Read Kodava ಆದ್ಯತ್‌ರ ಪುಸ್ತಕ 9 Bible Online

ಆದ್ಯತ್‌ರ ಪುಸ್ತಕ 9 - Kodava bible

ಆದ್ಯತ್‌ರ ಪುಸ್ತಕ 9

¹ಅಕ್ಕ ದೇವ ನೋಹನ ಪಿಂಞ ಅಂವೊಂಡ ಕ್‌ಣ್ಣ ಮಕ್ಕಳ ಆಶೀರ್ವಾದ ಮಾಡಿತ್: ನಿಂಗ ಅಬಿವೃದ್ದಿ ಪೊಂದಿತ್, ನಿಂಗಡ ಸಂತಾನ ಬಲ್ಯದಾಯಿತ್, ಈ ಲೋಕತ್‌ನ ದುಂಬಿಚಿಡುವಿರ.

²ಬೂಮಿರ ಮೇಲೆ ಉಳ್ಳ ಎಲ್ಲಾ ಪ್ರಾಣಿಯ, ಬಾನತ್‌ಲ್‌ ಉಳ್ಳ ಎಲ್ಲಾ ಪಕ್ಷಿಯ, ನೆಲತ್‌ಲ್‌ ಪರಿಯುವ ಎಲ್ಲಾ ಪ್ರಾಣಿಯ ಪಿಂಞ ಸಮುದ್ರತ್‌ಲ್‌ ಉಳ್ಳ ಎಲ್ಲಾ ಮೀನ್‌ ನಿಂಗಕ್‌ ಬೊತ್ತಿತ್‌ ಬೊರಡ್‌ವ. ಅದನೆಲ್ಲಾ ನಿಂಗಡ ಕೈಕ್‌ ಕೊಡ್‌ತಿತುಳ್ಳ.

³ನಾನ್‌ ನಿಂಗಕ್‌ ಕಾಳ್‌ಕಡ್ಡಿ ಪಿಂಞ ತರಕಾರಿನ ತಿಂಬಕ್‌ ತಂದನೆಕೆ, ಬೂಮಿರ ಮೇಲೆ ಉಳ್ಳ ಜೀವಜಂತುವಳ ನಿಂಗಕ್‌ ಆಹಾರವಾಯಿತ್‌ ತಂದಿಯೇ.

⁴ಆಚೇಂಗಿ ಯರ್ಚಿನ, ಅದ್‌ಂಡ ಜೀವ ಆನ ಚೋರೆರೆ ಕೂಡೆ ನಿಂಗ ತಿಂಬಕ್ಕಾಗ.

⁵ಇದಲ್ಲಾತೆ ನಿಂಗಡ ಜೀವತ್‌ನ ಎಡ್‌ಪಂವೊನ ಕಂಡಿತವಾಯಿತ್‌ ಅದಂಗಾಯಿತ್‌ ಲೆಕ್ಕ ಕ್‍ೕಪಿ. ಒರ್‌ ಕಾಡ್‌ಪ್ರಾಣಿ ಮನುಷ್ಯನ ಕೊಂದತೇಂಗಿ, ಆ ಪ್ರಾಣಿ ಚಾವಂಡು. ಒರ್‌ ಮನುಷ್ಯ ಇಂಞೊರ್‌ ಮನುಷ್ಯನ ಕೊಂದತೇಂಗಿ, ಆ ಮನುಷ್ಯ ಚಾವಂಡು.

⁶ದೇವ ಮನುಷ್ಯನ ತಾಂಡ ರೂಪತ್‌ಲ್‌ ಸೃಷ್ಟಿ ಮಾಡ್‍ನಗುಂಡ್, ಒರ್‌ ಮನುಷ್ಯ ಇಂಞೊರ್‌ ಮನುಷ್ಯನ ಕೊಂದತೇಂಗಿ, ಅಂವೊಂಡ ಜೀವ ಸಹ ಒರ್‌ ಮನುಷ್ಯಂಡ ಕೈಯಿಂಜಲೆ ಪೋಪ.

