Read Kodava ಆದ್ಯತ್‌ರ ಪುಸ್ತಕ 31 Bible Online

ಆದ್ಯತ್‌ರ ಪುಸ್ತಕ 31 - Kodava bible

ಆದ್ಯತ್‌ರ ಪುಸ್ತಕ 31

¹ಪಿಂಞ ಲಾಬಾನಂಡ ಕ್‌ಣ್ಣ್‌ ಮಕ್ಕ: ನಂಗಡ ಅಪ್ಪಂಡ ಆಸ್ತಿನೆಲ್ಲ ಯಾಕೋಬ ಎಡ್‌ತಂಡತ್‍ೕಂದು, ನಂಗಡ ಅಪ್ಪಂಡ ಆಸ್ತಿಯಿಂಜಲೇ ಅಂವೊ ಇಚ್ಚಕ್‌ ಐಶ್ವರ್ಯವಂತಂವೊನಾಚೀಂದು ಜನ ತಕ್ಕ್‌ ಪರಿವದ್‌ನ ಯಾಕೋಬಂಡ ಕೆಮಿಕ್‌ ಬುದ್ದತ್.

²ಇದಲ್ಲತೆ ಯಾಕೋಬ ಲಾಬಾನಂಡ ಮೂಡ್‌ನ ನೋಟ್‌ವಕ, ದಂಡ್‌ ಮೂಂದ್‌ ದಿವಸಕ್‌ ಮಿಂಞ ಇಂಜನೆಕೆ ಇಲ್ಲತೆ, ಯಾಕೋಬಂಡ ವಿಷಯತ್‌ ಅಂವೊಂಡ ಗುಣ ಇಕ್ಕ ಬದ್‌ಲಾಯಿಪ್ಪದ್‌ನ ಕಂಡತ್.

³ಅಕ್ಕ ಯೆಹೋವ ಯಾಕೋಬಂಗ್: ನೀನ್‌ ನೀಡ ಅಪ್ಪಂಡ ದೇಶಕು ನೀಡ ಬೆಂದ್‌ಕಡ ಪಕ್ಕವು ತಿರಿತ್‌ ಪೋ. ನಾನ್‌ ನೀಡ ಕೂಡೆ ಇಪ್ಪೀಂದ್‌ ಎಣ್ಣ್‌ಚಿ.

⁴ಅಕ್ಕ ಯಾಕೋಬ, ರಾಹೇಲ ಪಿಂಞ ಲೇಯಾಳ, ಅಂವೊ ಆಡ್‌ಕೊರಿಯಳ ಮೇಯಿಚಿಟ್ಟಂಡಿಂಜ ಬೇಲ್‌ಕ್‌ ಕಾಕ್‌ಚಿಟ್ಟಿತ್,

⁵ಅಯಿಂಗಳ ನೋಟಿತ್: ನಿಂಗಡ ಅಪ್ಪ ಮಿಂಞತ್‌ರನೆಕೆ ಇಲ್ಲೆ. ನಾಡ ವಿಷಯತ್‌ ಅಂವೊಂಡ ಗುಣ ದಂಡ್‌ ಮೂಂದ್‌ ದಿವಸಕ್‌ ಮಿಂಞ ಇಂಜನೆಕೆ ಇಲ್ಲತೆ ಬದ್‌ಲಾಯಿತ್‌ ಉಳ್ಳದ್‌ನ ಕಂಡಂಡುಳ್ಳ. ಆಚೇಂಗಿ ನಾಡ ಅಪ್ಪಂಡ ದೇವ ನಾಡ ಕೂಡೆ ಉಂಡ್.

⁶ನಾನ್‌ ಎಚ್ಚಕ್‌ ಕಷ್ಟಪಟ್ಟಿತ್‌ ನಿಂಗಡ ಅಪ್ಪಂಗ್‌ ಸೇವೆ ಮಾಡಿಯೇಂದ್‌ ನಿಂಗಕ್‌ ಗೊತ್ತುಂಡ್.

⁷ಆಚೇಂಗಿ ನಿಂಗಡ ಅಪ್ಪ ನಾಕ್‍ ಮೋಸ ಮಾಡಿತ್‌ ಪತ್ತ್‌ ಕುರಿ ನಾಡ ಸಂಬಳತ್‌ನ ಬದ್‌ಲ್‌ ಮಾಡಿತ್. ಆಚೇಂಗಿಯು ಅಂವೊ ನಾಕ್‍ ಏದ್‌ ಕ್‍ೕಡು ಮಾಡ್‌ವಕ್‌ ದೇವ ಬುಟ್ಟಿತ್‌ಲ್ಲೆ.

