Read Kodava ಆದ್ಯತ್‌ರ ಪುಸ್ತಕ 43 Bible Online

ಆದ್ಯತ್‌ರ ಪುಸ್ತಕ 43 - Kodava bible

ಆದ್ಯತ್‌ರ ಪುಸ್ತಕ 43

¹ಕಾನಾನ್‌ ದೇಶತ್‌ಲ್‌ ಬರಗಾಲ ಕಠಿಣವಾಯಿತ್‌ಂಜತ್.

²ಅಯಿಂಗ ಐಗುಪ್ತ ದೇಶತ್‌ಂಜ ಕೊಂಡಬಂದ ಆಹಾರ ದಾನ್ಯ ತ್‍ೕಂದ್‌ ಪೋಪಕಾಪಕ ಅಯಿಂಗಡ ಅಪ್ಪ ಅಯಿಂಗಳ ನೋಟಿತ್: ನಿಂಗ ತಿರಿತ್‌ ಪೋಯಿತ್‌ ಇಂಞು ಚೆನ್ನ ಆಹಾರ ದಾನ್ಯತ್‌ನ ಕ್ರಯಕ್‌ ಎಡ್‌ತ ಬಾರೀಂದ್‌ ಎಣ್ಣ್‌ಚಿ.

³ಅದ್‌ಂಗ್‌ ಯೆಹೂದ: ಆ ಮನುಷ್ಯ ನಿಂಗ ನಿಂಗಡ ತಮ್ಮಣನ ನಿಂಗಡ ಕೂಡೆ ಕಾಕಿಯಂಡ್‌ ಬಕ್ಕತೆ ಪೋಚೇಂಗಿ ನಿಂಗ ನಾಡ ಮೂಡ್‌ನ ನೋಟ್‌ವಕ್ಕಾಗಾಂದ್‌ ನಂಗಕ್‌ ಎಚ್ಚರಿಕೆ ಕೊಡ್‌ತಿತ್‌ ಅಯಿಚತ್.

⁴ನಂಗಡ ತಮ್ಮಣನ ನಂಗಡ ಕೂಡೆ ಅಯಿಚತೇಂಗಿ ನಂಗ ಪೋಯಿತ್‌ ಆಹಾರ ದಾನ್ಯತ್‌ನ ಕ್ರಯಕ್‌ ಎಡ್‌ತಂಡ್‌ ಬಪ್ಪಾಂದ್‌ ಎಣ್ಣ್‌ಚಿ.

⁵ಅನ್ನನೆ ಅಂವೊನ ನಂಗಡ ಕೂಡೆ ಅಯಿಕತೆ ಪೋಚೇಂಗಿ, ನಂಗ ಅಲ್ಲಿಕ್‌ ಪೋಪುಲೆ. ಎನ್ನಂಗೆಣ್ಣ್‌ಚೇಂಗಿ: ನಿಂಗ ನಿಂಗಡ ತಮ್ಮಣನ ನಿಂಗಡ ಕೂಡೆ ಕಾಕಿಯಂಡ್‌ ಬಕ್ಕತೆ ಪೋಚೇಂಗಿ ನಿಂಗ ನಾಡ ಮೂಡ್‌ನ ನೋಟ್‌ವಕ್ಕಾಗಾಂದ್‌ ಆ ಮನುಷ್ಯ ನಂಗಕ್‌ ಎಣ್ಣಿತ್‌ ಅಯಿಚಿತ್‍ೕಂದ್‌ ಎಣ್ಣ್‌ಚಿ.

⁶ಅದ್‌ಂಗ್‌ ಇಸ್ರಾಯೇಲ: ನಿಂಗಕ್‌ ಇಂಞೊರ್‌ ತಮ್ಮಣ ಉಂಡ್‍ೕಂದ್‌ ಆ ಮನುಷ್ಯಂಗ್‌ ಎಣ್ಣಿತ್, ಎನ್ನಂಗ್‌ ನಾಕ್‍ ಈ ತೊಂದರೆನ ಎಡ್‌ತಂಡ್‌ ಬಂದಿತುಳ್ಳಿರಾಂದ್‌ ಎಣ್ಣ್‌ಚಿ.

