Read Kodava ಆದ್ಯತ್‌ರ ಪುಸ್ತಕ 8 Bible Online

ಆದ್ಯತ್‌ರ ಪುಸ್ತಕ 8 - Kodava bible

ಆದ್ಯತ್‌ರ ಪುಸ್ತಕ 8

¹ದೇವ ನೋಹನ ಪಿಂಞ ಅಂವೊಂಡ ಕೂಡೆ ಹಡಗ್‌ಲ್‌ ಇಂಜ ಎಲ್ಲಾ ಕಾಡ್‌ ಪ್ರಾಣಿಯಳ ಚಾಕ್‌ ಪ್ರಾಣಿಯಳ ಮನಸ್ಸ್‌ಲ್‌ ಗೇನಮಾಡಿತ್, ಬೂಮಿರ ಮೇಲೆ ಗಾಳಿನ ಅಯಿಚತ್. ಅಕ್ಕ ನೀರ್‌ ಶಾಂತಿ ಆಯಿತ್, ಕಮ್ಮಿ ಆಪಕ್‌ ಶುರು ಆಚಿ.

²ಬೂಮಿರ ಒಳ್‌ಲ್‌ಂಜ ನೀರ್‌ರ ಬುಗ್ಗೆ ಪರಿಯುವದು ಪಿಂಞ ಬಾನತ್‌ರ ಕ್‌ಡ್‌ಕೆ ತೊರ್‌ಂದಿತ್‌ ನೀರ್‌ ಬಪ್ಪನೆಕೆ ಬಂದಂಡಿಂಜದು ನಿಂದತ್. ಬಾನತ್‌ಂಜ ಪೊಜ್ಜಂಡಿಂಜ ಮಳೆಯು ನಿಂದತ್.

³ಇನ್ನನೆ ದಿವಸ ಪೋನನೆಕೆ ಬೂಮಿರ ಮೇಲೆ ನೀರ್‌ ಕಮ್ಮಿ ಆಯೇಂಡಿಂಜತ್. ನೂಟ್ಯ ಐಂಬದ್‌ ದಿವಸ ಇಂಞು ಆಚಿ.

⁴ಏಳನೇ ತಿಂಗತ್‌ರ ಪದಿನ್‍ೕಳನೆ ದಿವಸತ್‌ಲ್‌ ಹಡಗ್‌ ಆರಾರಾಟ್ ಸೀಮೆರ ಕುಂದ್ರ ಒಂದ್‌ಲ್‌ ನಿಂದತ್.

⁵ಪತ್ತನೆ ತಿಂಗಕತ್ತನೆ ನೀರ್‌ ಕಮ್ಮಿ ಆಯಂಡ್‌ ಬಾತ್. ಪತ್ತನೆ ತಿಂಗತ್‌ರ ಒಂದನೆ ದಿವಸತ್‌ಲ್‌ ಕುಂದ್ರ ತುದಿ ಕಂಡ್‌ ಬಾತ್.

⁶ಇಂಞು ನಾಪದ್‌ ದಿವಸ ಆನ ಪಿಂಞ ನೋಹ ತಾನ್‌ ಮಾಡ್‌ನ ಹಡಗ್‌ರ ಕ್‌ಡ್‌ಕೆನ ತೊರ್‌ಂದಿತ್,

⁷ಒರ್‌ ಕಾಕೆನ ಪೊರಮೆ ಬುಟ್ಟತ್. ಬೂಮಿರ ಮೇಲೆ ನೀರ್‌ ಬತ್ತ್‌ವಕತ್ತನೆ ಆ ಕಾಕೆ ಪೊಯಂಡ್‌ ಬಂದಂಡ್‌ ಇಂಜತ್.

⁸ಇನ್ನನೆ ನೀರ್‌ ಬತ್ತ್‌ಚಾ ಇಲ್ಲಿಯಾಂದ್‌ ನೋಟ್‌ವಕಾಯಿತ್‌ ನೋಹ ಒರ್‌ ಪಾರಿವಾಳತ್‌ನ ಪೊರಮೆ ಬುಟ್ಟತ್.