⁸ಅಂವೊ ಚುಕ್ಕೆಮಚ್ಚೆ ಉಳ್ಳ ಪ್ರಾಣಿಯ ನೀಡ ಸಂಬಳಾಂದ್‌ ಎಣ್ಣ್‌ವಕ, ಎಲ್ಲಾ ಚುಕ್ಕೆಮಚ್ಚೆಯಾಯಿತ್‌ ಪುಟ್ಟ್‌ಚಿ. ಅಂವೊ ಮನಸ್ಸ್‌ ಬದ್‌ಲಾಯಿಚಿಟ್ಟಿತ್, ಪಟ್ಟಿಪಟ್ಟೆಯಾಯಿತ್‌ ಉಳ್ಳ ಕೊರಿಯ ನೀಡದ್‍ೕಂದ್‌ ಎಣ್ಣ್‌ವಕ, ಎಲ್ಲಾ ಕೊರಿಯ ಪಟ್ಟೆಪಟ್ಟೆಯಾಯಿತ್‌ ಪುಟ್ಟ್‌ಚಿ.

⁹ಇನ್ನನೆ ದೇವ ನಿಂಗಡ ಅಪ್ಪಂಡ ಆಡ್‌ಕೊರಿಯಳ ಅಂವೊಡಿಂಜ ಎಡ್‌ತಿತ್‌ ನಾಕ್‍ ಕೊಡ್‌ತತ್.

¹⁰ಆಡ್‌ವ ಕೂಡ್‌ವ ಸಮಯತ್‌ ನಾಡ ಸ್ವಪ್ನತ್‌ಲ್‌ ನಾನ್‌ ಕಣ್ಣೆಡ್‌ತಿತ್‌ ನೋಟ್‌ವಕ ಅವು ಎಲ್ಲಾ ಕೋಬಾಡು ಪಟ್ಟೆಯಾಯಿತ್, ಚುಕ್ಕೆಮಚ್ಚೆಯಾಯಿತ್‌ ಉಳ್ಳದ್‌ನ ಕಂಡ.

¹¹ಪಿಂಞ ಆ ಸ್ವಪ್ನತ್‌ಲ್‌ ದೇವದೂತ ಒಬ್ಬ: ಯಾಕೋಬಾಂದ್‌ ಕಾಕ್‌ಚಿ. ಅದ್‌ಂಗ್‌ ನಾನ್: ಇದಾ, ಇಲ್ಲಿ ಉಳ್ಳಂದ್‌ ಎಣ್ಣ್‌ನ.

¹²ಅಕ್ಕ ದೇವದೂತ: ನೀನ್‌ ಕಣ್ಣೆಡ್‌ತಿತ್‌ ನೋಟ್, ಪೊಣ್ಣ್‌ ಆಡ್‌ರ ಕೂಡೆ ಕೂಡುವ ಕೋಬಾಡೆಲ್ಲ ಕಲ್‌ಪ್‌ ರಂಗ್‌ ಉಳ್ಳದು, ಚುಕ್ಕೆಮಚ್ಚೆ ಉಳ್ಳದು, ಪಟ್ಟೆ ಉಳ್ಳದು ಆಯಿತುಂಡ್. ಲಾಬಾನ ನೀಕ್‌ ಮಾಡ್‌ನದ್‌ ಎಲ್ಲಾನ ನಾನ್‌ ಕಂಡ.

¹³ನೀನ್‌ ಒರ್‌ ಕಂಬತ್‌ರ ಮೇಲೆ ಎಣ್ಣೆ ಬೂಕಿತ್‌ ನಾಕ್‍ ಒರ್‌ ಪರಕೆನ ಮಾಡ್‌ನ ಬೇತೇಲ್‌ಲ್‌ ಕಾಂಬ್‌ಚಿಟ್ಟ ದೇವ ನಾನೇ. ಇಕ್ಕ ನೀನ್‌ ಎದ್ದಿತ್, ಈ ದೇಶತ್‌ನ ಬುಟ್ಟಿತ್, ಪೊರ್‌ಟಿತ್‌ ನೀಡ ಜನ ಉಳ್ಳ ನೀನ್‌ ಪುಟ್ಟ್‌ನ ದೇಶಕ್‌ ತಿರಿತ್‌ ಪೋಂದ್‌ ಎಣ್ಣ್‌ಚಿ.

¹⁴ಅದ್‌ಂಗ್‌ ರಾಹೇಲ ಪಿಂಞ ಲೇಯಾಳ: ನಂಗಡ ಅಪ್ಪ್‌ಂಡ ಮನೆಲ್, ನಂಗಕ್‌ ಇಂಞು ಎಂತ ಪಾಲ್‌ ಬಾಗ ಉಂಡ್?

¹⁵ಅಂವೊ ನಂಗಳ ಪರದೇಶಿಯಂಡನೆಕೆ ಕಾಂಬಲ್ಲಾ. ಅಂವೊ ನಂಗಳ ಮಾರಿತ್, ಅದಲ್‌ ಬಂದ ದುಡ್ಡ್‌ನ ಸಹ ಕರ್ಚ್‌ ಮಾಡಿರ್‌ತ್.

