Read Kodava ಆದ್ಯತ್‌ರ ಪುಸ್ತಕ 30 Bible Online

ಆದ್ಯತ್‌ರ ಪುಸ್ತಕ 30 - Kodava bible

ಆದ್ಯತ್‌ರ ಪುಸ್ತಕ 30

¹ರಾಹೇಲ ಯಾಕೋಬಂಗ್‌ ಮಕ್ಕಳ ಪೆರತಂಗ್‌ ತಾಂಡ ಅಕ್ಕಂಡ ಮೇಲೆ ಒಟ್ಟೆಕಿಚ್ಚ್‌ಪಟ್ಟಿತ್, ಯಾಕೋಬನ ನೋಟ್ಟಿತ್: ನೀನ್‌ ನಾಕ್‍ ಕುಂಞಿ ತಾ, ಇಲ್ಲೇಂಗಿ ನಾನ್‌ ಚತ್ತ್‌ಪೋಪೀಂದ್‌ ಎಣ್ಣ್‌ಚಿ.

²ಯಾಕೋಬ ಅವಡ ಮೇಲೆ ಚೆಡಿ ಮಾಡಿಯಂಡ್: ದೇವ ತಾನೇ ನೀನ್‌ ಕುಂಞಿ ಪೆರತನೆಕೆ ಮಾಡಿತುಂಡ್, ನಾನ್‌ ದೇವನಾಂದ್‌ ಕ್‍ೕಟತ್.

³ಅದ್‌ಂಗ್‌ ರಾಹೇಲ: ನಾಡ ಪಣಿಕಾರ್ತಿಯಳಾನ ಬಿಲ್ಹಾಳ ಉಂಡಲ್ಲಾ, ನೀನ್‌ ಅವಡ ಕೂಡೆ ಕೂಡಿರ್, ಅವ ಮಕ್ಕಳ ಪೆರಡ್, ನಾನ್‌ ಆ ಮಕ್ಕಳ ಚಾಕುವಿ. ನಾನ್‌ ಅವಡ ಮೂಲಕ ಸಹ ನಾಡ ಕುಟುಂಬತ್‌ನ ಕೆಟ್ಟ್‌ವೀಂದ್‌ ಎಣ್ಣಿತ್,

⁴ಅಂವೊಂಗ್‌ ತಾಂಡ ಪಣಿಕಾರ್ತಿಯಳಾನ ಬಿಲ್ಹಾಳ ಪೊಣ್ಣಾಯಿತ್‌ ಕೊಡ್‌ತತ್. ಯಾಹೊಬ ಅವಡ ಕೂಡ ಕೂಡ್‌ಚಿ.

⁵ಅವ ಕೆಲಕಾರ್ತಿಯಾಯಿತ್, ಯಾಕೋಬಂಗ್‌ ಒರ್‌ ಕ್‌ಣ್ಣ ಕುಂಞಿನ ಪೆತ್ತತ್.

⁶ಅಕ್ಕ ರಾಹೇಲ: ಯೆಹೋವನಾನ ದೇವ ನಾಕ್‍ ನ್ಯಾಯ ತಂದಿತ್, ನಾಡ ಮೊರೆನ ಸಹ ಕ್‍ೕಟಿತ್, ನಾಕ್‍ ಒರ್‌ ಮೋಂವೊನ ತಾತ್‍ೕಂದ್‌ ಎಣ್ಣಿತ್, ಆ ಕುಂಞಿಕ್‌ ದಾನ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್.

⁷ರಾಹೇಲಂಡ ಪಣಿಕಾರ್ತಿಯಾನ ಬಿಲ್ಹಾ ಪುನಃ ಕೆಲಕಾರ್ತಿಯಾಯಿತ್‌ ಯಾಕೋಬಂಗ್‌ ದಂಡನೆ ಕ್‌ಣ್ಣ ಕುಂಞಿನ ಪೆತ್ತತ್.

⁸ಅಕ್ಕ ರಾಹೇಲ: ನಾಡ ಅಕ್ಕಂಡ ಕೂಡೆ ಬಲವಾಯಿತ್‌ ಪೋರಾಡಿತ್‌ ಗೆದ್ದಿಯೇಂದ್‌ ಎಣ್ಣಿತ್‌ ಅಂವೊಂಗ್‌ ನಫ್ತಾಲಿ ಎಣ್ಣಿಯಂಡ್‌ ಪೆದ ಬೆಚ್ಚತ್.

