Read Kodava ಆದ್ಯತ್‌ರ ಪುಸ್ತಕ 40 Bible Online

ಆದ್ಯತ್‌ರ ಪುಸ್ತಕ 40 - Kodava bible

ಆದ್ಯತ್‌ರ ಪುಸ್ತಕ 40

¹ಈ ಸಂಗತಿಯೆಲ್ಲ ಆನ ಪಿಂಞ ಐಗುಪ್ತ ದೇಶತ್‌ರ ರಾಜನಾನ ಫರೋಹನಂಗ್‌ ದ್ರಾಕ್ಷಿರಸತ್‌ರ ಕಳ್ಳ್ ಮಾಡಿ ಕೊಡ್‌ಪಂವೊನು, ಒಟ್ಟಿ ಅಡಿಗೆ ಮಾಡ್‌ವಂವೊನು ರಾಜಂಗ್‌ ವಿರುದ್ದವಾಯಿತ್‌ ತಪ್ಪ್‌ ಮಾಡ್‌ಚಿ.

²ಫರೋಹನಂಗ್‌ ಈ ದಂಡಾಳ್‌ರ ಮೇಲೆ ದುಂಬ ಚೆಡಿ ಬಾತ್.

³ಅಯಿಂಗಳ ಕೈದಿಯಂಗಳ ಕಾಪಂವೊನಾನ ಜೈಲ್‌ರ ಮುಖ್ಯಸ್ತಂಡ ಮನೇಲ್‌ ಉಳ್ಳ ಜೈಲ್‌ಕ್‌ ಇಟ್ಟತ್. ಅದೇ ಜೈಲ್‌ಲ್‌ ಯೋಸೇಫ ಸಹ ಇಂಜತ್.

⁴ಜೈಲ್‌ರ ಮುಖ್ಯಸ್ತ ಅಯಿಂಗಳ ಉಪಚಾರ ಮಾಡ್‌ವಕ್‌ ಯೋಸೇಫನ ನೇಮಿಚಿಟ್ಟತ್. ಅಂವೊ ಅಯಿಂಗಕ್‌ ಸೇವೆ ಮಾಡ್‌ಚಿ. ಅಯಿಂಗ ದಂಡಾಳು ದುಂಬ ದಿವಸ ಅಲ್ಲಿ ಕೈದಿಯಳಾಯಿತ್‌ ಇಂಜತ್.

⁵ಐಗುಪ್ತ ರಾಜಂಗ್‌ ದ್ರಾಕ್ಷಿರಸ ಮಾಡಿ ಕೊಡ್‌ಪಂವೊನು ಅಡಿಗೆ ಮಾಡ್‌ವಂವೊನು ಜೈಲ್‌ಲ್‌ ಇಪ್ಪಕ, ಅಯಿಂಗ ದಂಡಾಲು ಒರೇ ಬಯಿಟ್ ಬೋರೆ ಬೋರೆ ಅರ್ಥ ತಪ್ಪ ಸ್ವಪ್ನ ಕಂಡತ್.

⁶ಪೊಲಾಕ ಯೋಸೇಫ ಅಯಿಂಗಡ ಪಕ್ಕ ಬಪ್ಪಕ, ಅಯಿಂಗ ದುಂಬ ಬೇಜಾರತ್‌ಲ್‌ ಇಂಜಾನ ಕಂಡತ್.

⁷ಅಕ್ಕ ಯೋಸೇಫ ತಾಂಡ ಎಜಮಾನಂಡ ಮನೆಲ್ ತಾಂಡ ಕೂಡೆ ಜೈಲ್‌ಲ್‌ ಬೆಚ್ಚಿತ್‌ಂಜ ಫರಹೋನಂಡ ಅದಿಕಾರಿಯಳ ನೋಟಿತ್: ಎನ್ನಂಗ್‌ ನಿಂಗಡ ಮೂಡ್‌ ಇಂದ್‌ ಇಚ್ಚಕ್‌ ಚಪ್ಪೆ ಆಯಿತ್‌ ಉಂಡ್‍ೕಂದ್‌ ಕ್‍ೕಟತ್.

