Read Kodava ಎಸ್ತೆರ್‌ 2 Bible Online

ಎಸ್ತೆರ್‌ 2 - Kodava bible

ಎಸ್ತೆರ್‌ 2

¹ಇದೆಲ್ಲಾ ಆನ ಪಿಂಞ ರಾಜನಾನ ಅಹಷ್ವೇರೋಷಂಡ ಚೆಡಿ ಕಮ್ಮಿ ಆಪಕ, ಅಂವೊ ವಷ್ಟಿ ರಾಣಿನ, ಅವ ಮಾಡ್‌ನಾನ, ಅವಡ ವಿಷಯತ್‌ ಮಾಡ್‌ನ ತೀರ್ಪ್‌ನ ಗೇನ ಮಾಡ್‌ಚಿ.

²ರಾಜಂಡ ಸನ್ನಿದಾನತ್‌ಲ್‌ ಸೇವೆ ಮಾಡಿಯಂಡಿಂಜ ರಾಜ್ಯತ್‌ರ ಸೇವಕಂಗ ಅಂವೊನ ನೋಟಿತ್: ಚಾಯಿಕಾರ್ತಿಯಾನ ಕನ್ನಿ ಮೂಡಿಯಳ ರಾಜಂಗಾಯಿತ್‌ ತ್‍ೕಡ್‌ವಕ್‌ ಅಪ್ಪಣೆ ಕೊಡ್‌ಕಂಡು.

³ಈ ಕಾರ್ಯತ್‌ನ ಮಾಡ್‌ವಕಾಯಿತ್‌ ರಾಜ ತಾಂಡ ರಾಜ್ಯತ್‌ ಉಳ್ಳ ಎಲ್ಲಾ ಪ್ರಾಂತ್ಯತ್‌ಲ್‌ ಅದಿಕಾರಿಯಳ ನೀಮಿಚಿಡಂಡು. ಆ ಅದಿಕಾರಿಯ, ಚಾಯಿಯುಳ್ಳ ಎಲ್ಲಾ ಕನ್ನಿಮೂಡಿಯಳ ಒಟ್ಟ್‌ಕೂಟಿತ್‌ ಶೂಷನ್‌ ಪಟ್ಟಣತ್‌ರ ಅರಮನೆರ ಕೋಟೆಲ್‌ ಉಳ್ಳ ಕನ್ನಿ ಮೂಡಿಯ ಒಳಿಯುವ ಮನೇಕ್‌ ಕಾಕಿಯಂಡ್‌ ಬರಂಡು. ಅಲ್ಲಿಂಜ ಅಯಿಂಗಳ ರಾಜಂಡ ಅದಿಕಾರಿಯನಾನ ಕನ್ನಿ ಮೂಡಿಯಳ ನೋಟ್ಟುವ ಹೇಗೈ ಎಣ್ಣುವ ಶಿಕಂಡಿರ ಕೈಕ್‌ ಒಪ್ಪ್‌ಚಿಡಡ್. ಅಯಿಂಗಡ ಚಾಯಿನ ಜಾಸ್ತಿ ಮಾಡುವಕ್‌ ಬೋಂಡಿಯಾನ ವಸ್ತುನ ಅಯಿಂಗಕ್‌ ಕೊಡ್‌ಕಡ್.

⁴ಅಕ್ಕ ರಾಜಂಗ್‌ ಏದ್‌ ಕನ್ನಿ ಮೂಡಿನ ಕುಶಿ ಆಪೊ, ಆ ಕನ್ನಿ ಮೂಡಿ ವಷ್ಟಿ ರಾಣಿರ ಬದ್‌ಲಾಯಿತ್‌ ರಾಣಿ ಆಡ್‍ೕಂದ್‌ ಎಣ್ಣ್‌ಚಿ. ಈ ತಕ್ಕ್‌ ರಾಜಂಗ್‌ ಕುಶಿಯಾನಗುಂಡ್‌ ಅನ್ನನೆ ಮಾಡ್‌ಚಿ.

⁵ಆ ಸಮಯತ್‌ಲ್‌ ಶೂಷನ್‌ ಪಟ್ಟಣತ್‌ರ ಅರಮನೆರ ಕೋಟೆಲ್‌ ಯಾಯೀರಂಡ ಮೋಂವೊನಾನ ಮೊರ್ದೆಕೈ ಎಣ್ಣುವ ಒರ್‌ ಯೆಹೂದ್ಯ ಮನುಷ್ಯ ವಾಸ ಮಾಡಿಯಂಡಿಂಜತ್. ಇಂವೊ ಬೆನ್ಯಾಮೀನ್‌ ಕುಲಕ್‌ ಕೂಡ್‌ನಂವನು, ಕೀಷ ಪಿಂಞ ಶಿಮ್ಗೀಯಂಡ ಸಂತಾನಕಾರನಾಯಿತು ಇಂಜತ್.

