Read Kodava ಎಸ್ತೆರ್‌ 8 Bible Online

ಎಸ್ತೆರ್‌ 8 - Kodava bible

ಎಸ್ತೆರ್‌ 8

¹ಅದೇ ದಿವಸತ್‌ ರಾಜನಾನ ಅಹಷ್ವೇರೋಷ, ಯೆಹೂದ್ಯಂಗಡ ವಿರೋದಿಯಾಯಿತ್‌ಂಜ ಹಾಮಾನಂಡ ಆಸ್ತಿನೆಲ್ಲಾ ರಾಣಿಯಾನ ಎಸ್ತೇರಂಗ್‌ ಕೊಡ್‌ತತ್. ಮೊರ್ದೆಕೈ ರಾಜಂಡ ಮಿಂಞತ್‌ ಬಾತ್. ಅದ್‌ಲ್ಲತೆ ಎಸ್ತೇರ್, ಮೊರ್ದೆಕೈಕು ಅವಕು ಉಳ್ಳ ಸಮ್ಮಂದತ್‌ನ ರಾಜಂಗ್‌ ಅರಿಚಿಟ್ಟತ್.

²ರಾಜ ಹಾಮಾನಂಡ ಕೈಯಿಂಜ ಎಡ್‌ತ ತಾಂಡ ಮೊಯಿರತ್‌ನ ಮೊರ್ದೆಕೈಕ್‌ ಕೊಡ್‌ತತ್. ಎಸ್ತೇರ್‌ ಮೊರ್ದೆಕೈನ ಹಾಮಾನಂಡ ಅರಮನೇರ ಎಲ್ಲಾ ಆಸ್ತಿಕ್‌ ಅದಿಕಾರಿಯಾಯಿತ್‌ ನೇಮಿಚಿಟ್ಟತ್.

³ಪುನಃ ಎಸ್ತೇರ್‌ ರಾಜಂಡ ಕೂಡೆ ತಕ್ಕ್‌ ಪರಿಯುವಕಾಯಿತ್‌ ಅಂವೊಂಡ ಕಾಲ್‌ಕ್‌ ಅಡ್ಡಬುದ್ದಿತ್‌ ಮೊರ್‌ಟಂಡ್, ಅಗಾಗ್‌ ಕುಲಕ್‌ ಕೂಡ್‌ನ ