Read Kodava ಆದ್ಯತ್‌ರ ಪುಸ್ತಕ 32 Bible Online

ಆದ್ಯತ್‌ರ ಪುಸ್ತಕ 32 - Kodava bible

ಆದ್ಯತ್‌ರ ಪುಸ್ತಕ 32

¹ಯಾಕೋಬ ಮಿಂಞಕ್‌ ಪ್ರಯಾಣ ಮಾಡಿಯಂಡ್‌ ಪೋಪಕ ದೇವದೂತಂಗ ಅಂವೊಂಡ ಮಿಂಞತ್‌ ಬಾತ್.

²ಅಯಿಂಗಳ ಕಂಡದು ಯಾಕೋಬ: ಇದ್‌ ದೇವಡ ಸೈನ್ಯಾಂದ್‌ ಎಣ್ಣಿತ್, ಆ ಜಾಗಕ್‌ ಮಹನಯಿಮ್‌ ಎಣ್ಣಿಯಂಡ್‌ ಪೆದ ಬೆಚ್ಚತ್.

³ಅಲ್ಲಿಂಜ ಯಾಕೋಬ ಅಂವೊಂಗಿಂಜ ಮಿಂಞ ಎದೋಮ್ಯಂಡ ದೇಶವಾನ ಸೇಯಿರ್‌ ಸೀಮೆಕ್‌ ತಾಂಡ ಅಣ್ಣ ಆನ ಏಸಾವಂಡ ಪಕ್ಕ ತಾಂಡ ಆಳ್‌ನ ಅಯಿಚತ್.

⁴ಅಯಿಂಗಳ ಅಯಿಪಕ: ನಾಡ ಯಜಮಾನನಾನ ನಾಡ ಅಣ್ಣನಾನ ಏಸಾವಂಡ ಪಕ್ಕ ಪೋಯಿತ್, ನೀಡ ಸೇವಕನಾನ ಯಾಕೋಬ ಇಲ್ಲಿಕತ್ತನೆ ನೀಡ ಮಾವನಾನ ಲಾಬಾನಂಡ ಕೂಡೆ ವಾಸ ಮಾಡಿಯಂಡಿಂಜತ್.

⁵ಇಕ್ಕ ಅಂವೊಂಡ ಪಕ್ಕ ಎತ್ತ್, ಕತ್ತೆ, ಕೊರಿ ಪಣಿಕಾರಂಗ ಪಿಂಞ ಪಣಿಕಾರ್ತಿಯ ಎಲ್ಲಾ ಉಂಡ್. ಅಂವೊಂಗ್‌ ನೀಡ ದಯೆ ಕ್‌ಟ್ಟಂಡೂಂದ್‌ ನೀಕ್‌ ಎಣ್ಣ್‌ವಕಾಯಿತ್‌ ನಂಗಳ ನೀಡ ಪಕ್ಕ ಅಯಿಚಿತುಂಡ್‍ೕಂಡ್‍ೕಂದ್‌ ಎಣ್ಣೀಂದ್‌ ಎಣ್ಣ್‌ಚಿ.

⁶ಅಂವೊಂಡ ಸುದ್ದಿನ ಎಡ್‌ತಂಡ್‌ ಪೋನಯಿಂಗ ತಿರಿತ್‌ ಬಂದಿತ್: ನಂಗ ನೀಡ ಅಣ್ಣ ಏಸಾವಂಡ ಪಕ್ಕ ಪೋಯಿತಿಂಜತ್. ಇಕ್ಕ ಅಂವೊ ನಾನೂರ್‌ ಆಣಾಳ್‌ವಡ ಕೂಡೆ ನಿನ್ನ ನೋಟ್‌ವಕ್‌ ಬಂದಂಡುಂಡ್‍ೕಂದ್‌ ಎಣ್ಣ್‌ಚಿ.

