Read Kodava ಆದ್ಯತ್‌ರ ಪುಸ್ತಕ 41 Bible Online

ಆದ್ಯತ್‌ರ ಪುಸ್ತಕ 41 - Kodava bible

ಆದ್ಯತ್‌ರ ಪುಸ್ತಕ 41

¹ದಂಡ್‌ ಕಾಲ ಆನ ಪಿಂಞ ಫರೋಹನ ಒರ್‌ ಸ್ವಪ್ನ ಕಂಡತ್. ಆ ಸ್ವಪ್ನತ್‌ಲ್‌ ಅಂವೊ ನೈಲ್‌ ಪೊಳೆರ ಬರಿಲ್‌ ನಿಂದಂಡಿಂಜತ್.

²ಅಕ್ಕಣೆಕ್ ನೈಲ್‌ ಪೊಳೆಯಿಂಜ ಚಾಯಿ ಪಿಂಞ ಕೊಬ್ಬಿತುಳ್ಳ ಏಳ್‌ ಪೈಯುವ ನೈಲ್‌ ಪೊಳೆಯಿಂಜ ಪೊರ್ಮೆ ಬಂದಿತ್‌ ಪೊಳೆರ ಬರಿಲ್‌ ಪಿಲ್ಲ್‌ನ ಮೇಯಿಂಜಂಡಿಂಜತ್.

³ಅದ್‌ಂಡ ಬಯ್ಯತ್‌ ಅಸಹ್ಯವಾಯಿತ್‌ ಚೆರ್‌ಂಗನೆ ಉಳ್ಳ ಇಂಞು ಏಳ್‌ ಪೈಯ್ಯುವ ನೈಲ್‌ ಪೊಳೆಯಿಂಜ ಪೊರ್ಮೆ ಬಂದಿತ್‌ ಪೊಳೆರೆ ಬರಿಲ್‌ ಬೋರೆ ಪೈಯ್ಯುರ ಕೂಡೆ ನಿಂದತ್.

⁴ಅಸಹ್ಯವಾಯಿತ್‌ ಚೆರ್‌ಂಗನೆ ಉಳ್ಳ ಪೈಯ್ಯುವ ಚಾಯಿ ಪಿಂಞ ಕೊಬ್ಬಿತುಳ್ಳ ಪೈಯ್ಯುವಳ ಮುಗ್ಗಿರ್‌ತ್. ಇನ್ನನೆ ಸ್ವಪ್ನ ಕಂಡಿತ್‌ ಫರೋಹನ ವರ್‌ಕ್‌ಯಿಂಜ ಎದ್ದ್‌ರ್‌ತ್.

⁵ಅಂವೊ ಪುನಃ ವರೀರ್‌ತ್. ಅಕ್ಕ ಇಂಞೊರ್‌ ಸ್ವಪ್ನ ಕಂಡತ್. ಈ ಕುರಿ, ಅಂವೊಂಡ ಸ್ವಪ್ನತ್‌ಲ್, ಏಳ್‌ ಕಾಳ್‌ರ ಮಂಡೆ ದುಂಬಿತ್‌ ಚಾಯಿತೆ ಬೊಳ್‌ಂದಿತ್‌ ಒರೇ ಕದ್ದ್‌ಲ್‌ ಉಳ್ಳನ ಕಂಡತ್.

⁶ಅಕ್ಕಣೆಕ್ ಚೆರ್‌ಂಗ್‌ನೆ ಪಿಂಞ ಕ್‍ೕಕ್‌ ದಿಕ್ಕ್‌ಲ್‌ ಬಂದ ಗಾಳಿಕ್‌ ಚುಟ್ಟ್‌ ಪೋನನೆಕೆ ಇಂಜ ಇಂಞು ಏಳ್‌ ಕಾಳ್‌ವಡ ಮಂಡೆನ ಕಂಡತ್.

⁷ಚೆರ್‌ಂಗ್‌ನೆ ಇಂಜ ಕಾಳ್‌ವಡ ಮಂಡೆ, ನಲ್ಲ ಕಾಳ್‌ರ ಮಂಡೆನ ಮುಗ್ಗಿರ್‌ತ್. ಅಕ್ಕ ಫರೋಹನ ವರ್‌ಕ್‌ಯಿಂಜ ಎಚ್ಚರ ಆಯಿತ್, ಅದ್‌ ಸ್ವಪ್ನ ಎಣ್ಣಿಯಂಡ್‌ ಅಂವೊಂಗ್‌ ಗೊತ್ತಾಚಿ.

