Read Kodava ಆದ್ಯತ್‌ರ ಪುಸ್ತಕ 47 Bible Online

ಆದ್ಯತ್‌ರ ಪುಸ್ತಕ 47 - Kodava bible

ಆದ್ಯತ್‌ರ ಪುಸ್ತಕ 47

¹ಅಕ್ಕ ಯೋಸೇಫ ಫರೋಹನಂಡ ಪಕ್ಕ ಪೋಯಿತ್: ನಾಡ ಅಪ್ಪ ಪಿಂಞ ಅಣ್ಣತಮ್ಮಣಂಗ, ಅಯಿಂಗಡ ಎತ್ತ್‌ಕಡ್‌ಚಿಯಳ, ಆಡ್‌ಕೊರಿಯಳ ಪಿಂಞ ಅಯಿಂಗಕ್‌ ಕೂಡ್‌ನ ಎಲ್ಲಾನ ಎಡ್‌ತಂಡ್‌ ಕಾನಾನ್‌ ದೇಶತ್‌ಂಜ ಗೋಷೆನ್‌ ನಾಡ್‌ಕ್‌ ಬಂದಿತುಂಡ್‍ೕಂದ್‌ ಎಣ್ಣ್‌ಚಿ.

²ಯೋಸೇಫ ಅಂಜ್ ಅಣ್ಣತಮ್ಮಣಂಗಳ ಮಾತ್‌ರ ಕಾಕಿಯಂಡ್‌ ಪೋಯಿತ್‌ ಫರೋಹನಂಡ ಮಿಂಞತ್‌ ನಿಪ್ಪ್‌ಚಿಟ್ಟತ್.

³ಫರೋಹನ ಅಯಿಂಗಳ ನೋಟಿತ್: ನಿಂಗಡ ಕೆಲಸ ಎಂತ್‍ೕಂದ್‌ ಕ್‍ೕಟತ್. ಅದ್‌ಂಗ್‌ ಅಯಿಂಗ: ನಂಗಡ ಮುತ್ತಜ್ಜಂಗಡನೆಕೆ ನಂಗ ಸಹ ಕೊರಿಕಾಪ್ಪಯಿಂಗಾಂದ್‌ ಎಣ್ಣ್‌ಚಿ.

⁴ಅದ್‌ಲ್ಲತೆ ಕಾನಾನ್‌ ದೇಶತ್‌ಲ್‌ ಬರಗಾಲ ದುಂಬ ಕಠಿಣವಾಯಿತ್‌ ಉಂಡ್. ನಿಂಗಡ ಸೇವಕಂಗಡ ಆಡ್‌ಕೊರಿಯಕ್‌ ತಿಂಬಕ್‌ ಪಿಲ್‌ಲ್‌ ಕ್‌ಟ್ಟತಂಗ್, ನಂಗ ಇಲ್ಲಿ ಚೆನ್ನ ಕಾಲ ವಾಸ ಮಾಡ್‌ವಕ್‌ ಬಂದಿಯೆ. ನಿಂಗಡ ಸೇವಕಂಗ ಗೋಷೆನ್‌ ನಾಡ್‌ಲ್‌ ವಾಸಮಾಡ್‌ವಕ್‌ ಅಪ್ಪಣೆ ತರಂಡೂಂದ್‌ ಎಣ್ಣ್‌ಚಿ.

⁵ಅಕ್ಕ ಫರೋಹನ ಯೋಸೇಫನ ನೋಟಿತ್: ನೀಡ ಅಪ್ಪ ಪಿಂಞ ಅಣ್ಣತಮ್ಮಣಂಗ ನೀಡ ಪಕ್ಕ ಬಂದಿತುಂಡ್.