⁷ಅದ್‌ಂಗ್‌ ಅಯಿಂಗ: ಆ ಮನುಷ್ಯ ನಿಂಗಡ ಅಪ್ಪ ಇಂಞು ಬದ್‌ಕಿತುಂಡಾ? ನಿಂಗಕ್‌ ಇಂಞೊರ್‌ ತಮ್ಮಣ ಉಂಡಾ? ಎಣ್ಣಿಯಂಡ್‌ ನಂಗಡ ಕುಟುಂಬತ್‌ರ ವಿಷಯತ್‌ ದುಂಬ ಪ್ರಶ್ನೆ ಇಟ್ಟತ್. ನಂಗ ಅಂವೊಂಡ ಪ್ರಶ್ನೆಕ್‌ ಉತ್ತರ ಕೊಡ್‌ತ್ತತ್. ನಿಂಗಡ ತಮ್ಮಣನ ಕಾಕಿಯಂಡ್‌ ಬಾರೀಂದ್‌ ಅಂವೊ ಎಣ್ಣ್‌ವಾಂದ್‌ ನಂಗಕ್‌ ಗೊತ್ತಿಂಜ್‌ತ್ತ್‌ಲೇಂದ್‌ ಎಣ್ಣ್‌ಚಿ.

⁸ಇಂಞು, ಯೆಹೂದ ತಾಂಡ ಅಪ್ಪನಾನ ಇಸ್ರಾಯೇಲನ ನೋಟಿತ್: ನೀನ್, ನಂಗ ಪಿಂಞ ನಂಗಡ ಚುಮ್ಮಿ ಮಕ್ಕ ಕೆಲ ಪಯಿಚಿತ್‌ ಚಾವತೆ ಬದಕ್‌ವಕಾಯಿತ್‌ ನಂಗ ಪೊರ್‌ಟಿತ್‌ ಪೋಪ, ಎಳೆಯಂವೊನ ನಾಡ ಕೂಡೆ ಅಯಿಚಿತಾರಿ.

⁹ನಾನ್‌ ಅಂವೊಂಗ್‌ ಜವಾಬ್ದಾರನಾಯಿತ್‌ಪ್ಪಿ. ಅಂವೊಂಡ ವಿಷಯತ್‌ ನನ್ನ ಕ್‍ೕಳಿ, ನಾನ್‌ ಅಂವೊನ ತಿರಿತ್‌ ಕಾಕಿಯಂಡ್‌ ಬಕ್ಕತೆ ಪೋಚೇಂಗಿ ಆ ಅಪರಾದ ಕಾಲಕಾಲಕು ನಾಡ ಮಂಡೆರ ಮೇಲೆ ಇರಡ್.

¹⁰ನಂಗ ತಡಮಾಡತೆ ಇಂಜಿತುಂಡೇಂಗಿ, ಇಕ್ಕಣೆಕ್‌ ನಂಗ ದಂಡ್‌ ಕುರಿ ಅಲ್ಲಿಕ್‌ ಪೋಯಿತ್‌ ಬಪ್ಪಕಿಂಜತ್‍ೕಂದ್‌ ಎಣ್ಣ್‌ಚಿ.

¹¹ಅದ್‌ಂಗ್‌ ಅಯಿಂಗಡ ಅಪ್ಪನಾನ ಇಸ್ರಾಯೇಲ: ಅನ್ನನೆ ಆಚೇಂಗಿ, ನಿಂಗ ಒರ್‌ ಕೆಲಸ ಮಾಡಿ. ಈ ದೇಶತ್‌ಲ್‌ ಕ್‌ಟ್ಟ್‌ವ ಬೆಲೆಯುಳ್ಳ ವಸ್ತುಲ್‌ ಚೆನ್ನ ತೈಲ, ಚೆನ್ನ ತೇನ್, ಚೆನ್ನ ವಾಸಾನೆಯುಳ್ಳ ದ್ರವ್ಯ, ಒಣಗ್‌ನ ರಾಕ್ಷೆ ಪಣ್ಣ್, ಕಾಕಂಬಿ, ಹಾಲುಬಡ್ಡಿ, ಪಿಂಞ ಬಾದಾಮಿನ ಆ ಮನುಷ್ಯಂಗ್‌ ಇನಾಮಾಯಿತ್‌ ಎಡ್‌ತಂಡ್‌ ಪೊಯಿ.