⁹ಆ ಸಮಯತ್‌ ಲೇಯಾ ಅವಕ್‌ ಇಂಞು ಮಕ್ಕ ಆಯಂಡಿಲ್ಲೇಂದ್‌ ಗೊತ್ತಾಯಿತ್, ತಾಂಡ ಪಣಿಕಾರ್ತಿಯಾನ ಜಿಲ್ಪಳ ಯಾಕೋಬಂಗ್‌ ಪೊಣ್ಣಾಯಿತ್‌ ಕೊಡ್‌ತತ್.

¹⁰ಲೇಯಾಳಂಡ ಪಣಿಕಾರ್ತಿಯಾನ ಜಿಲ್ಪ ಯಾಕೋಬಂಗ್‌ ಒರ್‌ ಕ್‌ಣ್ಣ ಕುಂಞಿನ ಪೆತ್ತತ್.

¹¹ಅಕ್ಕ ಲೇಯಾ: ನಾಕ್‍ ಅದೃಷ್ಟ ಆಚೀಂದ್‌ ಎಣ್ಣಿತ್‌ ಅಂವೊಂಗ್‌ ಗಾದ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್.

¹²ಅಲ್ಲಿಂಜ ಜಿಲ್ಪ ಯಾಕೋಬಂಗ್‌ ದಂಡನೆ ಕ್‌ಣ್ಣ ಕುಂಞಿನ ಪೆತ್ತತ್.

¹³ಅಕ್ಕ ಲೇಯ: ನಾನ್‌ ಆಶೀರ್ವಾದ ಪಡ್‌ಂದವ, ಬೋರೆ ಪೊಣ್ಣಾಳ್‌ವಳು ನನ್ನ ಆಶೀರ್ವಾದ ಪಡ್‌ಂದವಾಂದ್‌ ಎಣ್ಣ್‌ವಾಂದ್‌ ಎಣ್ಣಿತ್‌ ಅಂವೊಂಗ್‌ ಆಶೇರ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್.

¹⁴ಗೋದಿನ ಕೊಯ್ಯೊ ಸಮಯತ್‌ ರೂಬೇನ ಬೇಲ್‌ಕ್‌ ಪೋಯಿತ್‌ಪ್ಪಕ ಅಲ್ಲಿ ಅಂವೊ [22]ಕಾಮಜನಕ ಪಣ್ಣ್‌ನ ಕಂಡತ್. ಅಂವೊ ಆ ಕಾಮಜನಕ ಪಣ್ಣ್‌ನ ಎಡ್‌ತಂಡ್‌ ಬಂದಿತ್‌ ತಾಂಡ ಅವ್ವಳಾನ ಲೇಯಾಕ್‌ ಕೊಡ್‌ತತ್. ರೂಬೇನ ಆ ಪಣ್ಣ್‌ನ ಲೇಯಾಳಂಗ್‌ ಕೊಡ್‌ಪದ್‌ನ ರಾಹೇಲ ನೋಟಿತ್, ಲೇಯಳಂಗ್: ನೀಡ ಮೋಂವೊ ಎಡ್‌ತ ಬಂದ ಪಣ್ಣ್‌ಲ್‌ ನಾಕ್‍ ಚೆನ್ನ ತಾಂದ್‌ ಬೋಡಿಯಂಡತ್.

¹⁵ಆಚೇಂಗಿ ಲೇಯಾ ಚೆಡಿಲ್: ನೀನ್‌ ನಾಡ ವಡಿಯನ ಎಡ್‌ತಂಡದ್‌ ಸಾದಾರಣ ಕಾರ್ಯವಾ? ಇಕ್ಕ ನೀಕ್‌ ನಾಡ ಮೋಂವೊ ಎಡ್‌ತಂಡ್‌ ಬಂದ ಪಣ್ಣ್‌ ಸಹ ಬೋಂಡುವಾಂದ್‌ ಕ್‍ೕಟತ್. ಅದ್‌ಂಗ್‌ ರಾಹೇಲ: ಅನ್ನನಾಚೇಂಗಿ ನೀಡ ಮೋಂವೊ ಎಡ್‌ತಂಡ್‌ ಬಂದ ಪಣ್ಣ್‌ಕ್ ಬದ್‌ಲ್‌ ಇಂದ್‌ ಬಯಿಟ್ ನಾಡ ವಡಿಯನ ನೀಡ ಕೂಡೆ ಬುದ್ದುವಕ್‌ ಬುಡುವೀಂದ್‌ ಎಣ್ಣ್‌ಚಿ.

