Read Kodava ಆದ್ಯತ್‌ರ ಪುಸ್ತಕ 48 Bible Online

ಆದ್ಯತ್‌ರ ಪುಸ್ತಕ 48 - Kodava bible

ಆದ್ಯತ್‌ರ ಪುಸ್ತಕ 48

¹ಇದಾಯಿತ್‌ ಚೆನ್ನ ಸಮಯ ಆನ ಪಿಂಞ, ಅಂವೊಂಡ ಅಪ್ಪ ದುಂಬ ತಳಂದ್‌ ಪೋಯಂಡುಂಡ್‌ ಎಣ್ಣಿಯಂಡ್‌ ಯೋಸೇಫಂಗ್‌ ಸುದ್ದಿ ಬಾತ್. ಅಕ್ಕ ಯೋಸೇಫ ತಾಂಡ ದಂಡ್‌ ಕ್‌ಣ್ಣ ಮಕ್ಕಳಾನ ಮನಸ್ಸೆ ಪಿಂಞ ಎಫ್ರಾಯಿಮನ ಕಾಕಿಯಂಡ್‌ ಪೊರ್‌ಟತ್.

²ಯಾಕೋಬಂಗ್‌ ಯೋಸೇಫ ಬಂದಿತ್‍ೕಂದ್‌ ಗೊತ್ತಾಪಕ, ಅಂವೊ ಶಕ್ತಿ ಕೂಟಿಯಂಡ್‌ ಕಟ್ಟ್‌ರ ಮೇಲೆ ಅಳ್‌ತಂಡತ್.

³ಯಾಕೋಬ ಯೋಸೇಫನ ನೋಟಿತ್: ಸರ್ವಶಕ್ತನಾನ ದೇವ ಕಾನಾನ್‌ ದೇಶತ್‌ರ ಲೂಜ್ ಎಣ್ಣುವ ಜಾಗತ್‌ಲ್‌ ಅಂವೊನ ನಾಕ್‍ ಕಾಂಬ್‌ಚಿಟ್ಟಿತ್, ನನ್ನ ಆಶೀರ್ವಾದ ಮಾಡಿತ್:

⁴ನಾನ್‌ ನಿನ್ನ ಅಬಿವೃದ್ದಿ ಮಾಡಿತ್‌ ಲೆಕ್ಕ ಮಾಡ್‌ವಕ್‌ ಕಯ್ಯತಚ್ಚಕ್‌ ಜಾಸ್ತಿ ಮಾಡಿತ್, ನಿನ್ನ ಬಲ್ಯ ಗುಂಪ್ರ ಜನಾಂಗಳಾಯಿತ್‌ ಮಾಡುವಿ. ನಾನ್‌ ಈ ಕಾನಾನ್‌ ದೇಶತ್‌ನ ನೀಕು ನೀಡ ಬಯ್ಯ ಬಪ್ಪ ನೀಡ ಸಂತಾನಕು ಕಾಲಕಾಲಕ್‌ ಸ್ವಂತವಾಯಿತ್‌ ತಪ್ಪೀಂದ್‌ ಎಣ್ಣ್‌ಚಿ.

⁵ನಾನ್‌ ಐಗುಪ್ತ ದೇಶಕ್‌ ಬಪ್ಪಕಿಂಜ ಮಿಂಞ ನೀಕ್‌ ಪುಟ್ಟ್‌ನ ಈ ದಂಡ್‌ ಕ್‌ಣ್ಣ ಮಕ್ಕಳು ನಾಡ ಮಕ್ಕ. ರೂಬೇನ, ಸಿಮೆಯೋನಂಡನೆಕೆ, ಎಫ್ರಾಯಿಮನು ಮನಸ್ಸೆಯು ನಾಡ ಮಕ್ಕಳಾಯಿತ್‌ಪ್ಪ.

⁶ಈ ದಂಡ್‌ ಮಕ್ಕಕ್‌ ಬಯ್ಯ ಪುಟ್ಟ್‌ವ ಮಕ್ಕ ನೀಡ ಮಕ್ಕಳಾಯಿತ್‌ಪ್ಪ. ಎಫ್ರಾಯಿಮ್‌ ಪಿಂಞ ಮನಸ್ಸೆರ ಸೊತ್ತ್‌ಯಿಂಜ ಇಯಿಂಗಕ್‌ ಪಾಲ್‌ ಕ್‌ಟ್ಟುವ.