¹⁶ಆನಗುಂಡ್‌ ದೇವ ನಂಗಡ ಅಪ್ಪಂಡಲ್ಲಿಂಜ ಎಡ್‌ತ ಆಸ್ತಿನೆಲ್ಲ ನಂಗಕು ನಂಗಡ ಮಕ್ಕಕು ಆಪ. ಇನ್ನನೆ ಇಪ್ಪಕ, ದೇವ ನೀಕ್‌ ಎಣ್ಣ್‌ನನೆಕೆ ನೀನ್‌ ಮಾಡ್‍ೕಂದ್‌ ಉತ್ತರ ಕೊಡ್‌ತತ್.

¹⁷ಅಕ್ಕ ಯಾಕೋಬ ತಾಂಡ ಮಕ್ಕಳ ಪಿಂಞ ಪೊಂಗಳ ಒಂಟೆರ ಮೇಲೆ ಪತ್ತ್‌ಚಿಟ್ಟಿತ್,

¹⁸ತಾನ್‌ ವಾಸಮಾಡ್‌ನ ಪದ್ದನ್‌ ಅರಾಮ್‌ ದೇಶತ್‌ಲ್‌ ಸಂಪಾದನೆ ಮಾಡ್‌ನ ಎಲ್ಲಾ ವಸ್ತುನ ಎಡ್‌ತಂಡ್‌ ಪಿಂಞ ಎಲ್ಲಾ ಎತ್ತ್‌ಕಡ್‌ಚಿಯಳ ತಾಂಡ ಮಿಂಞತ್‌ ಅಟ್ಟಿಯಂಡ್‌ ತಾಂಡ ಅಪ್ಪ ಇಸಾಕ ವಾಸ ಮಾಡಿಯಂಡಿಂಜ ಕಾನಾನ್‌ ದೇಶಕ್‌ ಪೊರ್‌ಟತ್.

¹⁹ಲಾಬಾನ ತಾಂಡ ಕೊರಿಯಡ ರೋಮತ್‌ನ ಕತ್ತರಿಚಿಡುವಕಾಯಿತ್‌ ಪೋಯಿತಿಂಜತ್, ಆ ಸೆಮಯತ್‌ಲ್, ರಾಹೇಲ ತಾಂಡ ಅಪ್ಪಂಡ ಮನೆಯಿಂಜ ಚೆನ್ನ ಮೂರ್ತಿಯಳ ಕಟ್ಟಂಡ್‌ ಅವಡ ಕೂಡೆ ಎಡ್‌ತಂಡ್‌ ಪೋಚಿ.

²⁰ಯಾಕೋಬ ತಾನ್‌ ಓಡಿಪೋಪದ್‌ನ ಅರಾಮ್ಯನಾನ ಲಾಬಾನಂಗ್‌ ಎಣ್ಣತೆ, ದಾರ್‌ಕು ಗೊತ್ತಿಲ್ಲತೆ ಕಳ್ಳತನವಾಯಿತ್‌ ಪೊರ್‌ಟತ್.

²¹ಇನ್ನನೆ ಯಾಕೋಬ ತಾಂಡ ಆಸ್ತಿನೆಲ್ಲಾ ಎಡ್‌ತಂಡ್‌ ಓಡಿಪೊಯಿತ್‌ ಯೂಫ್ರೇಟೀಸ್ ಎಣ್ಣುವ ಒರ್‌ ಬಲ್ಯ ಪೊಳೆನ ದಾಟಿತ್, ಗಿಲ್ಯಾದ ಎಣ್ಣುವ ಕುಂದ್‌ ನಾಡ್‌ರ ಬಟ್ಟೆಲ್‌ ಬಂದ್ರತ್.

²²ಯಾಕೋಬ ಓಡಿಪೋನ ಸುದ್ದಿ, ಮೂಂದ್‌ ದಿವಸ ಆನ ಪಿಂಞ ಲಾಬಾನಂಗ್‌ ಗೊತ್ತಾಚಿ.

²³ಅಂವೊಂಗ್‌ ಗೊತ್ತಾನ ಪಿಂಞ, ಅಂವೊ ತಾಂಡ ಮನೆಕಾರಳ ಕಾಕಿಯಂಡ್, ಅಯಿಂಗಳ ಪುಡಿಪಕ್‌ ಪೊರ್‌ಟತ್. ಏಳ್‌ ದಿವಸ ಆನ ಪಿಂಞ ಗಿಲ್ಯಾದ್‌ ಕುಂದ್‌ಲ್‌ ಅಯಿಂಗಳ ಕಂಡ್‌ ಪುಡ್‌ಚತ್.