⁸ಅದ್‌ಂಗ್‌ ಅಯಿಂಗ: ಕಯಿಂಜ ಬಯಿಟ್ ನಂಗ ದಂಡಾಳು ಸ್ವಪ್ನ ಕಂಡತ್. ಅದ್‌ಂಡ ಅರ್ಥ ಎಣ್ಣಿ ತಪ್ಪಯಿಂಗ ಇಲ್ಲಿ ದಾರು ಇಲ್ಲೆಂದ್‌ ಎಣ್ಣ್‌ಚಿ. ಅಕ್ಕ ಯೋಸೇಫ: ಸ್ವಪ್ನತ್‌ರ ಅರ್ಥ ಎಣ್ಣ್‌ವದ್‌ ದೇವಕ್‌ ಕೂಡ್‌ನದ್‌ಂದ್‌ ನಿಂಗಕ್‌ ಗೊತ್ತಿಲ್ಲಯಾ? ನಿಂಗ ಎಂತ ಕಂಡಿರಾಂದ್‌ ನಾಕ್‍ ಎಣ್ಣೀಂದ್‌ ಎಣ್ಣ್‌ಚಿ.

⁹ಅಕ್ಕ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತ: ನಾಡ ಸ್ವಪ್ನತ್‌ಲ್‌ ನಾಡ ಮಿಂಞತ್‌ ದ್ರಾಕ್ಷಿಬಳ್ಳಿನ ಕಂಡ.

¹⁰ಅದ್‌ಲ್‌ ಮೂಂದ್‌ ಕೊಂಬ್ ಇಂಜತ್. ಅದ್‌ ಚಿಗ್‌ರ್ ಬುಟ್ಟಿತ್, ಪೂ ಆಚಿ. ಆ ಪೂ ಗುಡ್ಡೆ ಬೊಳ್‌ಂದಿತ್‌ ಪಣ್ಣ್‌ ಆಚಿ.

¹¹ಫರೋಹನ ಕುಡಿಪ ಪಾತ್‌ರ ನಾಡ ಕೈಲ್‌ ಇಂಜತ್. ನಾನ್‌ ದ್ರಾಕ್ಷಿಪಣ್ಣ್‌ನ ನಾಡ ಕೈಲ್‌ ಪುಂಡಿತ್‌ ಆ ಪಾತ್‌ರಕ್‌ ಬೂಕಿತ್‌ ಫರೋಹನಂಗ್‌ ಕೊಡ್‌ತಂದ್‌ ಎಣ್ಣ್‌ಚಿ.

¹²ಅದ್‌ಂಗ್‌ ಯೋಸೇಫ: ಆ ಸ್ವಪ್ನತ್‌ರ ಅರ್ಥ ಎಂತ ಎಣ್ಣ್‌ಚೇಂಗಿ, ಆ ಮೂಂದ್‌ ಕೊಂಬು ಮೂಂದ್‌ ದಿವಸ.

¹³ಇಂಞು ಮೂಂದ್‌ ದಿವಸತ್‌ಲ್‌ ಫರೋಹನ ನಿನ್ನ ಜೈಲ್‌ಂಜ ಬುಡ್‌ತಿತ್, ನಿನ್ನ ಪುನಃ ಆ ಕೆಲಸಕ್‌ ನೇಮಿಚಿಡ್‌ವ. ಪುಃನ ನೀನ್‌ ಫರಹೋನಂಡ ಪಾತ್‌ರತ್‌ನ ಪುಡಿಚ್ಚಂಡ್‌ ಮಿಂಞತ್‌ರನೆಕೆ ಮಾಡುವಿಯ.

¹⁴ಇದೇ ನೀಡ ಸ್ವಪ್ನತ್‌ರ ಅರ್ಥಾಂದ್‌ ಎಣ್ಣ್‌ಚಿ. ಆಚೇಂಗಿ, ಅಲ್ಲಿ ನೀನ್‌ ಕುಶೀಲ್‌ ಇಪ್ಪಕ, ನನ್ನ ಗೇನ ಮಾಡಿತ್, ನಾಡ ಮೇಲೆ ಕರುಣೆ ಕಾಟಿತ್, ನಾಡ ವಿಷಯತ್‌ ಫರೋಹನಂಗ್‌ ಎಣ್ಣಿತ್‌ ನನ್ನ ಈ ಜಾಗತ್‌ಂಜ ಬುಡ್‌ತ್.

¹⁵ಎನ್ನಂಗೆಣ್ಣ್‌ಚೇಂಗಿ ನಾನ್‌ ಇಬ್ರಿಯ ದೇಶಕ್‌ ಕೂಡ್‌ನಂವೊ. ಚೆನ್ನ ಜನ ನನ್ನ ಅಲ್ಲಿಂಜ ಕಟ್ಟಂಡ್‌ ಬಂದಿಯೆ. ಇಲ್ಲಿ ಸೆಹ ಜೈಲ್‌ಲ್‌ ಇಪ್ಪಂತ ತಪ್ಪ್‌ನ ನಾನ್‌ ಮಾಡಿತ್‌ಲ್ಲೆ. ಆಚೇಂಗಿಯು ಇಕ್ಕ ನಾನ್‌ ಜೈಲ್‌ಲ್‌ ಉಳ್ಳ್ಂದ್‌ ಎಣ್ಣ್‌ಚಿ.

