Read Kodava ಆದ್ಯತ್‌ರ ಪುಸ್ತಕ 3 Bible Online

ಆದ್ಯತ್‌ರ ಪುಸ್ತಕ 3 - Kodava bible

ಆದ್ಯತ್‌ರ ಪುಸ್ತಕ 3

¹ಯೆಹೋವನಾನ ದೇವ ಸೃಷ್ಟಿ ಮಾಡ್‌ನ ಎಲ್ಲಾ ಕಾಡ್‌ ಪ್ರಾಣಿಯಕಿಂಜ ಪಾಂಬ್ ತಂತ್‌ರ ಬುದ್ದಿ ಉಳ್ಳದಾಯಿತ್‌ಂಜತ್. ಅದ್‌ ಪೊಣ್ಣಾಳ್‌ರ ಪಕ್ಕ ಬಂದಿತ್: ಈ ತೋಟತ್‌ರ ಮರತ್‌ರ ಪಣ್ಣ್‌ಲ್‌ ಒಂದ್‌ ಸಹ ನಿಂಗ ತಿಂಬಕ್ಕಾಗಾಂದ್‌ ದೇವ ನೇರಾಯಿತು ಎಣ್ಣ್‌ಚಾಂದ್‌ ಕ್‍ೕಟತ್.

²ಅದ್‌ಂಗ್‌ ಆ ಪೊಣ್ಣಾಳ್: ಈ ತೋಟತ್‌ಲ್‌ ಉಳ್ಳ ಏದ್‌ ಮರತ್‌ರ ಪಣ್ಣ್‌ನ ನಂಗ ತಿಂಗಲು.

³ಆಚೇಂಗಿ ತೋಟತ್‌ರ ಮದ್ಯತ್‌ಲ್‌ ಉಳ್ಳ ಮರತ್‌ರ ಪಣ್ಣ್‌ನ ಮಾತ್‌ರ ನಂಗ ತಿಂಬಕ್ಕಾಗ. ಅದನ ತಿಂಬಕು, ಮುಟ್ಟ್‌ವಕು ಸಹ ಆಗ. ಅನ್ನನೆ ಮಾಡ್‌ಚೇಂಗಿ ನಂಗ ಚತ್ತ್‌ ಪೋಪಾಂದ್‌ ಎಣ್ಣ್‌ಚೀಂದ್‌ ಎಣ್ಣ್‌ಚಿ.

⁴ಅಕ್ಕ ಪಾಂಬ್ ಆ ಪೊಣ್ಣಾಳ್‌ಕ್: ನಿಂಗ ನೇರಾಯಿತು ಚಾವುಲೇಂದ್‌ ಎಣ್ಣ್‌ಚಿ;

⁵ನಿಂಗ ಅದನ ತಿಂಬ ದಿವಸತ್‌ಲ್‌ ನಿಂಗಡ ಕಣ್ಣ್‌ ತೊರ್ಪಾಂದು, ನಿಂಗಕ್‌ ನಲ್ಲದ್‌ ಕೆಟ್ಟದ್‌ ಎಂತದ್‍ೕಂದ್‌ ಗೊತ್ತಾಯಿತ್‌ ನಿಂಗ ದೇವಡನೆಕೆ ಆಪಿರಾಂದು ದೇವಕ್‌ ಗೊತ್ತುಂಡ್‌ಂದ್‌ ಎಣ್ಣ್‌ಚಿ.

⁶ಅಕ್ಕ ಆ ಪೊಣ್ಣಾಳ್‌ಕ್, ಈ ಮರತ್‌ರ ಪಣ್ಣ್‌ ತಿಂಬಕ್‌ ನಲ್ಲದಾಯಿತು, ನೋಟ್‌ವಕ್‌ ಚಾಯಿ ಉಂಡ್‍ೕಂದು, ಅವಕ್‌ ಜ್ಞಾನ ಕ್‌ಟ್ಟ್‌ವಕ್‌ ಅದ್‌ ಬೋಂಡ್‍ೕಂದು ಗೊತ್ತಾಯಿತ್, ಅದ್‌ನ ಪರಿಚಿತ್‌ ಅವ ತಿಂದತ್. ಅವಡ ವಡಿಯಂಗು ಕೊಡ್‌ಪಕ, ಅಂವೊನು ಅದನ ತಿಂದತ್.