²⁴ಆಚೇಂಗಿ ಅಂದ್‌ ಬಯಿಟ್ ದೇವ ಅರಾಮ್ಯನಾನ ಲಾಬಾನಂಗ್‌ ಸ್ವಪ್ನತ್‌ಲ್‌ ಬಂದಿತ್: ನೀನ್‌ ಯಾಕೋಬಂಡ ಕೂಡೆ ನಲ್ಲದ್‌ನ ಮಾತ್‌ರ ತಕ್ಕ್‌ ಪರಿ, ಕ್‍ೕಡ್‌ ಒಂದು ಎಣ್ಣತನೆಕೆ ಎಚ್ಚರ ಎಡ್‌ತಾಂದ್‌ ಎಣ್ಣ್‌ಚಿ.

²⁵ಲಾಬಾನ ಯಾಕೋಬಂಡ ಪಕ್ಕ ಬಪ್ಪಕ, ಯಾಕೋಬ ಗಿಲ್ಯಾದ್‌ ಕುಂದ್‌ಲ್‌ ತಾಂಡ ಗುಡಾರತ್‌ನ ಇಟ್ಟಿತ್‌ಂಜತ್. ಲಾಬಾನ ಪಿಂಞ ಅಂವೊಂಡ ಮನೆಕಾರ ಸಹ ಗಿಲ್ಯಾದ್‌ ಕುಂದ್‌ಲ್‌ ಗುಡಾರ ಇಟ್ಟತ್.

²⁶ಅಕ್ಕ ಲಾಬಾನ ಯಾಕೋಬಂಗ್: ಕಟ್ಟಂಡ್‌ ಪೋಪನೆಕೆ ಪೊರ್‌ಟಿತ್, ನಾಡ ಮೂಡಿ ಮಕ್ಕಳ ಯುದ್ದತ್‌ಲ್‌ ಪುಡ್‌ಚಿತ್‌ ಕೊಂಡಪೋಪ ಕೈದಿಯರನೆಕೆ ಕಾಕಿಯಂಡ್‌ ನೀನ್‌ ಕಳ್ಳತನವಾಯಿತ್‌ ಬಂದಿತುಳ್ಳಂಗ್‌ ಅರ್ಥ ಎಂತ?

²⁷ಎನ್ನಂಗ್‌ ನನ್ನ ಮೋಸ ಮಾಡಿತ್‌ ಕಳ್ಳಂಗಡನೆಕೆ ಓಡಿ ಬಂದಿಯಾ? ನಾಕ್‍ ಗೊತ್ತ್‌ಂಜತೇಂಗಿ ನಾನ್‌ ಕುಶೀಲ್‌ ಆಟ್‌ಪಾಟ್‌ರ ಕೂಡೆ, ಸಂಗೀತಯಿಂಜ ಅಯಿಚಿ ಕೊಡ್‌ಪಕಿಂಜಲ್ಲ.

²⁸ನಾಡ ಮೂಡಿಮಕ್ಕಕು ಮೊಮ್ಮಕ್ಕಕು ಒರ್‌ ಮುತ್ತ್‌ ಕೊಡ್‌ತಿತ್‌ ಅಯಿಪಕ್‌ ನೀನ್‌ ಬುಟ್ಟಿತ್‌ಲ್ಲೆಲ್ಲ? ನೀನ್‌ ಪುಚ್ಚಿ ಕಳಿ ಕಳ್‌ಚಿತುಳ್ಳಿಯ?

²⁹ನಿಂಗಕ್‌ ಕ್‍ೕಡ್‌ ಮಾಡ್‌ವಕ್‌ ನಾಕ್‍ ಶಕ್ತಿ ಉಂಡ್; ಆಚೇಂಗಿ, ನೀಡ ಅಪ್ಪಂಡ ದೇವ ನಾಡ ಸ್ವಪ್ನತ್‌ಲ್‌ ಬಂದಿತ್: ನೀನ್‌ ಯಾಕೋಬಂಡ ಕೂಡೆ ನಲ್ಲದ್‌ನ ಮಾತ್‌ರ ತಕ್ಕ್‌ ಪರಿ, ಕ್‍ೕಡ್‌ ಒಂದು ಎಣ್ಣತನೆಕೆ ಎಚ್ಚರ ಎಡ್‌ತಾಂದ್‌ ಎಣ್ಣ್‌ಚಿ.

³⁰ಇಕ್ಕಲು ನೀಡ ಅಪ್ಪಂಡ ಮನೆಕ್‌ ನೀಕ್‌ ಪೋಪಕ್‌ ದುಂಬ ಕುಶಿ ಉಂಡ್‍ೕಂದ್‌ ನಾಕ್‍ ಗೊತ್ತುಂಡ್, ನೀನ್‌ ಪೋ, ಆಚೇಂಗಿ ನೀನ್‌ ನಾಡ ಮನೇಲ್‌ ಇಂಜ ನಾಡ ಮೂರ್ತಿಯಳ ಎನ್ನಂಗ್‌ ಕಟ್ಟಂಡ್‌ ಬಂದಿಯಾಂದ್‌ ಕ್‍ೕಟತ್.