⁸ಪೊಲಾಕ ಇದ್‌ನ್ನೇ ಗೇನಮಾಡಿತ್‌ ಅಂವೊಂಡ ಮನಸ್ಸೆ ಬಾರಿ ಬೇಜಾರತ್‌ಲ್‌ ಇಂಜತ್. ಅಂವೊಂಗ್‌ ಸ್ವಪ್ನತ್‌ರ ಅರ್ಥ ಗೊತ್ತಾಂಡೂಂದ್‌ ಐಗುಪ್ತ ದೇಶತ್‌ರ ಮಂತ್‌ರವಾದಿಯಳ ಪಿಂಞ ಜ್ಞಾನಿಯಳ ಕಾಕ್‌ಚಿಟ್ಟಿತ್‌ ಅಂವೊಂಡ ಸ್ವಪ್ನತ್‌ನ ಅಯಿಂಗಕ್‌ ಎಣ್ಣ್‌ಚಿ. ಆಚೇಂಗಿ ದಾರ್‌ಕು ಅದ್‌ಂಡ ಅರ್ಥತ್‌ನ ಎಣ್ಣ್‌ವಕ್‌ ಕಯಿಂಜಿತ್‌ಲ್ಲೆ.

⁹ಇನ್ನನೆ ಇಪ್ಪಕ ದ್ರಾಕ್ಷಿರಸ ಮಾಡಿ ಕೊಡ್‌ಪಯಿಂಗಡ ಮುಖ್ಯಸ್ತ ಫರೋಹನನ ನೋಟಿತ್: ನಾನ್‌ ಮಾಡ್‌ನ ತಪ್ಪ್‌ನ ಇಂದ್‌ ನಾನ್‌ ಗೇನ ಮಾಡಿಯೊವಿ.

¹⁰ಚೆನ್ನ ಕಾಲಕ್‌ ಮಿಂಞ ನಿಂಗಕ್‌ ಚೆಡಿ ಬಂದಿತ್‌ ನನ್ನ ಪಿಂಞ ಅಡಿಗೆ ಮಾಡ್‌ವಯಿಂಗಡ ಮುಖ್ಯಸ್ತನ ಕೈದಿಯಳ ಕಾಪಂವೊನಾನ ಜೈಲ್‌ರ ಮುಖ್ಯಸ್ತಂಡ ಮನೆರ ಜೈಲ್‌ಕ್‌ ಇಟ್ಟಿರ.

¹¹ಒರೇ ಬಯಿಟ್ ನಾನು ಅಂವೊನು ಬೋರೆ ಬೋರೆ ಸ್ವಪ್ನ ಕಂಡತ್. ಆ ದಂಡ್‌ ಸ್ವಪ್ನಕ್‌ ಅದ್‌ಂಡದೇ ಆನ ಅರ್ಥ ಇಂಜತ್.

¹²ಅಕ್ಕ ಕೈದಿಯಳ ಕಾಪಂವೊನಾನ ಮುಖ್ಯಸ್ತಂಗ್‌ ಆಳ್‌ ಆಯಿತ್‌ಂಜ ಒರ್‌ ಇಬ್ರಿಯ ಬಾಲೆಕಾರ ಅಲ್ಲಿ ಇಂಜತ್. ಅಂವೊಂಗ್‌ ಆ ಸ್ಪಪ್ನತ್‌ನ ನಂಗ ಎಣ್ಣ್‌ವಕ, ಅಂವೊ ಆ ದಂಡ್‌ ಸ್ವಪ್ನತ್‌ರ ಅರ್ಥತ್‌ನ ಎಣ್ಣಿ ತಾತ್.

¹³ಅದ್‌ಲ್ಲಾತೆ ಅಂವೊ ಎಣ್ಣ್‌ನನೆಕೆ ಎಲ್ಲಾ ಕಾರ್ಯವು ನಡ್ಂದತ್. ನನ್ನ ಕೆಲಸಕ್‌ ಪುನಃ ನೇಮಿಚಿಟ್ಟಿರ, ಇಂಞೊಬ್ಬನ ಮರತ್‌ಲ್‌ ತೂಕಿರಾಂದ್‌ ಎಣ್ಣ್‌ಚಿ.

