Read Kodava ಆದ್ಯತ್‌ರ ಪುಸ್ತಕ 4 Bible Online

ಆದ್ಯತ್‌ರ ಪುಸ್ತಕ 4 - Kodava bible

ಆದ್ಯತ್‌ರ ಪುಸ್ತಕ 4

¹ಇಕ್ಕ ಆದಾಮ ತಾಂಡ ಪೊಣ್ಣ್‌ ಹವ್ವಂಡ ಕೂಡೆ ಕೂಡ್‌ವಕ ಅವ ಕುಳುಮೆಕಾರ್ತಿಯಾಯಿತ್‌ ಕಾಯಿನ ಎಣ್ಣುವಂವೊನ ಪೆತ್ತತ್. ಯೆಹೋವಂಡ ಸಹಾಯತ್‌ಂಜ ಒರ್‌ ಕ್‌ಣ್ಣ ಕುಂಞಿನ ಪಡ್‌ಂದಿಯೇಂದ್‌ ಅವ ಎಣ್ಣ್‌ಚಿ.

²ಅಲ್ಲಿಂಜ ಅವ ಅಂವೊಂಡ ತಮ್ಮಣನಾನ ಹೇಬೆಲನ ಪೆತ್ತತ್. ಹೇಬೆಲ ಕೊರಿಕಾಪಂವೊನಾಚಿ. ಕಾಯಿನ ವ್ಯವಸಾಯ ಮಾಡ್‌ವಂವೊನಾಚಿ.

³ಚೆನ್ನ ಕಾಲ ಆನ ಪಿಂಞ, ಕಾಯಿನ ಚೆನ್ನ ಬೊಳೆನ ಯೆಹೋವಂಗ್‌ ಕಾಣಿಕೆಯಾಯಿತ್‌ ಕೊಂಡಬಾತ್.

⁴ಹೇಬೆಲ ತಾಂಡ ಕೊರಿರ ಮದ್ಯತ್‌ಲ್‌ ಇಂಜ ಚಾಯಿಯಾನ ಆದ್ಯ ಕೊರಿಕುಟ್ಟಿಯಳನ ಕಾಣಿಕೆಯಾಯಿತ್‌ ಕೊಂಡಬಂದಿತ್, ಕೊಂದಿತ್‌ ಅದಂಡ ಗೊಬ್ಬಯಾನ ಬಾಗತ್‌ನ ಅರ್ಪಿಚ್ಚಿಟ್ಟತ್. ಯೆಹೋವ ಹೇಬೆಲಂಡ ಕಾಣಿಕೆನ ಸ್ವೀಕಾರ ಮಾಡ್‌ಚಿ,

⁵ಆಚೇಂಗಿ ಅಂವೊ ಕಾಯಿನನ ಪಿಂಞ ಅಂವೊಂಡ ಕಾಣಿಕೆನ ಸ್ವೀಕಾರ ಮಾಡಿತ್‌ಲೆ. ಇದ್‌ಂಗಾಯಿತ್‌ ಕಾಯಿನಂಗ್‌ ದುಂಬ ಚೆಡಿ ಬಂತ್‌ ಅಂವೊಂಡ ಮೂಡ್‌ ಚಪ್ಪೆ ಪುಡ್‌ಚಿತ್.

⁶ಅಕ್ಕ ಯೆಹೋವ: ನೀಕ್‌ ಎನ್ನಂಗ್‌ ಚೆಡಿ ಬಾತ್, ನೀಡ ಮೂಡ್‌ ಎನ್ನಂಗ್‌ ಇಚ್ಚಕ್‌ ಚಪ್ಪೆ ಪುಡ್‌ಚಿತ್‍ೕಂದ್‌ ಕಾಯಿನನ ಕ್‍ೕಟತ್.