⁷ನಿಂಗ ಅಬಿವೃದ್ದಿ ಪೊಂದಿತ್‌ ದುಂಬಿತ್, ಬೂಮಿರ ಮೇಲೆ ನಿಂಗಡ ಸಂತಾನಕಾರಂಗ ದುಂಬ ಬೊಳೆಯಡ್‍ೕಂದ್‌ ಎಣ್ಣ್‌ಚಿ.

⁸ಇದಲ್ಲಾತೆ ದೇವ ನೋಹನ ಪಿಂಞ ಅಂವೊಂಡ ಕ್‌ಣ್ಣ ಮಕ್ಕಳ ನೋಟಿತ್:

⁹ನೋಟಿ, ನಾನ್‌ ನೀಡ ಕೂಡೆ ಪಿಂಞ ಬಯ್ಯ ಬಪ್ಪ ನೀಡ ಸಂತಾನತ್‌ರ ಕೂಡೆ,

¹⁰ನೀಡ ಕೂಡೆ ಜೀವಂತವಾಯಿತುಳ್ಳ ಎಲ್ಲಾ ಜೀವಿಯಡ ಕೂಡೆ, ಹಡಗಿಂಜ ಪೊರ್‌ಟ್ ಬಂದ ಪಕ್ಷಿಯ, ಚಾಕ್‌ ಪ್ರಾಣಿಯ ಪಿಂಞ ಎಲ್ಲಾ ಕಾಡ್‌ ಪ್ರಾಣಿಯಡ ಕೂಡೆ ನಾಡ ಒಪ್ಪಂದತ್‌ನ ಮಾಡುವಿ.

¹¹ನಾನ್‌ ನಾಡ ಒಪ್ಪಂದತ್‌ನ ನೀಡ ಕೂಡ ಸ್ತಿರ ಮಾಡುವಿ; ನಾನ್‌ ನೇರಾಯಿತ್‌ ಜೀವಂತವಾಯಿತುಳ್ಳ ಪ್ರಾಣಿಯಳ ಪಿಂಞ ಬೂಮಿನ ನಾಶ ಮಾಡ್‌ವಕ್‌ ಇಂಞೊರ್‌ ಜಲಪ್ರಳಯತ್‌ನ ಅಯಿಪುಲೇಂದ್‌ ಎಣ್ಣ್‌ಚಿ.

¹²ಇಂಞು ದೇವ: ನಾನ್‌ ನಿಂಗಕು ನಾಕು ಪಿಂಞ ನಿಂಗಡ ಕೂಡೆ ಉಳ್ಳ ಎಲ್ಲಾ ಜೀವಜಂತುವಕು, ಇಂಞು ಮಿಂಞಕ್‌ ಬಪ್ಪಕುಳ್ಳ ಎಲ್ಲಾ ಸಂತಾನಕು ಮಾಡುವ ಒಪ್ಪಂದಕ್‌ ಗುರ್ತಾಯಿತ್,

¹³ನಾನ್‌ ಮೋಡತ್‌ಲ್‌ ನಾಡ ಮಳೆ ಬಿಲ್ಲ್‌ನ ಬೆಚ್ಚಿತುಳ್ಳ. ಅದ್‌ ನಾಕು ಈ ಬೂಮಿಕು ಮಾಡ್‌ನ ಒಪ್ಪಂದಕ್‌ ಗುರ್‌ತಾಯಿತ್‌ಪ್ಪ.

¹⁴ನಾನ್‌ ಈ ಬೂಮಿರ ಮೇಲೆ ಮೋಡತ್‌ನ ಅಯಿಪಕ, ಮಳೆ ಬಿಲ್‌ಲ್‌ ಕಂಡ್‌ ಬಪ್ಪ.