¹⁴ಇದ್‌ನ ಕ್‍ೕಟ ಪಿಂಞ ಫರೋಹನ ಯೋಸೇಫನ ಕಾಕ್‌ಚಿಟ್ಟತ್. ಯೋಸೇಫನ ಬೆರಿಯ ಜೈಲ್ಯಿಂಜ ಕಾಕಿಯಂಡ್‌ ಬಾತ್. ಅಂವೊ ಚೌರ ಮಾಡಿತ್, ಬಟ್ಟೆ ಬದ್‌ಲಾಯಿಚಿಟ್ಟಿತ್, ಫರೋಹನಂಡ ಮಿಂಞತ್‌ ಬಾತ್.

¹⁵ಅಕ್ಕ ಫರೋಹನ ಯೋಸೇಫನ ನೋಟಿತ್: ನಾನ್‌ ಒರ್‌ ಸ್ವಪ್ನ ಕಂಡ. ಅದ್‌ಂಡ ಅರ್ಥತ್‌ನ ದಾರ್‌ಕು ಎಣ್ಣ್‌ವಕ್‌ ಕಯಿಂಜಿತ್‌ಲ್ಲೆ. ಆಚೇಂಗಿ ನೀಕ್‌ ಸ್ವಪ್ನತ್‌ರ ಅರ್ಥತ್‌ನ ಎಣ್ಣ್‌ವಕ್‌ ಕಯ್ಯೂಂದ್‌ ನಾಕ್‍ ಗೊತ್ತಾಚಿಂದ್‌ ಎಣ್ಣ್‌ಚಿ.

¹⁶ಅದ್‌ಂಗ್‌ ಯೋಸೇಫ: ಇದ್‌ ನಾಡಗೊಂಡ್‌ ಆಪುಲೆ, ಆಚೇಂಗಿ ದೇವನೇ ಫರೋಹನಂಗ್‌ ಒರ್‌ ನಲ್ಲ ಜವಾಬ್ ತಪ್ಪಾಂದ್‌ ಎಣ್ಣ್‌ಚಿ.

¹⁷ಅಕ್ಕ ಫರೋಹನ ಯೋಸೇಫಂಗ್: ನಾಡ ಸ್ವಪ್ನತ್‌ಲ್‌ ನಾನ್‌ ನೈಲ್‌ ಪೊಳೆರ ಬರಿಲ್‌ ನಿಂದಿತ್‌ಂಜ.

¹⁸ಒಮ್ಮಕೆ, ಚಾಯಿ ಪಿಂಞ ಕೊಬ್ಬಿತುಳ್ಳ ಏಳ್‌ ಪೈಯುವ ನೈಲ್‌ ಪೊಳೆಯಿಂಜ ಪೊರ್ಮೆ ಬಂದಿತ್‌ ಪಿಲ್ಲ್‌ನ ಮೇಯಿಂಜಂಡಿಂಜತ್.

¹⁹ಅದ್‌ಂಡ ಬಯ್ಯತ್‌ ಇಂಞು ಏಳ್‌ ಪೈಯ್ಯುವ ಪೊಳೆಯಿಂಜ ಪೊರ್ಮೆ ಬಾತ್. ಇವು ದುಂಬ ಅಸಹ್ಯವಾಯಿತು ಚೆರ್‌ಂಗನೆ ಆಯಿತು ಇಂಜತ್. ಇನ್ನನೆ ಉಳ್ಳ ಪ್ರಾಣಿಯಳ ಐಗುಪ್ತ ದೇಶತ್‌ಲೆಲ್ಲಿಯೂ ನಾನ್‌ ಕಂಡಿತ್‌ಲ್ಲೆ.

²⁰ಅಸಹ್ಯವಾಯಿತ್‌ ಚೆರ್‌ಂಗನೆ ಇಂಜ ಪೈಯ್ಯುವ ಕೊಬ್ಬಿತುಳ್ಳ ಪೈಯ್ಯುವಳ ಮುಗ್ಗಿರ್‌ತ್.

²¹ಅವು ಅದ್‌ನೆಲ್ಲ ತಿಂದತೇಂಗಿಯೂ ಮಿಂಞ ಇಂಜನೆಕೆ ಅಸಹ್ಯವಾಯಿತು ಚೆರ್‌ಂಗನೆದಾಯಿತು ಇಂಜತ್. ಅವು ಅದನೆಲ್ಲಾ ತಿಂದತೇಂಂದ್‌ ದಾರ್‌ ಎಣ್ಣುವಕಯಿಂಚಿತಿಲ್ಲೆ. ಅಕ್ಕ ನಾಕ್‍ ವರ್‌ಕ್‌ಯಿಂಜ ಎಚ್ಚರ ಆಚಿ.

