Read Kodava ಆದ್ಯತ್‌ರ ಪುಸ್ತಕ 34 Bible Online

ಆದ್ಯತ್‌ರ ಪುಸ್ತಕ 34 - Kodava bible

ಆದ್ಯತ್‌ರ ಪುಸ್ತಕ 34

¹ಯಾಕೋಬ ಪಿಂಞ ಲೇಯಾಳ್‌ಕ್‌ ಪುಟ್ಟ್‌ನ ಮೋವಳಾನ ದೀನ, ಒರ್‌ ದಿವಸ ಆ ದೇಶತ್‌ರ ಪೊಣ್ಣಾಳ್‌ವಳ ನೋಟ್‌ವಕ್‌ ಪೊರಮೆ ಬಾತ್.

²ಆಚೇಂಗಿ, ಅಲ್ಲಿಯತ್‌ರ ಪ್ರಭುವಾಯಿತಿಂಜ ಹಿವ್ವಿಯನಾನ ಹಮೋರಂಡ ಮೋಂವೊನಾನ ಶೆಕೆಮ ಅವಳ ಕಂಡಿತ್, ಅವಳ ಕಾಕಿಯಂಡ್‌ ಪೋಯಿತ್‌ ಅವಡ ಕೂಡ ಬುದ್ದಿತ್, ಅವಳ ಅವಮಾನ ಮಾಡ್‌ಚಿ.

³ಅಂವೊಂಡ ಮನಸ್ಸ್‌ ಯಾಕೋಬಂಡ ಮೋವಳಾನ ದೀನಂಡ ಮೇಲೆ ದುಂಬ ಆಸೇಲ್‌ ಇಂಜತ್. ಅಂವೊ ಅವಳ ದುಂಬ ಪ್ರೀತಿ ಮಾಡಿತ್‌ ಅವಡ ಮನಸ್ಸ್‌ನ ಗೆಲ್ಲುವಕ್‌ ಪ್ರಯತ್‌ನಪಟ್ಟತ್.

⁴ಅಂವೊ ತಾಂಡ ಅಪ್ಪನಾನ ಹಮೋರಂಡ ಪಕ್ಕ ಪೋಯಿತ್: ಈ ಮೂಡಿನ ನಾಕ್‍ ಮಂಗಲ ಕಯಿಚಿತಾರೀಂದ್‌ ಕ್‍ೕಟತ್.

⁵ಶೆಕೆಮ ತಾಂಡ ಮೋವಳಾನ ದೀನಳ ಮಾನಕೆಡ್‌ತ್‌ಚೀಂದ್‌ ಯಾಕೋಬಂಗ್‌ ಗೊತ್ತಾಪಕ ಅಂವೊಂಡ ಕ್‌ಣ್ಣ ಮಕ್ಕ ಬೇಲ್‌ಲ್‌ ಎತ್ತ್‌ವಳ ಮೇಯಿಚಿಟ್ಟಂಡಿಂಜತ್. ಅಯಿಂಗೆಲ್ಲಾರು ತಿರಿತ್‌ ಬಪ್ಪಕತ್ತನೆ ಯಾಕೋಬ ಓರ್‌ ತಕ್ಕು ಪರ್‌ಂದಿತ್‌ಲ್ಲೆ.

⁶ಅಕ್ಕಣೆಕ್ ಶೆಕೆಮಂಡ ಅಪ್ಪನಾನ ಹಮೋರ ಯಾಕೋಬಂಡ ಕೂಡೆ ತಕ್ಕ್‌ ಪರಿಯುವಕಾಯಿತ್‌ ಬಾತ್.