⁷ಅಕ್ಕಲೆ ಅಯಿಂಗ ದಂಡಾಳ್‌ರ ಕಣ್ಣ್‌ ತೊರ್‌ಂದತ್; ಅಯಿಂಗ ಬೆತ್ತಲೆ ಆಯಿತ್ತುಂಡ್‍ೕಂದ್‌ ಅರಿಂಜಿತ್‌ ಅತ್ತಿಪಣ್ಣ್‌ ಮರತ್‌ರ ಎಲ್ಕಂಡತ್‌ನ ಪೊಂದಿತ್‌ ಸುತ್ತಿಯಂಡತ್.

⁸ಬಯಿಟಾಪಕ, ತಂಪ್‌ಗಾಳಿ ಬೀಜಿಯಂಡಿಪ್ಪ ನೇರತ್‌ಲ್‌ ಯೆಹೋವನಾನ ದೇವ ತೋಟತ್‌ಲ್‌ ನಡ್‌ಪ ಸದ್ದ್ ಅಯಿಂಗಕ್‌ ಕ್‍ೕಟತ್. ಅಕ್ಕ ಅಯಿಂಗ ಅಂವೊಂಡ ಪ್ರಸನ್ನತಿಂಜ ಮರಂಜಿತ್‌ ಮರತ್‌ರ ಮದ್ಯತ್‌ಲ್‌ ಒಳ್‌ಚಂಡತ್.

⁹ಯೆಹೋವನಾನ ದೇವ ಆದಾಮನ ಕಾಕಿತ್: ನೀನ್‌ ಎಲ್ಲಿ ಉಳ್ಳಿಯಾಂದ್‌ ಕ್‍ೕಟತ್.

¹⁰ಅದಂಗ್‌ ಅಂವೊ, ನಾಕ್, ನೀನ್‌ ತೋಟತ್‌ಲ್‌ ನಡಪ್ಪ ಸದ್ದ್ ಕ್‍ೕಟಿಯೆ, ನಾನ್‌ ಬೆತ್ತಲೆಯಾಯಿತ್‌ ಉಳ್ಳಂಗ್‌ ನಾಕ್‍ ಪೋಡಿ ಆಯಿತ್, ನಾನ್‌ ಒಳ್‌ಚಂಡ್‍ೕಂದ್‌ ಎಣ್ಣ್‌ಚಿ.

¹¹ಅದಂಗ್‌ ಅಂವೊ: ನೀನ್‌ ಬೆತ್ತಲೆಯಾಯಿತ್‌ ಉಳ್ಳಿಯಾಂದ್‌ ದಾರ್‌ ನೀಕ್‌ ಎಣ್ಣಿಯೆ? ನಾನ್‌ ನೀಕ್‌ ತಿಂಬಕ್ಕಾಗಾಂದ್‌ ಎಣ್ಣಿತ್‌ಂಜ ಮರತ್‌ಂಜ ತಿಂದಿಯಾಂದ್‌ ಕ್‍ೕಟತ್.

¹²ಅದ್‌ಂಗ್‌ ಆದಾಮ: ನೀನ್‌ ತಂದ ಆ ಪೊಣ್ಣಾಳ್‌ ನಾಕ್‍ ಆ ಪಣ್ಣ್‌ನ ತಂದಂಗ್‌ ನಾನ್‌ ತಿಂದಿಯೇಂದ್‌ ಎಣ್ಣ್‌ಚಿ.

¹³ಯೆಹೋವನಾನ ದೇವ ಆ ಪೊಣ್ಣಾಳ್‌ಕ್: ನೀನ್‌ ಎಂತ ಮಾಡಿಯಾಂದ್‌ ಕ್‍ೕಟತ್. ಅದಂಗ್‌ ಆ ಪೊಣ್ಣಾಳ್: ಆ ಪಾಂಬ್ ನಾಕ್‍ ವಂಚನೆ ಮಾಡ್‌ಚಿ, ಅದಂಗೇ ನಾನ್‌ ತಿಂದಂದ್‌ ಎಣ್ಣ್‌ಚಿ.

