Read Kodava ಎಸ್ತೆರ್‌ 6 Bible Online

ಎಸ್ತೆರ್‌ 6 - Kodava bible

ಎಸ್ತೆರ್‌ 6

¹ಅಂದ್‌ ಬಯಿಟ್ ರಾಜಂಗ್‌ ವರಿಯೊಕ್‌ ಕಯಿಂಜಿತ್‌ಲ್ಲೆ. ಅದ್‌ಂಗ್‌ ಅಂವೊ ಅಂವೊಂಡ ಆಳ್‌ವಿಕೆರ ಕಾಲತ್‌ಲ್‌ ನಡ್‌ಂದ ಮುಕ್ಯಪಟ್ಟ ವಿಷಯತ್‌ನ ಒಳ್‌ದಿ ಬೆಪ್ಪ ಪುಸ್ತಕತ್‌ನ ಎಡ್‌ತ ಬಪ್ಪಕ್‌ ಆಜ್ಞೆ ಮಾಡ್‌ಚಿ. ಅದ್‌ನ ಅಂವೊಂಡ ಮಿಂಞತ್‌ ಓದ್ವಕ್‌ ಮಾಡ್‌ಚಿ.

²ಅಕ್ಕ ಪಡಿಕಾಪಯಂಗಳಾನ ಬಿಗೆತಾನ ಪಿಂಞ ತೆರೆಷ ಎಣ್ಣುವ ರಾಜಂಡ ದಂಡ್‌ ಸೇವಕಂಗ ರಾಜನಾನ ಅಹಷ್ವೇರೋಷನ ಕೊಲ್ಲಂಡೂಂದ್‌ ಚದಿ ಮಾಡ್‌ನ ವಿಷಯತ್‌ನ ಮೋರ್ದೆಕೈ ಅರಿಚಿಟ್ಟತ್‍ೕಂದ್‌ ಉಳ್ಳ ವಿಷಯತ್‌ನ ಆ ಪುಸ್ತಕತ್‌ಲ್‌ ಒಳ್‌ದಿತಿಂಜನ ಓದ್‌ಚಿ.

³ಅಕ್ಕ ರಾಜ: ಇದ್‌ಂಗಾಯಿತ್‌ ಮೊರ್ದೆಕೈಕ್‌ ಏದ್‌ ಪ್ರತಿಫಲ ಕ್‌ಟ್ಟ್‌ಚೀಂದ್‌ ಕ್‍ೕಟತ್. ಅದ್‌ಂಗ್‌ ರಾಜಂಡ ಸೇವಕಂಗ: ಅಂವೊಂಗ್‌ ಒಂದೂ ಮಾಡಿತ್‌ಲ್ಲೆಂದ್‌ ಎಣ್ಣ್‌ಚಿ.

⁴ಹಾಮಾನ ತಾನ್‌ ತಯಾರ್‌ ಮಾಡಿತ್‌ ಬೆಚ್ಚಿತುಳ್ಳ ತೂಕ್‌ಮರತ್‌ಲ್‌ ಅಂವೊನ ಇಡಂಡೂಂದ್‌ ತಕ್ಕ್‌ ಪರಿಯುವಕಾಯಿತ್‌ ಅರಮನೆರ ಪೊರ್ಮೆ ಉಳ್ಳ ಒರ್‌ ಚಾವಡಿಲ್‌ ಬಂದಿತ್‌ ನಿಂದತ್. ಅಕ್ಕ ರಾಜ: ಅರಮನೆರ ಬಾಯಿಕಂಡೀರ ಕೈಯಾಲೆಲ್‌ ದಾರ್‌ ಬಂದತ್‌ಂದ್‌ ಕ್‍ೕಟತ್.

⁵ಅದ್‌ಂಗ್‌ ರಾಜಂಡ ಸೇವಕಂಗ: ಇದಾ ಹಾಮಾನ ಬಾಯಿಕಂಡೀರ ಕೈಯಾಲೆರ ಪಕ್ಕ ನಿಂದಂಡುಂಡ್‍ೕಂದ್‌ ಎಣ್ಣ್‌ಚಿ. ಅಕ್ಕ ರಾಜ: ಅಂವೊನ ಒಳ್‌ಕ್‌ ಬಪ್ಪಕ್‌ ಬುಡೀಂದ್‌ ಎಣ್ಣ್‌ಚಿ.