¹²ದಂಡ್‌ ಪಟ್ಟ್‌ ಪಣತ್‌ನ ಕೈಲ್‌ ಎಡ್‌ತಂಡ್‌ ಪೋಯಿ. ಚೀಲತ್‌ರ ಬಾಯಿಲ್‌ ಇಟ್ಟಿತ್‌ ತಿರಿತ್‌ ಅಯಿಚ ಪಣತ್‌ನ ಸಹ ಎಡ್‌ತಂಡ್‌ ಪೋಯಿ. ಒರ್‌ ಸಮಯ ಅಯಿಂಗ ಅರಿಯತೆ ನಿಂಗಡ ಚೀಲತ್‌ ಬೆಚ್ಚಿತಿಕ್ಕು

¹³ನಿಂಗಡ ತಮ್ಮಣನ ಸಹ ಕಾಕಿಯಂಡ್‌ ಆ ಮನುಷ್ಯಂಡ ಪಕ್ಕ ಪುನಃ ಪೋಯಿ.

¹⁴ಅಂವೊ ನಿಂಗಡ ಮೇಲೆ ಕನಿಕರ ಬೆಚ್ಚಿತ್‌ ಸಿಮೇಯೋನನ, ಪಿಂಞ ಬೆನ್ಯಾಮೀನನ ನಿಂಗಡ ಕೂಡೆ ತಿರಿತ್‌ ಅಯಿಪಕ್‌ ಸರ್ವಶಕ್ತನಾನ ದೇವ ನಿಂಗಕ್‌ ಕರುಣೆ ಕ್‌ಟ್ಟುವನೆಕೆ ಮಾಡಡ್. ನಾನ್‌ ನಾಡ ಮಕ್ಕಳ ಕಳ್‌ದಂಡುಂದ್‌ ಇಂಜತೇಂಗಿ, ಅದ್‌ ಅನ್ನನೆ ಆಡ್‍ೕಂದ್‌ ಎಣ್ಣ್‌ಚಿ.

¹⁵ಅಕ್ಕ ಅಯಿಂಗ ಇನಾಮ್‌ನ ಪಿಂಞ ದಂಡ್‌ ಪಟ್ಟ್‌ ಪಣತ್‌ನ ಎಡ್‌ತಂಡ್‌ ಬೆನ್ಯಾಮೀನ್ನ ಅಯಿಂಗಡ ಕೂಡೆ ಕಾಕಿಯಂಡ್‌ ಐಗುಪ್ತ ದೇಶಕ್‌ ಪ್ರಯಾಣ ಮಾಡಿತ್, ಯೋಸೇಫಂಡ ಮಿಂಞತ್‌ ಬಂದಿತ್‌ ನಿಂದತ್.

¹⁶ಬೆನ್ಯಾಮೀನ ಅಯಿಂಗಡ ಕೂಡೆ ಬಂದಿತುಳ್ಳದ್‌ನ ಯೋಸೇಫ ಕಂಡಿತ್, ತಾಂಡ ಮನೆರ ಕಾರ್ಯಕಾರನ ಕಾಕಿತ್: ಈಂಗಳ ಮನೆಕ್‌ ಕಾಕಿಯಂಡ್‌ ಪೋಯಿತ್, ಉಂಬಕ್‌ ಬೋಂಡಿಯಾನದ್‌ನ ಕೊಂದಿತ್‌ ನಲ್ಲ ಗದ್ದಾಳ ತಯಾರ್‌ ಮಾಡ್, ಇಂದ್‌ ಮಜ್ಜಣ ಈ ಜನ ನಾಡ ಕೂಡೆ ಉಂಬಾಂದ್‌ ಎಣ್ಣ್‌ಚಿ.

¹⁷ಆ ಕಾರ್ಯಕಾರ ಯೋಸೇಫ ಎಣ್ಣ್‌ನನೆಕೆ ಮಾಡಿತ್‌ ಅಯಿಂಗಳ ಯೋಸೇಫಂಡ ಮನೇಕ್‌ ಕಾಕಿಯಂಡ್‌ ಪೋಚಿ.

