Read Kodava ಎಸ್ತೆರ್‌ 3 Bible Online

ಎಸ್ತೆರ್‌ 3 - Kodava bible

ಎಸ್ತೆರ್‌ 3

¹ಇದೆಲ್ಲಾ ಆನಪಿಂಞ ರಾಜನಾನ ಅಹಷ್ವೇರೋಷ, ಅಗಾಗ್‌[2] ಕುಲಕ್‌ ಕೂಡ್‌ನ ಹಮ್ಮೆದಾತಂಡ ಮೋಂವೊನಾನ ಹಾಮಾನ ಎಣ್ಣುವಂವೊನ ಗೌರವ ಪಡ್‌ತಿತ್, ತಾಂಡ ಪಕ್ಕ ಉಳ್ಳ ಎಲ್ಲಾ ಪ್ರಬುಕ್ಕಳೂಕಿಂಜ ಅಂವೊಂಗ್‌ ಬಲ್ಯ ಅದಿಕಾರತ್‌ರ ಸ್ತಾನತ್‌ನ ಕೊಡ್‌ತತ್.

²ಆನಗುಂಡ್‌ ರಾಜಂಡ ಅರಮನೆಲ್‌ ಇಂಜ ಎಲ್ಲಾ ಸೇವಕಂಗಳು ಹಾಮಾನಂಗ್‌ ಮಂಡೆ ಬಗ್ಗಿತ್‌ ಮರ್ಯಾದೆ ಕೊಡ್‌ಪಕಿಂಜತ್. ಇನ್ನನೆ ಮಾಡಂಡೂಂದ್‌ ರಾಜ ಆಜ್ಞೆ ಕೊಡ್‌ತಿತ್‌ಂಜತ್. ಆಚೇಂಗಿ ಮೊರ್ದೆಕೈ ಅಂವೊಂಗ್‌ ಮಂಡೆ ಬಗ್ಗಿತು ಇಲ್ಲೆ ಅಂವೊಂಗ್‌ ತಗ್ಗಿತು ಇಲ್ಲೆ.

³ಅಕ್ಕ ಅರಮನೆರ ಪಡಿನ ಕಾತಂಡಿಂಜ ರಾಜಂಡ ಸೇವಕಂಗ ಮೊರ್ದೆಕೈನ ನೋಟಿತ್: ಎನ್ನಂಗ್‌ ನೀನ್‌ ರಾಜಂಡ ಆಜ್ಞೆನ ಮೀರಿಯಂಡುಳ್ಳಿಯಾಂದ್‌ ಕ್‍ೕಟತ್.

⁴ಪ್ರತಿ ದಿವಸವೂ ಅಯಿಂಗ ಅಂವೊನ ಎಚ್ಚರ ಮಾಡುವಯಿಂಜತ್. ಆಚೇಂಗಿ ಅಯಿಂಗ ದಿನೋಲು ಎಣ್ಣಿಯಂಡಿಂಜತೇಂಗಿಯೂ ಅಂವೊ ಕ್‍ೕಪಯಿಂಜಿಲ್ಲೆ. ಅಂವೊ ಒರ್‌ ಯೆಹೋದ್ಯಾಂದ್‌ ಅಯಿಂಗಕ್‌ ಎಣ್ಣಿತಿಂಜಾಂಗ್, ಅಯಿಂಗ ಅದ್‌ನ ಹಾಮಾನಂಗ್‌ ಎಣ್ಣಿತ್‌ ಮೊರ್ದೆಕೈ ಬದ್‌ಲಾಕುವಂದ್‌ ನೋಟಿಯಂಡಿಂಜತ್.

⁵ಮೊರ್ದೆಕೈ ತಾಂಗ್‌ ಮಂಡೆ ಬಾಂಗಿತ್‌ ಮರ್ಯಾದೆ ಕೊಡ್‌ಕತೆ ಇಪ್ಪದ್‌ನ ಕಂಡಿತ್‌ ಹಾಮಾನಂಗ್‌ ದುಂಬ ಚೆಡಿಬಾತ್.

⁶ಆಚೇಂಗಿ ಮೊರ್ದೆಕೈ ಯೆಹೂದ್ಯ ಜನಾಂಗಕ್‌ ಕೂಡ್‌ನಂವೋಂದ್‌ ಗೊತ್ತಾನಪಿಂಞ, ಅಂವೊ ಒಬ್ಬನ ಮಾತ್‌ರ ಕೊಲ್ಲುವತ್‌ ದುಂಬ ಕಮ್ಮೀಂದ್‌ ಗೇನಮಾಡಿತ್, ಅಹಷ್ವೇರೋಷಂಡ ರಾಜ್ಯತ್‌ಲ್‌ ಉಳ್ಳ ಮೊರ್ದೆಕೈಯಂಡ ಜನಳಾನ ಎಲ್ಲಾ ಯೆಹೂದ್ಯ ಜನತ್‌ನ ನಾಶ ಮಾಡವಕ್‌ ಗೇನ ಮಾಡ್‌ಚಿ.

