ನೀಡ ಅಣ್ಣಂಡ ಚೆಡಿ ಕಮ್ಮಿಯಾಯಿತ್, ನೀನ್‌ ಅಂವೊಂಗ್‌ ಮಾಡ್‌ನದ್‌ನ ಅಂವೊ ಮರ್‌ಂದಪಿಂಞ, ನಿನ್ನ ಕಾಕ್‌ಚಿಟ್ಟೊವಿ. ನಾನ್‌ ಎನ್ನಂಗ್‌ ನಿಂಗ ದಂಡಾಳ್‌ನು ಒರೇ ದಿವಸತ್‌ ಕಳಂದೊಂಡ್‍ೕಂದ್‌ ಎಣ್ಣ್‌ಚಿ.

⁴⁶ಅಲ್ಲಿಂಜ ರೆಬೆಕ್ಕ ಇಸಾಕಂಗ್: ಹಿತ್ತಿಯಂಡ ಮೂಡಿಯಯಿಂಜ ನಾಡ ಬದ್‌ಕ್‌ ನಾಕ್‍ ಮದಿಯಾಚಿ. ಈ ದೇಶತ್‌ ಮೂಡಿಯಳಾನ ಹಿತ್ತಿಯಂಡ ಒರ್‌ ಮೂಡಿನ ಯಾಕೋಬ ಮಂಗಲ ಕಯಿಚತೇಂಗಿ, ನಾನ್‌ ಬದ್‌ಕಿತ್‌ ಎಂತ ಪ್ರಯೋಜನಾಂದ್‌ ಎಣ್ಣ್‌ಚಿ.