⁶ಬಾಬೆಲೋನಂಡ ರಾಜನಾನ ನೆಬೂಕದ್‌ನೆಚ್ಚರ್‌ ಯೆಹೂದ್ಯ ರಾಜನಾನ ಯೆಹೋಯಾಕೀನನ ಗೆದ್ದಿತ್‌ ಪುಡ್‌ಚಂಡ್‌ ಪೋಪಕ, ಅಂವೊಂಡ ಕೂಡೆ ಯೆರೂಸಲೇಮಿಂಜ ಪುಡ್‌ಚಂಡ್‌ ಪೋನಯಿಂಗಡಡೆಲ್‌ ಇಂವೊನು ಒಬ್ಬನಾಯಿತ್‌ಂಜತ್.

⁷ಮೊರ್ದೆಕೈ, ಎಸ್ತೇರ್‌ ಎಣ್ಣುವ ಪೆದತ್‌ನ ಪಡ್‌ಂದ ಹದೆಸ್ಸಾ ಎಣ್ಣುವವಳ ಚಾಕ್‌ಚಿ. ಇವ ಮೊರ್ದೆಕೈಯಂಡ ಕುಂಞಪ್ಪಂಡ ಮೋವಳಾಯಿತ್‌ಂಜತ್. ಅವಕ್‌ ಅಪ್ಪವ್ವ ಇಂಜಿತ್ತ್‌ಲ್ಲೆ. ಆ ಮೂಡಿ ಕಾಂಬಕ್‌ ಬಾರಿ ಚಾಯಿಕಾರ್ತಿಯು, ಸೌಂದರ್ಯ ಉಳ್ಳವಳು ಆಯಿತ್‌ಂಜತ್. ಅವಡ ಅಪ್ಪವ್ವ ಚತ್ತಪಿಂಞ ಅವಳ ತಾಂಡ ಮೋವಳಾಯಿತ್‌ ಸ್ವೀಕಾರ ಮಾಡಿತ್‌ ಚಾಕಿಯಂಡಿಂಜತ್.

⁸ರಾಜಂಡ ಆಜ್ಞೆಯು ತೀರ್ಮಾನವು ಪ್ರಚಾರ ಆನಪಿಂಞ, ಅಲ್ಲಿ ಸುಮಾರ್‌ ಚಾಯಿಕಾರ್ತಿ ಮೂಡಿಯಳ ಕೂಟಿಯಂಡ್‌ ಶೂಷನ್‌ ಅರಮನೆರ ಕೋಟೆಲ್‌ ಪೊಣ್ಣಾಳ್‌ವ ಕಾಪಂವೊನಾನ ಹೇಗೈರಂಡ ಕೈಕ್‌ ಒಪ್ಪ್‌ಚಿಟ್ಟತ್. ಅಯಿಂಗಡಡೆಲ್‌ ಎಸ್ತೇರಳ ಸಹ ಕೋಟೆಕ್‌ ಕಾಕಿಯಂಡ್‌ ಬಾತ್. ಅವಳ ಪೊಣ್ಣಾಳ್‌ವ ವಾಸಮಾಡ್‌ವ ಮನೆನೆ ಕಾಪಂವೊನಾನ ಹೈಗೈಯಂಡ ಕೈಕ್‌ ಒಪ್ಪ್‌ಚಿಟ್ಟತ್.