⁷ರಾಜನಾನ ಅಹಷ್ವೇರೋಷಂಡ ಆಳ್‌ವಿಕೆರ ಪನ್ನೆರಂಡನೇ ಕಾಲತ್, ನಿಸಾನ್‌ ಎಣ್ಣುವ ತಿಂಗವಾನ ಮೊದಲೆನ ತಿಂಗತ್‌ಲ್‌ ಹಾಮಾನಂಡ ಮಿಂಞತ್‌ಲ್‌ ಪೂರ್‌ ಎಣ್ಣುವ ಚೀಟಿನ, ಏದ್‌ ದಿವಸ ಪಿಂಞ ಏದ್‌ ತಿಂಗಾಂದ್‌ ತೀರ್ಮಾನ ಮಾಡುವಕ್‌ ಪ್ರತಿ ದಿವಸಕು, ಪ್ರತಿ ತಿಂಗಕು ಇಟ್ಟತ್. ಆ ಚೀಟಿ ಆದಾರ್‌ ತಿಂಗವಾನ ಪನ್ನರಂಡನೆ ತಿಂಗಕ್‌ ಬುದ್ದತ್.

⁸ಅಕ್ಕ ಹಾಮಾನ ಅಹಷ್ವೇರೋಷ ರಾಜನ ನೋಟಿತ್: ನೀಡ ರಾಜ್ಯತ್‌ರ ಎಲ್ಲಾ ಪ್ರಾಂತಿಯತ್‌ಲು ಒರ್‌ ಜನಾಂಗ ಉಂಡ್. ಅಯಿಂಗ ಬೋರೆ ಜನಾಂಗತ್‌ರ ಕೂಡೆ ಪಬ್ಬಿತುಂಡೇಂಗಿಯೂ, ಆ ಜನಾಂಗ ಬೋರೆ ಆಯಿತೇ ಉಂಡ್. ಆ ಜನಾಂಗತ್‌ರ ಪದ್ದತಿ ಬೋರೆ ಎಲ್ಲಾ ಜನಾಂಗತ್‌ರ ಪದ್ದತಿಕಿಂಜ ಬೋರೆಯಾಯಿತೇ ಉಂಡ್. ಅಯಿಂಗ ರಾಜಂಡ ಆಜ್ಞೆರ ಪ್ರಕಾರ ನಡ್‌ಪದೇ ಇಲ್ಲೆ. ಆನಗುಂಡ್‌ ರಾಜ ಅಯಿಂಗಳ ಇನ್ನನೆ ಮುಂಡತೆ ಬುಡೋದ್‌ ಸೆರಿಯಿಲ್ಲೆ.

⁹ರಾಜಂಗ್‌ ಕುಶಿ ಉಂಡೇಂಗಿ ಅಯಿಂಗಳ ಕೊಲ್ಲ್‌ವಕ್‌ ಆಜ್ಞೆ ಕೊಡ್‌ಕಡ್; ಅನ್ನನೆ ಮಾಡ್‌ಚೇಂಗಿ ನಾನ್‌ ರಾಜಬಂಡಾರತ್‌ಲ್‌ ಇಡ್‌ವಕಾಯಿತ್‌ ಪತ್ತಾರಯಿರ ತಾಲಂದ್‌[3] ಬೊಳ್ಳಿ ನಾಣ್ಯತ್‌ನ ರಾಜಂಡ ವ್ಯವಹಾರತ್‌ನ ನೋಟುವಯಿಂಗಡ ಕೈಕ್‌ ಕೊಡ್‌ಪಿ.

¹⁰ಅಕ್ಕ ರಾಜ ತಾಂಡ ಕೈಯಿಲ್‌ ಇಂಜ ಮೊಯಿರತ್‌ನ ಎಡ್‌ತಿತ್‌ ಅಗಾಗ್‌ ಕುಲಕ್‌ ಕೂಡ್‌ನ ಹಮ್ಮೆದಾತಂಡ ಮೋಂವೊನು, ಯೆಹೂದ್ಯಂಗಡ ವಿರೋದಿಯು ಆನ ಹಾಮಾನಂಡ ಕೈಕ್‌ ಕೊಡ್‌ತತ್.

¹¹ಅಲ್ಲಿಂಜ ರಾಜ ಹಾಮಾನಂಗ್: ಆ ಬೊಳ್ಳಿನ ನೀನೇ ಬೆಚ್ಚ. ನೀಕ್‌ ಕುಶಿ ಬಂದನೆಕೆ ಆ ಜನಳ ಎಂತ ಬೋಂಡೇಂಗಿಯು ಮಾಡಲೂಂದ್‌ ಎಣ್ಣ್‌ಚಿ.

