Read Kodava ಆದ್ಯತ್‌ರ ಪುಸ್ತಕ 5 Bible Online

ಆದ್ಯತ್‌ರ ಪುಸ್ತಕ 5 - Kodava bible

ಆದ್ಯತ್‌ರ ಪುಸ್ತಕ 5

¹ಆದಾಮಂಡ ವಂಶಾವಳಿರ ನೇಮ. ದೇವ ಮನುಷ್ಯನ ಸೃಷ್ಟಿ ಮಾಡ್‌ವ ದಿವಸತ್‌ಲ್‌ ದೇವಡ ರೂಪತ್‌ಲ್‌ ಉಂಟ್ ಮಾಡ್‌ಚಿ.

²ಅಯಿಂಗಳ ಆಣಾಳ್‌ ಪೊಣ್ಣಾಳಾಯಿತ್‌ ಸೃಷ್ಟಿ ಮಾಡ್‌ತ್, ಅಯಿಂಗಳ ಆಶೀರ್ವಾದ ಮಾಡ್‌ಚಿ. ಅಂವೊ ಅಯಿಂಗಳ ಸೃಷ್ಟಿ ಮಾಡ್‌ವಕ ಅಯಿಂಗಳ ಮನುಷ್ಯಾಂದ್‌ ಕಾಕ್‌ಚಿ.

³ಆದಾಮಂಗ್‌ ನೂಟ್ಯ ನುಪ್ಪದ್‌ ವಯಸ್ಸ್‌ ಇಪ್ಪಕ ತಾಂಡ ರೂಪತ್‌ಲ್‌ ಮೋಂವೊ ಪುಟ್ಟಚ್‍ ಅಂವೊಂಗ್‌ ಸೇತಾಂದ್‌ ಪೆದ ಬೆಚ್ಚತ್.

⁴ಸೇತ ಪುಟ್ಟ್‌ನ ಪಿಂಞ ಆದಾಮ ಇಂಞು ಎಟ್ಟ್‌ ನೂರ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

⁵ಆದಾಮ ಒಟ್ಟ್‌ ಒಂಬೈನೂಟ್ಯ ನುಪ್ಪದ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

⁶ಸೇತಂಗ್‌ ನೂಟ್ಯ ಅಂಜ್ ವಯಸ್ಸ್‌ ಇಪ್ಪಕ ಎನೋಷ ಪುಟ್ಟ್‌ಚಿ.

⁷ಎನೋಷ ಪುಟ್ಟ್‌ನ ಪಿಂಞ ಸೇತ ಇಂಞು ಎಟ್ಟ್‌ ನೂಟ್ಯ ಏಳ್‌ ಕಾಲ ಬದ್‌ಕಿತ್, ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

⁸ಸೇತ ಒಟ್ಟ್‌ ಒಂಬೈನೂಟ್ಯ ಪನ್ನೆರಂಡ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

⁹ಎನೋಷಂಗ್‌ ತೊಂಬದ್‌ ವಯಸ್ಸ್‌ ಇಪ್ಪಕ ಕೇನಾನ ಪುಟ್ಟ್‌ಚಿ.

¹⁰ಕೇನಾನ ಪುಟ್ಟ್‌ನ ಪಿಂಞ ಎನೋಷ ಇಂಞು ಎಟ್ಟ್‌ ನೂಟ್ಯ ಪದಿನಂಜಿ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

¹¹ಏನೋಷ ಒಟ್ಟ್‌ ಒಂಬೈ ನೂಟ್ಯ ಅಂಜ್ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

¹²ಕೇನಾನಂಗ್‌ ಎಳ್‌ವದ್‌ ವಯಸ್ಸ್‌ ಇಪ್ಪಕ ಮಹಲಲೇಲ ಪುಟ್ಟ್‌ಚಿ.

¹³ಮಹಲಲೇಲ ಪುಟ್ಟ್‌ನ ಪಿಂಞ ಕೇನಾನ ಇಂಞು ಎಟ್ಟ್‌ ನೂಟ್ಯ ನಾಪ್ಪದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

¹⁴ಕೇನಾನ ಒಟ್ಟ್‌ ಒಂಬೈ ನೂಟ್ಯ ಪತ್ತ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

¹⁵ಮಹಲಲೇಲಂಗ್‌ ಅರುವತಂಜಿ ವಯಸ್ಸ್‌ ಇಪ್ಪಕ ಯೆರೆದ ಪುಟ್ಟ್‌ಚಿ.

¹⁶ಯೆರೆದ ಪುಟ್ಟ್‌ನ ಪಿಂಞ ಮಹಲಲೇಲ ಇಂಞು ಎಟ್ಟ್‌ ನೂಟ್ಯ ನುಪ್ಪದ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

¹⁷ಮಹಲಲೇಲ ಒಟ್ಟ್‌ ಎಟ್ಟ್‌ ನೂಟ್ಯ ತೊಂಬತಂಜಿ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

¹⁸ಯೆರೆದಂಗ್‌ ನೂಟ್ಯ ಅರವದಂಡ್‌ ವಯಸ್ಸ್‌ ಇಪ್ಪಕ ಹನೋಕ ಪುಟ್ಟ್‌ಚಿ.