¹⁵ಅಕ್ಕ ನಾನ್, ನಾಕು ನಿಂಗಕು ಪಿಂಞ ಎಲ್ಲಾ ತರತ್‌ರ ಜೀವಜಂತುವಡ ಕೂಡೆ ಮಾಡ್‌ನ ಒಪ್ಪಂದತ್‌ನ ಗೇನ ಮಾಡಿಯೊವಿ. ಇಂಞು ಮಿಂಞಕ್‌ ಜೀವಂತವಾಯಿತ್‌ಪ್ಪ ಎಲ್ಲಾ ಜೀವಿಯಳ ನಾಶ ಮಾಡ್‌ವಕ್‌ ಮಳೆ ಜಲಪ್ರಳಯವಾಯಿತ್‌ ಆಪುಲೆ.

¹⁶ಆ ಮಳೆ ಬಿಲ್ಲ್‌ನ ಬಾನತ್‌ಲ್‌ ಕಂಡ್‌ ಬಪ್ಪಕ, ನಾಕೂ ಬೂಮಿಲ್‌ ಜೀವಂತವಾಯಿತುಳ್ಳ ಜೀವಿಯಡ ಕೂಡೆ ಉಳ್ಳ ನಿತ್ಯ ಒಪ್ಪಂದತ್‌ನ ಗೇನಮಾಡಿಯೊವೀಂದ್‌ ಎಣ್ಣ್‌ಚಿ.

¹⁷ಪಿಂಞ ದೇವ ನೋಹಂಗ್: ಅಕ್ಕು, ಈ ಮಳೆ ಬಿಲ್‌ಲ್‌ ನಾಕ್‍ ಪಿಂಞ ಜೀವಂತವಾಯಿತುಳ್ಳ ಎಲ್ಲಾ ಜೀವಿಯಡ ಕೂಡೆ ನಾನ್‌ ಮಾಡ್‌ನ ಒಪ್ಪಂದಕ್‌ ಗುರ್‌ತ್‍ೕಂದ್‌ ಎಣ್ಣ್‌ಚಿ.

¹⁸ಹಡಗಿಂಜ ಪೊರ್‌ಟ್ ಬಂದ ನೋಹಂಡ ಕ್‌ಣ್ಣ ಮಕ್ಕ ಶೇಮ್, ಹಾಮ್, ಯೆಫೆತ್‌ ಎಣ್ಣುವಯಿಂಗಳೇ. (ಹಾಮ್‌ ಕಾನಾನ್‌ಕ್‌ ಅಪ್ಪನಾಯಿತ್‌ಂಜತ್‌)

¹⁹ನೋಹಂಡ ಈ ಮೂಂದ್‌ ಕ್‌ಣ್ಣ ಮಕ್ಕಡಿಂಜಲೇ ಈ ಬೂಮಿರ ಮೇಲೆ ಎಲ್ಲಾ ಕಡೆಯೂ ಜನ ದುಂಬ್‌ಚಿ.

²⁰ಜಲಪ್ರಳಯ ಆನದು, ನೋಹ ವ್ಯವಸಾಯ ಮಾಡ್‌ವಕ್‌ ಸುರು ಮಾಡ್‌ಚಿ. ಆದ್ಯವಾಯಿತ್‌ ದ್ರಾಕ್ಷಿ ತೋಟತ್‌ನ ಮಾಡ್‌ನಂವೊ ಇಂವೊನೇ.

²¹ಅಂವೊ ತಾನ್‌ ಮಾಡ್‌ನ ದ್ರಾಕ್ಷಿರಸತ್‌ರ ಕಳ್ಳ್‌ನ ಜಾಸ್ತಿ ಕುಡಿಚಿತ್‌ ಅಂವೊಂಡ ಗುಡಾರತ್‌ಲ್‌ ಬೆತ್ತಲೆಯಾಯಿತ್‌ ಬುದ್ದಂಡತ್.