⁶ಈ ಐಗುಪ್ತ ದೇಶ ನೀಡ ಮಿಂಞತ್‌ ಉಂಡ್. ದೇಶತ್‌ ಉಳ್ಳ ನಲ್ಲ ಜಾಗತ್‌ಲ್‌ ಅಯಿಂಗಳ ವಾಸ ಮಾಡ್‌ವಕ್‌ ಏರ್ಪಾಡ್‌ ಮಾಡ್. ಅಯಿಂಗ ಗೋಷೇನ್‌ ನಾಡ್‌ಲ್‌ ವಾಸ ಮಾಡಡ್. ಅಯಿಂಗಡಲ್ಲಿ ದಾರ್‌ಕೇಂಗಿ ಸಾಮರ್ಥ್ಯ ಉಂಡೇಂಗಿ, ನಾಡ ಎತ್ತ್‌ಕಡ್‌ಚಿಯಳ ನೋಟ್‌ವಕ್‌ ನೇಮಿಚಿಡ್‍ೕಂದ್‌ ಎಣ್ಣ್‌ಚಿ.

⁷ಅಲ್ಲಿಂಜ ಯೋಸೇಫ ತಾಂಡ ಅಪ್ಪನಾನ ಯಾಕೋಬನ ಕಾಕಿಯಂಡ್‌ ಬಂತ್‌ ಫರೋಹನಂಡ ಮಿಂಞತ್‌ ನಿಪ್ಪ್‌ಚಿಟ್ಟತ್. ಯಾಕೋಬ ಫರೋಹನನ ಆಶೀರ್ವಾದ ಮಾಡ್‌ಚಿ.

⁸ಫರೋಹನ ಯಾಕೋಬನ ನೋಟಿತ್: ನೀಡ ವಯಸ್ಸ್‌ ಎಚ್ಚಕ್‍ೕಂದ್‌ ಕ್‍ೕಟತ್.

⁹ಅದ್‌ಂಗ್‌ ಯಾಕೋಬ: ನಾನ್‌ ಪರದೇಶೀಯಾಯಿತ್‌ ಪ್ರಯಾಣ ಮಾಡ್‌ನ ಕಾಲ ನೂಟ್ಯ ನುಪ್ಪದ್. ನಾಡ ಆಯಸ್ಸ್‌ ಕಾಲ ಕಮ್ಮಿಯು ಕಷ್ಟ ದುಂಬ್‌ನದು ಆಯಿತ್‌ಂಜತ್. ಆಚೇಂಗಿಯು, ನಾಡ ಮುತ್ತಜ್ಜಂಗ ಪರದೇಶಿಯಾಯಿತ್‌ ಪ್ರಯಾಣ ಮಾಡ್‌ನ ಕಾಲತ್‌ನ ನೋಟ್‌ಚೇಂಗಿ ನಾಡದ್‌ ಕಮ್ಮಿ ಆಯಿತುಂಡ್‍ೕಂದ್‌ ಫರಹೋನಂಗ್‌ ಎಣ್ಣ್‌ಚಿ.

¹⁰ಯಾಕೋಬ ಫರೋಹನನ ಪುನಃ ಆಶೀರ್ವಾದ ಮಾಡಿತ್‌ ಅಂವೊಂಡ ಮಿಂಞತಿಂಜ ಪೊರ್‌ಟ್ ಪೋಚಿ.

¹¹ಫರೋಹನಂಡ ಅಪ್ಪಣೆರ ಪ್ರಕಾರ ಯೋಸೇಫ ತಾಂಡ ಅಪ್ಪಂಗು, ಅಣ್ಣತಮ್ಮಣಂಗಕು, ಇಡೀ ಐಗುಪ್ತ ದೇಶತ್‌ಲ್‌ ನಲ್ಲ ಜಾಗವಾನ ರಮ್ಸೇಸ್ ಪ್ರದೇಶತ್‌ನ ಸ್ವಂತಾಯಿತ್‌ ಕೊಡ್‌ತಿತ್, ಅಯಿಂಗ ಅಲ್ಲಿ ವಾಸಮಾಡ್‌ವಕ್‌ ಮಾಡ್‌ಚಿ.