²²ಚೆನ್ನ ನೇರ ಆನದು ನಾಕ್‍ ಇಂಞೊರ್‌ ಸ್ವಪ್ನ ಬುದ್ದತ್. ಈ ಕುರಿ ಏಳ್‌ ಕಾಳ್‌ರ ಮಂಡೆ, ದುಂಬಿತ್‌ ಚಾಯಿತೆ ಬೊಳ್‌ಂದಿತ್‌ ಒರೇ ಕದ್ದ್‌ಲ್‌ ಬಪ್ಪದ್‌ನ ಕಂಡ.

²³ಅಕ್ಕಣೆಕ್ ಚೆರ್‌ಂಗ್‌ನೆ ಪಿಂಞ ಕ್‍ೕಕ್‌ ದಿಕ್ಕ್‌ಲ್‌ ಬಂದ ಗಾಳಿಕ್‌ ಚುಟ್ಟ್‌ ಪೋನನೆಕೆ ಇಂಜ ಏಳ್‌ ಕಾಳ್‌ರ ಮಂಡೆ ಮೊಳೆಕೆ ಬುಟ್ಟತ್.

²⁴ಈ ಚೆರ್‌ಂಗ್‌ನೆ ಇಂಜ ಏಳ್‌ ಕಾಳ್‌ರ ಮಂಡೆ ನಲ್ಲ ಕಾಳ್‌ರ ಮಂಡೆನ ಮುಗ್ಗಿರ್‌ತ್. ಈ ಸ್ವಪ್ನತ್‌ನ ನಾನ್‌ ನಾಡ ಮಂತ್‌ರವಾದಿಯಕ್‌ ಎಣ್ಣ್‌ನ, ಆಚೇಂಗಿ ದಾರ್‌ಕು ಇದ್‌ಂಡ ಅರ್ಥತ್‌ನ ಎಣ್ಣ್‌ವಕ್‌ ಕಯಿಂಜಿತ್‌ಲ್ಲೆ.

²⁵ಅಕ್ಕ ಯೋಸೇಫ ಫರೋಹನನ ನೋಟಿತ್: ದಂಡ್‌ ಸ್ವಪ್ನತ್‌ರ ಅರ್ಥವು ಒಂದೇ. ದೇವ ಮಾಡ್‌ವಕುಳ್ಳ ಕಾರ್ಯತ್‌ನ ಫರೋಹನಂಗ್‌ ಕಾಂಬ್‌ಚಿಟ್ಟಿತುಂಡ್.

²⁶ಆ ಏಳ್‌ ನಲ್ಲ ಪೈಯ್ಯುವ ಏಳ್‌ ಕಾಲತ್‌ರ ವಿಷಯ; ಆ ಏಳ್‌ ನಲ್ಲ ಕಾಳ್‌ರ ಮಂಡೆಯು ಏಳ್‌ ಕಾಲತ್‌ರ ವಿಷಯ. ದಂಡ್‌ ಸ್ವಪ್ನವು ಒಂದೇ.

²⁷ಬಯ್ಯ ಬಂದ ಅಸಹ್ಯವಾನ ಚೆರ್‌ಂಗನೆ ಇಂಜ ಏಳ್‌ ಪೈಯ್ಯುವಳು ಏಳ್‌ ಕಾಲತ್‌ರ ವಿಷಯ. ಚೆರ್‌ಂಗ್‌ನೆ ಪಿಂಞ ಕ್‍ೕಕ್‌ ದಿಕ್ಕ್‌ಲ್‌ ಬಂದ ಗಾಳಿಕ್‌ ಚುಟ್ಟ್‌ ಪೋನನೆಕೆ ಇಂಜ ಏಳ್‌ ಕಾಳ್‌ರ ಮಂಡೆಯು ಏಳ್‌ ಕಾಲತ್‌ರ ವಿಷಯ. ಈ ಏಳ್‌ ಕಾಲವು ಬರಗಾಲ ಉಳ್ಳ ಕಾಲ ಆಪ.

²⁸ಇದೇ ನಾನ್‌ ಫರೋಹನಂಗ್‌ ಎಣ್ಣ್‌ವಕಿಂಜ ವಿಷಯ. ದೇವ ತಾನ್‌ ಮಾಡ್‌ವಕುಳ್ಳದ್‌ನ ಫರೋಹನಂಗ್‌ ಕಾಟಿಕೊಡ್‌ತಿತುಂಡ್.