¹⁸ಅಯಿಂಗಳ ಯೋಸೇಫಂಡ ಮನೆಕ್‌ ಕಾಕಿಯಂಡ್‌ ಪೋಪದ್‌ನ ಕಂಡಿತ್‌ ಅಯಿಂಗಕ್‌ ಪೋಡಿ ಆಯಿತ್: ಮಿಂಞ ನಂಗಡ ಚೀಲತ್‌ಲ್‌ ತಿರಿತ್‌ ಅಯಿಚ ಪಣಕ್‌ ನಂಗಡ ಮೇಲೆ ಕುತ್ತ ಎಣ್ಣಿತ್, ನಂಗಳ ಪುಡ್‌ಚಂಡ್‌ ಬಂದಿತ್, ಸಮಯ ನೋಟಿತ್‌ ಇಕ್ಕ ನಂಗಡ ವಿರುದ್ದ ಬಂದಿತ್, ನಂಗಡ ಕತ್ತೆಯಳ ಎಡ್‌ತಂಡ್‌ ನಂಗಳ ಅಡಿಯಾಳಾಯಿತ್‌ ಮಾಡ್‌ವಕ್‌ ಇಕ್ಕ ಕಾಕಿಯಂಡ್‌ ಪೋಯಂಡುಂಡ್‍ೕಂದ್‌ ಎಣ್ಣ್‌ಚಿ.

¹⁹ಆನಗುಂಡ್‌ ಅಯಿಂಗ ಯೋಸೇಫಂಡ ಮನೆರ ಪಡಿರ ಪಕ್ಕ ಬಪ್ಪಕ, ಯೋಸೇಫಂಡ ಕಾರ್ಯಕಾರಂಡ ಪಕ್ಕ ಬಂದಿತ್:

²⁰ಸ್ವಾಮಿ, ಮಿಂಞ ಒರ್‌ ಕುರಿ ನಂಗ ಇಲ್ಲಿಕ್‌ ಬಂದಿತ್‌ ಆಹಾರ ದಾನ್ಯತ್‌ನ ಕ್ರಯಕ್‌ ಎಡ್‌ತಂಡ್‌ ಪೋಚಿ.

²¹ನಂಗ ತಿರಿತ್‌ ಮನೆಕ್‌ ಪೋಪಕ, ಬಯಿಟ್ ಒಳಿಯುವ ಜಾಗತ್‌ಲ್‌ ಚೀಲತ್‌ನ ತೊರ್‌ಂದಿತ್‌ ನೋಟ್‌ವಕ ತೂಕ ಕಮ್ಮಿ ಆಕತೆ ನಂಗ ಆಹಾರ ದಾನ್ಯತ್‌ನ ಎಡ್‌ಪಕ್‌ ಕೊಡ್‌ತ ಪಣ ನಂಗಡನಂಗಡ ಚೀಲತ್‌ಲ್‌ ಉಳ್ಳದ್‌ ನಂಗಕ್‌ ಗೊತ್ತಾಚಿ. ಅದ್‌ನ ನಂಗ ಅದ್‌ನ ತಿರಿತ್‌ ಎಡ್‌ತಂಡ್‌ ಬಂದಿತುಂಡ್.

²²ಇಕ್ಕ ನಂಗ ಇಂಞು ಚೆನ್ನ ಆಹಾರ ದಾನ್ಯತ್‌ನ ಕ್ರಯಕ್‌ ಎಡ್‌ಪಕಾಯಿತ್‌ ಬೋರೆ ಪಣತ್‌ನ ಎಡ್‌ತಂಡ್‌ ಬಂದಿಯೆ. ನಂಗ ಮಿಂಞ ಕೊಡ್‌ತ ಪಣತ್‌ನ ದಾರ್‌ ಚೀಲಕ್‌ ಇಟ್ಟತ್‍ೕಂದ್‌ ನಂಗಕ್‌ ಗೊತ್ತ್‌ಲ್ಲೇಂದ್‌ ಎಣ್ಣ್‌ಚಿ.