⁶ಹಾಮಾನ ಒಳ್‌ಕ್‌ ಬಪ್ಪಕ ರಾಜ ಅಂವೊನ ನೋಟಿತ್: ರಾಜ ಸನ್ಮಾನ ಮಾಡಂಡೂಂದ್‌ ನೇರಾಯಿತ್‌ ಕುಶಿ ಪಡ್‌ವ ಮನುಷ್ಯಂಗ್‌ ಎಂತ ಮಾಡಂಡೂಂದ್‌ ಅಂವೊನ ಕ್‍ೕಟತ್. ಅಕ್ಕ ಹಾಮಾನ, ನನ್ನ ಬುಟ್ಟಿತ್‌ ರಾಜ ಬೋರೆ ದಾರ್‌ನ ಗೌರವ ಮಾಡುವಾಂದ್‌ ಅಂವೊಂಡ ಒಳಲ್‌ ಗೇನಮಾಡಿತ್,

⁷ರಾಜನ ನೋಟಿತ್: ರಾಜ ಗಣಪಡುತ್ತಂಡೂಂದ್‌ ಕುಶಿಪಡ್‌ವ ಮನುಷ್ಯಂಗ್,

⁸ತಾನ್‌ ಇಟ್ಟ ಒರ್‌ ರಾಜ ಉಡುಪ್ನ, ರಾಜ ಸವಾರಿ ಮಾಡ್‌ನ ಕುದುರೆನ ಪಿಂಞ ಅಂವೊಂಡ ರಾಜಕಿರೀಟತ್‌ನ ಅದಂಡ ಮೇಲ ಇಡುವಕ್‌ ಎಡ್‌ತ ಬರಂಡು.

⁹ಆ ಉಡ್‌ಪ್‌ನ ಪಿಂಞ ಕುದುರೆನ ರಾಜಂಡ ಮುಕ್ಯ ಪ್ರಬು ಒಬ್ಬಂಡ ಕೈಯಿಲ್‌ ಕೊಡ್‌ಕಂಡು. ಆ ಅದಿಕಾರಿ ರಾಜ ಗೌರವ ಪಡ್‌ತಂಡೂಂದ್‌ ಗೇನ ಮಾಡಿತುಳ್ಳ ಮನುಷ್ಯಂಗ್‌ ಆ ರಾಜಬಟ್ಟೆನ ಇಡಂಡು. ಅಲ್ಲಿಂಜ ಅಂವೊನ ಆ ಕುದುರೆರ ಮೇಲೆ ಅಳ್‌ಪ್‌ಚಿಟ್ಟಿತ್‌ ಪಟ್ಟಣತ್‌ರ ಬೀದಿರ ಬಟ್ಟೇಲ್‌ ಕಾಕಿಯಂಡ್‌ ಪೋಯಿತ್, ರಾಜ ಸನ್ಮಾನ ಮಾಡವಕ್‌ ಕುಶಿಪಡ್‌ವ ಮನುಷ್ಯಂಗ್‌ ಇನ್ನನೆ ಮಾಡ್‌ವಾಂದ್‌ ಅಂವೊಂಡ ಮಿಂಞತ್‌ ಪ್ರಚಾರ ಮಾಡಂಡೂಂದ್‌ ಎಣ್ಣ್‌ಚಿ.

¹⁰ಅಕ್ಕ ರಾಜ ಹಾಮಾನನ ನೋಟಿತ್: ನೀನ್‌ ಬೆರಿಯ ರಾಜ ಉಡ್‌ಪ್‌ನ ಪಿಂಞ ಕುದುರೆನ ಎಡ್‌ತಂಡ್‌ ಪೋಯಿತ್, ನೀನ್‌ ಎಣ್ಣ್‌ನನೆಕೆ ರಾಜಂಡ ಅರಮನೆರ ಪಡಿಲ್‌ ಅಳ್‌ತಂಡುಳ್ಳ ಯೆಹೂದ್ಯನಾನ ಮೊರ್ದಿಕೈಕ್‌ ಮಾಡ್. ನೀನ್‌ ಎಣ್ಣ್‌ನ ಒಂದನ ಸಹ ಬುಡತೆ ಮಾಡ್‍ೕಂದ್‌ ಎಣ್ಣ್‌ಚಿ.

