Read Kodava ಆದ್ಯತ್‌ರ ಪುಸ್ತಕ 36 Bible Online

ಆದ್ಯತ್‌ರ ಪುಸ್ತಕ 36 - Kodava bible

ಆದ್ಯತ್‌ರ ಪುಸ್ತಕ 36

²ಏಸಾವ ಕಾನಾನ್ಯರಯಿಂಗಡ ಮೂಡಿಯಳ ಮಂಗಲ ಕಯಿಚತ್. ಅಯಿಂಗ ದಾರ್‌ ಎಣ್ಣ್‌ಚೇಂಗಿ ಹಿತ್ತಿಯ ಜನಕ್‌ ಕೂಡ್‌ನ ಏಲೋನಂಡ ಮೋವಳಾನ ಆದಾಳ, ಹಿವ್ವಿಯ ಜನಕ್‌ ಕೂಡ್‌ನ ಸಿಬಿಯೋನಂಡ ಮೋಂವೊನಾನ ಅನಾಹಂಡ ಮೋವಳಾನ ಒಹೊಲೀಬಾಮ;

³ಪಿಂಞ ಇಷ್ಮಾಯೇಲಂಡ ಮೋವಳು ನೆಬಾಯೋತಂಡ ತಂಗೆಯು ಆನ ಬಾಸೆಮತ ಎಣ್ಣ್‌ವಯಿಂಗಳೇ.

⁴ಆದಾಳ ಏಸಾವಂಗ್‌ ಎಲೀಫಜನ ಪೆತ್ತತ್. ಬಾಸೆಮತ ರೆಗೂವೇಲನ ಪೆತ್ತತ್.

⁵ಒಹೊಲೀಬಾಮ ಯೆಗೂಷನ, ಯಳಾಮನ ಪಿಂಞ ಕೋರಹನ ಪೆತ್ತತ್. ಈಂಗಳೇ ಏಸಾವಂಗ್‌ ಕಾನಾನ್‌ ದೇಶತ್‌ಲ್‌ ಪುಟ್ಟ್‌ನ ಕ್‌ಣ್ಣ ಮಕ್ಕ.

⁶ಏಸಾವ ತಾಂಡ ಪೊಣ್ಣ್‌ ಮಕ್ಕಳ ಪಿಂಞ ಎಲ್ಲಾ ಮನೆಕಾರಳ, ತಾಂಡ ಚಾಕ್‌ ಪ್ರಾಣಿಯಳ, ಕಾನಾನ್‌ ದೇಶತ್‌ಲ್‌ ಸಂಪಾದನೆ ಮಾಡ್‌ನ ಎಲ್ಲಾನ ಎಡ್‌ತಂಡ್‌ ತಾಂಡ ತಮ್ಮಣನಾನ ಯಾಕೋಬ ಇಂಜ ಜಾಗತ್‌ಂಜ ದೂರ ದೇಶಕ್‌ ವಾಸ ಮಾಡ್‌ವಕ್‌ ಪೋಚಿ.

⁷ಅಯಿಂಗ ದಂಡಾಳ್‌ರ ಆಸ್ತಿ ದುಂಬ ಇಂಜನಗುಂಡ್‌ ಅಯಿಂಗ ಒಕ್ಕಚೆ ಇಪ್ಪಕ್‌ ಕಯ್ಯತೆ ಆಚಿ. ಅಯಿಂಗ ಒಕ್ಕಚೆ ಇಪ್ಪಕ ಇಂಜ ಜಾಗ ಅಯಿಂಗಡ ಎತ್ತ್‌ಕಡ್‌ಚಿಯಕ್‌ ಪೋರತೆ ಆಚಿ.

⁸ಇನ್ನನೆ ಆಯಿತ್‌ ಏಸಾವ ಸೇಯೀರ್‌ ಕುಂದ್ರ ಸೀಮೆಕ್‌ ಪೋಯಿತ್‌ ಅಲ್ಲಿಯೇ ವಾಸಮಾಡ್‌ಚಿ. ಏಸಾವಂಗ್‌ ಎದೋಮ ಎಣ್ಣಿಯಂಡ್‌ ಇಂಞೊರ್‌ ಪೆದ ಇಂಜತ್.

⁹ಸೇಯಿರ್‌ ಕುಂದ್ರ ಸೀಮೆಲ್‌ ವಾಸಮಾಡ್‌ನ ಎದೋಮ್ಯ ಜನತ್‌ರ ಮುತ್ತಜ್ಜನಾನ ಏಸಾವಂಡ ವಂಶಾವಳಿ.

