Read Kodava ಆದ್ಯತ್‌ರ ಪುಸ್ತಕ 39 Bible Online

ಆದ್ಯತ್‌ರ ಪುಸ್ತಕ 39 - Kodava bible

ಆದ್ಯತ್‌ರ ಪುಸ್ತಕ 39

¹ಇಕ್ಕ ಇಷ್ಮಾಯೇಲ್ಯರಯಿಂಗ ಯೋಸೇಫನ ಐಗುಪ್ತ ದೇಶಕ್‌ ಕಾಕಿಯಂಡ್‌ ಪೋಚಿ. ಅಲ್ಲಿ ಐಗುಪ್ತ ದೇಶಕ್‌ ಕೂಡ್‌ನಂವೊನಾನ ಫರೋಹನಂಡ ಒರ್‌ ಅದಿಕಾರಿಯು, ಅಂವೊಂಡ ಅರಮನೆಕ್‌ ನಾಯಕನು ಅಯಿತ್‌ಂಜ ಪೋಟೀಫರ ಎಣ್ಣುವ ಒಬ್ಬ ಯೋಸೇಫನ ಅಯಿಂಗಡ ಕೈಯಿಂಜ ಕ್ರಯಕ್‌ ಎಡ್‌ತ್ತಂಡತ್.

²ಯೆಹೋವ ಯೋಸೇಫಂಡ ಕೂಡೆ ಇಂಜತ್. ಅಂವೊ ಕೈ ಬೆಪ್ಪ ಎಲ್ಲಾ ಕಾರ್ಯತ್‌ಲು ಅಬಿವೃದ್ದಿ ಪೊಂದ್‌ಚಿ. ಅಂವೊ ತಾಂಡ ಎಜಮಾನಂಡ ಮನೇಲ್‌ ವಾಸಮಾಡ್‌ಚಿ.

³ಯೆಹೋವ ಯೋಸೇಫಂಡ ಕೂಡೆ ಉಂಡ್‍ೕಂದು, ಅಂವೊ ಮಾಡುವ ಕೆಲಸತ್‌ನೆಲ್ಲ ಯೆಹೋವ ಅಬಿವೃದ್ದಿ ಮಾಡಿಯಂಡುಂಡೂಂದು ಪೋಟಿಫರ ಕಂಡತ್.

⁴ಅನ್ನನಾಯಿತ್‌ ಯೋಸೇಫಂಗ್‌ ಪೋಟಿಫರಂಡ ದಯೆ ಕ್‌ಟ್ಟ್‌ಚಿ. ಪೋಟಿಫರ ತಾಂಡ ಮನೆನ ಎಚ್ಚರತ್‌ಲ್‌ ನೋಟ್‌ವಕಾಯಿತ್, ಅಂವೊಂಗ್‌ ಉಳ್ಳ ಎಲ್ಲಾನ ಅಂವೊಂಡ ಕೈಕ್‌ ಒಪ್ಪ್‌ಚಿಟ್ಟತ್.

⁵ಯೋಸೇಫಂಡ ಕೈಕ್‌ ಎಲ್ಲಾನ ಒಪ್ಪ್‌ಚಿಟ್ಟಪಿಂಞ ಯೆಹೋವ ಯೇಸೇಫಂಡ ಮೂಲಕ ಪೋಟಿಫರಂಡ ಮನೆನ ಆಶೀರ್ವಾದ ಮಾಡ್‌ಚಿ. ಮನೇಲ್‌ ಪಿಂಞ ಪೊರ್ಮೆ ಉಳ್ಳದ್‌ಲ್‌ ಪೋಟಿಫರಂಗ್‌ ಕೂಡ್‌ನ ಎಲ್ಲಾಂಡ ಮೇಲೆ ಯೆಹೋವಂಡ ಆಶೀರ್ವಾದ ಇಂಜತ್.

⁶ಆನಗುಂಡ್, ಪೋಟಿಫರ ಯೋಸೇಫಂಗ್‌ ಎಲ್ಲಾ ಅದಿಕಾರತ್‌ನ ಕೊಡ್‌ತತ್. ಅಂವೊ ಉಂಬ ಆಹಾರತ್‌ನ ಬುಟ್ಟತೇಂಗಿ ಇಂಞು ಏದ್‌ ವಿಷಯತ್‌ನ ಅಂವೊ ಗೇನ ಮಾಡ್‌ವಕಿಂಜಿಲೆ. ಇಕ್ಕ ಯೋಸೇಫ ತಡಿ ಬೆಚ್ಚಿತ್‌ ನಲ್ಲ ಚಾಯಿಕಾರನಾಯಿತ್‌ಂಜತ್.