⁹ಬೂಮಿರ ಮೇಲೆಯೆಲ್ಲಾ ನೀರ್‌ ಇಂಜಗುಂಡ್, ಪಾರಿವಾಳಕ್‌ ಕಾಲಿಡ್‌ವಕ್‌ ಜಾಗ ಇಲ್ಲತೆ ಪುನಃ ಹಡಗ್‌ಕ್ ತಿರಿತ್‌ ಬಾತ್. ನೋಹ ಅಂವೊಂಡ ಕೈಯಿನ ನ್‍ೕಟಿತ್‌ ಅದ್‌ನ ಪುಡಿಚಿತ್‌ ಹಡಗ್‌ಲ್‌ ತಾಂಡ ಪಕ್ಕ ಕೂಟಿಯಂಡತ್.

¹⁰ಅಂವೊ ಇಂಞು ಏಳ್‌ ದಿವಸ ಪಾರಕಾತಿತ್, ಪುನಃ ಪಾರಿವಾಳತ್‌ನ ಪೊರಮೆ ಬುಟ್ಟತ್.

¹¹ಬಯಿಟಾಪಕ ಆ ಪಾರಿವಾಳ ಅಂವೊಂಡ ಪಕ್ಕ ತಿರಿತ್‌ ಬಪ್ಪಕ, ಅದ್‌ ಪರ್ಚಂಡ್‌ ಬಂದ ಎಣ್ಣೆಮರತ್‌ರ ಎಲ್ಕಂಡ್‌ ಅದ್‌ಂಡ ಬಾಯಿಲ್‌ ಇಂಜತ್. ಅದನ ನೊಟ್‌ನ ನೋಹಂಗ್‌ ನೀರ್‌ ಬೂಮಿಯಿಂಜ ಕಮ್ಮಿ ಆಚೀಂದ್‌ ಗೊತ್ತಾಚಿ.

¹²ಪಿಂಞ ಇಂಞು ಏಳ್‌ ದಿವಸಕ್‌ ಪಾರಕಾತಿತ್‌ ಪುನಃ ಪಾರಿವಾಳತ್‌ನ ಪೊರಮೆ ಬುಟ್ಟತ್, ಆಚೇಂಗಿ, ಈ ಕುರಿ ಅದ್‌ ಅಂವೊಂಡ ಪಕ್ಕ ತಿರಿತ್‌ ಬಂದಿತ್‌ಲೆ.

¹³ನೋಹಂಗ್‌ ಆರ್‌ ನೂಟ್ಯ ಒರ್‌ ವಯಸ್ಸ್‌ ಆಪ ಕಾಲತ್, ಮೊದಲನೆ ತಿಂಗತ್‌ರ ಮೊದಲೆನೆ ದಿವಸತ್‌ಲ್‌ ಬೂಮಿಯಿಂಜ ನೀರ್‌ ಬತ್ತಿತ್‌ಂಜತ್. ನೋಹ ಹಡಗ್‌ರ ಮೇಲ್‌ ಬಾಗತ್‌ನ ಪೊಳಿಚಿತ್‌ ನೋಟ್‌ವಕ ನೆಲ ಒಣಗಿಪೋಯಿತ್‌ಂಜತ್.

¹⁴ಇಂಞು ದಂಡನೆ ತಿಂಗತ್‌ರ ಇರ್ವತ್‌ ಏಳನೆ ದಿವಸತ್‌ಲ್‌ ಬೂಮಿ ಪೂರ್ತಿಯಾಯಿತ್‌ ಒಣಗಿತ್‌ಂಜತ್.

¹⁵ಅಕ್ಕ ದೇವ ನೋಹಂಗ್:

¹⁶ನೀನ್, ನೀಡ ಕೂಡೆ ನೀಡ ಪೊಣ್ಣ್, ನೀಡ ಕ್‌ಣ್ಣ ಮಕ್ಕ, ನೀಡ ಮೈಮಕ್ಕ ಎಲ್ಲಾರು ಹಡಗ್ಯಿಂಜ ಪೊರಟಿತ್‌ ಪೊರಮೆ ಬಕ್ಕಲು.