²⁹ಇಡೀ ಐಗುಪ್ತ ದೇಶತ್‌ಲ್‌ ಪೂರ್ತಿ ಬೊಳೆ ಉಳ್ಳ ವಿಶೇಷವಾನ ಏಳ್‌ ಕಾಲ ಬಪ್ಪ.

³⁰ಅದ್‌ ಆನದು ಬರಗಾಲ ಉಳ್ಳ ಏಳ್‌ ಕಾಲ ಬಪ್ಪ. ಅಕ್ಕ ಐಗುಪ್ತ ದೇಶತ್‌ರ ಜನ ಆ ವಿಶೇಷವಾನ ಪೂರ್ತಿ ಬೊಳೆ ಇಂಜ ಕಾಲತ್‌ನ ಮರ್‌ಂದ್‌ರ್‌ವ. ಬರಗಾಲ ಇಡೀ ದೇಶತ್‌ನ ನಾಶ ಮಾಡಿರುವ.

³¹ಬಪ್ಪಕುಳ್ಳ ಬರಗಾಲ ಎಚ್ಚಕ್‌ ಗೋರವಾಯಿತ್‌ ಇಪ್ಪಾಂದ್‌ ಎಣ್ಣ್‌ಚೇಂಗಿ, ಅದ್‌ ನಲ್ಲ ಕಾಲತ್‌ರ ಗೇನನ ಪಾಳ್‌ ಮಾಡಿರುವ.

³²ಫರೋಹನಂಗ್‌ ದಂಡ್‌ ಕುರಿ ಈ ಸ್ವಪ್ನ ಬುದ್ದಗುಂಡ್, ಈ ಕಾರ್ಯತ್‌ನ ದೇವ ಕಂಡಿತವಾಯಿತ್‌ ಮಾಡ್‌ವಾಂದು, ಬೆರಿಯ ಮಾಡ್‌ವಾಂದು ನಿಂಗಕ್‌ ಗೊತ್ತಿರಡ್.

³³ಆನಗುಂಡ್‌ ಇಕ್ಕ ಫರೋಹನ ನಲ್ಲೋಣೆ ಬಯಂದ್ವ ಪಿಂಞ ಬುದ್ದಿವಂತಂವೊನಾನ ಒರ್‌ ಮನುಷ್ಯನ ಆರಿಚಿಟ್ಟಿತ್, ಅಂವೊನ ಇಡೀ ಐಗುಪ್ತ ದೇಶಕ್‌ ಅದಿಕಾರಿಯಾಯಿತ್‌ ನೇಮಿಚಿಡಂಡು.

³⁴ಇನ್ನನೆ ಫರೋಹನ ಅದಿಕಾರಿಯಳ ನೇಮಿಚಿಟ್ಟಿತ್, ಪೂರ್ತಿ ಬೊಳೆ ಉಳ್ಳ ಆ ಏಳ್‌ ಕಾಲತ್‌ಲ್‌ ಅಂಜಿಲ್‌ ಒರ್‌ ಬಾಗತ್‌ರ ಬೊಳೆನ ಅಯಿಂಗ ಕೂಟಿ ಬೆಕ್ಕಡ್.

³⁵ಈ ನಲ್ಲ ಕಾಲತ್‌ಲ್‌ ಕೂಟಿ ಬೆಚ್ಚ ಆಹಾರ ದಾನ್ಯ ಪಿಂಞ ಕಾಳ್‌ಕಡ್ಡಿನೆಲ್ಲ ಫರೋಹನಂಡ ಅದಿಕಾರತ್‌ರ ಅಡಿಲ್‌ ಕೂಟಿಬೆಕ್ಕಂಡು ಅಕ್ಕ ಪಟ್ಟಣತ್‌ಲೆಲ್ಲಾ ಆಹಾರ ಇಪ್ಪ.

³⁶ಅನ್ನನೆ ಮಾಡ್‌ಚೇಂಗಿ, ಬರಗಾಲತ್‌ಲು ಜನಕ್‌ ಬೋಂಡಿಯಚ್ಚಕ್‌ ತಿಂಬಕ್‌ ಇಪ್ಪ. ಇಲ್ಲತೆ ಪೋಚೇಂಗಿ ಬರಗಾಲ ಬಪ್ಪಕ ದೇಶತ್‌ಲ್‌ ಉಳ್ಳ ಜನಯೆಲ್ಲಾ ಚತ್ತ್‌ ಪೋಪಾಂದ್‌ ಎಣ್ಣ್‌ಚಿ.