³¹ಅದ್‌ಂಗ್‌ ಯಾಕೋಬ: ನೀನ್‌ ಎಲ್ಲಿ ನೀಡ ಮೂಡಿಮಕ್ಕಳ ಒತ್ತಾಯ ಮಾಡಿತ್‌ ಎಡ್‌ತೊವಿಯಾಂದ್‌ ಗೇನ ಮಾಡಿತ್‌ ಪೋಡಿಲ್‌ ಪೊರ್‌ಟ್ ಬಂದ.

³²ಆಚೇಂಗಿ ನೀಡ ಮೂರ್ತಿಯಳ ದಾಡ ಕೈಯಿಲ್‌ ಕ್‌ಟ್ಟ್‌ವ ಅಯಿಂಗ ಜೀವಂತವಾಯಿತ್‌ಪ್ಪ್‌ಲೆ. ನೀಡ ವಸ್ತು ಎಂತೇಂಗಿ ನಾಡ ಪಕ್ಕ ಉಂಡೇಂಗಿ, ಅದ್‌ನ ನೀನ್‌ ನಂಗಡ ಬೆಂದ್‌ಕಡ ಮಿಂಞತ್‌ ತ್‍ೕಡ್. ಅನ್ನನೆ ಉಂಡೇಂಗಿ ನೀನ್‌ ಎಡ್‌ತಾಂದ್‌ ಎಣ್ಣ್‌ಚಿ. ಆಚೇಂಗಿ, ರಾಹೇಲ ಅದನ ಕಟ್ಟಂಡ್‌ ಬಂದದ್‌ ಅಕ್ಕ ಯಾಕೋಬಂಗ್‌ ಗೊತ್ತಿಂಜಿತ್‌ಲ್ಲೆ.

³³ಅಕ್ಕ, ಲಾಬಾನ ಯಾಕೋಬಂಡ ಗುಡಾರತ್‌ಲ್, ಲೇಯಾಡ ಗುಡಾರತ್‌ಲ್‌ ಪಿಂಞ ದಂಡ್‌ ಪಣಿಕಾರ್ತಿಯಡ ಗುಡಾರತ್‌ಲ್‌ ತ್‍ೕಡ್‌ಚಿ. ಅಲ್ಲಿ ಅಂವೊಂಗ್‌ ಒಂದು ಕ್‌ಟ್ಟಿತ್‌ಲ್ಲೆ. ಬಯ್ಯ ಅಂವೊ ರಾಹೇಲಂಡ ಗುಡಾರಕ್‌ ಪೋಚಿ.

³⁴ರಾಹೇಲ ಆ ವಿಗ್‌ರಹತ್‌ನೆಲ್ಲ ಎಡ್‌ತಿತ್‌ ಒಂಟೆರ ಚೀಲತ್‌ ಬೆಚ್ಚಿತ್‌ ಅದ್‌ಂಡ ಮೇಲೆ ಅಳ್‌ತಿತ್‌ಂಜತ್. ಲಾಬಾನ ಗುಡಾರತ್‌ರ ಎಲ್ಲಾ ಜಾಗತ್‌ಲು ತ್‍ೕಡ್‌ಚೇಂಗಿಯು ಅದ್‌ ಮಾತ್‌ರ ಕ್‌ಟ್ಟಿತ್‌ಲ್ಲೆ.

³⁵ರಾಹೇಲ ತಾಂಡ ಅಪ್ಪಂಗ್: ಅಪ್ಪ ನಾನ್‌ ನೀಡ ಮಿಂಞತ್‌ಲ್‌ ಎದ್ದಿತ್‌ ನಿಂದಿತ್‌ಲೇಂದ್‌ ಚೆಡಿಮಾಡಿಯೊತೆ. ನಾಕ್‍ ಮುಟ್ಟಾಯಿತ್‌ಂದ್‌ ಎಣ್ಣ್‌ಚಿ. ಅಂವೊ ಚಾಯಿತೆ ತ್‍ೕಡ್‌ಚೇಂಗಿಯು ಅಂವೊಂಗ್‌ ಆ ವಿಗ್‌ರಗ ಒಂಡು ಕ್‌ಟ್ಟಿತ್‌ಲ್ಲೆ.