⁷ಯಾಕೋಬ ಈ ಸುದ್ದಿನ ಕ್‍ೕಟಿತ್‌ ಬೊತ್ತಿ ಪೋಚಿ. ಅಂವೊ ತಾಂಡ ಕೂಡೆ ಇಂಜ ಜನಳ, ಆಡ್‌ಕೊರಿಯಡ ಹಿಂಡ್‌ನ ಒಂಟೆಯಳ ಎಲ್ಲಾನು ದಂಡ್‌ ಬಾಗ ಮಾಡಿತ್:

⁸ಏಸಾವ ಒರ್‌ ಬಾಗತ್‌ನ ಆಕ್ರಮಣ ಮಾಡ್‌ಚೇಂಗಿಯು, ಇಂಞೊರ್‌ ಬಾಗ ಬಚಾವ್‌ ಆಪಾಂದ್‌ ಗೇನ ಮಾಡ್‌ಚಿ.

⁹ಅಲ್ಲಿಂಜ ಯಾಕೋಬ: ಓ ದೇವ, ನಾಡ ಅಪ್ಪನಾನ ಅಬ್ರಹಾಮಂಡ ದೇವನೇ, ನಾಡ ಅಪ್ಪನಾನ ಇಸಾಕಂಡ ದೇವನೇ, ನಾಡ ದೇಶಕು, ನಾಡ ಬೆಂದ್‌ಕ ಉಳ್ಳ ಜಾಗಕು ತಿರಿತ್‌ ಪೋಂದ್‌ ಎಣ್ಣಿಯ ಯೆಹೋವ ನೀನೆ. ನೀನ್‌ ನಾಕ್‍ ನಲ್ಲದ್‌ನ ಮಾಡ್‌ವಿಯಾಂದ್‌ ತಕ್ಕ್‌ ತಂದಿತುಳ್ಳಿಯ.

¹⁰ನೀಡ ಸೇವಕನಾನ ನಾಡ ಮೇಲೆ ನೀನ್‌ ಕಾಟ್‌ನ ಎಲ್ಲಾ ಪ್ರೀತಿಕು, ನೀನ್‌ ಬೆಚ್ಚಿತುಳ್ಳ ಎಲ್ಲಾ ನಂಬಿಕೆಕು ನಾನ್‌ ಎಚ್ಚಕು ಯೋಗ್ಯನಲ್ಲ . ಮಿಂಞ ನಾನ್‌ ಈ ಯೊರ್ದನ್‌ ಪೊಳೆನ ದಾಟ್‌ವಕ ನಾಡ ಕೈಯಿಲ್‌ ಬರಿ ಕೋಲ್‌ ಮಾತ್‌ರ ಇಂಜತ್. ಇಕ್ಕ ನಾನ್‌ ದಂಡ್‌ ಗುಂಪ್‌ಕ್‌ ಎಜಮಾನನಾಯಿತುಳ್ಳ.

¹¹ಓ ಯೆಹೋವನೇ, ನಾಡ ಅಣ್ಣ ಏಸಾವಯಿಂಜ ನನ್ನ ಕಾಪಾಡ್. ಅಂವೊ ನನ್ನ ಪಿಂಞ ನಾಡ ಪೊಣ್ಣ್‌ ಮಕ್ಕಳ ಕೊಲ್ಲುವಕ್‌ ಬಂದಂಡುಂಡ್‍ೕಂದ್‌ ನಾಕ್‍ ಪೋಡಿ ಆಯಂಡುಂಡ್.

¹²ಆಚೇಂಗಿ ನೀನ್‌ ನಲ್ಲದ್‌ನ ಮಾಡ್‌ವಿಯಾಂದ್‌ ನಾಕ್‍ ತಕ್ಕ್‌ ತಂದಿತುಳ್ಳಿಯ. ಪಿಂಞ ನಾಡ ಸಂತಾನತ್‌ನ ಕಡಕರೆಲ್‌ ಉಳ್ಳ ಮಣತ್‌ರನೆಕೆ ಲೆಕ್ಕ ಮಾಡ್‌ವಕಯ್ಯತಚ್ಚಕ್‌ ಮಾಡ್‌ವಿಯಾಂದ್‌ ತಕ್ಕ್‌ ತಂದಿತುಳ್ಳಿಯಾಂದ್‌ ಪ್ರಾರ್ಥನೆ ಮಾಡ್‌ಚಿ.