¹²ಯೋಸೇಫ ತಾಂಡ ಅಪ್ಪಂಗು, ಅಣ್ಣತಮ್ಮಣಂಗಕು, ತಾಂಡ ಅಪ್ಪಂಡ ಮನೆಕಾರ ಎಲ್ಲಾರ್‌ಕು ಅಯಿಂಗಯಿಂಗಡ ಕುಟುಂಬಕ್‌ ಬೋಂಡಿಯಾನ ಆಹಾರತ್‌ನ ಕೊಡ್‌ತತ್.

¹³ಬರಗಾಲ ದುಂಬ ಕಠಿಣವಾಯಿತ್‌ ಇಂಜನಗುಂಡ್‌ ದೇಶತ್‌ರ ಏದ್‌ ಬಾಗತ್‌ಲು ಆಹಾರ ಕ್‌ಟ್ಟ್‌ವಯಿಂಜ್‌ಲ್ಲೆ. ಅನ್ನನಾಯಿತ್‌ ಐಗುಪ್ತ ಪಿಂಞ ಕಾನಾನ್‌ ದೇಶತ್‌ಲ್‌ ಇಂಜ ಜನಕ್‌ ಕೆಲ ಪೈಚಿತ್‌ ದುಂಬ ನರಳಿಯಡಿಂಜತ್.

¹⁴ಐಗುಪ್ತ ಪಿಂಞ ಕಾನಾನ್‌ ದೇಶತ್‌ರ ಜನ ಅಯಿಂಗಡ ಪಕ್ಕ ಇಂಜ ಪಣತ್‌ನೆಲ್ಲಾ ಆಹಾರ ದಾನ್ಯತ್‌ನ ಕ್ರಯಕ್‌ ಎಡ್‌ಪಕಾಯಿತ್‌ ಕರ್ಚಿ ಮಾಡ್‌ಚಿ. ಯೋಸೇಫ, ಐಗುಪ್ತ ಪಿಂಞ ಕಾನಾನ್‌ ದೇಶತ್‌ರ ಜನಕ್‌ ಆಹಾರ ದಾನ್ಯತ್‌ನ ಮಾರಿತ್, ಅದ್‌ಲ್‌ ಬಂದ ಪಣತ್‌ನೆಲ್ಲಾ ಫರೋಹನಂಡ ಅರಮನೆಕ್‌ ಕೊಂಡಬಂತ್‌ ದುಂಬ್‌ಚಿ.

¹⁵ಐಗುಪ್ತ ಪಿಂಞ ಕಾನಾನ್‌ ದೇಶತ್‌ರ ಜನಡ ಪಕ್ಕ ಇಂಜ ಪಣಯೆಲ್ಲಾ ತ್‍ೕಂದ್‌ ಪೋನ ಪಿಂಞ, ಅಯಿಂಗೆಲ್ಲಾರು ಯೋಸೇಫಂಡ ಪಕ್ಕ ಬಂದಿತ್: ನಂಗಕ್‌ ತಿಂಬಕ್‌ ಆಹಾರ ತಾರಿ. ನಂಗಡ ಪಕ್ಕ ಇಂಜ ಪಣಯೆಲ್ಲ ಕಾಲಿಯಾಚಿ. ಎನ್ನಂಗ್‌ ನಂಗ ನೀಡ ಕಣ್ಣ್‌ರ ಮಿಂಞತ್‌ ಚಾವಂಡೂಂದ್‌ ಕ್‍ೕಟತ್.

¹⁶ಅದ್‌ಂಗ್‌ ಯೋಸೇಫ: ನಿಂಗಡ ಪಕ್ಕ ಪಣ ಇಲ್ಲತಪೋಚೇಂಗಿ, ನಿಂಗಡ ಪಕ್ಕ ಉಳ್ಳ ಎತ್ತ್‌ಕಡ್‌ಚಿಯಳ ಕೊಂಡಬಾರಿ. ನಾನ್‌ ನಿಂಗಕ್‌ ಆಹಾರ ದಾನ್ಯ ತಪ್ಪೀಂದ್‌ ಎಣ್ಣ್‌ಚಿ.