¹⁴ಅಕ್ಕ ಯೆಹೋವನಾನ ದೇವ ಆ ಪಾಂಬ್‌ಕ್: ನೀನ್‌ ಈ ಕಾರ್ಯತ್‌ನ ಮಾಡ್‍ನಗುಂಡ್, ಎಲ್ಲಾ ಚಾಕ್‌ ಪ್ರಾಣಿಯಡಿಂಜ, ಕಾಡ್‌ ಪ್ರಾಣಿಯಡಿಂಜ ಬೋರೆ ಆಯಿತ್‌ ನೀಕ್‌ ಶಾಪ ಕ್‌ಟ್ಟಿತ್‌ಪ್ಪ. ನೀನ್‌ ನೀಡ ಪೊಟ್ಟೆಯಿಂಜ ತೆವಳಿಯಂಡ್‌ ಪೋಪಿಯ ಪಿಂಞ ನೀನ್‌ ಜೀವವಾಯಿತ್‌ ಉಳ್ಳ ದಿವಸವೆಲ್ಲ ನೀನ್‌ ದೂಳ್‌ನ ತಿಂಬಿಯ.

¹⁵ನೀಕು ಪೊಣ್ಣಾಳ್‌ಕು, ನೀಡ ಸಂತಾನಕು ಪೊಣ್ಣಾಳ್‌ರ ಸಂತಾನಕು ಪಗೆತನ ಉಂಟ್ ಮಾಡ್‌ವಿ. [3]ಅಂವೊ ನೀಡ ಮಂಡೆನ ಜಜ್ಜ್‌ವ, ನೀನ್‌ ಅಂವೊಂಡ ಕಾಲ್‌ರ ಮುಡಿನ ಕಡಿಪಿಯಾಂದ್‌ ದೇವ ಎಣ್ಣ್‌ಚಿ.

¹⁶ಅಲ್ಲಿಂಜ ಅಂವೊ ಆ ಪೊಣ್ಣಾಳ್‌ಕ್: ನೀನ್‌ ಕೆಲಕರ್ತಿಯಾಯಿತ್‌ಪ್ಪಕ ದುಂಬ ನೊಂಬಲತ್‌ನ ಉಂಟ್‌ಮಾಡ್‌ವಿ, ದುಂಬ ನೊಂಬಲತ್‌ಲ್‌ ನೀನ್‌ ಕುಂಞಿಯಳ ಪೆರುವಿಯ. ನೀಡ ಆಸೆಯೆಲ್ಲ ನೀಡ ವಡಿಯಂಡ ಮೇಲೆ ಇಪ್ಪ; ಆಚೇಂಗಿ ಅಂವೊ ನೀಡ ಮೇಲೆ ಅದಿಕಾರ ಮಾಡ್‌ವಾಂದ್‌ ಎಣ್ಣ್‌ಚಿ.

¹⁷ಪಿಂಞ ದೇವ ಆದಾಮನ ನೋಟ್ಟಿತ್: ನೀನ್‌ ನೀಡ ಪೊಣ್ಣ್‌ರ ತಕ್ಕ್‌ ಕ್‍ೕಟಿತ್, ನಾನ್‌ ತಿಂಬಕ್ಕಾಗಾಂದ್‌ ಎಣ್ಣಿತ್‌ಂಜ ಮರತ್‌ರ ಪಣ್ಣ್‌ನ ತಿಂದಂಗ್, ನೀಡಗುಂಡ್‌ ನೆಲಕ್‌ ಶಾಪ ಕ್‌ಟ್ಟ್‌ಚಿ. ನೀಡ ಆಯಿಸ್ಸೆಲ್ಲಾ ಕಷ್ಟಪಟ್ಟಿತ್‌ ಈ ಬೂಮಿರ ಪಸಲ್‌ನ ತಿಂಬಿಯ.

¹⁸ಈ ಬೂಮಿಲ್‌ ಮುಳ್ಳ್ ಗಿಡ ಪಿಂಞ ಕಳೆಯೆಲ್ಲಾ ದುಂಬ ಪುಟ್ಟ್‌ವ. ಅನ್ನನೆ ನೀನ್‌ ಅದ್‌ಂಡ ಪಸಲ್‌ನ ಅನುಬವಿಚಿಡ್‌ವಿಯ.