⁷ನೀನ್‌ ಸರಿಯಾನದ್‌ನ ಮಾಡಿತ್‌ಂಜಕ, ನಿನ್ನ ಸ್ವೀಕಾರ ಮಾಡ್‌ವಕಿಂಜಿತ್‌ಲ್ಲೆಯ? ಆಚೇಂಗಿ ನೀನ್‌ ನಲ್ಲದ್‌ ಮಾಡ್‌ವಕ್‌ ತ್‌ಕ್ಕಾರ ಮಾಡಿಚೇಂಗಿ, ಪಾಪ ನಿನ್ನ ಆಳ್‌ವಿಕೆ ಮಾಡ್‌ವಕ್‌ ಪಿಂಞ ನಾಶ ಮಾಡ್‌ವಕ್‌ ಪಡಿರ ಪಕ್ಕ ಪಾರಕಾತಂಡಿಪ್ಪ, ಆಚೇಂಗಿ ನೀನ್‌ ಅದನ ಆಳಂಡು.

⁸ಇಕ್ಕ ಕಾಯಿನ ತಾಂಡ ತಮ್ಮಣನಾನ ಹೇಬೆಲಂಗ್, ಬೇಲ್‌ಕ್‌ ಪೋಕನ ಬಾಂದ್‌ ಕಾಕ್‌ಚಿ. ಬೇಲ್‌ಕ್‌ ಪೋನ ಪಿಂಞ ಕಾಯಿನ ತಾಂಡ ತಮ್ಮಣಂಡ ಮೇಲೆ ಚೆಡಿಲ್‌ ಜಗಳ ಮಾಡಿತ್‌ ಹೇಬೆಲನ ಕೊಂದತ್.

⁹ಅದಾನ ಪಿಂಞ ಯೆಹೋವ ಕಾಯಿನಂಗ್: ನೀಡ ತಮ್ಮಣ ಹೇಬೆಲ ಎಲ್ಲಿಯಾಂದ್‌ ಕ್‍ೕಟತ್. ಅದ್‌ಂಗ್‌ ಕಾಯಿನ: ನಾಕ್‍ ಗೊತ್ತ್‌ಲೆ, ನಾನೆಂತ ನಾಡ ತಮ್ಮಣನ ಕಾಪಂವೊನಾಂದ್‌ ಜವಾಬ್ ಕೊಡ್‌ತತ್.

¹⁰ಅದಂಗ್‌ ಯೆಹೋವ: ನೀನ್‌ ಎಂತ ಮಾಡಿಯ? ಕ್‍ೕಳ್‌! ನೀಡ ತಮ್ಮಣಂಡ ಚೋರೆ ಬೂಮಿಯಿಂಜ ನನ್ನ ಕಾಕಿಯಂಡುಂಡ್.

¹¹ನೀನ್‌ ಬೂಕ್‌ಚಿಟ್ಟ ನೀಡ ತಮ್ಮಣಂಡ ಚೋರೆನ ಕುಡಿಚ ಈ ಬೂಮಿಲ್‌ ನೀನ್‌ ಶಾಪ ಪಡ್‌ಂದಂವೊನಾಯಿತ್‌ಪ್ಪಿಯ.

¹²ನೀನ್‌ ಬೂಮಿನ ಎಚ್ಚಕ್‌ ಕಷ್ಟಪಟ್ಟಿತ್‌ ವ್ಯವಸಾಯ ಮಾಡ್‌ಚೇಂಗಿಯು ಅದ್‌ ಇಂಞು ಮಿಂಞಕ್‌ ಬೊಳೆ ತಪ್ಪ್‌ಲೆ, ಇಕ್ಕಯಿಂಞ ನೀನ್‌ ಈ ಬೂಮಿಲ್‌ ಮನೆ ಇಲ್ಲತೆ ತಿರ್‌ಗಾಡ್‌ವಂವೊನಾಯಿತ್‌ಪ್ಪಿಯಾಂದ್‌ ಎಣ್ಣ್‌ಚಿ.

¹³ಅದಂಗ್‌ ಕಾಯಿನ ಯೆಹೋವನ ನೋಟಿತ್: ಈ ದಂಡನೆ ನಾಕ್‍ ಸಹಿಸ್ವಕಯ್ಯತಚ್ಚಕ್‌ ಉಂಡ್.