¹⁶ಬಯಿಟಾಪಕ ಯಾಕೋಬ ಬೇಲಿಂಜ ಮನೆಕ್‌ ಬಂದಂಡಿಪ್ಪಕ, ಲೇಯಾ ಅಂವೊನ ಕಾಂಬಕ್‌ ಪೋಯಿತ್, ಯಾಕೋಬಂಗ್: ನಾಡ ಮೋಂವೊ ಎಡ್‌ತಂಡ್‌ ಬಂದ ಪಣ್ಣ್‌ನ ಕೊಡ್‌ತಿತ್‌ ನಿನ್ನ ಕ್ರಯಕ್‌ ಎಡ್‌ತಿಯೆ, ಇಂದ್‌ ನೀನ್‌ ನಾಡ ಕೂಡೆ ಬುದ್ದಂಡು. ಅಕ್ಕ ಯಾಕೋಬ ಆ ಬಯಿಟ್ ಅವಡ ಕೂಡೆ ಬುದ್ದಂಡತ್.

¹⁷ಪಿಂಞ ದೇವ ಲೇಯಳಂಡ ಪ್ರಾರ್ಥನೆನ ಕ್‍ೕಟತ್. ಅವ ಪುನಃ ಕೆಲಕಕಾರ್ತಿಯಾಯಿತ್, ಯಾಕೋಬಂಗ್‌ ಅಂಜನೆ ಕ್‌ಣ್ಣ ಕುಂಞಿನ ಪೆತ್ತತ್.

¹⁸ಅಕ್ಕ ಅವ: ನಾನ್‌ ನಾಡ ಪಣಿಕಾರ್ತಿನ ನಾಡ ವಡಿಯಂಗ್‌ ಕೊಡ್‌ತಗುಂಡ್, ದೇವ ನಾಕ್‍ ಪ್ರತಿಫಲ ತಂದಿತ್‍ೕಂದ್‌ ಎಣ್ಣಿತ್, ಅಂವೊಂಗ್‌ ಇಸ್ಸಾಕಾರಾಂದ್‌ ಪೆದ ಬೆಚ್ಚತ್.

¹⁹ಲೇಯಾ ಪುನಃ ಕೆಲಕಾರ್ತಿಯಾಯಿತ್‌ ಯಾಕೋಬಂಗ್‌ ಆರನೇ ಕ್‌ಣ್ಣ ಕುಂಞಿನ ಪೆತ್ತತ್.

²⁰ಅಕ್ಕ ಅವ: ದೇವ ನಾಕ್‍ ನಾಡ ವಡಿಯಂಗಾಯಿತ್‌ ನಲ್ಲ ಇನಾಮ್‌ ತಂದಿತ್. ನಾನ್‌ ಆರ್‌ ಕ್‌ಣ್ಣ ಮಕ್ಕಳ ಪೆತ್ತಂಗ್, ಇಕ್ಕ ನಾಡ ವಡಿಯ ನಾಕ್‍ ಮರ್ಯಾದೆ ತಪ್ಪಾಂದ್‌ ಎಣ್ಣಿತ್, ಅಂವೊಂಗ್‌ ಜೆಬುಲೂನ ಎಣ್ಣಿಯಂಡ್‌ ಪೆದ ಬೆಚ್ಚತ್.

²¹ಅಲ್ಲಿಂಜ ಅವ ಒರ್‌ ಮೂಡಿ ಕುಂಞಿನ ಪೆತ್ತಿತ್, ಆ ಕುಂಞಿಕ್‌ ದೀನಾ ಎಣ್ಣಿಯಂಡ್‌ ಪೆದ ಬೆಚ್ಚತ್.

²²ಇನ್ನನೆ ಇಪ್ಪಕ, ದೇವ ರಾಹೇಲಳ ಗೇನ ಮಾಡಿತ್, ಅವಡ ಪ್ರಾರ್ಥನೆನ ಕ್‍ೕಟಿತ್‌ ಅವ ಕೆಲಕಾರ್ತಿ ಆಪನೆಕೆ ಮಾಡ್‌ಚಿ.