¹⁰ಏಸಾವಂಡ ಮಕ್ಕಡ ಪೆದ ಎಂತ ಎಣ್ಣ್‌ಚೇಂಗಿ: ಎಲೀಫಜ, ಏಸಾವಂಡ ಪೊಣ್ಣ್‌ ಆನ ಆದಾಳಂಡ ಮೋಂವೊ. ರೆಗೂವೇಲ, ಏಸಾವಂಡ ಪೊಣ್ಣ್‌ ಆನ ಬಾಸೆಮತಳಂಡ ಮೋಂವೊ.

¹¹ಎಲೀಫಜಂಡ ಮಕ್ಕ ದಾರ್‌ ಎಣ್ಣ್‌ಚೇಂಗಿ: ತೇಮಾನ, ಓಮಾರ, ಚೆಫೋ, ಗತಾಮ, ಕೆನಜ್ ಎಣ್ಣುವಯಿಂಗ.

¹²ತಿಮ್‌ನ ಎಣ್ಣುವವ ಏಸಾವಂಡ ಮೋಂವೊನಾನ ಎಲೀಫಜಂಗ್‌ ಉಪ ಪೊಣ್ಣಾಯಿತಿಂಜಗುಂಡ್‌ ಅಂವೊಂಗ್‌ ಅಮಾಲೇಕನ ಪೆತ್ತತ್. ಈಂಗಳೇ ಏಸಾವಂಡ ಪೊಣ್ಣ್‌ ಆನ ಆದಾಕ್‌ ಪುಟ್ಟ್‌ನ ಮಕ್ಕ.

¹³ರೆಗೂವೇಹಲಂಡ ಮಕ್ಕ ನಹತ್, ಜೆರಹ, ಶಮ್ಮಾ, ಮಿಜ್ಜಾ ಎಣ್ಣುವಯಿಂಗಳೇ. ಈಂಗಳೇ ಏಸಾವಂಡ ಪೊಣ್ಣ್‌ ಆನ ಬಾಸೆಮತಳಂಡ ಮಕ್ಕ.

¹⁴ಸಿಬಿಯೋನಂಡ ಮೋವನಾನ ಆನಾಹಂಡ ಮೋವಳಾನ ಒಹೊಲೀಬಾಮ ಎಣ್ಣುವ ಏಸಾವಂಡ ಪೊಣ್ಣ್, ಯೆಗೂಷ್, ಯಳಾನ, ಕೋರಹ ಎಣ್ಣುವ ಕ್‌ಣ್ಣ ಮಕ್ಕಳ ಏಸಾವಂಗ್‌ ಪೆತ್ತತ್.

¹⁵ಏಸಾವಂಡ ಕ್‌ಣ್ಣ ಮಕ್ಕಯಿಂಜ ಬಂದ ಮುಖ್ಯಸ್ತಂಗ ದಾರ್‌ ಎಣ್ಣ್‌ಚೇಂಗಿ: ಏಸಾವಂಡ ಪೆರಿಯ ಮೋಂವೊನಾನ ಎಲೀಫಜನಿಂಜ ಪುಟ್ಟ್‌ನ ಮಕ್ಕಯಿಂಜ ತೇಮಾನ ಕುಲತ್‌ರ ಮುಖ್ಯಸ್ತ, ಓಮಾರ ಕುಲತ್‌ರ ಮುಖ್ಯಸ್ತ, ಚೆಫೋ ಕುಲತ್‌ರ ಮುಖ್ಯಸ್ತ, ಕೆನಜ್ ಕುಲತ್‌ರ ಮುಖ್ಯಸ್ತ,

¹⁶ಕೋರಹ ಕುಲತ್‌ರ ಮುಖ್ಯಸ್ತ, ಗತಾಮ ಕುಲತ್‌ರ ಮುಖ್ಯಸ್ತ, ಅಮಾಲೇಕ ಕುಲತ್‌ರ ಮುಖ್ಯಸ್ತಂಗಳೇ. ಈಂಗ ಎದೋಮ್ಯಂಡ ದೇಶತ್‌ಲ್‌ ಎಲೀಫಜಂಡ ಸಂತಾನವು, ಆದಾಳಂಡ ಕ್‌ಣ್ಣ ಮಕ್ಕಳು ಆಯಿತ್‌ಂಜ ಮುಖ್ಯಸ್ತಂಗ.