¹⁴ಇಕ್ಕ ನೀನ್‌ ನನ್ನ ಈ ಜಾಗತಿಂಜ, ನೀಡ ಪ್ರಸನ್ನತ್‌ಂಜ ಓಟಿಚಿಟ್ಟಂಡುಳ್ಳಿಯ; ನನ್ನ ಒರ್‌ ಅಲೆಮಾರಿಯಾಯಿತ್‌ ಮಾಡಿತುಳ್ಳಿಯ. ನನ್ನ ದರಾಚೇಂಗಿ ಕಂಡತೇಂಗಿ ನನ್ನ ಕೊಂದ್ರುವಾಂದ್‌ ಎಣ್ಣ್‌ಚಿ.

¹⁵ಅದಂಗ್‌ ಯೆಹೋವ: ನೋಟ್, ಅನ್ನನೆ ಆಪುಲೆ. ಎನ್ನಂಗೆಣ್ಣ್‌ಚೇಂಗಿ ನಿನ್ನ ಕೊಲ್ಲ್‌ವಯಿಂಗಕ್‌ ಏಳ್‌ ಕುರಿ ದಂಡನೆ ಕ್‌ಟ್ಟ್‌ವಾಂದ್‌ ಎಣ್ಣಿತ್, ಯೆಹೋವ ಕಾಯಿನನ ದಾರೂ ಕೊಲ್ಲ್‌ವಕ್ಕಾಗಾಂದ್‌ ಎಚ್ಚರವಾಯಿತಿಪ್ಪಕ್‌ ಅಂವೊಂಡ ಮೇಲೆ ಒರ್‌ ಗುರ್‌ತ್‌ನ ಇಟ್ಟತ್.

¹⁶ಅಕ್ಕ ಕಾಯೀನ ಯೆಹೋವಂಡ ಸನ್ನಿದಾನತಿಂಗ ಪೊರಟಿತ್‌ ಪೋಯಿತ್, ಏದೇನ್‌ರ ಕೇಕ್‌ ತಿಕ್‌ಲ್ ಉಳ್ಳ ನೋಡ್‌ ಎನ್ನುವ ಜಾಗತ್‌ಲ್‌ ವಾಸಮಾಡ್‌ಚಿ.

¹⁷ಕಾಯಿನ ತಾಂಡ ಪೊಣ್ಣ್‌ರ ಕೂಡೆ ಕೂಡ್‌ವಕ ಅವ ಕುಳ್ಮೆಕಾರ್ತಿಯಾಯಿತ್‌ ಹನೋಕನ ಪೆತ್ತತ್. ಇದಲ್ಲತೆ ಕಾಯಿನ ಒರ್‌ ಊರ್‌ನ ಕೆಟ್ಟಿತ್‌ ಅದ್‌ಂಗ್‌ ಹನೋಕಾಂದ್‌ ತಾಂಡ ಮೊಂವೊಂಡ ಪೆದತ್‌ನ ಬೆಚ್ಚತ್.

¹⁸ಹನೋಕಂಗ್‌ ಈರಾದ ಪುಟ್ಟ್‌ಚಿ. ಈರಾದ ಮೆಹಾಯಾಯೇಲನ ಪೆತ್ತತ್. ಮೆಹಾಯಾಯೇಲ ಮೆತೂಷಾಯೇಲನ ಪೆತ್ತತ್. ಮೆತೂಷಾಯೇಲನ ಲೆಮೆಕನ ಪೆತ್ತತ್.

¹⁹ಲೆಮೆಕ, ಆದಾ ಪಿಂಞ ಚಿಲ್ಲಾ ಎಣ್ಣುವ ದಂಡ್‌ ಪೊಣ್ಣಾಳ್‌ನ ಮಂಗಲ ಕಯಿಚತ್.

²⁰ಆದಾ ಯಾಬಾಲನ ಪೆತ್ತತ್. ಎತ್ತ್‌ ಕಡ್‌ಚಿಯಳ ಚಾಕಿಯಂಡ್‌ ಗುಡಾರತ್‌ಲ್‌ ಇಪ್ಪಯಿಂಗಕ್‌ ಅಂವೊನೇ ಮೂಲ ವಾಸಿಯಾಚಿ.