⁷ನಾನ್‌ ಪದ್ದನ್‌ ಅರಾಮ್ಯಿಂಜ ತಿರಿತ್‌ ಬಪ್ಪಕಾಪಕ, ಕಾನಾನ್‌ ದೇಶತ್‌ಲ್‌ ಎಫ್ರಾತಕ್‌ ಎತ್ತ್‌ವಕ್‌ ಇಂಞು ಚೆನ್ನ ದೂರ ಇಪ್ಪಕ ರಾಹೇಲ ಬಟ್ಟೆಲ್‌ ಚತ್ತ್‌ ಪೋಚಿ. ಅವಳ ಅಲ್ಲೇ ಬೇತ್‌ಲೆಹೇಮ್‌ಂದ್‌ ಕಾಕುವ ಎಫ್ರಾತಕ್‌ ಪೋಪ ಬಟ್ಟೆಲ್‌ ಪೂತಂದ್‌ ಎಣ್ಣ್‌ಚಿ.

⁸ಇಸ್ರಾಯೇಲ ಯೋಸೇಫಂಡ ಮಕ್ಕಳ ನೋಟಿತ್: ಇಯಿಂಗ ದಾರ್‌ಂದ್‌ ಕ್‍ೕಟತ್.

⁹ಯೋಸೇಫ: ಇಯಿಂಗ ಐಗುಪ್ತ ದೇಶತ್‌ಲ್‌ ಯೆಹೋವನಾನ ದೇವ ನಾಕ್‍ ತಂದ ಮಕ್ಕಾಂದ್‌ ಎಣ್ಣ್‌ಚಿ. ಅದ್‌ಂಗ್‌ ಯಾಕೋಬ: ಅಯಿಂಗಳ ನಾಡ ಪಕ್ಕ ಕಾಕಿಯಂಡ್‌ ಬಾ. ನಾನ್‌ ಅಯಿಂಗಳ ಆಶೀರ್ವಾದ ಮಾಡಂಡೂಂದ್‌ ಎಣ್ಣ್‌ಚಿ.

¹⁰ಯಾಕೋಬಂಗ್‌ ವಯಸ್ಸಾನಂಗ್‌ ಕಣ್ಣ್‌ ಸರಿಯಾಯಿತ್‌ ಕಾಂಬಯಿಂಜಿತ್‌ಲ್ಲೆ. ಅದ್‌ಂಗ್‌ ಯೋಸೇಫ ಮಕ್ಕಳ ಅಂವೊಂಡ ಪಕ್ಕ ಕಾಕಿಯಂಡ್‌ ಪೋಚಿ. ಅಕ್ಕ ಯಾಕೋಬ ಅಯಿಂಗಕ್‌ ಮುತ್ತ್‌ ಕೊಡ್‌ತಿತ್‌ ತಬ್ಬಿಯಂಡತ್.

¹¹ಅಕ್ಕ ಯಾಕೋಬ ಯೋಸೇಫಂಗ್: ನಾನ್‌ ಪುನಃ ನೀಡ ಮೂಡ್‌ ನೋಟ್‌ವೀಂದ್‌ ಗೇನ ಮಾಡಿತ್‌ಂಜ್‌ತ್‌ಲ್ಲೆ, ಆಚೇಂಗಿ ದೇವ ನೀಡ ಮಕ್ಕಳ ಸಹ ನೋಟ್‌ವನೆಕೆ ಮಾಡಿತ್‍ೕಂದ್‌ ಎಣ್ಣ್‌ಚಿ.

¹²ಅಕ್ಕ ಯೋಸೇಫ ಅಯಿಂಗಳ ಅಪ್ಪಂಡ ಮೊಣಕಾಲ್‌ರ ಮದ್ಯತ್‌ ಇಂಜ ಮಕ್ಕಳ ಕಾಕಿತ್, ಅಂವೊಂಡ ಅಪ್ಪಂಗ್‌ ಅಡ್ಡ ಬುದ್ದತ್.