³⁶ಅಕ್ಕ ಯಾಕೋಬಂಗ್‌ ಚೆಡಿ ಬಂದಿತ್‌ ಲಾಬಾನಂಗ್‌ ಜೋರ್‌ ಮಾಡಿತ್: ನಾನ್‌ ಎಂತ ತಪ್ಪ್‌ ಮಾಡಿಯೆ, ನಾನ್‌ ಎಂತ ವಂಚನೆ ಮಾಡಿಯೆ ಎಣ್ಣಿಯಂಡ್‌ ನನ್ನ ಇನ್ನನೆ ದೌತಿಯಂಡ್‌ ನಾಡ ಬಯ್ಯತ್‌ ಓಡಿ ಬಂದಿಯ?

³⁷ನಾಡ ಸಾಮಾನತ್‌ನೆಲ್ಲಾ ತ್‍ೕಡಿ ನೋಟಿರಲ್ಲ; ನೀಡ ಸಾಮಾನ್‌ ಎಂತ್ತಾಚೇಂಗಿ ಕ್‌ಟ್ಟಿಚಾ? ಅದ್‌ನ ನಂಗ ದಂಡಾಳ್‌ರ ಬೆಂದ್‌ಕಡ ಮಿಂಞತ್‌ ಬೆಯ್ಯಿ. ಅಯಿಂಗಳೇ ನಂಗಡ ಮದ್ಯತ್‌ ನ್ಯಾಯ ತ್‍ೕಕಡ್.

³⁸ನಾನ್‌ ಇರ್ವದ್‌ ಕಾಲ ನೀಡ ಪಕ್ಕ ಇಂಜಲ್ಲಾ. ಆ ಕಾಲತ್‌ಲ್‌ ನೀಡ ಆಡ್‌ ಕೊರಿಯಳ ಚಾಕ್‌ನ. ಅವು ನಲ್ಲ ಕುಟ್ಟಿಯಳ ಪುಟ್ಟ್‌ಚಿಟ್ಟತ್. ಆ ಇರ್ವದ್‌ ಕಾಲತ್‌ ನೀಡ ಹಿಂಡ್‌ಯಿಂಜ ಒರ್‌ ಟಗರ್‌ನ ಸಹ ತಿಂದಿತ್‌ಲ್ಲೆ.

³⁹ಕಾಡ್‌ ಪ್ರಾಣಿಯ ಗಾಯ ಮಾಡ್‌ನ ಕೊರಿ ಆಡ್‌ನ ನೀಡ ಬಾಗಕ್‌ ಇಡತೆ, ಆ ನಷ್ಟತ್‌ನ ನಾನೆ ಎಡ್‌ತಂಡ. ಪೋಲ್ ನೇರತ್‌ ತಪ್ಪಿ ಪೋಚೇಂಗಿಯು, ಬಯಿಟ್ ನೇರತ್‌ ತಪ್ಪಿ ಪೋಚೇಂಗಿಯು, ನಾಡ ಬದ್‌ಲ್‌ ಮಾಡ್‌ವನೆಕೆ ನೀನ್‌ ಮಾಡಿಯೆ.

⁴⁰ಪೋಲ್‌ರ ಬೆದ್, ಬಯಿಟ್‌ರ ಕುಳುರ್‌ಂದ್‌ ನೋಟತೆ ವರ್‌ಕ್‌ ಇಲ್ಲತೆ ನೀಕಾಯಿತ್‌ ನಾನ್‌ ಕಷ್ಟ ಪಟ್ಟಿತ್‌ ಕೆಲಸ ಮಾಡಿಯೆ.

⁴¹ಅಕ್ಕು, ನೀಡ ಕೂಡ ಇರ್ವದ್‌ ಕಾಲ ವಾಸಮಾಡಿಯೆ. ಅದಲ್‌ ಪದಿನಾಲ್‌ ಕಾಲ ನೀಡ ದಂಡ್‌ ಮೂಡಿಮಕ್ಕಳ ಪಡೆಯುವಕಾಯಿತು, ಇಂಞು ಆರ್‌ ಕಾಲ ಆಡ್‌ ಕೊರಿಯಳ ಪಡೆಯುವಕಾಯಿತು ನಾನ್‌ ನೀಕ್‌ ಸೇವೆ ಮಾಡ್‌ನ. ನೀನ್‌ ನಾಡ ಸಂಬಳತ್‌ನ ಪತ್ತ್‌ಕುರಿ ಬದ್‌ಲ್‌ ಮಾಡಿಯ.