²¹ಅಂವೊಂಡ ತಮ್ಮಣಂಡ ಪೆದ ಯೂಬಾಲ. ಇಂವೊ ಕಿನ್ನರಿ ಪಿಂಞ ಪಾಂಗೊಳ ಊದುವಯಿಂಗಕ್‌ ಮೂಲ ವಾಸಿಯಾಚಿ.

²²ಲೆಮೆಕಂಡ ಇಂಞೊರ್‌ ಪೊಣ್ಣ್‌ ಚಿಲ್ಲಾ ತೂಬಲ್ಕಾಯಿನನ ಪೆತ್ತತ್. ಅಂವೊ ಪಿಚ್ಚೋಳೆ ಪಿಂಞ ಇರ್‌ಂಬ್ ಸಾಮಾನ್‌ ಮಾಡುವಯಿಂಗಕ್‌ ಮೂಲ ವಾಸಿಯಾಚಿ. ತೂಬಲ್ಕಾಯಿನಂಡ ತಂಗೆ ನಯಮಾ ಆಯಿತ್ತಿಂಜತ್‌

²³ಒರ್‌ ದಿವಸ ಲೆಮೆಕ ತಾಂಡ ದಂಡ್‌ ಪೊಂಗಳ ಕಾಕ್‌ವಂಜಿ: ನಾಡ ತಕ್ಕ್‌ಕ್‌ ಕೆಮಿ ಕೊಡಿ; ಲೆಮೆಕಂಡ ಪೊಂಗಳೇ ನಾನ್‌ ಎಣ್ಣ್‌ವಾನ ಕ್‍ೕಳಿ: ನನ್ನ ಗಾಯ ಮಾಡಿತ್‌ ಗಾಯಮಾಡ್‌ನ ಮನುಷ್ಯನ ನಾನ್‌ ಕೊಂದಿಯೆ.

²⁴ಕಾಯಿನನ ಕೊಂದಂವೊಂಗ್‌ ಏಳ್‌ ಕುರಿ ದಂಡನೆ ಬಪ್ಪದಾಚೇಂಗಿ, ಲೆಮೆಕನ ಕೊಂದಂವೊಂಗ್‌ ಏಳ್‌ವತ್‌ ಏಳ್‌ ಕುರಿ ದಂಡನೆ ಕ್‌ಟ್ಟ್‌ವಾಂದ್‌ ಎಣ್ಣ್‌ಚಿ.

²⁵ಆದಾಮ ಪುನಃ ತಾಂಡ ಪೊಣ್ಣ್‌ರ ಕೂಡೆ ಕೂಡ್‌ಚಿ. ಅವ ಇಂಞೊರ್‌ ಕ್‌ಣ್ಣ ಕುಂಞಿನ ಪೆತ್ತಿತ್: ಕಾಯಿನ ಕೊಂದ ಹೇಬೆಲಂಗ್‌ ಬದಲಾಯಿತ್‌ ದೇವ ನಾಕ್‍ ಬೋರೆ ಮೋಂವೊನ ತಂದಿತ್‌ಂದ್‌ ಆ ಕುಂಞಿಕ್‌ ಸೇತಾಂದ್‌[4] ಪೆದ ಬೆಚ್ಚತ್.

²⁶ಅಲ್ಲಿಂಜ ಸೇತಂಗ್‌ ಸಹ ಒರ್‌ ಕ್‌ಣ್ಣ ಕುಂಞಿ ಪುಟ್ಟ್‌ಚಿ. ಅಂವೊಂಗ್‌ ಎನೋಷಾಂದ್‌ ಪೆದ ಬೆಚ್ಚತ್. ಆ ಕಾಲತ್‌ಲ್‌ ಯೆಹೋವಂಡ ಪೆದ ಎಣ್ಣಿತ್‌ ಆರಾದನೆ ಮಾಡ್‌ವಕ್‌ ಜನ ಸುರ್ ಮಾಡ್‌ಚಿ.