¹³ಯಾಕೋಬ ಅಂದ್‌ ಬಯಿಟ್ ಅಲ್ಲಿಯೇ ಒಳಿಂಜಿತ್, ಏಸಾವಂಗ್‌ ಕೊಡ್‌ಪಕ್‌ ಇನಾಮ್‌ನ ತಯಾರ್‌ ಮಾಡ್‌ಚಿ.

¹⁴ಇರ್‌ನೂರ್‌ ಪೊಣ್ಣ್‌ ಆಡ್‌ವಳ, ಇರ್ವದ್‌ ಕೋಬಾಡ್‌ವಳ, ಇರ್‌ನೂರ್‌ ಪೊಣ್ಣ್‌ ಕೊರಿಯಳ, ಇರ್ವದ್‌ ಟಗರ್ವಳ,

¹⁵ನುಪ್ಪದ್‌ ಪಾಲ್‌ ಕೊಡ್‌ಪ ಒಂಟೆಯಳ ಪಿಂಞ ಅದ್‌ಂಡ ಕುಟ್ಟಿಯಳ, ನಾಪ್ಪದ್‌ ಪಯ್ಯುವಳ, ಪತ್ತ್‌ ಎತ್ತ್‌ವಳ, ಇರ್ವದ್‌ ಪೊಣ್ಣ್‌ ಕತ್ತೆಯಳ ಪಿಂಞ ಪತ್ತ್‌ ಆಣ್‍ ಕತ್ತೆಯಳ

¹⁶ಪ್ರತಿಯೋರ್‌ ಗುಂಪ್ನ ಚೆನ್ನ ಚೆನ್ನ ದೂರತ್‌ಲ್‌ ಬೆಚ್ಚಿತ್, ತಾಂಡ ಆಳ್‌ವಡ ಕೈಯಿಲ್‌ ಒಪ್ಪಿಚಿಟ್ಟಿತ್: ಓರೋರ್‌ ಗುಂಪ್‌ಕ್‌ ಮದ್ಯತ್‌ಲ್‌ ಜಾಗ ಬುಟ್ಟಿತ್, ನಾಕಿಂಜ ಮಿಂಞ ಅಟ್ಟಿಯಂಡ್‌ ಪೋಯೀಂದ್‌ ಎಣ್ಣ್‌ಚಿ.

¹⁷ಆದ್ಯವಾಯಿತ್‌ ಪೋಯಂಡಿಂಜಂವೊನ ನೋಟಿತ್: ನೀನ್‌ ಏಸಾವನ ಕಾಂಬಕ, ನೀನ್‌ ದಾಡ ಆಳ್? ನೀನ್‌ ಎಲ್ಲಿಕ್‌ ಪೋಯಂಡುಳ್ಳಿಯ? ಈ ಪ್ರಾಣಿಯ ದಾಡದ್‌ ಎಣ್ಣಿಯಂಡ್‌ ಕ್‍ೕಟತೇಂಗಿ,

¹⁸ನೀನ್: ಇದೆಲ್ಲ ನೀಡ ಸೇವಕನಾನ ಯಾಕೊಂಬಂಗ್‌ ಕೂಡ್‌ನದ್. ಅಂವೊಂಡ ಯಜಮಾನನಾನ ಏಸಾವಂಗ್‌ ಕೊಡ್‌ಪಕ್‌ ಉಳ್ಳ ಇನಾಮ್‌ ಇದ್. ಇದಾ, ಯಾಕೋಬ ಸಹ ನಂಗಡ ಬಯ್ಯತ್‌ ಬಂದಂಡುಂಡ್‍ೕಂದ್‌ ಎಣ್ಣಂಡೂಂದ್‌ ಯಾಕೋಬ ಅಯಿಂಗಕ್‌ ಎಣ್ಣ್‌ಚಿ.