¹¹ಅನ್ನನೆ ಹಾಮಾನ ರಾಜಂಡ ಉಡ್‌ಪನ ಪಿಂಞ ರಾಜ ಸವಾರಿ ಮಾಡ್‌ನ ಕುದರೆನ ಕೊಂಡಪೋಯಿತ್, ಬಟ್ಟೆನ ಮೊರ್ದೆಕೈಕ್‌ ಇಟ್ಟಿತ್, ಅಂವೊನ ಕುದರೆನ ಮೇಲೆ ಅಳ್‌ಪ್‌ಚಿಟ್ಟಿತ್‌ ಪಟ್ಟಣತ್‌ರ ಬೀದಿರ ಬಟ್ಟೆಲ್‌ ಕೊಂಡಪೋಯಿತ್‌ ಅಂವೊಂಡ ಮಿಂಞತ್: ರಾಜ ಗೌರವ ಪಡ್‌ತಂಡೂಂದ್‌ ಕುಶಿಪಡ್‌ವ ಮನುಷ್ಯಂಗ್‌ ಇನ್ನನೆ ಮಾಡುವಾಂದ್‌ ಎಣ್ಣಿಯಂಡ್‌ ಪ್ರಚಾರ ಮಾಡ್‌ಚಿ.

¹²ಮೊರ್ದೆಕೈ ತಿರಿತ್‌ ರಾಜಂಡ ಅರಮನೆರ ಪಡಿರ ಪಕ್ಕ ಪೋಚಿ. ಆಚೇಂಗಿ ಹಾಮಾನ ದುಃಖತ್‌ ಮಂಡೆನ ಮುಚ್ಚಿಯಂಡ್‌ ತಾಂಡ ಮನೆಕ್‌ ಬೆರಿಯ ಪೋಚಿ.

¹³ಅಕ್ಕ ಹಾಮಾನ ತಾಂಡ ಪೊಣ್ಣ್‌ ಜೆರೆಷ ಪಿಂಞ ಅಂವೊಂಡ ಎಲ್ಲಾ ಸ್ನೇಹಿತಂಗಕ್‌ ತಾಂಗ್‌ ಆನ ಸಂಗತಿನೆಲ್ಲ ಎಣ್ಣ್‌ಚಿ. ಅಕ್ಕ ಅಂವೊಂಡ ಪುದ್ದಿವಂತ ಸ್ನೆಹಿತಂಗ ಪಿಂಞ ಅಂವೊಂಡ ಪೊಣ್ಣ್‌ ಜೆರೆಷ ಅಂವೊನ ನೋಟಿತ್: ನೀನ್‌ ಇಕ್ಕಲೆ ಮೊರ್ದೆಕೈಯಂಡ ಪಕ್ಕ ಚೋತ್‌ ಪೋಪಕ್‌ ಸುರ್ ಆಯಿತುಳ್ಳಿಯ. ಅಂವೊ ಒರ್‌ ಯೆಹೂದ್ಯನಾಯಿತ್‌ ಇಂಜತೇಂಗಿ ನೀನ್‌ ಅಂವೊನ ಗೆಲ್ಲ್‌ವಕಯ್ಯುಲೆ. ನೇರಾಯಿತು ಅಂವೊಂಡ ಮಿಂಞತ್‌ ನೀನ್‌ ಚೋತಿತ್‌ ಪಾಳಾಯಿ ಪೋಪಿಯಾಂದ್‌ ಎಣ್ಣ್‌ಚಿ.

¹⁴ಅಂವೊ ಇಂಞು ಅಯಿಂಗಡ ಕೂಡೆ ತಕ್ಕ್‌ ಪರ್‌ಂದಂಡಿಪ್ಪಕಲೇ ರಾಜಂಡ ಶಿಕಂಡಿ ಸೇವಕಂಗ ಬಂದಿತ್‌ ಎಸ್ತೇರ್‌ ತಯಾರ್‌ ಮಾಡಿತುಳ್ಳ ಗದ್ದಾಳಕ್‌ ಬೆರಿಯ ಬರಂಡೂಂದ್‌ ಎಣ್ಣಿತ್‌ ಹಾಮಾನನ ಕಾಕಿಯಂಡ್‌ ಪೋಚಿ.