¹⁷ಏಸಾವಂಡ ಮೋಂವೊನಾನ ರೆಗೂವೇಲಂಗ್‌ ಪುಟ್ಟ್‌ನಯಿಂಗ, ನಹತ್‌ ಕುಲತ್‌ರ ಮುಖ್ಯಸ್ತ, ಜೆರಹ ಕುಲತ್‌ರ ಮುಖ್ಯಸ್ತ, ಶಮ್ಮಾ ಕುಲತ್‌ರ ಮುಖ್ಯಸ್ತ, ಮಿಜ್ಜಾ ಕುಲತ್‌ರ ಮುಖ್ಯಸ್ತಂಗಳೇ. ಈಂಗ ಎದೋಮ್ಯಂಡ ದೇಶತ್‌ಲ್‌ ಏಸಾವಂಡ ಪೊಣ್ಣಾನ ಬಾಸೆಮತಳಂಡ ಕ್‌ಣ್ಣ ಮಕ್ಕಳಾಯಿತ್‌ಂಜ ಮುಖ್ಯಸ್ತಂಗ.

¹⁸ಏಸಾವಂಡ ಪೊಣ್ಣಾನ ಒಹೊಲೀಬಾಮಳಂಗ್‌ ಪುಟ್ಟ್‌ನಯಿಂಗ, ಯೆಗೂಷ್ ಕುಲತ್‌ರ ಮುಖ್ಯಸ್ತ, ಯಳಾಮ ಕುಲತ್‌ರ ಮುಖ್ಯಸ್ತ, ಕೋರಹ ಕುಲತ್‌ರ ಮುಖ್ಯಸ್ತಂಗಳೇ. ಈಂಗ ಅನಾಹಂಡ ಮೋವಳು ಏಸಾವಂಡ ಪೊಣ್ಣು ಆಯಿತ್‌ಂಜ ಒಹೊಲೀಬಾಮಳಂಡ ಸಂತಾನವಾಯಿತಂಜ ಮುಖ್ಯಸ್ತಂಗ.

¹⁹ಎದೋಮಾಂದ್‌ ಕಾಕುವ ಏಸಾವಯಿಂಜ ಪುಟ್ಟ್‌ನ ಕುಲಕೆಲ್ಲಾ ಈಂಗಳೇ ಮುಖ್ಯಸ್ತಂಗ.

²⁰ಆ ದೇಶತಲ್‌ ವಾಸಯಿಂಜ ಹೋರಿಯನಾನ ಸೇಯಿರಂಗ್‌ ಪುಟ್ಟ್‌ನಯಿಂಗ ದಾರ್‌ ಎಣ್ಣ್‌ಚೇಂಗಿ: ಲೋಟಾನ್, ಶೋಬಾಲ್, ಸಿಬೆಯೋನ್, ಅನಾಹ,

²¹ದೀಶೋನ್, ಏಚೆರ್‌ ಎಣ್ಣುವಯಿಂಗಳೇ. ಈಂಗಳೇ ಎದೋಮ್ಯರ ದೇಶತ್‌ಲ್‌ ಸೇಯಿರಂಡ ಕ್‌ಣ್ಣ ಮಕ್ಕಳು ಹೋರಿಯಂಗಡ ಸಂತಾನವಾಯಿತ್‌ಂಜ ಮುಖ್ಯಸ್ತಂಗ.

²²ಲೋಟಾನಂಡ ಕ್‌ಣ್ಣ ಮಕ್ಕ ಹೋರಿ, ಹೇಮಾಮ್‌ ಎಣ್ಣುವಯಿಂಗ; ಲೋಟಾನಂಡ ತಂಗೆರ ಪೆದ ತಿಮ್‌ನಾ.

²³ಶೋಬಾಲಂಡ ಮಕ್ಕ ಅಲ್ವಾನ್, ಮಾನಹತ್, ಗೇಬಾಲ್, ಶೆಫೋ, ಓನಾಮ್‌ ಎಣ್ಣುವಯಿಂಗ.

²⁴ಸಿಬೆಯೋನಂಡ ಕ್‌ಣ್ಣ ಮಕ್ಕ: ಅಯ್ಯಾ, ಅನಾಹ ಎಣ್ಣುವಯಿಂಗ. ಮಣಬೂಮಿಲ್‌ ತಾಂಡ ಅಪ್ಪನಾನ ಸಿಬಿಯೋನಂಡ ಕತ್ತೆಯಳ ಮೇಯಿಚಿಟ್ಟಂಡ್‌ ಇಪ್ಪಕ ಬಿಸಿ ನೀರ್‌ರ ಬುಗ್ಗೆನ ಕಂಡ್‌ ಪುಡ್‌ಚ ಅನಾಹ ಇಂವೊನೇ.