¹⁷ಅದ್‌ಂಗ್‌ ಅಯಿಂಗ ಆಹಾರ ದಾನ್ಯಕ್‌ ಬದ್‌ಲ್‌ ಎತ್ತ್‌ಕಡ್‌ಚಿಯಳ ಕೊಂಡಬಾತ್. ಯೋಸೇಫ ಕುದುರೆಯಳ, ಎತ್ತ್‌ಕಡ್‌ಚಿಯಳ, ಕೊರಿಯಳ ಪಿಂಞ ಕತ್ತೆಯಳ ಎಡ್‌ತಂಡ್, ಅದ್‌ಂಗ್‌ ಬದ್‌ಲ್‌ ಆ ಕಾಲಕ್‌ ಬೋಂಡಿಯಾನ ಆಹಾರ ದಾನ್ಯತ್‌ನ ಅಯಿಂಗಕ್‌ ಕೊಡ್‌ತತ್.

¹⁸ಆ ಕಾಲ ಕಯಿಂಜ ಪಿಂಞ, ಅಯಿಂಗ ಪುನಃ ಅಂವೊಂಡ ಪಕ್ಕ ಬಂದಿತ್: ನಂಗಡ ಸ್ವಾಮಿಕ್‌ ಗೊತ್ತಿಲ್ಲತದ್‌ ಒಂದು ಇಲ್ಲೆ. ನಂಗಡ ಪಕ್ಕ ಇಂಜ ದುಡ್ಡು ಕರ್ಚಿ ಆಚಿ, ಎತ್ತ್‌ಕಡ್‌ಚಿಯಳು ನಂಗಡ ಸ್ವಾಮಿರ ಪಕ್ಕ ಎತ್ತಚಿ. ಇಕ್ಕ ನಂಗಡ ಪಕ್ಕ ನಂಗಡ ತಡಿ ಪಿಂಞ ಬೂಮಿನ ಬುಟ್ಟತೇಂಗಿ ಬೋರೆ ಒಂದೂ ಇಲ್ಲೆ.

¹⁹ಎನ್ನಂಗ್‌ ನಂಗ ನೀಡ ಕಣ್ಣ್‌ರ ಮಿಂಞತ್‌ ಚಾವಂಡು? ನಂಗಡ ಬೂಮಿ ಎನ್ನಂಗ್‌ ನಾಶ ಆಂಡು? ನಂಗಳ ಪಿಂಞ ನಂಗಡ ಬೂಮಿನ ಎಡ್‌ತಂಡ್‌ ನಂಗಕ್‌ ಉಂಬಕ್‌ ಆಹಾರ ತಾ. ನಂಗ ಫರೋಹನಂಗ್‌ ಅಡಿಯಾಳಾಯಿತ್‌ ಆಪ. ರಾಜ ನಂಗಡ ಬೂಮಿರ ಎಜಮಾನ ಆಪ. ಅಕ್ಕ ನಂಗಳು ಬದ್‌ಕುವ, ನಂಗಡ ಬೂಮಿಯು ಪಾಳಾಪುಲೇಂದ್‌ ಎಣ್ಣ್‌ಚಿ.

²⁰ಅನ್ನನೆ ಬರಗಾಲ ದುಂಬ ಕಠಿಣವಾಯಿತ್‌ ಇಂಜಂಗ್‌ ಐಗುಪ್ತ ಜನ ಅಯಿಂಗಯಿಂಗಡ ಬೂಮಿನ ಮಾರಿರ್‌ತ್. ಯೋಸೇಫ ಐಗುಪ್ತ ಬೂಮಿ ಎಲ್ಲಾನ ಫರೋಹನಂಗಾಯಿತ್‌ ಎಡ್‍ತತ್. ಇನ್ನನೆ ಆ ಬೂಮಿಯೆಲ್ಲ ಫರೋಹನಂಡದಾಚಿ.

²¹ಅನ್ನನಾಯಿತ್‌ ಯೋಸೇಫ ಐಗುಪ್ತ ದೇಶತ್‌ರ ಒರ್‌ ಕಡೆಯಿಂಜ ಇಂಞೊರ್‌ ಕಡೆಕತ್ತನೆ ಎಲ್ಲಾರ್‌ನ ಫರೋಹನಂಡ ಅಡಿಯಾಳಾತ್‌ ಮಾಡ್‌ಚಿ.