⁷ಇನ್ನನೆ ಇಪ್ಪಕ ಅಂವೊಂಡ ಎಜಮಾನಂಡ ಪೊಣ್ಣ್‌ ಅಂವೊಂಡ ಮೇಲೆ ಕಣ್ಣ್‌ ಬೆಚ್ಚಿತ್‌ ಅವಡ ಕೂಡೆ ಬುದ್ದೋಕ್‌ ಬಾಂದ್‌ ಅಂವೊನ ಕಾಕ್‌ಚಿ.

⁸ಆಚೇಂಗಿ ಅಂವೊ ಅದ್‌ಂಗ್‌ ಒತ್ತೊತೆ: ನೋಟ್, ನಾಡ ಯಜಮಾನ ನಾಡ ಮೇಲೆ ನಂಬಿಕೆ ಬೆಚ್ಚಿತ್‌ ಈ ಮೆನೇಲ್‌ ಉಳ್ಳದ್‌ನ ಒಂದ್‌ನ ಸಹ ವಿಚಾರ ಮಾಡತೆ, ತಾಂಡ ಇಡೀ ಆಸ್ತಿನ ಎಚ್ಚರತ್‌ಲ್‌ ನೋಟ್‌ವಕ್‌ ನಾಡ ಪಕ್ಕ ಒಪ್ಪಿಚಿಟ್ಟಿತುಂಡ್.

⁹ಈ ಮನೆಲ್ ನಾಕ್ಯಿಂಜ ಬಲ್ಯಂವೊ ದಾರು ಇಲ್ಲೆ. ನೀನ್‌ ಅಂವೊಂಡ ಪೊಣ್ಣಾಯಿತ್‌ ಉಳ್ಳಾಂಗ್‌ ನಿನ್ನ ಬುಟ್ಟಿತ್‌ ಬೋರೆ ಎಲ್ಲಾಂಡ ಮೇಲೆ ನಾಕ್‍ ಅದಿಕಾರ ತಂದಿತ್. ಇನ್ನನೆ ಇಪ್ಪಕ ಇಂತ ಮೋಸವಾನ ಕಾರ್ಯತ್‌ನ ಮಾಡಿತ್, ಯೆಹೋವಂಗ್‌ ವಿರುದ್ದವಾಯಿತ್‌ ನಾನ್‌ ಎನ್ನನೆ ಪಾಪ ಮಾಡಡ್‍ೕಂದ್‌ ಎಣ್ಣ್‌ಚಿ.

¹⁰ಅವ ಯೋಸೇಫಂಡ ಕೂಡೆ ದಿನಾಲು ಇನ್ನನೆ ತಕ್ಕ್‌ ಪರ್‌ಂದಂಡಿಂಜತ್. ಆಚೇಂಗಿಯು ಯೋಸೇಫ ಅವಕ್‌ ಕೆಮಿ ಕೊಡ್‌ಕತೆ, ಅವಡ ಕೂಡೆ ಬುದ್ದ್‌ವಕು, ಅವಡ ಕೂಡೆ ಇಪ್ಪಕು ಒತ್ತಂಡ್‌ತ್‌ಲ್ಲೆ.

¹¹ಇನ್ನನೆ ಇಪ್ಪಕ ಒರ್‌ ದಿವಸ ಅಂವೊ ತಾಂಡ ಕೆಲಸ ಮಾಡ್‌ವಕ್‌ ಮನೇರ ಒಳ್‌ಕ್‌ ಪೋಚಿ. ಮನೇಲ್‌ ಬೋರೆ ಪಣಿಕಾರಂಗ ದಾರು ಇಂಜಿತ್‌ಲ್ಲೆ.

¹²ಅಕ್ಕ ಅವ ಬಂದಿತ್‌ ಅಂವೊಂಡ ಬಟ್ಟೆನ ಪುಡ್‌ಚಿತ್‌ ನಾಡ ಕೂಡೆ ಬುದ್ದುವಕ್‌ ಬಾಂದ್‌ ಎಣ್ಣ್‌ಚಿ. ಆಚೇಂಗಿ, ಅಂವೊ ತಾಂಡ ಬಟ್ಟೆನ ಅವಡ ಕೈಲ್‌ ಬುಟ್ಟಿತ್‌ ಪೊರ್ಮೆ ಓಡಿ ಪೋಚಿ.

¹³ಅಂವೊ ತಾಂಡ ಬಟ್ಟೆನ ಅವಡ ಕೈಲ್‌ ಬುಟ್ಟಿತ್‌ ಪೋರ್ಮೆ ಓಡಿಪೋನದ್‌ನ ಕಂಡಿತ್,

¹⁴ತಾಂಡ ಮನೆರ ಪಣಿಕಾರಂಗಳ ಕಾಕಿತ್, ಅವ ಅಯಿಂಗಕ್: ನೋಟಿ, ಈ ಇಬ್ರಿಯ ಆಳ್‌ ನಂಗಳ ಅವಮಾನ ಮಾಡ್‌ವಕ್‌ ನಾಡ ವಡಿಯ ಕಾಕಿಯಂಡ್‌ ಬಂದಿಯೆ. ಇಂವೊ ನಾಡ ಕೂಡೆ ಬುದ್ದವಕ್‌ ಬಾತ್. ಆಚೇಂಗಿ ನಾನ್‌ ಕೂತ್‌ ಕೊಡ್‌ತಿಯೆ.