⁹ಹೇಗೈ ಆ ಮೂಡಿನ ಕಾಂಬಕ, ಅಂವೊಂಗ ಅವಳ ದುಂಬ ಕುಶಿಯಾಚಿ. ಆನಗುಂಡ್‌ ಅಂವೊಂಡ ದಯೆ ಅವಕ್‌ ಕ್‌ಟ್ಟ್‌ಚಿ. ಅನ್ನನೆ, ಅಂವೊ ಅವಳ ಞಂಞು ಚಾಯಿ ಮಾಡ್‌ವಕ್‌ ಬೋಂಡಿಯಾನ ವಸ್ತುನೆಲ್ಲಾ ಪಿಂಞ ಆಹಾರತ್‌ನ ಬೆರಿಯ ಕೊಡ್‌ತಿತ್, ಅವಕ್‌ ಬೋಂಡಿಯಾನ ಸೇವೆ ಮಾಡ್‌ವಕಾಯಿತ್‌ ಏಳ್‌ ಪಣಿಕಾರ್ತಿಯಳ ಅರಮನೆಯಿಂಜ ಆರಿಚಿಟ್ಟಿತ್, ಅವಳ ಪಿಂಞ ಅವಡ ಪಣಿಕಾರ್ತಿಯಳ ಅರಮನೆರ ಕೋಟೆಲ್‌ ಉಳ್ಳ ಪೊಣ್ಣಾಳ್‌ವ ವಾಸಮಾಡ್‌ವ ಮನೆರ ನಲ್ಲ ಬಾಗತ್‌ ಬೆಚ್ಚತ್.

¹⁰ಎಸ್ತೇರ್‌ ಅರಮನೆರ ಕೋಟೆಕ್‌ ಬಪ್ಪಕ್‌ ಮಿಂಞ ಮೊರ್ದೆಕೈ ಅವ ಏದ್‌ ದೇಶಕ್, ಕುಲಕ್‌ ಕೂಡ್‌ನವಾಂದು, ಅವಡ ಬೆಂದ್‌ಕ ದಾರ್‍ೕಂದು ಎಣ್ಣ್‌ವಕ್ಕಾಗಾಂದ್‌ ಎಚ್ಚರ ಮಾಡಿತ್‌ಂಜತ್. ಅವ ಅನ್ನನೆ ದಾರ್‌ಕು ಒಂದೂ ಎಣ್ಣಿತ್‌ಲ್ಲೆ.

¹¹ಎಸ್ತೇರ್‌ ಎನ್ನನೆ ಉಂಡ್‍ೕಂದು, ಅವಕ್‌ ಎಂತ ನಡ್‌ಂದಂಡುಂಡ್‍ೕಂದು ಗೊತ್ತಾಪಕಾಯಿತ್, ಪ್ರತಿ ದಿವಸ ಆ ಮನೇರ ಮಿಂಞತ್‌ ಮೊರ್ದೆಕೈ ತಿರ್‌ಗಾಡಿಯಂಡಿಪ್ಪಯಿಂಜತ್.

¹²ಆ ಜಾಗಕ್‌ ಕಾಕಿಯಂಡ್‌ ಬಂದ ಒರೋರ್‌ ಕನ್ನಿ ಮೂಡಿಯಕು, ರಾಜನಾನ ಅಹಷ್ವೇರೋಷಂಡ ಪಕ್ಕ ಪೋಪಕ್‌ ಮಿಂಞ ಆರ್‌ ತಿಂಗ ಪರಿಮಳ ತೈಲತ್‌ರಗುಂಡ್, ಆರ್‌ ತಿಂಗ ಕಾಂತಿವರ್ಧಕ ದ್ರವ್ಯತ್‌ರಗುಂಡ್, ವಾಸನೆ ದ್ರವ್ಯತ್‌ರಗುಂಡ್‌ ಮಾಡಿತ್‌ ಅಯಿಂಗಳ ಚಾಯಿ ಮಾಡ್‌ವ. ಇನ್ನನೆ ಪನ್ನೆರಂಡ್‌ ತಿಂಗ ಆ ಕನ್ನಿ ಮೂಡಿಯಕ್‌ ಮಾಡ್‌ವ. ಇದೆಲ್ಲಾ ಆನಪಿಂಞ ಪ್ರತಿಯೋರ್‌ ಕನ್ನಿ ಮೂಡಿಯೂ, ಅವಡ ಸಮಯ ಬಪ್ಪಕ, ರಾಜಂಡ ಅರಮನೆರ ಪದ್ದತಿರ ಪ್ರಕಾರ ತಯಾರಾಯಿತ್ ರಾಜನಾನ ಅಹಷ್ವೇರೋಷಂಡ ಪಕ್ಕ ಪೋಪಕಿಂಜತ್.

¹³ಇನ್ನನೆ ಅಲಂಗಾರ ಮಾಡ್‌ನಪಿಂಞ ಒರೋರ್‌ ಮೂಡಿಯು ರಾಜಂಡ ಪಕ್ಕ ಪೋಪ. ಅವ ಪೊಣ್ಣಾಳ್‌ರ ಮನೇಯಿಂಜ ಅರಮನೆಕ್‌ ಪೋಪಕ, ಅವ ಅವಡ ಕೂಡೆ ಏದೆಲ್ಲಾ ಎಡ್‌ತಂಡ್‌ ಪೋಂಡೂಂದ್‌ ಕ್‍ೕಟತೋ, ಅದ್‌ನೆಲ್ಲಾ ಅವಕ್‌ ಕೊಡ್‌ಪಯಿಂಜತ್.