⁴²ನಾಡ ಅಪ್ಪಂಡ ದೇವನಾನ ಅಬ್ರಹಾಮಂಡ ದೇವನು, ಇಸಾಕ ಪೋಡಿ ಬೆಚ್ಚಿತ್‌ಂಜ ದೇವನು ನಾಡ ಕೂಡೆ ಇಲ್ಲತೆ ಪೋಯಿತ್‌ಂಜತೇಂಗಿ ನೀನ್‌ ನನ್ನ ಬರಿ ಕೈಲ್‌ ಅಯಿಚಿರುವಯಿಂಜಿಯ. ಆಚೇಂಗಿ ದೇವ ನಾಡ ಕಷ್ಟತ್‌ನ ಪಿಂಞ ನಾನ್‌ ನಯಿಚದ್‌ನ ಕಂಡಾಂಗ್‌ ನಿನ್ನಾಂದ್‌ ಬಯಿಟ್ ದೇವ ನಿನ್ನ ಚೂಕ್‌ಚಿಟ್ಟತ್‍ೕಂದ್‌ ಎಣ್ಣ್‌ಚಿ.

⁴³ಅದ್‌ಂಗ್‌ ಲಾಬಾನ ಯಾಕೋಬಂಗ್: ಈ ಪೊಣ್ಣಾಳ್‌ವ ನಾಡ ಮೂಡಿಮಕ್ಕ, ಈ ಮಕ್ಕ ನಾಡ ಮಕ್ಕ. ಈ ಆಡ್‌ಕೊರಿಯೆಲ್ಲ ನಾಡ ಆಡ್‌ಕೊರಿಯ. ನೀನ್‌ ಕಾಂಬದೆಲ್ಲಾ ನಾಡದ್; ನಾಡ ಮೂಡಿಮಕ್ಕಳಾನ ಈಂಗಳ ಪಿಂಞ ಈಂಗ ಪೆತ್ತ ಮಕ್ಕಳ ನಾನ್‌ ಎಂತ ಮಾಡುವಕಯ್ಯು?

⁴⁴ಇಕ್ಕ ಬಾ, ನಾನ್‌ ನೀನ್‌ ಕೂಡಿತ್‌ ಒರ್‌ ಒಪ್ಪಂದ ಮಾಡಿಯೊನ. ಅದ್‌ ನಾಕು ನೀಕು ಸಾಕ್ಷಿಯಾಯಿತ್‌ಪ್ಪಾಂದ್‌ ಎಣ್ಣ್‌ಚಿ.

⁴⁵ಅಕ್ಕ ಯಾಕೋಬ ಒರ್‌ ಕಲ್ಲ್‌ನ ಎಡ್‌ತಿತ್‌ ಕಂಬವಾಯಿತ್‌ ನಿಪ್ಪ್‌ಚಿಟ್ಟತ್.

⁴⁶ಇಂಞು ಯಾಕೋಬ ತಾಂಡ ಬೆಂದ್‌ಕಡ ಆಣಾಳ್‌ವಕ್: ಕಲ್ಲ್‌ರ ಗುಡ್ಡೆ ಕೂಟೀಂದ್‌ ಎಣ್ಣ್‌ಚಿ. ಅಯಿಂಗ ಎಲ್ಲಾರು ಕಲ್ಲ್‌ನ ಕೂಟಿತ್‌ ಗುಡ್ಡೆ ಮಾಡ್‌ಚಿ. ಅದಾನ ಪಿಂಞ ಅಯಿಂಗೆಲ್ಲಾರು ಕಲ್‌ಲ್‌ ಗುಡ್ಡೆರ ಪಕ್ಕ ಒಕ್ಕಚೆ ಅಳ್‌ತಿತ್‌ ಉಂಡತ್.

⁴⁷ಆ ಕಲ್‌ಲ್‌ ಗುಡ್ಡೆಕ್‌ ಲಾಬಾನ ಯಗರಸಾಹದೂತ ಎಣ್ಣಿಯಂಡ್‌ ಪೆದ ಬೆಚ್ಚತ್. ಯಾಕೋಬ ಅದ್‌ಂಗ್‌ ಗಲೇದ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್.

⁴⁸ಈ ಕಲ್ಲ್‌ರ ಗುಡ್ಡೆ ನಂಗ ಇಂದ್‌ ಮಾಡಿಯಂಡ ಒಪ್ಪಂದಕ್‌ ಸಾಕ್ಷಿಯಾಯಿತ್‌ಪ್ಪಾಂದ್‌ ಲಾಬಾನ ಎಣ್ಣನಗುಂಡ್, ಆ ಕಲ್‌ಲ್‌ ಗುಡ್ಡೆಕ್‌ ಗಲೇದ್‌ ಎಣ್ಣಿಯಂಡೇ ಪೆದ ಕ್‌ಟ್ಟ್‌ಚಿ.