¹⁹ಹನೋಕ ಪುಟ್ಟ್‌ನ ಪಿಂಞ ಯೆರೆದ ಇಂಞು ಎಟ್ಟ್‌ ನೂರ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

²⁰ಯೆರೆದ ಒಟ್ಟ್‌ ಒಂಬೈ ನೂಟ್ಯ ಅರವದಂಡ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

²¹ಹನೋಕಂಗ್‌ ಅರವತಂಜಿ ವಯಸ್ಸ್‌ ಇಪ್ಪಕ ಮೆತೂಷೆಲ ಪುಟ್ಟ್‌ಚಿ.

²²ಮೆತೂಷೆಲ ಪುಟ್ಟ್‌ನ ಪಿಂಞ ಹನೋಕ ದೇವಡ ಕೂಡೆ ದುಂಬ ಐಕ್ಯತ್‌ಲ್‌ ನಡಂದಂಡಿಜಂಡ್‌ ಇಂಞು ಮುನ್ನೂರ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

²³ಹನೋಕ ಒಟ್ಟ್‌ ಮುನ್ನೂಟ್ಯ ಅರವತಂಜಿ ಕಾಲ ಬದ್‌ಕ್‌ಚಿ.

²⁴ಹನೋಕ ದೇವಡ ಕೂಡೆ ದುಂಬ ಐಕ್ಯತ್‌ಲ್‌ ನಡಂದಂಡ್‌ ಬದ್‌ಕ್‌ಚಿ. ಅನ್ನನೆ ಒರ್‌ ದಿವಸ ದೇವ ಅಂವೊನ ಕಾಕ್‌ನಗುಂಡ್‌ ಅಂವೊ ಕಾಂಗತೆ ಆಯಿ ಪೋಚಿ.

²⁵ಮೆತೂಷೆಲಂಗ್‌ ನೂಟ್ಯ ಎಂಬತ್‍ೕಳ್‌ ವಯಸ್ಸ್‌ ಇಪ್ಪಕ ಲೆಮೆಕ ಪುಟ್ಟ್‌ಚಿ.

²⁶ಲೆಮೆಕ ಪುಟ್ಟ್‌ನ ಪಿಂಞ ಮೆತೂಷೆಲ ಇಂಞು ಏಳ್‌ ನೂಟ್ಯ ಎಂಬದಂಡ್‌ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

²⁷ಮೆತೂಷೆಲ ಒಟ್ಟ್‌ ಒಂಬೈನೂಟ್ಯ ಅರವತೊಯಿಂಬದ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

²⁸ಲೆಮೆಕಂಗ್‌ ನೂಟ್ಯ ಎಂಬದಂಡ್‌ ವಯಸ್ಸ್‌ ಇಪ್ಪಕ ಒರ್‌ ಮೋಂವೊ ಪುಟ್ಟ್‌ಚಿ.

²⁹ಲೆಮೆಕ: ಯೆಹೋವ ಶಾಪ ಇಟ್ಟ ಈ ಬೂಮಿಯಿಂಜ ನಂಗಕ್‌ ಆನ ಕಷ್ಟ ಪಿಂಞ ಶ್ರಮತ್ತಿಂಜ ಈ ಮೋಂವೊ ನಂಗಕ್‌ ಸಮಾದಾನ ಕೊಂಡ ಬಪ್ಪಾಂದ್‌ ಎಣ್ಣಿತ್‌ ಅಂವೊಂಗ್‌ [5]ನೋಹಾಂದ್‌ ಪೆದ ಬೆಚ್ಚತ್.

³⁰ನೋಹ ಪುಟ್ಟ್‌ನ ಪಿಂಞ ಲೆಮೆಕ ಇಂಞು ಅಂಞೂಟ್ಯ ತೊಂಬತಂಜಿ ಕಾಲ ಬದ್‌ಕಿತ್‌ ಬೋರೆ ಕ್‌ಣ್ಣ ಮಕ್ಕಳ ಮೂಡಿ ಮಕ್ಕಳ ಪೆತ್ತತ್.

³¹ಲೆಮೆಕ ಒಟ್ಟ್‌ ಏಳ್‌ ನೂಟ್ಯ ಎಳ್‌ವತ್‍ೕಳ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್ತ್‌ ಪೋಚಿ.

³²ನೋಹಂಗ್‌ ಅಂಞೂರ್‌ ಕಾಲ ಇಪ್ಪಕ ಶೇಮ್, ಹಾಮ್, ಯೆಫೆತ್‌ ಎಣ್ಣುವ ಮೂಂದ್‌ ಕ್‌ಣ್ಣ ಮಕ್ಕ ಪುಟ್ಟ್‌ಚಿ.