²³ಅದ್‌ಂಗ್‌ ಆ ಕಾರ್ಯಕಾರ: ನಿಂಗ ಸಮಾದಾನತ್‌ಲ್‌ ಇರಿ. ನಿಂಗ ಬೊತ್ತತಿ. ನಿಂಗಡ ದೇವನಾಯಿತುಳ್ಳ ನಿಂಗಡ ಮುತ್ತಜ್ಜಂಗಡ ದೇವ ನಿಂಗಕ್‌ ಆ ಚೀಲತ್‌ಲ್‌ ಇಟ್ಟಿತಿಕ್ಕು. ನಿಂಗಡ ಪಣ ನಾಕ್‍ ಕ್‌ಟ್ಟ್‌ಚೀಂದ್‌ ಎಣ್ಣಿತ್, ಸಿಮೆಯೋನನ ಪೊರ್ಮೆ ಕಾಕಿಯಂಡ್‌ ಬಂತ್‌ ಅಯಿಂಗಡ ಪಕ್ಕ ಬುಟ್ಟತ್.

²⁴ಇಂಞು ಆ ಮನುಷ್ಯ ಅಯಿಂಗಳ ಯೋಸೇಫಂಡ ಮನೆರ ಒಳ್‌ಕ್‌ ಕಾಕಿಯಂಡ್‌ ಪೋಯಿತ್, ಅಯಿಂಗಕ್‌ ಕಾಲ್‌ ಕತ್ತ್‌ವಕ್‌ ನೀರ್‌ ಕೊಡ್‌ತಿತ್, ಅಯಿಂಗಡ ಕತ್ತೆಯಕ್‌ ಮೇಚಿನ ಇಟ್ಟತ್.

²⁵ಅಯಿಂಗ ಅಲ್ಲಿ ಉಂಬಾಂದ್‌ ಅಯಿಂಗಕ್‌ ಗೊತ್ತಾನಗುಂಡ್, ಮಜ್ಜಣ ಯೋಸೇಫ ಬಪ್ಪಕತ್ತನೆ ಇನಾಮ್‌ನ ಬೆಚ್ಚಂಡ್‌ ಅಂವೊಂಗಾಯಿತ್‌ ಪಾರಕಾತಂಡಿಂಜತ್.

²⁶ಯೋಸೇಫ ಮನೆಕ್‌ ಬಂದದು ಅಯಿಂಗ ಅಯಿಂಗಡ ಕೈಯಿಲ್‌ ಬೆಚ್ಚಂಡಿಂಜ ಇನಾಮ್‌ನ ಮನೆರ ಒಳ್‌ಕ್‌ ಎಡ್‌ತ ಬಂತ್, ಅಂವೊಂಗ್‌ ಕೊಡ್‌ತಿತ್, ಅಂವೊಂಡ ಮಿಂಞತ್‌ ಅಡ್ಡ ಬುದ್ದತ್.

²⁷ಅಕ್ಕ ಅಂವೊ ಅಯಿಂಗಳ ವಿಚಾರಿಚಿಟ್ಟಿತ್, ನಿಂಗ ಎಣ್ಣಿಯಂಡಿಂಜ ವಯಸ್ಸಾನ ನಿಂಗಡ ಅಪ್ಪ ಚಾಯಿತೆ ಉಂಡಾ? ಅಂವೊ ಇಂಞು ಬದ್‌ಕಿತುಂಡಾಂದ್‌ ಕ್‍ೕಟತ್.

²⁸ಅದ್‌ಂಗ್‌ ಅಯಿಂಗ: ಅಕ್ಕು, ನೀಡ ಸೇವಕನಾನ ನಂಗಡ ಅಪ್ಪ ಚಾಯಿತೆ ಉಂಡ್. ಅಂವೊ ಬದ್‌ಕಿತುಂಡ್‍ೕಂದ್‌ ಎಣ್ಣಿತ್, ಪುನಃ ಅಂವೊಂಗ್‌ ಅಡ್ಡ ಬುದ್ದತ್.