²³ಅವ ಕೆಲಕಾರ್ತಿಯಾಯಿತ್‌ ಒರ್‌ ಕ್‌ಣ್ಣ ಕುಂಞಿನ ಪೆತ್ತತ್. ಅಕ್ಕ ಅವ: ದೇವ ನಾಡ ಅವಮಾನತ್‌ನ ಎಡ್‍ತತ್,

²⁴ಯೆಹೋವ ಇಂಞೊರ್‌ ಕ್‌ಣ್ಣ ಕುಂಞಿನ ನಾಕ್‍ ತಪ್ಪಾಂದ್‌ ಎಣ್ಣಿತ್, ಅಂವೊಂಗ್‌ ಯೋಸೇಫ ಎಣ್ಣಿಯಂಡ್‌ ಪೆದ ಬೆಚ್ಚತ್.

²⁵ರಾಹೇಲ ಯೋಸೇಫನ ಪೆತ್ತ ಪಿಂಞ ಯಾಕೋಬ ಲಾಬಾನಂಗ್: ನಾನ್‌ ನಾಡ ದೇಶತ್‌ಲ್‌ ಉಳ್ಳ ನಾಡ ಸ್ವಂತ ಊರ್‌ಕು ಪೋಪಕ್‌ ಅನುಮತಿ ಕೊಡ್.

²⁶ನಾನ್‌ ಕೆಲಸ ಮಾಡಿತ್‌ ಸಂಪಾದನೆ ಮಾಡ್‌ನ ನಾಡ ಪೊಮ್ಮಕ್ಕಳ ಪಿಂಞ ಮಕ್ಕಳ ನಾಕ್‍ ತಾ. ನಾನ್‌ ಪೋಪಿ. ನಾನ್‌ ನೀಡ ಪಕ್ಕ ಎನ್ನನೆ ಕೆಲಸ ಮಾಡಿಯೇಂದ್‌ ನೀಕ್‌ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ.

²⁷ಆಚೇಂಗಿ ಲಾಬಾನ: ನೀಡ ಕಣ್ಣ್‌ಲ್‌ ನಾಕ್‍ ದಯೆ ಕ್‌ಟ್ಟಿತುಂಡೇಂಗಿ ನನ್ನ ಬುಟ್ಟಿತ್‌ ಪೋಕತೆ. ನೀಡಗುಂಡ್‌ ಯೆಹೋವ ನನ್ನ ಆಶೀರ್ವಾದ ಮಾಡಿತುಂಡ್‍ೕಂದ್‌ ನಾಕ್‍ ಸೂಷ್ಮತ್‌ಲ್‌ ಗೊತ್ತುಂಡ್‍ೕಂದ್‌ ಎಣ್ಣ್‌ಚಿ.

²⁸ಪುನಃ ಅಂವೊ: ನಾನ್‌ ನೀಕ್‌ ಎಚ್ಚಕ್‌ ಸಂಬಳ ತರಂಡೂಂದ್‌ ಎಣ್ಣ್, ಅದನ ತಪ್ಪೀಂದ್‌ ಎಣ್ಣ್‌ಚಿ.

²⁹ಅದ್‌ಂಗ್‌ ಯಾಕೋಬ: ನಾನ್‌ ನೀಕ್‌ ಮಾಡ್‌ನ ಕೆಲಸವು, ನಾಡ ಆರೈಕೆಲ್‌ ನೀಡ ಎತ್ತ್‌ಕಡ್‌ಚಿಯ ಜಾಸ್ತಿ ಆನದು ನೀಕ್‌ ಗೊತ್ತುಂಡ್.

³⁰ನಾನ್‌ ಬಪ್ಪಕ್‌ ಮಿಂಞ ನೀಡ ಪಕ್ಕ ಚೆನ್ನಂಗೇ ಇಂಜತ್. ನಾನ್‌ ಬಂದ ಪಿಂಞ ಯೆಹೋವ ನಿನ್ನ ಆಶೀರ್ವಾದ ಮಾಡ್‌ನಗುಂಡ್‌ ಅದ್‌ ದುಂಬ ಜಾಸ್ತಿ ಆಯಿತುಂಡ್. ಎಕ್ಕ ನಾನ್‌ ನಾಡ ಕುಟುಂಬಕಾಯಿತ್‌ ಸಂಪಾದನೆ ಮಾಡಡ್‍ೕಂದ್‌ ಕ್‍ೕಟತ್.