⁷ಯಾಕೋಬಂಡ ಕ್‌ಣ್ಣಮಕ್ಕ ಈ ಸುದ್ದಿನ ಕ್‍ೕಟ ಒಡನೆ ಬೇಲ್ಯಿಂಜ ಪೊರಮೆ ಬಾತ್. ಶೆಕೆಮ ಯಾಕೋಬಂಡ ಮೋವಳ ಮಾನಕೆಡ್‌ತಿತ್, ಮಾಡಕಾಗತ ಕೆಲಸತ್‌ನ ಇಸ್ರಾಯೇಲಂಡ ಕುಟುಂಬಕ್‌ ಮಾಡ್‍ನಗುಂಡ್, ಆ ಮನುಷ್ಯಂಗ ಬೇಜಾರ್‌ ಮಾಡಿಯಂಡ್‌ ಅಯಿಂಗಕ್‌ ದುಂಬ ಚೆಡಿ ಬಾತ್.

⁸ಹಮೋರ ಅಯಿಂಗಕ್: ನಾಡ ಮೋಂವೊನಾನ ಶೆಕೆಮ ನಿಂಗಡ ಮೂಡಿನ ದುಂಬ ಪ್ರೀತಿ ಮಾಡಿಯಂಡುಂಡ್. ದಯಬೆಚ್ಚಿತ್‌ ಅವಳ ಅಂವೊಂಗ್‌ ಮಂಗಲ ಕಯಿಚಿತ್‌ ಅಂವೊಂಗ್‌ ಪೊಣ್ಣಾಯಿತ್‌ ಕೊಡೀಂದ್‌ ಕ್‍ೕಟತ್.

⁹ಇದಲ್ಲಾತೆ ಮಂಗಲತ್‍ರ ಮೂಲಕ ನಂಗ ಎಲ್ಲಾರು ಒಂದಾಕನ. ನಿಂಗಡ ಮೂಡಿಯಳ ನಂಗಕ್‌ ತಾರಿ. ನಂಗಡ ಮೂಡಿಯಳ ನಿಂಗ ಎಡ್‌ತೊಳಿ.

¹⁰ನಿಂಗ ಈ ದೇಶತ್‌ಲ್‌ ನಂಗಡ ಮದ್ಯತ್‌ ವಾಸ ಮಾಡಿ. ಈ ದೇಶ ನಿಂಗಡ ಮಿಂಞತ್‌ ಉಂಡ್. ಈ ದೇಶತ್‌ ವಾಸ ಮಾಡಿತ್, ವ್ಯಾಪಾರ ಮಾಡಿತ್, ಆಸ್ತಿನ ಸಂಪಾದನೆ ಮಾಡಿಯೊಳೀಂದ್‌ ಎಣ್ಣ್‌ಚಿ.

¹¹ಶೆಕೆಮ ಆ ಮೂಡಿರ ಅಪ್ಪನ ಪಿಂಞ ಅಣ್ಣಂಗಳ ನೋಟಿತ್: ನಿಂಗಡ ದಯೆ ನಾಕ್‍ ಬೋಂಡು. ನಿಂಗ ಎಂತ ಕ್‍ೕಟತೇಂಗಿಯು ನಾನ್‌ ತಪ್ಪಿ.

¹²ಮೂಡಿಕ್‌ ಕೊಡ್‌ಪಕುಳ್ಳದ್‌ನ ಪಿಂಞ ಕಾಣಿಕೆಯಾಯಿತ್‌ ನಿಂಗ ಎಚ್ಚಕ್‌ ಕ್‍ೕಟತೇಂಗಿಯು ನಾನ್‌ ತಪ್ಪಿ. ಆ ಮೂಡಿನ ಮಾತ್‌ರ ನಾಕ್‍ ಪೊಣ್ಣಾಯಿತ್‌ ತಾರೀಂದ್‌ ಎಣ್ಣ್‌ಚಿ.