³⁷ಯೋಸೇಫ ಎಣ್ಣ್‌ನದ್‌ ಫರೋಹನಂಗು ಅಂವೊಂಡ ಅದಿಕಾರಿಯಂಗಕು ನಲ್ಲದಾಯಿತ್‌ ಕಂಡತ್.

³⁸ಅಕ್ಕ, ಫರೋಹನ ಅಂವೊಂಡ ಅದಿಕಾರಿಯಳ ನೋಟಿತ್: ದೇವಡ ಆತ್ಮ ದುಂಬಿತುಳ್ಳ ಈ ಮನುಷ್ಯಂಡನೆಕೆ ಬೋರೆ ಒರ್‌ ಮನುಷ್ಯ ನಂಗಕ್‌ ಉಂಡಾಂದ್‌ ಎಣ್ಣ್‌ಚಿ.

³⁹ಫರೋಹನ ಯೋಸೇಫಂಡ ಕಡೆಕ್‌ ತಿರಿತ್: ದೇವ ನೀಕ್‌ ಇದ್‌ನೆಲ್ಲ ಅರ್ಥಮಾಡುವಕ್‌ ಎಣ್ಣಿ ಕೊಡ್‌ತಾಂಗ್, ನೀಕಿಂಜ ಬಲ್ಯ ನಲ್ಲೋಣೆ ಬಯಂದಂವೊನು, ಬುದ್ದಿವಂತನು ಉಳ್ಳ ಬೋರೆ ಒಬ್ಬ ಈ ದೇಶತ್‌ಲ್‌ ಇಲ್ಲೆ.

⁴⁰ನೀನ್‌ ನಾಡ ಅರಮೆನೆಕ್‌ ಅದಿಕಾರಿಯಾತ್‌ಪ್ಪಿಯ. ನೀಡ ತಕ್ಕ್‌ಕ್‌ ನಾಡ ಜನಯೆಲ್ಲಾ ತಗ್ಗಿತ್‌ ನಡ್‌ಪ. ಆಚೇಂಗಿ ಸಿಂಹಾಸನತ್‌ರ ವಿಷಯತ್‌ಲ್‌ ಮಾತ್‌ರ ನಾನ್‌ ನೀಕಿಂಜಿ ಬಲ್ಯಂವೊನಾಯಿತ್‌ಪ್ಪಿ.

⁴¹ನೋಟ್, ನಾನ್‌ ನಿನ್ನ ಇಡೀ ಐಗುಪ್ತ ದೇಶಕು ಅದಿಕಾರಿಯಾಯಿತ್‌ ನೇಮಿಚಿಟ್ಟಿತುಳ್ಳಂದ್‌ ಎಣ್ಣಿತ್,

⁴²ಫರೋಹನ ತಾಂಡ ಕೈಯಿಲ್‌ ಇಟ್ಟಂಡಿಂಜ ಮುದ್ರೆ ಮೋಯಿರತ್‌ನ ಎಡ್‌ತಿತ್‌ ಯೋಸೇಫಂಡ ಕೈ ಬೆರಕ್‌ ಇಟ್ಟಿತ್, ಅಂವೊಂಗ್‌ ನಾರ್‌ ಬಟ್ಟೆನ ಇಟ್ಟಿತ್, ಅಂವೊಂಡ ಬೋಳೆಕ್‌ ಪೊನ್ನ್‌ರ ಮಾಲೆನ ಇಟ್ಟತ್.

⁴³ಅಂವೊನ ತಾಂಡ ದಂಡನೆ ತೇರ್‌ರ ಮೇಲೆ ಪತ್ತ್‌ಚಿಟ್ಟಿತ್, ಪಿಂಞ ತಾಂಡ ಅದಿಕಾರಿಯಂಗಕ್‌ ಹುಕುಮ್‌ ಅಂವೊನ ಮರ್ಯಾತೆ ಮಾಡಂಡುಂದ್‌ ಜೋರಾಯಿತ್‌ ಎಣ್ಣುವಕ್‌ ಕೊಡ್‌ತ್ತತ್. ಅನ್ನನೆ ಇಗುಪ್ತ ರಾಜ್ಯಕ್‌ ಅಲ್ಲಾ ಪ್ರದಾನಿಯಾಯಿತ್‌ ಮಾಡ್‌ಚಿ.