¹⁹ನಿನ್ನ ಮಣ್ಣ್‌ಂಜ ಎಡ್‌ತಾಂಗ್, ನೀನ್‌ ಮಣ್ಣ್‌ಕ್ ಪೋಪಕತ್ತನೆ ಬೆವರ್‌ ಸುರಿಸಿಯಂಡ್‌ ನೀಕ್‌ ಉಂಬಕುಳ್ಳದ್‌ನ ಸಂಪಾದನೆಮಾಡ್‌ವಿಯ. ನೀನ್‌ ಮಾಣ್ಣಾಯಿತ್‌ ಉಳ್ಳಿಯ, ಮಣ್ಣ್‌ಕೇ ಪೋಪಿಯಾಂದ್‌ ಎಣ್ಣ್‌ಚಿ.

²⁰ಆದಾಮ ತಾಂಡ ಪೊಣ್ಣ್‌ಕ್ ಹವ್ವಾಂದ್‌ ಪೆದ ಬೆಚ್ಚತ್; ಎನ್ನಂಗೆಣ್ಣ್‌ಚೇಂಗಿ ಬದ್‌ಕಿಯಂಡುಳ್ಳಯಿಂಗಕೆಲ್ಲಾ ಅವಳೇ ಅವ್ವಳಾಯಾಯಿತುಂಡ್.

²¹ಯೆಹೋವನಾನ ದೇವ ಆದಾಮಂಗ್‌ ಪಿಂಞ ಅಂವೊಂಡ ಪೊಣ್ಣ್‌ಕ್ ಪ್ರಾಣಿರ ದೋಲ್‌ರ ಉಡ್‌ಪ್ ಮಾಡಿತ್‌ ಅಯಿಂಗಳ ಉಡ್‌ತತ್.

²²ಪಿಂಞ ಯೆಹೋವನಾನ ದೇವ: ಈ ಮನುಷ್ಯ ನಲ್ಲದ್‌ ಕೆಟ್ಟದ್‌ ಏದ್‍ೕಂದ್‌ ಗೊತ್ತಾಯಿತ್‌ ನಂಗಡನೆಕೆ ಆಯಿತಲ್ಲ. ಇಂಞು ಅಂವೊ ತಾಂಡ ಕೈ ನ್‍ೕಟಿತ್, ಆ ಜೀವ ತಪ್ಪ ಮರತ್‌ರ ಪಣ್ಣ್‌ನ ಕೊಜ್ಜಿತ್‌ ತಿಂದಿತ್‌ ಕಾಲಕಾಲಕು ಬದ್‌ಕ್‌ವಕ್ಕಾಗಾಂದ್‌ ಎಣ್ಣಿತ್,

²³ಅಂವೊನ ರೂಪ್‌ಚಿಟ್ಟ ನೆಲತ್‌ಲ್‌ ಬೇಲ್‌ ಪಣಿ ಮಾಡ್‌ವಕಾಯಿತ್‌ ಆದಾಮನ ಪಿಂಞ ಅಂವೊಂಡ ಪೊಣ್ಣ್‌ನ ಏದೆನ್‌ ತೋಟತ್‌ಂಜ ಪೊರಮೆ ಅಯಿಚಿರ್‌ತ್‌

²⁴ಅಯಿಂಗಳ ಏದೆನ್‌ ತೋಟತ್‌ಂಜ ಓಡಿಚಿಟ್ಟ ಪಿಂಞ, ಏದೆನ್‌ ತೊಟತ್‌ರ ಕ್‍ೕಕ್‌ ದಿಕ್ಕ್‌ಲ್‌ ಕೆರೂಬಿಯಂಗಳ ಪಿಂಞ ಬೀಜುವ ಮಿನ್ನಿಯಂಡಿಪ್ಪ ಕತ್ತಿನ, ಜೀವ ತಪ್ಪ ಮರತ್‌ರ ಪಕ್ಕ ಪೋಪ ಬಟ್ಟೇನೆ ಕಾಪಕಾಯಿತ್‌ ಬೆಚ್ಚತ್.