¹⁴ಅವ ಅಲ್ಲಿಕ್‌ ಬಯಿಟಾಪಕ ಪೋಯಿತ್‌ ಪಿತ್ಯಾಂದ್‌ ಪೊಲಾಕ ಬಪ್ಪಕ, ಅವ ರಾಜಂಡ ಉಪ ಪೊಣ್ಣಾಳ್‌ವ ಒಳಿಯುವ ದಂಡನೆ ಮನೇಕ್‌ ಬಪ್ಪ. ಕಾಪಂವೊನಾನ ಶವಷ್ಗಜ ಎಣ್ಣುವ ರಾಜಂಡ ಶಿಕಂಡಿರ ವಶತ್‌ಲ್‌ ಇಂಜ ದಂಡನೆ ಮನೇಕ್‌ ಬಪ್ಪಯಿಂಜತ್. ಅವ ರಾಜಂಡ ಮಿಂಞ ಬಪ್ಪಕ, ರಾಜ ಅವಳ ಕುಶಿಪಟ್ಟಿತ್, ಅವಡ ಪೆದತ್‌ನ ಎಣ್ಣಿತ್‌ ಕಾಕ್‌ಚೇಂಗಿ ಮಾತ್‌ರ ಅವ ರಾಜಂಡ ಪಕ್ಕ ಪುನಃ ಪೋಪಕಯ್ಯು[1].

¹⁵ಮೊರ್ದೆಕೈಯಂಡ ಚಾಕ್‌ ಮೋವಳು ಅಂವೊಂಡ ಕುಂಞಪ್ಪನಾನ ಅಬೀಹೈಲಂಡ ವೋವಳು ಆನ ಎಸ್ತೇರ್‌ ರಾಜಂಡ ಪಕ್ಕ ಪೋಪಕ್‌ ಪೆದ ಬಪ್ಪಕ, ಅವ ಮನೇನ ಕಾಪಂವೊನಾನ ಹೇಗೈ ಎಣ್ಣುವ ಶಿಕಂಡಿ ಗೊತ್ತ್‌ ಮಾಡ್‌ನದ್‌ನ ಅಲ್ಲತೆ ಬೋರೆ ಒಂದೂ ಕ್‍ೕಟಿತ್‌ಲ್ಲೆ. ಇದ್‌ಲ್ಲತೆ ಎಸ್ತೇರ್‌ನ ನೋಟ್‌ನಯಿಂಗ ಎಲ್ಲಾಡ ದಯೆ ಅವಕ್‌ ಕ್‌ಟ್ಟ್‌ಚಿ.

¹⁶ಅನ್ನನೆ ರಾಜನಾನ ಅಹಷ್ವೇರೋಷಂಡ ಆಳ್‌ವಿಕೆರ ಏಳನೇ ಕಾಲತ್‌ರ ತೇಬೇತ್‌ ಎಣ್ಣುವ ಪತ್ತನೆ ತಿಂಗತ್‌ಲ್‌ ಎಸ್ತೇರ್‌ನ ರಾಜಂಡ ಅರಮನೆಕ್‌ ಕಾಕಿಯಂಡ್‌ ಪೋಚಿ.

¹⁷ರಾಜ ಎಲ್ಲಾ ಕನ್ನಿ ಮೂಡಿಯಕಿಂಜ ಎಸ್ತೇರ್‌ನ ಕುಶಿಪಟ್ಟತ್. ಎಲ್ಲಾ ಕನ್ನಿ ಮೂಡಿಯಕಿಂಜ ಅವಕ್‌ ಅಂವೊಂಡ ದಯೆ ಪಿಂಞ ಪ್ರೀತಿ ಕ್‌ಟ್ಟ್‌ಚಿ. ಅಂವೊ ರಾಜಕಿರೀಟತ್‌ನ ಅವಡ ಮಂಡೆರ ಮೇಲೆ ಇಟ್ಟಿತ್, ವಷ್ಟಿಕ್‌ ಬದ್‌ಲ್‌ ಎಸ್ತೇರಳ ರಾಣಿಯಾಯಿತ್‌ ಮಾಡಿಯಂಡತ್.