¹³ಅಕ್ಕ ಯಾಕೋಬಂಡ ಕ್‌ಣ್ಣ ಮಕ್ಕ ತಂಗಡ ತಂಗೆ ದೀನಳ ಶೆಕೆಮ ಅಶುದ್ದ ಮಾಡ್‌ನಗುಂಡ್‌ ಶೆಕೆಮಂಗು ಅಂವೊಂಡ ಅಪ್ಪನಾನ ಹಮೋರಂಗು ವಂಚನೆಯಿಂಜ ಉತ್ತರ ಕೊಡ್‌ತತ್.

¹⁴ಅಯಿಂಗ: ನಂಗ ಸುನ್ನತಿ ಮಾಡತಯಿಂಗಕ್‌ ನಂಗಡ ತಂಗೆನ ತಪ್ಪಕ್‌ ಕಯ್ಯುಲೆ. ಅನ್ನನೆ ಮಾಡ್‌ಚೇಂಗಿ ಅದ್‌ ನಂಗಕ್‌ ಅವಮಾನವಾಯಿತ್‌ ಇಪ್ಪ.

¹⁵ಆಚೇಂಗಿ ನಿಂಗಡಲ್ಲಿ ಉಳ್ಳ ಎಲ್ಲಾ ಆಣಾಳು ನಂಗಡನೆಕೆ ಸುನ್ನತಿ ಮಾಡ್‌ಚಿಟ್ಟಂಡತೇಂಗಿ, ನಂಗ ಇದ್‌ಂಗ್‌ ಒತ್ತವ.

¹⁶ಅಂದಕ ಮಾತ್‌ರ ನಂಗ ನಂಗಡ ಮೂಡಿಯಳ ನಿಂಗಕ್‌ ತಂದಿತ್, ನಿಂಗಡ ಮೂಡಿಯಳ ನಂಗ ಎಡ್‌ತಿತ್, ನಿಂಗಡ ಕೂಡೆ ವಾಸಯಿಂಜಿತ್, ಒರೇ ಜನವಾಯಿತ್‌ ಇಪ್ಪ.

¹⁷ನಿಂಗ ಸುನ್ನತಿ ಮಾಡ್‌ಚಿಡ್‌ವಕ್‌ ಒತ್ತತೆ ಪೋಚೇಂಗಿ, ನಂಗ ನಂಗಡ ಮೋವಳ ಕಾಕಿಯಂಡ್‌ ಪೋಪಾಂದ್‌ ಎಣ್ಣ್‌ಚಿ.

¹⁸ಅಯಿಂಗಡ ತಕ್ಕ್‌ ಕ್‍ೕಪಕ ಹಮೋರಂಗು, ಅಂವೊಂಡ ಮೋಂವೊನಾನ ಶೆಕೆಮಂಗು ಕುಶಿಯಾಚಿ.

¹⁹ಆ ಬಾಲೆಕಾರಂಗ್‌ ಯಾಕೋಬಂಡ ಮೋವಳಾನ ದೀನಂಡ ಮೇಲೆ ಬಾರಿ ಪ್ರೀತಿ ಇಂಜಗುಂಡ್‌ ಅಯಿಂಗ ಎಣ್ಣ್‌ನ ಕಾರ್ಯತ್‌ನ ಮಾಡ್‌ವಕ್‌ ತಡ ಮಾಡಿತ್‌ಲ್ಲೆ. ಶೆಕೆಮಂಗ್‌ ಅಂವೊಂಡ ಕುಟುಂಬತ್‌ಲ್‌ ದುಂಬ ಮರ್ಯಾದೆ ಕೊಡ್‌ಪಯಿಂಜತ್.