¹⁶ಇಂವೊ ಎಣ್ಣ್‌ನ ಅರ್ಥ ಚಾಯಿ ಉಂಡ್‍ೕಂದ್‌ ಗೊತ್ತಾಯಿತ್, ಅಡಿಗೆ ಮಾಡ್‌ವಂವೊ ಸಹ ಯೋಸೇಫನ ನೋಟಿತ್: ನಾನ್‌ ಸಹ ನಾಡ ಸ್ವಪ್ನತ್‌ಲ್‌ ನಾಡ ಮಂಡೆರ ಮೇಲೆ ಮೂಂದ್‌ ಕುಕ್ಕೆಲ್‌ ಒಟ್ಟಿ ದುಂಬಿತ್‌ಂಜನ ಕಂಡ.

¹⁷ಕೊಡಿಯತ್‌ರ ಕುಕ್ಕೆಲ್‌ ಫರೋಹನಂಗ್‌ ತಿಂಬಕ್‌ ಬೋಂಡಿಯಾನ ತಿಂಡಿಯಿಂಜತ್. ಆಚೇಂಗಿ ಪಕ್ಷಿಯ ಬಂದಿತ್‌ ಅದನೆಲ್ಲ ತಿಂದ್‌ರ್‌ತ್‍ೕಂದ್‌ ಎಣ್ಣ್‌ಚಿ.

¹⁸ಅದ್‌ಂಗ್‌ ಯೋಸೇಫ: ನೀಡ ಸ್ವಪ್ನತ್‌ರ ಅರ್ಥ ಎಂತ ಎಣ್ಣ್‌ಚೇಂಗಿ, ಆ ಮೂಂದ್‌ ಕುಕ್ಕೆ ಮೂಂದ್‌ ದಿವಸತ್‌ರನೆಕೆ.

¹⁹ಇಂಞು ಮೂಂದ್‌ ದಿವಸತ್‌ರ ಒಳ್‌ಲ್, ಫರೋಹನ ನಿನ್ನ ಪೊರ್ಮೆ ಕಾಕಿಯಂಡ್‌ ಬಂದಿತ್, ನಿನ್ನ ಮರತ್‌ಲ್‌ ತೂಕಿರುವ. ಅಕ್ಕ ಪಕ್ಷಿಯ ಬಂದಿತ್‌ ನೀಡ ಯರ್ಚಿನ ತಿಂಬಾಂದ್‌ ಎಣ್ಣ್‌ಚಿ.

²⁰ಮೂಂದನೆ ದಿವಸ ಫರೋಹನ ಪುಟ್ಟ್‌ನ ದಿವಸವಾಯಿತ್‌ಂಜತ್. ಆನಗೊಂಡ್‌ ಅಂವೊ ತಾಂಡ ಅದಿಕಾರಿಯಂಗಕ್‌ ಗದ್ದಾಳ ಮಾಡ್‌ಚಿ. ಜೈಲ್‌ಕ್‌ ಇಟ್ಟ ತಾಂಗ್‌ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತನು ಅಡಿಗೆ ಮಾಡ್‌ವಯಿಂಗಡ ಮುಖ್ಯಸ್ತನು ಆಯಿತಿಂಜ ಆ ದಂಡ್‌ ಅದಿಕಾರಿಯಳ ಸಹ ಫರೋಹನ ಪೊರಮೆ ಕಾಕ್‌ಚಿಟ್ಟಿತ್‌ ಗೌರವ ಮಾಡ್‌ಚಿ.

²¹ಅಕ್ಕ ಫರೋಹನ ತಾಂಗ್‌ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತನ ಕೆಲಸಕ್‌ ಪುಃನ ನೇಮಿಚಿಟ್ಟತ್.

²²ಆಚೇಂಗಿ ಅಡಿಗೆ ಮಾಡ್‌ವಯಿಂಗಡ ಮುಖ್ಯಸ್ತನ ಮರತ್‌ಲ್‌ ತೂಕ್‌ಚಿ. ಯೋಸೇಫ ಅಯಿಂಗಕ್‌ ಎಣ್ಣ್‌ನ ಅರ್ಥತ್‌ರನೆಕೆ ನಡ್ಂದತ್.

²³ಆಚೇಂಗಿ ರಸ ಕುಡಿಪ್ಪಕ್‌ ಕೊಡ್‌ಪ್ಪ ಮುಖ್ಯಸ್ತ ಯೋಸೇಫನ ಗೇನ ಮಾಡತೆ ಮರ್‌ಂದ್‌ ಪೋಚಿ.