¹³ಅಲ್ಲಿಂಜ ಯೋಸೇಫ ಎಫ್ರಾಯಿಮ್‌ನ ತಾಂಡ ಬಲತೆ ಬರಿಯಿಂಜ ಇಸ್ರಾಯೇಲ್‌ಂಡ ಎಡ್‌ತ ಬರಿಕು, ಮನಸ್ಸೆನ ತಾಂಡ ಎಡತ ಬರಿಯಿಂಜ ಇಸ್ರಾಯೇಲ್‌ಂಡ ಬಲತೆ ಬರಿಕು ನಿಪ್ಪ್‌ಚಿಟ್ಟತ್.

¹⁴ಆಚೇಂಗಿಯು ಇಸ್ರಾಯೇಲ್‌ ತಾಂಡ ಕೈಯಿನ ಅಡ್ಡ ನ್‍ೕಟಿತ್‌ ಚೆರಿಯಂವೊನಾನ ಎಫ್ರಾಯಿಮಂಡ ಮಂಡರೆ ಮೇಲೆ ಬಲತೆ ಕೈಯಿನ ಪಿಂಞ ಪೆರಿಯಂವೊನಾನ ಮನಸ್ಸೆರ ಮಂಡರೆ ಮೇಲೆ ಎಡತ ಕೈಯಿನ ಬೆಚ್ಚತ್.

¹⁵ಅಲ್ಲಿಂಜ ಯೋಸೇಫನ ಆಶೀರ್ವಾದ ಮಾಡಿತ್: ನಾಡ ಮುತ್ತಜ್ಜಂಗಳಾನ ಅಬ್ರಹಾಮನು, ಇಸಾಕನು ಆರಾದನೆ ಮಾಡ್‌ನ ದೇವ ಇಯಿಂಗಳ ಆಶೀರ್ವಾದ ಮಾಡಡ್. ನಾನ್‌ ಪುಟ್ಟ್‌ನ ದಿವಸತ್‌ಂಜ ಇಲ್ಲಿಕತ್ತನ ನನ್ನ ನಡ್‌ತಿಯಂಡ್‌ ಬಂದ ದೇವ ಇಯಿಂಗಳ ಆಶೀರ್ವಾದ ಮಾಡಡ್.

¹⁶ನನ್ನ ಎಲ್ಲಾ ಕ್‍ೕಡಿಂಜ ಕಾಪಾಡ್‌ನ ದೇವದೂತ ಈ ಕ್‌ಣ್ಣ ಮಕ್ಕಳ ಆಶೀರ್ವಾದ ಮಾಡಡ್. ಈ ದಂಡ್‌ ಕ್‌ಣ್ಣ ಮಕ್ಕ ನಾಡ ಪೆದತ್‌ನ, ನಾಡ ಅಜ್ಜ ಅಬ್ರಹಾಮ ಪಿಂಞ ನಾಡ ಅಪ್ಪ ಇಸಾಕಂಡ ಪೆದತ್‌ನ ಕಾಪಾಡಡ್. ಇಯಿಂಗಡ ಸಂತಾನ ಬೂಮಿರ ಮೇಲೆ ಬೊಳ್‌ಂದಿತ್‌ ಬಲ್ಯದಾಡ್‌ಂದ್‌ ಎಣ್ಣ್‌ಚಿ.

¹⁷ತಾಂಡ ಅಪ್ಪ ಬಲತೆ ಕೈಯಿನ ಚೆರಿಯಂವೊನಾನ ಎಫ್ರಾಯಿಮಂಡ ಮೇಲೆ ಬೆಚ್ಚದ್‌ನ ಕಂಡಿತ್, ಅದ್‌ನ ಅಂವೊ ಕುಶಿಪಡತೆಗುಂಡ್, ಅಂವೊ ತಾಂಡ ಅಪ್ಪಂಡ ಬಲತೆ ಕೈಯಿನ ಎಡ್‌ತಿತ್‌ ಮನಸ್ಸೆರ ಮಂಡೆರ ಮೇಲೆ ಬೆಪ್ಪಕ್‌ ಎಡ್‌ತಿತ್:

¹⁸ಅಪ್ಪಾ, ಇಂವೊ ಪೆರಿಯಂವೊ, ಇಂವೊಂಡ ಮಂಡೆರೆ ಮೇಲೆ ನೀಡ ಬಲತೆ ಕೈಯಿನ ಬೆಕ್ಕಂಡೂಂದ್‌ ಎಣ್ಣ್‌ಚಿ.