¹⁹ಅನ್ನನೆ ದಂಡನೆ, ಮೂಂದನೆ ಪಿಂಞ ಬಯ್ಯತ್‌ ಪೋಯಂಡಿಂಜ ಎಲ್ಲಾರ್‌ನ ನೋಟಿತ್: ಏಸಾವನ ಕಾಂಬಕ ನಿಂಗೆಲ್ಲಾರು ಇನ್ನನೆ ಎಣ್ಣಂಡು.

²⁰ನೀಡ ಸೇವಕನಾನ ಯಾಕೋಬ ನಂಗಡ ಬಯ್ಯತ್‌ ಬಂದಂಡುಂಡ್‍ೕಂದ್‌ ಎಣ್ಣಂಡೂಂದ್‌ ಆಜ್ಞೆ ಮಾಡ್‌ಚಿ. ಮಿಂಞ ಈ ಇನಾಮ್‌ನ ಅಯಿಚಿತ್, ಅಂವೊನ ಸಮಾದಾನ ಮಾಡಿತ್‌ ಬಯ್ಯ ಏಸಾವಂಡ ಮೂಡ್‌ ನೋಟ್‌ವಿ, ಅಕ್ಕ ಒರ್‌ ಸಮಯ ಅಂವೊ ನನ್ನ ಸ್ವೀಕಾರ ಮಾಡ್‌ವಾಂದ್‌ ಯಾಕೋಬ ಗೇನ ಮಾಡ್‌ಚಿ.

²¹ಅನ್ನನೆ ಅಂವೊಂಡ ಇನಾಮ್‌ ಮಿಂಞ ಪೋಚಿ; ಯಾಕೋಬ ಗುಡಾರತ್‌ಲ್‌ ಆ ಬಯಿಟ್ ಕಯಿಚತ್.

²²ಆ ಬಯಿಟ್ ಎದ್ದಿತ್‌ ಅಂವೊಂಡ ದಂಡ್‌ ಪೊಣ್ಣಾಳ್‌ವಳ, ದಂಡ್‌ ಪಣಿಕಾರ್ತಿಯಳ ಪಿಂಞ ಪನ್ನಂದ್‌ ಮಕ್ಕಳ ಕಾಕಿಯಂಡ್‌ ಯಬ್ಬೋಕ್‌ ಎಣ್ಣುವ ಪೊಳೆನ ದಾಟ್‌ಚಿ.

²³ಅಯಿಂಗಳ ಪೊಳೆರ ಆ ಬರಿಕ್‌ ದಾಟ್‌ಚಿಟ್ಟಪಿಂಞ ಅಂವೊಂಗ್‌ ಕೂಡ್‌ನ ಆಸ್ತಿನೆಲ್ಲ ಅ ಬರಿಕ್‌ ಅಯಿಚತ್.

²⁴ಇದಾನ ಪಿಂಞ ಯಾಕೋಬ ಗುಡಾರತ್‌ ಒಂಟಿಯಾಯಿತ್‌ ದಾರ್‌ ಇಲ್ಲತ ಇಂಜತ್. ಅಕ್ಕ ಒರ್‌ ಮನುಷ್ಯ ಅಂವೊಂಡ ಕೂಡೆ ಪೊಲಾಕಕತ್ತನೆ ಪೋರಾಡ್‌ಚಿ.

²⁵ಆ ಮನುಷ್ಯಂಗ್‌ ಯಾಕೋಬನ ಗೆಲ್ಲ್‌ವಕ್‌ ಕಯ್ಯುಲೇಂದ್‌ ಗೊತ್ತಾಪಕ, ಯಾಕೋಬಂಡ ತೊಡೆರ ಕೀಲ್‌ನ ಮುಟ್ಟ್‌ಚಿ. ಯಾಕೋಬ ಅನ್ನನೆ ಪೋರಾಡ್‌ವಕ ಅಂವೊಂಡ ತೊಡೆ ಕೀಲ್‌ ಬಲ್‌ಚಂಡ್‌ ಬಾತ್.