²⁵ಅನಾಹಂಡ ಮಕ್ಕ ದೀಶೋನ್‌ ಪಿಂಞ ಅನಾಹಂಡ ಮೋವಳಾನ ಒಹೊಲೀಬಾಮ.

²⁶ದೀಶೋನಂಡ ಕ್‌ಣ್ಣ ಮಕ್ಕ ಹೆಮ್ದಾನ್, ಎಷ್ಬಾನ್, ಇತ್‌ರಾನ್‌ ಪಿಂಞ ಕೆರಾನ್.

²⁷ಏಚೆರಂಡ ಕ್‌ಣ್ಣ ಮಕ್ಕ: ಬಿಲ್ಹಾನ್, ಜಾವಾನ್‌ ಪಿಂಞ ಅಕಾನ್.

²⁸ದೀಶಾನಂಡ ಕ್‌ಣ್ಣ ಮಕ್ಕ: ಊಚ್‍ ಪಿಂಞ ಅರಾನ್.

²⁹ಹೋರಿಯರಂಡ ಸಂತಾನತ್‌ಲ್‌ ಪುಟ್ಟ್‌ನ ಮುಖ್ಯಸ್ತಂಗ ಲೋಟಾನ್‌ ಕುಲತ್‌ರ ಮುಖ್ಯಸ್ತ, ಶೋಬಾಲಂಡ ಕುಲತ್‌ರ ಮುಖ್ಯಸ್ತ, ಸಿಬೆಯೋನಂಡ ಕುಲತ್‌ರ ಮುಖ್ಯಸ್ತ, ಅನಾಹಂಡ ಕುಲತ್‌ರ ಮುಖ್ಯಸ್ತ,

³⁰ದೀಶೋನಂಡ ಕುಲತ್‌ರ ಮುಖ್ಯಸ್ತ, ಏಚರ್‌ಂಡ ಕುಲತ್‌ರ ಮುಖ್ಯಸ್ತ, ದೀಶಾನ್‌ಂಡ ಕುಲತ್‌ರ ಮುಖ್ಯಸ್ತಂಗ. ಈಂಗಳೇ ಸೀಯಿರ್‌ ದೇಶತ್‌ಲ್‌ ಅಯಿಂಗಯಿಂಗಡ ಜಾಗತ್‌ಲ್‌ ವಾಸ ಮಾಡಿಯಂಡಿಂಜ ಹೋರಿಯಡ ಕುಲತ್‌ರ ಮುಖ್ಯಸ್ತಂಗ.

³¹ಇಸ್ರಾಯೇಲ್‌ರ ರಾಜಂಗ ಆಳ್‌ವಕ್‌ ಮಿಂಞಲೇ ಎದೋಮ್‌ ದೇಶತ್‌ನ ಆಳಿಯಂಡಿಂಜ ರಾಜಂಗ ದಾರ್‌ ಎಣ್ಣ್‌ಚೇಂಗಿ:

³²ಬೆಯೋರಂಡ ಮೋಂವೊನಾನ ಬೆಲಗ ಎದೋಮ್‌ಲ್‌ ಆಳ್‌ವಿಕೆ ಮಾಡ್‌ಚಿ. ಅಂವೊ ದಿನ್ಹಾಬಾ ಪಟ್ಟಣತಿಂಞ ಬಂದವನಾಯಿತ್‌ಂಜತ್.

³³ಬೆಲಗ ಚತ್ತ್‌ ಪೋನ ಪಿಂಞ ಬೊಚ್ರ ಪಟ್ಟಣಕ್‌ ಕೂಡ್‌ನಂವೊನಾನ ಜೆರಹಂಡ ಮೋಂವೊನಾಯಿತ್‌ಂಜ ಯೋಬಾಬ ಅಂವೊಂಡ ಪಟ್ಟಣಕ್‌ ರಾಜನಾಚಿ.

³⁴ಯೋಬಾಬ ಚತ್ತ್‌ ಪೋನ ಪಿಂಞ ತೇಮಾನ್‌ ದೇಶಕ್‌ ಕೂಡ್‌ನಂವೊನಾನ ಹುಷಾಮ ಅಂವೊಂಡ ಬದ್‌ಲ್‌ ಆಳ್‌ಚಿ.

³⁵ಹುಷಾಮ ಚತ್ತ್‌ ಪೋನ ಪಿಂಞ ಮೊವಾಬ್ಯಡ ನಾಡ್‌ಲ್‌ ಮಿದ್ಯಾರಯಿಂಗಳ ಚೋಪ್‌ಚಿಟ್ಟ ಬೆದದಂಡ ಮೋಂವೊನಾನ ಹದದ ರಾಜನಾಚಿ. ಅಂವೊಂಡ ಪಟ್ಟಣತ್‌ರ ಪೆದ ಅವೀತ್‌ ಆಯಿತ್‌ಂಜತ್.