²⁰ಹಮೋರನು ಅಂವೊಂಡ ಮೋಂವೊನಾನ ಶೆಕೆಮನು ಊರ್‌ ಜನ ಕೂಡುವ ಜಾಗತ್‌ ನಿಂದಿತ್‌ ಅಯಿಂಗಡ ಜನಡ ಕೂಡೆ ತಕ್ಕ್‌ ಪರ್‌ಂದಿತ್:

²¹ಆ ಆಣಾಳ್‌ವ ನಂಗಡ ಕೂಡೆ ಸಮಾದಾನತ್‌ಲ್‌ ಉಂಡ್. ಅಯಿಂಗ ನಂಗಡ ನಾಡ್‌ಲ್‌ ಇಂಜಿತ್‌ ವ್ಯಾಪಾರ ಮಾಡಡ್. ಅಯಿಂಗ ಇಲ್ಲಿ ವಾಸಮಾಡುವಕ್‌ ಬೋಂಡಿಯಚ್ಚಕ್‌ ಜಾಗ ನಂಗಡ ಪಕ್ಕ ಉಂಡ್. ಅಯಿಂಗಡ ಮೂಡಿಮಕ್ಕಳ ನಂಗ ಮಂಗಲ ಕಯಿಚಿತ್, ನಂಗಡ ಮೂಡಿಮಕ್ಕಳ ಅಯಿಂಗಕ್‌ ಮಂಗಲ ಕಯಿಚಿತ್‌ ಕೊಡ್‌ಕನ.

²²ಆಚೇಂಗಿ ನಂಗ ಎಂತ ಮಾಡಂಡು ಎಣ್ಣ್‌ಚೇಂಗಿ, ಇಸ್ರಾಯೇಲ್‌ ಜನತ್‌ರನೆಕೆ ನಂಗಡ ಎಲ್ಲಾ ಆಣಾಳ್‌ವಳು ಸುನ್ನತಿ ಮಾಡ್‌ಚಿಟ್ಟಂಡು.

²³ಇದನ ನಂಗ ಮಾಡ್‌ಚೇಂಗಿ, ಅಯಿಂಗಡ ಚಾಕ್‌ ಪ್ರಾಣಿಯ, ಆಸ್ತಿಯೆಲ್ಲಾ ನಂಗಡದಾಪ. ಬಾರಿ, ನಂಗ ಇದ್‌ಂಗ್‌ ಒತ್ತೊನ, ಅಕ್ಕ ಅಯಿಂಗ ನಂಗಡ ಮದ್ಯತ್‌ಲ್‌ ವಾಸ ಮಾಡ್‌ವಾಂದ್‌ ಎಣ್ಣ್‌ಚಿ.

²⁴ಅಕ್ಕ ಹಮೋರ ಪಿಂಞ ಅಂವೊಂಡ ಮೋಂವೊನಾನ ಶೆಕೆಮ ಎಣ್ಣ್‌ನ ತಕ್ಕ್‌ನ ಕ್‍ೕಟಿತ್‌ ಊರ್‌ರ ಪೊರಮೆ ಪೋಪ ಎಲ್ಲಾ ಆಣಾಳ್‌ವ ಸುನ್ನತಿ ಮಾಡ್‌ಚಿಟ್ಟಂಡತ್.

²⁵ಅನ್ನನೆ ಇಪ್ಪಕ, ಮೂಂದನೆ ದಿವಸತ್‌ಲ್‌ ಅಯಿಂಗಕ್‌ ಇಂಞು ನೊಂಬಲ ಇಪ್ಪಕ, ಯಾಕೋಬಂಡ ಕ್‌ಣ್ಣ ಮಕ್ಕಳು, ದೀನಂಡ ಅಣ್ಣಂಗಳು ಆನ ಸಿಮೆಯೋನ ಪಿಂಞ ಲೇವಿ ಎಣ್ಣ್‌ವಯಿಂಗ ದಂಡಾಳು ಕೈಯಿಲ್‌ ಅಯಿಂಗಡ ಬಾಳ್‌ನ ಎಡ್‌ತಂಡ್‌ ದೈರ್ಯತ್‌ಲ್‌ ಬಂದಿತ್, ಆ ಊರ್‌ಕ್‌ ನುಗ್ಗಿತ್‌ ಅಲ್ಲಿ ಉಳ್ಳ ಎಲ್ಲಾ ಆಣಾಳ್‌ವಳ ಕೊಂದತ್.