¹⁹ಆಚೇಂಗಿ ಅಂವೊಂಡ ಅಪ್ಪ ಅದ್‌ಂಗ್‌ ಒತ್ತತೆ: ನಾನ್‌ ಎಂತ ಮಾಡಿಯಂಡುಳ್ಳ ಎಣ್ಣಿಯಂಡ್‌ ನಾಕ್‍ ಗೊತ್ತುಂಡ್‌ ನಾಡ ಮೋನೇ. ಮನಸ್ಸೆಯು ಬಲ್ಯ ಜನಾಂಗ ಆಪ. ಇಂವೊಂಡ ಸಂತಾನವೂ ಬಲ್ಯದಾಪ. ಆಚೇಂಗಿ ಇಂವೊಂಡ ತಮ್ಮಣ ಇಂವೊಂಗಿಂಜ ಇಂಞು ಬಲ್ಯ ಜನಾಂಗಳಾಪ. ಅಂವೊಂಡ ಸಂತಾನ ಎಚ್ಚಕೋ ಬಲ್ಯ ಜನಾಂಗಳಾಯಿತ್‌ ಬೊಳೆಯುವಾಂದ್‌ ಎಣ್ಣ್‌ಚಿ.

²⁰ಇನ್ನನೆ ಅಂದ್‌ ಯಾಕೋಬ ಆ ದಂಡ್‌ ಕ್‌ಣ್ಣ ಮಕ್ಕಳ ಆಶೀರ್ವಾದ ಮಾಡಿತ್: ಇಸ್ರಾಯೇಲ್‌ ದೇಶತ್‌ರ ಜನ ಒಬ್ಬನ ಆಶೀರ್ವಾದ ಮಾಡ್‌ವಕ ನಿಂಗಡ ಪೆದತ್‌ನ ಉಪಯೋಗಿಚಿಡುವ. ಅಯಿಂಗ: ನಿಂಗಳ ಎಫ್ರಾಯಿಮ್‌ ಪಿಂಞ ಮನಸ್ಸೆರನೆಕೆ ದೇವ ಆಶೀರ್ವಾದ ಮಾಡಡ್‍ೕಂದ್‌ ಎಣ್ಣ್‌ವಾಂದ್‌ ಎಣ್ಣ್‌ಚಿ. ಇನ್ನನೆ ಯಾಕೋಬ ಮನಸ್ಸೆಕಿಂಜಿ ಮಿಂಞ ಎಫ್ರಾಯಿಮ್‌ನ ಇಟ್ಟತ್.

²¹ಅಲ್ಲಿಂಜ ಯಾಕೋಬ ಯೋಸೇಫನ ನೋಟಿತ್: ಇದಾ, ನಾನ್‌ ಚಾವಕ್‌ ಉಳ್ಳ. ಆಚೇಂಗಿ ದೇವ ನೀಡ ಕೂಡೆ ಇಪ್ಪ. ಅಂವೊ ನೀಡ ಮುತ್ತಜ್ಜಂಗಡ ದೇಶವಾನ ಕಾನಾನ್‌ ದೇಶಕ್‌ ತಿರಿತ್‌ ಕಾಕಿಯಂಡ್‌ ಪೋಪ.

²²ನೀಡ ಅಣ್ಣತಮ್ಮಣಂಗಕ್‌ ಕೊಡ್‌ತ ಜಾಗಕಿಂಜಿ, ನಾನ್‌ ಅಮೋರಿಯಂಗಡ ಕೈಯಿಂಜ ನಾಡ ಕತ್ತಿಯಿಂಜ, ಬಿಲ್ಲ್‌ಯಿಂಜ ಎಡ್‌ತ ಜಾಗತ್‌ನ ಒರ್‌ ಪಾಲ್‌ ಜಾಸ್ತಿಯಾಯಿತ್‌ ನೀಕ್‌ ತಂದಂಡುಳ್ಳಂದ್‌ ಎಣ್ಣ್‌ಚಿ.