³¹ಅದ್‌ಂಗ್‌ ಲಾಬಾನ: ನಾನ್‌ ನೀಕ್‌ ಎಂತ ತರಂಡೂಂದ್‌ ಎಣ್ಣ್‍ೕಂದ್‌ ಎಣ್ಣ್‌ಚಿ. ಯಾಕೋಬ: ನಾಕ್‍ ನೀನ್‌ ಒಂದೂ ತರಂಡ. ನಾನ್‌ ಎಣ್ಣ್‌ವನೆಕೆ ನೀನ್‌ ಮಾಡ್‌ಚೇಂಗಿ, ನೀಡ ಎತ್ತ್‌ಕಡ್‌ಚಿಯಳ ನಾನ್‌ ಕಾಪಿ.

³²ಅದ್‌ ಎಂತ ಎಣ್ಣ್‌ಚೇಂಗಿ, ನಾನ್‌ ಇಂದ್‌ ನೀಡ ಕೊಟ್ಟ್‌ಕ್‌ ಪೋಯಿತ್, ಪ್ರತಿಯೊರ್‌ ಚುಕ್ಕೆ ಮಚ್ಚೆ ಉಳ್ಳ ಆಡ್‌ವಳ ಪಿಂಞ ಪ್ರತಿಯೊರ್‌ ಕರ್ತ ಕೊರಿಯಳ ಬೋರೆ ಮಾಡ್‌ವಿ. ಈ ಪ್ರಾಣಿಯಳ ನಾಕ್‍ ಸಂಬಳವಾಯಿತ್‌ ತಾಂದ್‌ ಎಣ್ಣ್‌ಚಿ.

³³ಇಂಞು ಮಿಂಞಕ್‌ ನೀನ್‌ ಬಂತ್‌ ಪರೀಕ್ಷೆ ಮಾಡ್‌ವಕ ನಾನ್‌ ಪ್ರಾಮಾಣಿಕನಾ ಅಥವ ಪ್ರಾಮಾಣಿಕ ಅಲ್ಲತ ಮನುಷ್ಯನಾಂದ್‌ ನೀಕ್‌ ಗೊತ್ತಾಪ. ನಾಡ ಪಕ್ಕ ಚುಕ್ಕೆ ಮಚ್ಚೆ ಉಳ್ಳ ಆಡ್‌ವಳ ಇಲ್ಲತೆ ಪೋಚೇಂಗಿ ಕರ್ತ ಕೊರಿಯಳ ನೀನ್‌ ಕಂಡತೇಂಗಿ, ಅದ್‌ನ ನಾನ್‌ ಕಟ್ಟಂಡಿಯೇಂದ್‌ ನೀನ್‌ ಗೇನ ಮಾಡಲೂಂದ್‌ ಎಣ್ಣ್‌ಚಿ.

³⁴ಅದ್‌ಂಗ್‌ ಲಾಬಾನ: ನೀನ್‌ ಎಣ್ಣ್‌ನನೆಕೆ ಆಡ್‍ೕಂದ್‌ ಎಣ್ಣ್‌ಚಿ.

³⁵ಅದೇ ದಿವಸ ಲಾಬಾನ ಪೋಯಿತ್‌ ಚುಕ್ಕೆಮಚ್ಚೆ ಉಳ್ಳ ಕೊಬಾಡ್‌ ಪಿಂಞ ಪೊಣ್ಣಾಡ್‌ ಪಿಂಞ ಎಲ್ಲಾ ಕರ್ತ ಕೊರಿಯಳ ಬೋರೆ ಮಾಡಿತ್, ತಾಂಡ ಕ್‌ಣ್ಣ ಮಕ್ಕಕ್‌ ಒಪ್ಪ್‌ಚಿಟ್ಟತ್.

³⁶ಲಾಬಾನ ಯಾಕೋಬಂಡ ಜಾಗತ್‌ಂಜ ಮೂಂದ್‌ ದಿವಸ ಪ್ರಯಾಣ ಮಾಡ್‌ವ ದೂರಕ್‌ ಅಟ್ಟಿಯಂಡ್‌ ಪೋಚಿ. ಯಾಕೋಬ ಅಲ್ಲಿಯೇ ಇಂಜಿತ್‌ ಲಾಬಾನಂಡ ಬೋರೆ ಕೊರಿಯಳ ಪಿಂಞ ಆಡುವಳ ಕಾತಂಡಿಂಜತ್.