²⁶ಅಯಿಂಗ ಹಮೋರನ ಪಿಂಞ ಅಂವೊಂಡ ಮೋಂವೊ ಶೆಕೆಮನ ಬಾಳ್‌ಲ್‌ ಕೊಂದಿತ್, ದೀನಳ ಅಯಿಂಗಡ ಮನೆಯಿಂಜ ಕಾಕಿಯಂಡ್‌ ಪೊರ್‌ಟತ್.

²⁷ಆದಲ್ಲತೆ, ಯಾಕೋಬಂಡ ಮಕ್ಕ, ತಂಗಡ ತಂಗೆನ ಮಾನಕೆಡ್‌ತಿತ್‌ ಅಶುದ್ದ ಮಾಡ್‌ನಂಗ್, ಅಲ್ಲಿಕ್‌ ಬಂದಿತ್‌ ಆ ಊರ್‌ನ ಸೂರೆ ಮಾಡಿತ್,

²⁸ಅಯಿಂಗಡ ಆಡ್‌ಕೊರಿಯಳ, ಎತ್ತ್‌ಕಡ್‌ಚಿಯಳ, ಕತ್ತೆಯಳ, ಊರ್‌ಲ್‌ ಪಿಂಞ ಬೇಲ್‌ಲ್‌ ಇಂಜ ಎಲ್ಲಾನ, ಅಯಿಂಗಡ ಕೈಕ್‌ ಕ್‌ಟ್ಟ್‌ನದ್‌ನೆಲ್ಲಾನ ಎಡ್‌ತಂಡ್‌ ಬಾತ್.

²⁹ಪಿಂಞ ಅಯಿಂಗ ಅಲ್ಲಿ ಉಳ್ಳ ಎಲ್ಲಾ ಪೊಣ್ಣಾಳ್‌ವಳ ಮಕ್ಕಳ ಪುಡ್‌ಚಿ ಕೂಟಿತ್, ಮನೆಲ್ ಇಂಜ ಎಲ್ಲಾನ ಲೂಟಿ ಮಾಡ್‌ಚಿ.

³⁰ಅಕ್ಕ ಯಾಕೋಬ ಸಿಮೆಯೋನಂಗು ಲೇವಿಕು: ನಿಂಗ ಈ ದೇಶತ್‌ ವಾಸಮಾಡಿಯಂಡುಳ್ಳ ಕಾನಾನ್ಯ ಪಿಂಞ ಪೆರಿಜೀಯ ಜನಾಂಗತ್‌ ನಾಡ ಪೆದತ್‌ನ ಪಾಳ್‌ ಮಾಡ್‌ನಗುಂಡ್‌ ನನ್ನ ಅಪಾಯತ್‌ಲ್‌ ಬುಟ್ಟಿತುಳ್ಳಿರ. ನಾಕ್‍ ಉಳ್ಳದೇ ಚೆನ್ನ ಜನ. ಅಯಿಂಗೆಲ್ಲ ಕೂಡಿತ್‌ ನಾಡ ವಿರುದ್ದ ಬಾತೇಂಗಿ, ನಾನು ನಾಡ ಕುಟುಂಬವು ಪಾಳಾಯಿ ಪೋಪನೆಕೆ ಆಕ್ರಮಣ ಮಾಡಿತ್‌ ನಂಗ ಎಲ್ಲಾರ್‌ನು ಕೊಂದ್ರುವಲ್ಲಾಂದ್‌ ಎಣ್ಣ್‌ಚಿ.

³¹ಅದ್‌ಂಗ್‌ ಅಯಿಂಗ: ನಂಗಡ ತಂಗೆನ ಒರ್‌ ಚೂಳೆರನೆಕೆ ನಡ್‌ತ್‌ಚಿ ಅಲ್ಲಾಂದ್‌ ಕ್‍ೕಟತ್.