²⁹ಅಕ್ಕ ಅಂವೊ ಕಣ್ಣೆಡ್‌ತಿತ್‌ ತಾಂಡ ಅವ್ವ ಪೆತ್ತ ಮೋಂವೊನಾನ ಬೆನ್ಯಾಮೀನನ ನೋಟಿತ್: ನಿಂಗ ನಾಕ್‍ ಎಣ್ಣ್‌ನ ನಿಂಗಡ ಚೆರಿಯ ತಮ್ಮಣ ಇಂವೊನಾ? ನಾಡ ಮೋನೇ, ದೇವ ನೀಡ ಮೇಲೆ ಕನಿಕರ ಕಾಟಡ್‍ೕಂದ್‌ ಎಣ್ಣ್‌ಚಿ.

³⁰ಯೋಸೇಫಂಡ ಮನಸ್ಸ್‌ ಅಂವೊಂಡ ತಮ್ಮಣಂಗಾಯಿತ್‌ ಕೊದಿಚಾಂಗ್, ಅಂವೊ ಮೊರ್‌ಡ್‌ವಕ್‌ ಒರ್‌ ಜಾಗತ್‌ನ ತ್‍ೕಡಿಯಂಡ್‌ ಬೆರಿಯ ಕೋಂಬರೆಕ್‌ ಪೋಯಿತ್‌ ಅಲ್ಲಿ ಮೊರ್‌ಟತ್.

³¹ಅಲ್ಲಿಂಜ ಅಂವೊ ತಾಂಡ ಮೂಡ್‌ನ ಕತ್ತಿಯಂಡ್‌ ಪೊರ್ಮೆ ಬಂದಿತ್, ದುಃಖತ್‌ನ ಮನಸ್ಸ್‌ಲ್‌ ಬೆಚ್ಚಂಡ್, ಉಂಬಕ್‌ ಎಡ್‌ತಂಡ್‌ ಬಾರೀಂದ್‌ ಎಣ್ಣ್‌ಚಿ.

³²ಐಗುಪ್ತ ದೇಶತ್‌ರ ಜನ ಇಬ್ರಿಯ ಜನತ್‌ರ ಕೂಡೆ ಉಂಬಯಿಂಜ್‌ತ್‌ಲ್ಲೆ. ಅನ್ನನೆ ಮಾಡ್‌ವದ್‌ ಅಯಿಂಗಕ್‌ ಅಸಹ್ಯವಾಯಿತ್‌ಪ್ಪ. ಆನಗುಂಡ್‌ ಅಯಿಂಗ ಯೋಸೇಫಂಗ್‌ ಬೋರೆಯಾಯಿತು, ಅಯಿಂಗಕ್‌ ಬೋರೆಯಾಯಿತು ಉಂಬಕ್‌ ಬೆಚ್ಚತ್.

³³ಅಂವೊಂಗ್‌ ಮಿಂಞತ್‌ ಬಲ್ಯಂವೊಡಿಂಜ ಚೆರಿಯಂವೊಕತ್ತನೆ ಅಯಿಂಗಯಿಂಗಡ ವಯಸ್ಸ್‌ಕ್ ಸೆರಿಯಾಯಿತ್‌ ಅಯಿಂಗಳ ಅಳ್‍ಪ್‍ಚಿಟ್ಟತ್. ಅದ್‌ಂಗ್‌ ಅಯಿಂಗ ಆಶ್ಚರ್ಯ ಪಟ್ಟತ್.

³⁴ಯೋಸೇಫ ಅಂವೊಂಡ ಮೇಜಿಲ್‌ ಬೆಚ್ಚಿತ್‌ಂಜ ಆಹಾರತ್‌ಂಜ ಚೆನ್ನ ಆಹಾರತ್‌ನ ಒಬ್ಬೊಬ್ಬಂಗು ಅಯಿಚತ್. ಆಚೇಂಗಿ ಬೆನ್ಯಾಮೀನಂಗ್‌ ಅಂಜ್ ಪಟ್ಟ್‌ ಜಾಸ್ತಿ ಇಂಜತ್. ಅಯಿಂಗ ಎಲ್ಲಾರು ಅಂವೊಂಡ ಕೂಡೆ ಉಂಡಿತ್‌ ಕುಡ್‌ಚಿತ್‌ ಕುಶೀಲ್‌ ಇಂಜತ್.