⁴⁴ಇಂಞು ಫರೋಹನ ಯೋಸೇಫನ ನೋಟಿತ್: ನಾನ್‌ ಫರೋಹನ (ರಾಜ), ಆಚೇಂಗಿಯು ನೀಡ ಅಪ್ಪಣೆ ಇಲ್ಲತೆ ದಾರು ಕೈಯಿನ ಆಡ್‌ ಕಾಲ್‌ನ ಆಡ್‌ ಅನ್‌ಕೊಕ್ಕಾಗಾಂದ್‌ ಎಣ್ಣ್‌ಚಿ.

⁴⁵ಅದಲ್ಲತೆ, ಫರೋಹನ ಯೋಸೇಫಂಗ್‌ ಸಾಪ್ನತ್ಪನ್ನೇಹ ಎಣ್ಣುವ ಐಗುಪ್ತ ಪೆದತ್‌ನ ಬೆಚ್ಚತ್. ಪಿಂಞ ಓನ್‌ ಎಣ್ಣುವ ಪಟ್ಟಣಕ್‌ ಯಾಜಕನಾನ ಪೋಟೀಫೆರಂಡ ಮೋವಳಾನ ಆಸನತ್‌ ಎಣ್ಣುವವಳ ಯೋಸೇಫಂಗ್‌ ಪೊಣ್ಣಾಯಿತ್‌ ಕೊಡ್‌ತತ್. ಯೋಸೇಫ ಐಗುಪ್ತ ದೇಶತ್‌ರ ಮೇಲೆ ಅದಿಕಾರ ಎಡ್‌ತಂಡ್, ಐಗುಪ್ತ ದೇಶತ್‌ನ ನೋಟ್ಟುವಕ್‌ ಪೊರಟಿತ್‌ ಪೋಚಿ.

⁴⁶ಯೋಸೇಫ ಐಗುಪ್ತ ದೇಶತ್‌ರ ರಾಜನಾನ ಫರೋಹನಂಡ ಸೇವೇನ ಸುರು ಮಾಡ್‌ವಕ ಅಂವೊಂಗ್‌ ನುಪ್ಪದ್‌ ವಯಸ್ಸ್‌ ಆಯಿತ್‌ಂಜತ್. ಯೋಸೇಫ ಫರೋಹನಂಡ ಸನ್ನಿದಿಯಿಂಜ ಪೋಯಿತ್‌ ಇಡೀ ಐಗುಪ್ತ ದೇಶತ್‌ನ ಪ್ರಯಾಣ ಮಾಡ್‌ಚಿ.

⁴⁷ಎಣ್ಣ್‌ನನೆಕೆ ಪೂರ್ತಿ ಬೊಳೆ ಇಂಜ ಆ ಏಳ್‌ ಕಾಲತ್‌ಲ್‌ ಬೂಮಿ ಬಲ್ಯ ಫಲ ಕೊಡ್‌ತತ್.

⁴⁸ಆ ಕಾಲತ್‌ಲ್, ಯೋಸೇಫ ಐಗುಪ್ತ ದೇಶತ್‌ಲ್‌ ಬೊಳ್‌ಂದ ಬೊಳೆನ ಕೂಟಿತ್, ಆ ಬೊಳೆನೆಲ್ಲಾ ಪಟ್ಟಣತ್‌ಲ್‌ ಕೂಟಿ ಬೆಚ್ಚತ್. ಓರೋರ್‌ ಪಟ್ಟಣತ್‌ರ ಸುತ್ತ್‌ಮುತ್ತ್‌ಲ್‌ ಇಂಜ ಬೂಮಿರ ಬೊಳೆನ ಕೂಟಿಬೆಚ್ಚತ್.

⁴⁹ಇನ್ನನೆ ಯೋಸೇಫ ಆಹಾರ ದಾನ್ಯತ್‌ನ ಕಡಕರೆ ಮಣತ್‌ರನೆಕೆ ಲೆಕ್ಕ ಬೆಪ್ಪಕ್‌ ಕಯ್ಯತಚ್ಚಕ್‌ ಕೂಟಿ ಬೆಚ್ಚತ್.

⁵⁰ಈ ಕಾಲತ್‌ ಬರಗಾಲ ಸುರು ಆಪಕ್‌ ಮಿಂಞಲೆ ಯೋಸೇಫಂಗ್‌ ದಂಡ್‌ ಕ್‌ಣ್ಣ ಮಕ್ಕ ಪುಟ್ಟ್‌ಚಿ. ಅಯಿಂಗಳ ಓನ್‌ ಪಟ್ಟಣತ್‌ರ ಯಾಜಕನಾನ ಪೋಟೀಫರಂಡ ಮೋವಳಾನ ಆಸನತ್‌ ಅಂವೊಂಗ್‌ ಪೆತ್ತತ್.