¹²ಒಂದನೆ ತಿಂಗತ್‌ರ ಪದಿಮೂಂದನೆ ದಿವಸತ್‌ಲ್‌ ರಾಜಂಡ ಒಳ್‌ತ್‌ಕಾರಂಗ ಕೂಡಿತ್‌ ಬರಂಡೂಂದ್‌ ಅಪ್ಪಣೆಯಾಚಿ; ಹಾಮಾನ ಅಯಿಂಗಕ್‌ ಆಜ್ಞೆ ಕೊಡ್‌ತನೆಕೆ ಅಯಿಂಗ ಉಪರಾಜಂಗಕು, ಓರೋರ್‌ ಪ್ರಾಂತ್ಯತ್‌ಲ್‌ ನೇಮಿಚಿಟ್ಟ ಅದಿಪತಿಯಂಗಕು, ಓರೋರ್‌ ಜನಾಂಗತ್‌ರ ಪ್ರಬುವಯಿಂಗಕು, ಪ್ರತಿಯೊರ್‌ ಪ್ರಾಂತ್ಯತ್‌ಲ್‌ ಉಳ್ಳ ತಕ್ಕ್‌ರ ಒಳ್‌ತ್‌ಲ್ ಪಿಂಞ ಅಯಿಂಗಯಿಂಗ ಪರಿಯುವ ತಕ್ಕ್‌ಲ್‌ ಒಳ್‌ದ್‌ಚಿ. ರಾಜನಾನ ಅಹಷ್ವೇರೋಷಂಡ ಪೆದತ್‌ಲ್‌ ಒಳ್‌ದಿತ್, ಅಂವೊಂಡ ಮೋಯಿರತ್‌ಂಜ ಮುದ್ರೆ ಇಟ್ಟತ್.

¹³ರಾಜಂಡ ಆಜ್ಞೆನ ಕಾಗದತ್‌ಲ್‌ ಒಳ್‌ದಿತ್, ಆ ಕಾಗತ್‌ನ ರಾಜಂಡ ಎಲ್ಲಾ ಪ್ರಾಂತ್ಯಕ್‌ ಬೆರಿಯ ಅಯಿಚಿ ಕೊಡ್‌ಪಕಾಯಿತ್‌ ಕುದುರೆ ಸೇವಕಂಗಡ ಮೂಲಕ ಅಯಿಚತ್. ಆ ಕಾಗದತ್‌ಲ್, ಒರೇ ದಿವಸತ್‌ಲ್‌ ಎಣ್ಣ್‌ಚೇಂಗಿ, ಆದಾರ್‌ ತಿಂಗವಾನ ಪನ್ನರಂಡನೆ ತಿಂಗತ್‌ ಪದಿಮೂಂದನೆ ದಿವಸತ್‌ ಚಿರಿಯಯಿಂಗ ಪೆರಿಯಯಿಂಗ, ಪೊಣ್ಣಾಳ್‌ವ ಮಕ್ಕಾಂದ್‌ ನೋಟತೆ ಎಲ್ಲಾ ಯೆಹೂದ್ಯ ಜನಳ ನಾಶ ಮಾಡಿತ್, ಕೊಂದಿತ್, ಪಾಳ್‌ ಮಾಡಿತ್‌ ಪಿಂಞ ಅಯಿಂಗಡ ಆಸ್ತಿಪಾಸ್ತಿನೆಲ್ಲಾ ಸೂರೆ ಮಾಡೀಂದ್‌ ಒಳ್‌ದಿತ್‌ಂಜತ್.

¹⁴ಅದಲ್ಲತೆ: ಈ ಕಾಗತ್‌ರ ಒರೋರ್‌ ಪ್ರತಿಯೂ ಪ್ರತಿಯೋರ್‌ ಪ್ರಾಂತ್ಯಕ್‌ ರಾಜಾಜ್ಞೆ ಎಣ್ಣಿಯಂಡ್‌ ಅಯಿಚಿತ್‌ ಎಲ್ಲಾ ಜನಳೂ ತಯಾರಾಯಿತ್ ಇಪ್ಪನೆಕೆ ಎಲ್ಲಾ ಜನಳೂ ಅರಿಯುವನೆಕೆ ಪ್ರಕಟಿಚಿಡಂಡುಂದ್‌ ಒಳ್‌ದಿತ್‌ಂಜತ್.

¹⁵ರಾಜಂಡ ಆಜ್ಞೆರನೆಕೆ ಆ ಕುದುರೆ ಸೇವಕಂಗ ಕಾಗದತ್‌ನ ಎಡತಂಡ್‌ ಬೆರಿಯ ಪೊರ್‌ಟ್ ಪೋಚಿ. ಈ ತೀರ್ಮಾನ ಶೂಷನ್‌ ಅರಮನೆಲ್‌ ಪ್ರಕಟ ಆಚಿ. ರಾಜನೋ ಹಾಮಾನಂಡ ಕೂಡೆ ಕುಡಿಪಕ್‌ ಅಳ್‌ತಂಡತ್. ಶೂಷನ್‌ ಪಟ್ಟಣತ್‌ ಗಲಿಬಿಲಿ ಸುರು ಆಚಿ.