¹⁵ನಾನ್‌ ಜೋರಾಯಿತ್‌ ಕೂತ್‌ ಕೊಡ್‌ಪ್ಪಾನ ಕ್‍ೕಟಿತ್, ಅಂವೊ ತಾಂಡ ಬಟ್ಟೆನ ನಾಡ ಪಕ್ಕ ಬುಟ್ಟಿತ್‌ ಓಡಿಪೋಚೀಂದ್‌ ಎಣ್ಣ್‌ಚಿ.

¹⁶ಅವ ಅವಡ ವಡಿಯ ಮನೆಕ್‌ ಬಕ್ಕಣೆಕೆ ಯೋಸೇಫಂಡ ಬಟ್ಟೆನ ತಾಂಡ ಪಕ್ಕ ಬೆಚ್ಚಂಡತ್.

¹⁷ವಡಿಯ ಮನೆಕ್‌ ಬಂದದು: ನೀನ್‌ ನಂಗಡ ಪಕ್ಕ ಕಾಕಿಯಂಡ್‌ ಬಂದ ಆ ಇಬ್ರಿಯ ಆಳ್‌ ನನ್ನ ಅವಮಾನ ಮಾಡುತುವಕ್‌ ಬಾತ್.

¹⁸ನಾನ್‌ ಕೂತ್‌ ಕೊಡ್‌ತ್ತಾಂಗ್‌ ಅಂವೊಂಡ ಬಟ್ಟೆನ ನಾಡ ಪಕ್ಕ ಬುಟ್ಟಿತ್‌ ಓಡಿಪೋಚೀಂದ್‌ ಎಣ್ಣ್‌ಚಿ.

¹⁹ನೀಡ ಆಳ್‌ ನಾಕ್‍ ಇನ್ನನೆ ಮಾಡ್‌ಚೀಂದ್‌ ತಾಂಡ ಪೊಣ್ಣ್‌ ಅಂವೊಂಡ ಪಕ್ಕ ಎಣ್ಣ್‌ನದ್‌ನ ಕ್‍ೕಟಿತ್‌ ಪೋಟಿಫರಂಗ್‌ ದುಂಬ ಚೆಡಿಬಾತ್.

²⁰ಯೋಸೇಫಂಡ ಎಜಮಾನ ಯೋಸೇಫನ ಪುಡಿಚಿತ್‌ ರಾಜಂಡ ಕೈದಿಯಳ ಇಡ್‌ವ ಜೈಲ್‌ಲ್‌ ಇಂವೊನ ಸಹ ಇಟ್ಟತ್. ಅಂವೊ ಆ ಜೈಲ್‌ಲ್‌ ಇಂಜತ್.

²¹ಆಚೇಂಗಿ ಯೆಹೋವ ಯೋಸೇಫಂಡ ಕೂಡೆ ಇಂಜಂಡ್‌ ಪ್ರೋತಿಚ್ಚಿಟ್ಟಗುಂಡ್, ಅಂವೊಂಗ್‌ ಜೈಲ್‌ರ ಮುಖ್ಯಸ್ತಂಡ ಕಣ್ಣ್‌ಲ್‌ ದಯೆ ಕ್‌ಟ್ಟ್‌ವನೆಕೆ ಮಾಡ್‌ಚಿ.

²²ಜೈಲ್‌ರ ಮುಖ್ಯಸ್ತ ಜೈಲ್‌ಲ್‌ ಬೆಚ್ಚಿತುಳ್ಳ ಎಲ್ಲಾ ಕೈದಿಯಡ ಮೇಲೆ ಯೋಸೇಫಂಗ್‌ ಅದಿಕಾರ ಕೊಡ್‌ತತ್. ಅಲ್ಲಿ ಅಯಿಂಗ ಮಾಡಿಯಡಿಂಜ ಎಲ್ಲಾ ಕಾರ್ಯಕು ಯೋಸೇಫ ಜವಾಬ್ದಾರನಾಯಿತ್‌ಂಜತ್.

²³ಯೆಹೋವ ಅಂವೊಂಡಕೂಡೆ ಇಂಜಾಂಗು, ಅಂವೊ ಎಂತೆಲ್ಲಾ ಮಾಡ್‌ಚೋ ಅದ್‌ನ ಯೆಹೋವ ಆಶೀರ್ವಾದ ಮಾಡ್‌ನಾಂಗು, ಜೈಲ್‌ರ ಮುಖ್ಯಸ್ತ ಯೋಸೇಫ ಮಾಡುವ ಏದ್‌ ವಿಷಯಕು ಬೇಜಾರ್‌ ಮಾಡಿತ್‌ಲ್ಲೆ.