⁵¹ಯೋಸೇಫ: ದೇವ ನಾಡ ಎಲ್ಲಾ ಕಷ್ಟತ್‌ನ ಪಿಂಞ ನಾಡ ಅಪ್ಪಂಡ ಕುಟುಂಬತ್‌ನ ಮರ್ಪನೆಕೆ ಮಾಡ್‌ಚೀಂದ್‌ ಎಣ್ಣಿತ್‌ ಅಂವೊಂಗ್‌ ಮನಸ್ಸೆ ಎಣ್ಣಿಯಂಡ್‌ ಪೆದ ಬೆಚ್ಚತ್.

⁵²ನಾನ್‌ ಕಷ್ಟ ಪಟ್ಟ ದೇಶತ್‌ಲ್‌ ದೇವ ನನ್ನ ಅಬಿವೃದ್ದಿ ಮಾಡಿತ್‌ಂದ್‌ ಎಣ್ಣಿತ್‌ ಎಳೆಯ ಮೋಂವೊಂಗ್‌ ಎಫ್ರಾಯಿಮ್‌ ಎಣ್ಣಿಯಂಡ್‌ ಪೆದಬೆಚ್ಚತ್.

⁵³ಐಗುಪ್ತ ದೇಶತ್‍ಕ್ ಬಂದ ಏಳ್‌ ಪೂರ್ತಿ ಬೊಳೆರ ಕಾಲ ತ್‍ೕಂದತ್.

⁵⁴ಅಲ್ಲಿಂಜ ಯೋಸೇಫ ಎಣ್ಣ್‌ನನೆಕೆ ಏಳ್‌ ಕಾಲತ್‌ರ ಬರಗಾಲ ಸುರು ಆಚಿ. ಬರಕಾಲ ಸುತ್ತ್‌ಮುತ್ತ್‌ ಉಳ್ಳ ಎಲ್ಲಾ ದೇಶತ್‌ಲ್‌ ಸುರು ಆಚಿ. ಆಚೇಂಗಿ ಐಗುಪ್ತ ದೇಶತ್‌ಲ್‌ ಮಾತ್‌ರ ಆಹಾರ ಇಂಜತ್.

⁵⁵ಐಗುಪ್ತ ದೇಶತ್‌ರ ಜನಕ್‌ ಬರಗಾಲತ್‌ರ ಬಿಸಿ ಪಡ್‌ವಕ, ಜನ ಫರೋಹನಂಗ್‌ ಮೊರೆ ಇಟ್ಟತ್. ಅಂವೊ ಅಯಿಂಗಕ್: ಯೋಸೇಫಂಡ ಪಕ್ಕ ಪೋಯಿತ್‌ ಅಂವೊ ಎಂತ ಎಣ್ಣ್‌ವ ಅನ್ನನೆ ಮಾಡೀಂದ್‌ ಎಣ್ಣ್‌ಚಿ.

⁵⁶ದೇಶತ್‌ರ ಎಲ್ಲಾ ಕಡೆಯು ಬರಗಾಲ ಬಪ್ಪಕ, ಯೋಸೇಫ ಪತ್ತಾಯ ಕೋಂಬರೆನ ತೊರ್‌ಂದಿತ್‌ ಐಗುಪ್ತ ದೇಶತ್‌ರ ಜನಕ್‌ ಆಹಾರ ದಾನ್ಯತ್‌ನ ಮಾರ್ಚಿ. ಬರಕಾಲ ಐಗುಪ್ತ ದೇಶತ್‌ಲ್‌ ದುಂಬ ಕಠಿಣವಾಯಿತ್‌ ಆಯಂಡಿಂಜತ್.

⁵⁷ಇಡೀ ಲೋಕತ್‌ ಬರಕಾಲ ದುಂಬ ಕಠಿಣವಾಯಿತ್‌ ಇಂಜಂಗ್‌ ಸುತ್ತ್‌ಮುತ್ತ್‌ ದೇಶತ್‌ಂಜೆಲ್ಲಾ ಜನ ಐಗುಪ್ತ ದೇಶಕ್‌ ಬಂದಿತ್‌ ಯೋಸೇಫಂಡ ಪಕ್ಕ ಆಹಾರ ದಾನ್ಯತ್‌ನ ಕ್ರಯಕ್‌ ಎಡ್‍ತತ್.