²²ಯಾಜಕಂಗಡ ಬೂಮಿನ ಮಾತ್‌ರ ಅಂವೊ ಎಡ್‌ತಿತ್‌ಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಫರೋಹನನೇ ಅಯಿಂಗಕ್‌ ಆಹಾರ ದಾನ್ಯತ್‌ನ ದಿನ ಕೊಡ್‌ತ್ತಂಡಿಂಜದ್‌ ಅಯಿಂಗಕ್‌ ಮದಿಯಾಯಿತಿಂಜತ್, ಆನಗುಂಡ್‌ ಅಯಿಂಗಡ ಬೂಮಿನ ಅಯಿಂಗ ಮಾರಿತ್‌ಲ್ಲೆ.

²³ಇಂಞು ಯೋಸೇಫ ಜನಳ ನೋಟಿತ್: ಕ್‍ೕಳಿ! ನಾನ್‌ ಫರೋಹನಂಗಾಯಿತ್‌ ನಿಂಗಳ ಪಿಂಞ ನಿಂಗಡ ಬೂಮಿನ ಎಡ್‌ತಿಯೆ. ಇದಾ, ನಾನ್‌ ನಿಂಗಕ್‌ ಬಿತ್ತ್‌ವಕ್‌ ಕುರುನ ತಪ್ಪಿ, ಅದ್‌ನ ಬೂಮಿಲ್‌ ಬಿತ್ತಿ.

²⁴ಆಚೇಂಗಿ ನಿಂಗ ಕೊಯಿಪಣಿ ಮಾಡ್‌ವಕ ಅಂಜಿಲ್‌ ಒರ್‌ ಬಾಗತ್‌ನ ಫರೋಹನಂಗ್‌ ಕೊಡ್‌ಕಂಡು. ಉಳ್‌ಂಜ ನಾಲ್‌ ಬಾಗ ನಿಂಗಕ್‌ ಆಪ. ಅದ್‌ ಬಿತ್ತ್‌ವಕು, ನಿಂಗಕು, ನಿಂಗಡ ಮನೆಕಾರಕು, ನಿಂಗಡ ಮಕ್ಕಕು ಆಹಾರವಾಯಿತ್‌ ಬೆಚ್ಚೊಳೀಂದ್‌ ಎಣ್ಣ್‌ಚಿ.

²⁵ಅದ್‌ಂಗ್‌ ಅಯಿಂಗ: ನೀನ್‌ ನಂಗಡ ಜೀವತ್‌ನ ಕಾಪಾಡಿಯ; ನಂಗಡ ಸ್ವಾಮಿರ ದಯೆ ನಂಗಡ ಮೇಲೆ ಇರಡ್. ನಂಗ ಫರೋಹನಂಗ್‌ ಅಡಿಯಾಳಂಗಳಾಯಿತ್‌ಪ್ಪಾಂದ್.

²⁶ಬೊಳ್‌ಂದ ಬೊಳೆಲ್‌ ಅಂಜಲ್‌ ಒರ್‌ ಪಾಲ್‌ನ ಫರೋಹನಂಗ್‌ ಕೊಡ್‌ಕಂಡು ಎಣ್ಣಿಯಂಡ್‌ ಯೋಸೇಫ ಐಗುಪ್ತ ದೇಶತ್‌ಲ್‌ ಒರ್‌ ಕಾನೂನ್‌ ಕೊಂಡ ಬಾತ್. ಈ ಕಾನೂನ್‌ ಇಕ್ಕಲೂ ಉಂಡ್. ಆಚೇಂಗಿ ಯಾಜಕಂಗಡ ಬೂಮಿ ಮಾತ್‌ರ ಫರೋಹನಂಗ್‌ ಸ್ವಂತ ಆಯಿತ್‌ಲ್ಲೆ.