³⁶ಹದದ ಚತ್ತ್‌ ಪೋನ ಪಿಂಞ, ಮಸ್ರೇಕ ಊರ್‌ಕ್‌ ಕೂಡ್‌ನಂವೊನಾನ ಸಮ್ಲಾಹ ರಾಜನಾಚಿ.

³⁷ಸಮ್ಲಾಹ ಚತ್ತ್‌ ಪೋನ ಪಿಂಞ, ಅಲ್ಲಿ ಇಂಜ ಪೊಳೆರ ಪಕ್ಕತ್‌ ಉಳ್ಳ ರೆಹೋಬೋತ್‌ ಎಣ್ಣುವ ಊರ್‌ಕ್‌ ಕೂಡ್‌ನಂವೊನಾನ ಸೌಲ ರಾಜನಾಚಿ.

³⁸ಸೌಲ ಚತ್ತ್‌ ಪೋನ ಪಿಂಞ, ಅಕ್ಬೋರಂಡ ಮೋಂವೊನಾನ ಬಾಳ್ಹಾನಾನ್‌ ರಾಜನಾಚಿ.

³⁹ಅಕ್ಬೋರಂಡ ಮೋಂವೊನಾನ ಬಾಳ್ಹಾನಾನ್‌ ಚತ್ತ್‌ಪೋನ ಪಿಂಞ, ಹದರ ರಾಜನಾಚಿ. ಅಂವೊಂಡ ಪಟ್ಟಣತ್‌ರ ಪೆದ ಪಾಗು ಆಯಿತ್‌ಂಜತ್. ಅಂವೊಂಡ ಪೊಣ್ಣ್‌ರ ಪೆದ ಮಹೇಟಬೇಲ್. ಅವ ಮೇಜಾಹಾಬಂಡ ಮೋವಳಾನ ಮಟ್‌ರೇದಳಂಡ ಮೋವಳಾಯಿತ್‌ಂಜತ್.

⁴⁰ಅಯಿಂಗಯಿಂಗ ವಾಸಯಿಂಜ ಜಾಗ, ಕುಲ ಪಿಂಞ ಪೆದತ್‌ರ ಪ್ರಕಾರ ಏಸಾವ ಸಂತಾನತ್‌ಂಜ ಬಂದ ಮುಖ್ಯಸ್ತಂಗಡ ಪೆದ ಎಂತ ಎಣ್ಣ್‌ಚೇಂಗಿ: ತಿಮ್‌ನಾ ಕುಲತ್‌ರ ಮುಖ್ಯಸ್ತ, ಅಲ್ವಾ ಕುಲತ್‌ರ ಮುಖ್ಯಸ್ತ, ಯೆತೇತ ಕುಲತ್‌ರ ಮುಖ್ಯಸ್ತ,

⁴¹ಒಹೊಲೀಬಾಮಾ ಕುಲತ್‌ರ ಮುಖ್ಯಸ್ತ, ಏಲಾ ಕುಲತ್‌ರ ಮುಖ್ಯಸ್ತ, ಪೀನೋನ್‌ ಕುಲತ್‌ರ ಮುಖ್ಯಸ್ತ,

⁴²ಕೆನಜ್ ಕುಲತ್‌ರ ಮುಖ್ಯಸ್ತ, ತೇಮಾನ್‌ ಕುಲತ್‌ರ ಮುಖ್ಯಸ್ತ, ಮಿಪ್‌ಚಾರ್‌ ಕುಲತ್‌ರ ಮುಖ್ಯಸ್ತ,

⁴³ಮಗ್ಗೀಯೇಲ್‌ ಕುಲತ್‌ರ ಮುಖ್ಯಸ್ತ, ಗೀರಾಮ್‌ ಕುಲತ್‌ರ ಮುಖ್ಯಸ್ತ. ಈಂಗಳೇ ತಂಗಡ ಸ್ವಂತ ದೇಶತ್‌ಲ್‌ ಬೋರೆ ಬೋರೆ ಜಾಗತ್‌ಲ್‌ ವಾಸಮಾಡಿಯಂಡಿಂಜ ಎದೋಮ್‌ ಸಂತಾನತ್‌ರ ಮುಖ್ಯಸ್ತಂಗ; ಈ ಎದೋಮ್‌ ಸಂತಾನತ್‌ರ ಮುತ್ತಜ್ಜನೇ ಏಸಾವ.