²⁶ಅಕ್ಕ ಆ ಮನುಷ್ಯ: ಪೊಲಾಕ ಆಚಿ, ನನ್ನ ಪೋಪಕ್‌ ಬುಡ್‍ೕಂದ್‌ ಎಣ್ಣ್‌ಚಿ. ಅಕ್ಕ ಯಾಕೋಬ: ನೀನ್‌ ನನ್ನ ಆಶೀರ್ವಾದ ಮಾಡ್‌ವಕತ್ತನೆ ನಿನ್ನ ಪೋಪಕ್‌ ಬುಡುಲೇಂದ್‌ ಎಣ್ಣ್‌ಚಿ.

²⁷ಆ ಮನುಷ್ಯ: ನೀಡ ಪೆದ ಎಂತಾಂದ್‌ ಕ್‍ೕಪಕ, ಅಂವೊ: ಯಾಕೋಬಾಂದ್‌ ಎಣ್ಣ್‌ಚಿ.

²⁸ಅಕ್ಕ ಆ ಮನುಷ್ಯ: ನೀನ್‌ ದೇವಡ ಕೂಡೆಯು ಮನುಷ್ಯಂಡ ಕೂಡೆಯು ಪೋರಾಡಿತ್‌ ಗೆದ್ದಗುಂಡ್, ನೀಡ ಪೆದ ಇಂಞು ಮಿಂಞಕ್‌ ಯಾಕೋಬಾಂದ್‌ ಇಕ್ಕತೆ ಇಸ್ರಾಯೇಲ್‌ಾಂದ್‌ ಇಪ್ಪಾಂದ್‌ ಎಣ್ಣ್‌ಚಿ.

²⁹ಅಕ್ಕ ಯಾಕೋಬ: ನೀಡ ಪೆದ ಎಂತಾಂದ್‌ ಕ್‍ೕಪಕ, ನೀನ್‌ ಎನ್ನಂಗ್‌ ನಾಡ ಪೆದತ್‌ನ ಕ್‍ೕಪಿಯಾಂದ್‌ ಎಣ್ಣಿತ್‌ ಅಲ್ಲಿ ಅಂವೊನ ಆಶೀರ್ವಾದ ಮಾಡ್‌ಚಿ.

³⁰ಅಕ್ಕ ಯಾಕೋಬ: ನಾನ್‌ ದೇವಡ ಮೂಡ್‌ನ ನೋಟ್‌ನ ಆಚೇಂಗಿಯು, ನಾಡ ಜೀವ ಉಳ್‌ಂಜತಲ್ಲಾಂದ್‌ ಎಣ್ಣಿತ್‌ ಆ ಜಾಗಕ್‌ ಪೆನೀಯೇಲ್‌ಂದ್‌ ಪೆದ ಬೆಚ್ಚತ್.

³¹ತೊಡೆರ ನೊಂಬಲತ್‌ರಗುಂಡ್‌ ಅಂವೊ ಕುಂಟಿಯಂಡ್‌ ಪೆನೀಯೇಲ್‌ ಜಾಗತ್‌ನ ಬುಟ್ಟಿತ್‌ ಪೋಪಕ ಸೂರ್ಯ ಕೊಡಿಕ್‌ ಬಾತ್.

³²ಆ ಮನುಷ್ಯ ಯಾಕೋಬಂಡ ತೊಡೆರೆ ಕೀಲ್‌ರ ನರುನ ಮುಟ್ಟ್‌ನಗುಂಡ್‌ ಇಂದ್‌ ಸಹ ಇಸ್ರಾಯೇಲ್‌ ದೇಶತ್‌ರ ಜನ ತೊಡೆರ ಕೀಲ್‌ರ ನರುನ ಯರ್ಚಿನ ತಿಂಬ್‌ಲೆ.