²⁷ಇಸ್ರಾಯೇಲ್‌ ಜನ ಐಗುಪ್ತ ದೇಶತ್‌ಲ್‌ ಉಳ್ಳ ಗೋಷೆನ್‌ ನಾಡ್‌ಲ್‌ ವಾಸಮಾಡಿಯಂಡಿಂಜತ್. ಅಲ್ಲಿ ಅಯಿಂಗ ಆಸ್ತಿನ ಸಂಪಾದನೆ ಮಾಡ್‌ಚಿ. ಅಯಿಂಗಡ ಸಂತಾನ ಅಬಿವೃದ್ದಿ ಪೊಂದಿತ್‌ ಬಲ್ಯದಾಚಿ.

²⁸ಯಾಕೋಬ ಐಗುಪ್ತ ದೇಶತ್‌ಲ್‌ ಪದ್‌ನ್‍ೕಳ್‌ ಕಾಲ ಬದ್‌ಕ್‌ಚಿ. ಅಂವೊ ಒಟ್ಟ್‌ ನೂಟ್ಯ ನಾಪತ್‍ೕಳ್‌ ಕಾಲ ಬದ್‌ಕಿತಿಂಜತ್.

²⁹ಇಸ್ರಾಯೇಲ್‌ ಚಾವ ಕಾಲ ಪಕ್ಕ ಬಪ್ಪಕ, ಅಂವೊ ತಾಂಡ ಮೋಂವೊನಾನ ಯೋಸೇಫನ ಕಾಕ್‌ಚಿಟ್ಟಿತ್, ಅಂವೊನ ನೋಟಿತ್: ನೀಕ್‌ ನನ್ನ ನೇರಾಯಿತ್‌ ಕುಶಿ ಉಂಡೇಂಗಿ, ನೀಡ ಕೈಯಿನ ನಾಡ ತೊಡೆರ ಅಡಿಲ್‌ ಬೆಚ್ಚಿತ್, ನಾಕ್‍ ನಂಬಿಕಸ್ತನಾಯಿತು, ಸತ್ಯವಂತಂವೊನಾಯಿತು ಇರ್. ನನ್ನ ಐಗುಪ್ತ ದೇಶತ್‌ಲ್‌ ಪೂಪಕ್ಕಾಗಾಂದ್‌ ಎಣ್ಣ್‌ಚಿ.

³⁰ನಾನ್‌ ಚತ್ತ್‌ ಪೋನ ಪಿಂಞ ನಾಡ ಚಾವ್‌ ತಡಿನ ಐಗುಪ್ತ ದೇಶತ್‌ಂಜ ಎಡ್‌ತಂಡ್‌ ಪೋಯಿತ್, ನಾಡ ಮುತ್ತಜ್ಜಂಗಡ ಕೂಡೆ ನನ್ನ ಪೂಕಂಡೂಂದ್‌ ಎಣ್ಣ್‌ಚಿ. ಅಕ್ಕ ಯೋಸೇಫ: ನೀನ್‌ ಎಣ್ಣ್‌ನನೆಕೆ ನಾನ್‌ ಮಾಡ್‌ವೀಂದ್‌ ಎಣ್ಣ್‌ಚಿ.

³¹ಅದ್‌ಂಗ್‌ ಯಾಕೋಬ: ನೀನ್‌ ಮಾಡ್‌ವಿಯಾಂದ್‌ ತಕ್ಕ್‌ ಕೊಡ್‌ಂದ್‌ ಒತ್ತಾಯ ಮಾಡ್‌ಚಿ. ಅಕ್ಕ ಯೋಸೇಫ ತಕ್ಕ್‌ ಕೊಡ್‌ತತ್. ಪಿಂಞ ಯಾಕೋಬ, ತಾನ್‌ ಬುದ್ದಂಡಿಂಜ ಕಟ್ಟ್‌ರ ಮಂಡೆ ಬೆಪ್ಪ ಬರಿ ಬಗ್ಗಿತ್‌ ದೇವಕ್‌ ವಂದನೆ ಮಾಡ್‌ಚಿ.