⁴⁹ಪಿಂಞ ಲಾಬಾನ: ನೀನ್‌ ನಾಡ ಮೂಡಿಮಕ್ಕಳ ನೊಂಬಲಮಾಡ್‌ಚೇಂಗಿ, ಇಲ್ಲೆ ಬೋರೆ ಮೂಡಿಯಳ ಮಂಗಲ ಕಯಿಚತೇಂಗಿಯು, ಇಲ್ಲಿ ಕ್‍ೕಪಕ್‌ ದಾರು ಇಲ್ಲತೆ ಪೋಚೇಂಗಿಯು, ಯೆಹೋವನಾನ ದೇವನೇ ನಂಗಡ ಒಪ್ಪಂದಕ್‌ ಸಾಕ್ಷಿಯಾಯಿತ್‌ಪ್ಪಾಂದ್‌ ಎಣ್ಣ್‌ಚಿ.

⁵⁰ಇದಲ್ಲಾತೆ ಅಂವೊ: ನಂಗ ದುಂಬ ದೂರ ಇಪ್ಪಕ, ಯೆಹೋವನೇ ನಂಗಳ ನೋಟಿಯಂಡಿಪ್ಪಾಂದ್‌ ಎಣ್ಣ್‌ನಗುಂಡ್‌ ಅದ್‌ಂಗ್‌ [23]ಮಿಚ್ಪಾ ಎಣ್ಣಿಯಂಡ್‌ ಪೆದ ಕ್‌ಟ್ಟ್‌ಚಿ.

⁵¹ಇಂಞು ಲಾಬಾನ ಯಾಕೋಬನ ನೋಟಿತ್: ನೋಟ್, ಈ ಕಲ್‌ಲ್‌ ಗುಡ್ಡೆನ ಪಿಂಞ ಈ ಕಲ್ಲ್‌ರ ಕಂಬತ್‌ನ ನೀಕು ನಾಕು ಮದ್ಯತ್‌ಲ್‌ ನಾನ್‌ ನಿಪ್ಪ್‌ಚಿಟ್ಟದ್‌ನ ನೋಟ್.

⁵²ಕ್‍ೕಡ್‌ ಮಾಡುವಕ್‌ ನಾನ್‌ ಈ ಕಲ್ಲ್‌ರ ಗುಡ್ಡೆನ ದಾಟಿತ್‌ ನಿನ್ನ ಪಕ್ಕ ಬರತೆ ಇಪ್ಪಕಾಯಿತು, ನೀನ್‌ ಈ ಗುಡ್ಡೆನ ಪಿಂಞ ಕಂಬತ್‌ನ ದಾಟಿತ್‌ ನಾಡ ಪಕ್ಕ ಬರತೆ ಇಪ್ಪಕಾಯಿತು ಈ ಗುಡ್ಡೆಯು ಕಂಬವು ನಂಗ ಮಾಡ್‌ನ ಒಪ್ಪಂದಕ್‌ ಸಾಕ್ಷಿಯಾಯಿತ್‌ ಉಂಡ್.

⁵³ನಂಗಡಲ್ಲಿ ದಾರ್‌ ಕ್‍ೕಡ್‌ ಮಾಡ್‌ವ ಅಯಿಂಗಳ ಅಬ್ರಹಾಮಂಡ ದೇವನು ನಾಹೋರಂಡ ದೇವನು ಪಿಂಞ ಅಯಿಂಗಡ ಮುತ್ತಜ್ಜಂಗಡ ದೇವನು ಆಯಿತುಳ್ಳಂವೊ ನಂಗಳ ನ್ಯಾಯ ತೀಕಡ್. ಅಕ್ಕ ಯಾಕೋಬ ತಾಂಡ ಅಪ್ಪನಾನ ಇಸಾಕ ಬಯಬಕ್ತಿಯಿಂಜ ಸೇವೆ ಮಾಡುವಂವೊಂಡ ಮೇಲೆ ಆಣೆ ಮಾಡ್‌ಚಿ.

⁵⁴ಅಲ್ಲಿಂಜ ಯಾಕೋಬ ಆ ಕುಂದ್ರ ಕೊಡಿಲ್‌ ದೇವಕ್‌ ಬಲಿ ಕೊಡ್‌ತಿತ್, ಉಂಬಕಾಯಿತ್‌ ತಾಂಡ ಬೆಂದ್ವಳ ಕಾಕ್‌ಚಿ. ಅಯಿಂಗ್‌ ಅಂದ್‌ ಬಯಿಟ್ ಆ ಕುಂದ್‌ಲ್‌ ಒಳಿಂಜತ್‌

⁵⁵ಪೊಲಾಕ ಲಾಬಾನ ಬೆರಿಯ ಎದ್ದಿತ್‌ ತಾಂಡ ಮೂಡಿಮಕ್ಕಕು ಮೊಮಕ್ಕಕು ಮುತ್ತ್‌ ಕೊಡ್‌ಪಂಜಿ ಆಶೀರ್ವಾದ ಮಾಡ್‌ಚಿ. ಅಲ್ಲಿಂಜ ಅಂವೊ ತಾಂಡ ಮನೆಕ್‌ ತಿರಿತ್‌ ಪೋಚಿ.