¹⁸ತಾಂಡ ಎಲ್ಲಾ ಪ್ರಬುವಯಿಂಗಕು, ಸೇವಕಂಗಕು, ಎಸ್ತೇರಂಡ ಪೆದತ್‌ಲ್‌ ಬಲ್ಯ ನಮ್ಮೆ ಮಾಡಿತ್, ಎಲ್ಲಾ ಪ್ರಾಂತ್ಯತ್‌ ಸುಂಕತ್‌ನ ಕಮ್ಮಿ ಮಾಡಿತ್, ರಾಜಂಡ ಗನತ್‍ಕ್ ಸೆರಿಯಾಯಿತ್‌ ಉದಾರವಾಯಿತ್‌ ಇನಾಮ್‌ ಅಯಿಚತ್.

¹⁹ದಂಡನೆ ಕುರಿ ಕನ್ನಿ ಮೂಡಿಯಳ ಒಟ್ಟ್‌ ಕೂಟಿತ್‌ಪ್ಪಕ, ಮೋರ್ದೆಕೈ ಅರಮನೆರ ಬಾಯಿಕಂಡಿರ ಪಕ್ಕ ಅಳ್‌ತಂಡಿಂಜತ್.

²⁰ಎಸ್ತೇರ್, ಮೋರ್ದೆಕೈ ಅವಕ್‌ ಎಚ್ಚರ ಮಾಡಿತ್‌ಂಜನೆಕೆ ತಾಂಡ ಬೆಂದ್‌ಕ ಪಿಂಞ ತಾಂಡ ಜನ ದಾರ್‌ಂದ್‌ ದಾರ್‌ಕು ಒಂದು ಎಣ್ಣಿತ್‌ಲ್ಲೆ. ಮಿಂಞ ಅಂವೊ ಎಣ್ಣುವಕ ನಡಪ್ಪನೆಕೆ ಇಕ್ಕಲು ಅವ ನಡಂದತ್.

²¹ಆ ದಿವಸತ್‌ಲ್‌ ಮೋರ್ದೆಕೈ ಅರಮನೆರ ಬಾಯಿಕಂಡಿರ ಪಕ್ಕ ಅಳ್‌ತಂಡಿಪ್ಪಕ ಪಡಿಕಾಪಯಂಗಳಾನ ಬಿಗೆತಾನ ಪಿಂಞ ತೆರೆಷ ಎಣ್ಣುವ ದಂಡ್‌ ರಾಜಂಡ ಸೇವಕಂಗಳಾನ ಶಿಕಂಡಿಯ, ರಾಜನಾನ ಅಹಷ್ವೇರೋಷಂಡ ಮೇಲೆ ಚೆಡಿ ಮಾಡಿಯಂಡ್‌ ಅಂವೊನ ಕೊಲ್ಲಂಡೂಂದ್‌ ಚದಿ ಮಾಡಿಯಂಡಿಂಜತ್.

²²ಈ ವಿಷಯ ಮೋರ್ದೆಕೈಕ್‌ ಗೊತ್ತಾಯಿತ್, ರಾಣಿಯಾನ ಎಸ್ತೇರಂಗ್‌ ಅರಿಚಿಟ್ಟತ್; ಈ ವಿಷಯತ್‌ನ ಮೋರ್ದೆಕೈಯನೇ ಎಣ್ಣ್‌ಚೀಂದ್‌ ಎಸ್ತೇರ್‌ ರಾಜಂಗ್‌ ಎಣ್ಣ್‌ಚಿ.

²³ಈ ವಿಷಯ ವಿಚಾರಣೆಕ್‌ ಬಪ್ಪಕ ಅದ್‌ ನೇರ್‌ಂದ್‌ ಗೊತ್ತಾನಪಿಂಞ ಆ ದಂಡಾಳ್‌ನ ಮರತ್‌ಲ್‌ ತೂಕ್‌ಚಿ. ಇದ್‌ನ, ರಾಜಂಡ ಮಿಂಞತ್‌ ಅಂವೊ ಆಳ್‌ವಿಕೆ ಮಾಡನ ಕಾಲತ್‌ಲ್‌ ನಡ್‌ಂದ ಮುಕ್ಯಪಟ್ಟ ವಿಷಯತ್‌ನ ಒಳ್‌ದಿ ಬೆಪ್ಪ ಪುಸ್ತಕತ್‌ಲ್‌ ಒಳದಿ ಬೆಚ್ಚತ್.