²²ಕಾನಾನ್‌ಕ್‌ ಅಪ್ಪನಾನ ಹಾಮ್, ಅಪ್ಪ ಬೆತ್ತಲೆಯಾಯಿತ್‌ ಉಳ್ಳಾನ ಕಂಡಿತ್, ಅಂವೊ ಪೊರಮೆ ಪೋಯಿತ್‌ ತಾಂಡ ಅಣ್ಣತಮ್ಮಣಂಗಳಾನ ಶೇಮ್‌ ಪಿಂಞ ಯೆಫೆತಂಗ್‌ ಎಣ್ಣ್‌ಚಿ.

²³ಆಚೇಂಗಿ ಶೇಮ್‌ ಪಿಂಞ ಯೆಫೆತ್‌ ಕಂಬಳಿನ ಎಡ್‌ತ್‌ಂಡ್‌ ತಂಗಡ ಬೆನ್ನ್‌ರ ಮೇಲೆ ಇಟ್ಟಂಡ್‌ ಬಯ್ಯಕ್‌ ನಡ್‌ದಂಡ್‌ ಪೋಯಿತ್‌ ಅಪ್ಪಂಡ್‌ ಬೆತ್ತೆಲೆನ ಮುಚ್ಚ್‌ಚಿ. ಅಯಿಂಗಡ ಮೂಡ್‌ನ ಇಂಞೊರ್‌ ಬರಿಕ್‌ ತಿರ್‌ಗಿತ್‌ಂಜನಗುಂಡ್‌ ಅಯಿಂಗ ಅಪ್ಪಂಡ ಬೆತ್ತಲೆನ ಕಂಡಿತ್‌ಲೆ.

²⁴ನೋಹ ಕುಡಿಚ ಬೋದೆಯಿಂಜ ಏವಕ ತಾಂಡ ಚೆರಿಯ ಮೋಂವೊ ಮಾಡ್‌ನದ್‌ ಗೊತ್ತಾಚಿ.

²⁵ಅಂವೊ ಹಾಮಂಡ ಸಂತಾನಕ್‌ ಶಾಪ ಇಟ್ಟಿತ್, ಅಂವೊ ಶೇಮ್, ಯೆಫೆತ್‌ರ ಸಂತಾನತ್‌ರ ಅಡಿಯಾಳಂಗಕ್‌ ಅಡಿಯಾಳಾಯಿತ್‌ ಇಪ್ಪಾಂದ್‌ ಎಣ್ಣ್‌ಚಿ .

²⁶ಇಂಞು ನೋಹ: ಶೇಮಂಡ ಯೆಹೋವನಾನ ದೇವಂಗ್‌ ವಂದನೆ. ಕಾನಾನ್‌ ಶೇಮಂಗ್‌ ಅಡಿಯಾಳಾಯಿತ್‌ ಇರಡ್.

²⁷ಯೆಹೋವನಾನ ದೇವ ಯೆಫೆತ್‌ರ ಜಾಗತ್‌ನ ಬಲ್ಯದ್‌ ಮಾಡಡ್‌ ಪಿಂಞ ಶೇಮಂಡ ಅಬಿವೃದ್ದಿಲ್‌ ಅಂವೊಂಗು ಪಾಲ್‌ ಕ್‌ಟ್ಟಡ್. ಕಾನಾನ್‌ ಅಂವೊಂಗ್‌ ಅಡಿಯಾಳಾಯಿತ್‌ ಇರಡ್.

²⁸ಜಲಪ್ರಳಯ ಬಂದ ಪಿಂಞ ನೋಹ ಇಂಞು ಮುನ್ನೂಟ್ಯ ಐಂಬದ್‌ ಕಾಲ ಬದ್‌ಕ್‌ಚಿ.

²⁹ಅಂವೊ ಒಟ್ಟ್‌ ಒಂಬೈನೂಟ್ಯ ಐಂಬದ್‌ ಕಾಲ ಬದ್‌ಕಿತಿಂಜತ್, ಪಿಂಞ ಚತ್‌ ಪೋಚಿ.