¹⁷ನೀಡ ಕೂಡೆ ಉಳ್ಳ ಎಲ್ಲಾ ಪ್ರಾಣಿ, ಪಕ್ಷಿ, ಬೂಮಿರ ಮೇಲೆ ಪರ್ಪ ಎಲ್ಲಾ ಪ್ರಾಣಿಯಳ ಪೊರಮೆ ಬುಡ್. ಅಯಿಂಗ ಬೂಮಿರ ಮೇಲೆ ಅಯಿಂಗಡ ಸಂತಾನ ಬಲ್ಯದಾಯಿತ್, ಅಬಿವೃದ್ದಿ ಪೊಂದಿತ್, ಜಾಸ್ತಿ ಆಡ್‍ೕಂದ್‌ ಎಣ್ಣ್‌ಚಿ.

¹⁸ಅಕ್ಕ ನೋಹ, ಅಂವೊಂಡ ಪೊಣ್ಣ್, ಕ್‌ಣ್ಣ ಮಕ್ಕ, ಮೈಮಕ್ಕ ಎಲ್ಲಾರು ಪೊರಮೆ ಬಾತ್.

¹⁹ಎಲ್ಲಾ ತರತ್‌ರ ಪ್ರಾಣಿ ಪಕ್ಷಿಯ ತಾಂಡ ತಾಂಡ ಜಾತಿ ಪ್ರಕಾರ ಓರೋರ್‌ ಜೊತೆಯಾಯಿತ್‌ ಹಡಗ್ಯಿಂಜ ಪೊರಮೆ ಬಾತ್.

²⁰ಅಕ್ಕ ನೋಹ ಯೆಹೋವಂಗ್‌ ಒರ್‌ ಬಲಿಪೀಠತ್‌ನ ಕೆಟ್ಟಿತ್, ಶುದ್ದವಾನ ಚೆನ್ನ ಪ್ರಾಣಿ ಪಿಂಞ ಪಕ್ಷಿಯಳ ಬಲಿಪೀಠತ್‌ರ ಮೇಲೆ ದಹನ ಬಲಿಯಾಯಿತ್‌ ಬಲಿ ಕೊಡ್‌ತತ್.

²¹ಬಲಿ ಕೊಡ್‌ತ ನಲ್ಲ ವಾಸನೆ ಯೆಹೋವನ ಕುಶಿ ಪಡ್‌ತ್‌ಚಿ. ಅಕ್ಕ ಯೆಹೋವ: ಮನುಷ್ಯಂಡ ಮನಸ್ಸ್‌ ಚೆರ್ಪತ್‌ಂಜಲೇ ಕೆಟ್ಟದಾಯಿತ್‌ ಇಂಜತೇಂಗಿಯು, ನಾನ್‌ ಇಂಞು ಮಿಂಞಕ್‌ ಮನುಷ್ಯನಗುಂಡ್‌ ಬೂಮಿಕ್‌ ಶಾಪ ಇಡುಲೆ; ನಾನ್‌ ಇಕ್ಕ ನಾಶಮಾಡ್‌ನನೆಕೆ ಇಂಞು ಮಿಂಞಕ್‌ ಎಲ್ಲಾ ಜೀವಿಯಳ ನಾಶ ಮಾಡುಲೆ.

²²ಬೂಮಿ ಇಪ್ಪಲ್ಲಿಕತ್ತನೆ ಬಿತ್ತ್‌ವದ್, ಕೊಯ್ಯಿಪಣಿ ಮಾಡ್‌ವದ್, ಕೋಟ ಸೆಕೆ, ಬೆದ್‌ ಕಾಲ ಕುಳುರ್‌ ಕಾಲ, ಪೋಲ್ ಪಿಂಞ ಬಯಿಟ್ ಇಪ್ಪಾಂದ್‌ ಎಣ್ಣ್‌ಚಿ.