³⁷ಇಕ್ಕ ಯಾಕೋಬ ಲಿಬ್‌ನೆ, ಬಾದಾಮಿ, ಅರ್ಮೋನ್‌ ಎಣ್ಣ್‌ವ ಮರತ್‌ರ ಪಚ್ಚೆ ಕೊಂಬೆನ ಪೊಳ್‌ಚಿತ್, ಎಡೆಕ್ಕೆಡೆಲ್‌ ಒಳ್‌ಲ್‌ರ ಬೊಳ್‌ಪು ಪೊರಮೆ ಕಾಂಬನೆಕೆ ಪಟ್ಟೆಪಟ್ಟೆಯಾಯಿತ್‌ ತೋಲ್‌ಚತ್.

³⁸ಆ ಕೊಂಬೆಯಳ ಯಾಕೋಬ ಆಡ್‌ ಪಿಂಞ ಕೊರಿಯಕ್‌ ಕಾಂಬನೆಕೆ ನೀರ್‌ ಉಳ್ಳ ಜಾಗತ್‌ರ ಸುತ್ತ್‌ಲ್‌ ಅಟ್ಟ್‌ಚಿ. ಪ್ರಾಣಿಯ ನೀರ್‌ ಕುಡಿಪ್ಪಕ್‌ ಬಪ್ಪಕ ಆ ಜಾಗತ್‌ ಅವು ಒಂದಾಪಯಿಂಜತ್.

³⁹ಅಲ್ಲಿ ಪಟ್ಟೆ ಉಳ್ಳ ಕೊಂಬೆರ ಮಿಂಞತ್‌ ಆ ಪ್ರಾಣಿಯ ಒಂದಾಪಕ, ಆ ಪ್ರಾಣಿಯಕ್‌ ಪುಟ್ಟ್‌ನ ಮರಿಯಳು ಪಟ್ಟೆಯಾಯಿತ್‌ ಚುಕ್ಕೆಮಚ್ಚೆ ಉಳ್ಳನೆಕೆ ಪುಟ್ಟ್‌ಚಿ.

⁴⁰ಯಾಕೋಬ ಆ ಕುಟ್ಟಿಯಳೆಲ್ಲ ಲಾಬಾನಂಡ ಹಿಂಡ್‌ಯಿಂಜ ಬೋರೆ ಮಾಡಿತ್‌ ತಾಂಡ ಪ್ರಾಣಿಯಡ ಕೂಡೆ ಕೂಟ್‌ಚಿ. ಆಚೇಂಗಿ ಲಾಬಾನಂಡ ಪ್ರಾಣಿಯ ಒಂದಾಪ ನೇರತ್‌ಲ್‌ ಕೊಂಬೆರ ಪಟ್ಟಿಯಳ ನೋಟೊನೆಕೆ ಮಾಡ್‌ಚಿ.

⁴¹ಇದಲ್ಲತೆ ನಲ್ಲ ಆರೋಗ್ಯತ್‌ಲ್‌ ಉಳ್ಳ ಪ್ರಾಣಿಯ ಒಂದಾಪಕ, ಯಾಕೋಬ ಆ ಕೊಂಬೆಯಳ ಅಯಿಂಗಡ ಮಿಂಞತ್‌ ನೀರ್‌ರ ಪಕ್ಕ ಬೆಪ್ಪಯಿಂಜತ್.

⁴²ಆಚೇಂಗಿ ಬಲಯಿಲ್ಲತ ಪ್ರಾಣಿಯಕ್‌ ಕೊಂಬೆನ ಬೆಪ್ಪಯಿಂಜಿತ್‌ಲೆ. ಅನ್ನನೆ ಬಲಯಿಲ್ಲತ ಕೊರಿಯ ಲಾಬಾನಂಡ ಬಾಗಕ್, ಬಲವುಳ್ಳದ್‌ ಯಾಕೋಬಂಡ ಬಾಗಕ್‌ ಬಾತ್.

⁴³ಯಾಕೋಬ ಬಲ್ಯ ಸೊತ್ತ್‌ರ ಎಜಮಾನನಾಚಿ. ಅಂವೊಂಗ್‌ ಬೋಂಡಿಯಚ್ಚಕ್‌ ಕೊರಿಯ, ಆಡ್‌ವ, ಒಂಟೆಕತ್ತೆಯ ಪಿಂಞ ಪಣಿಕಾರಂಗ ಇಂಜತ್.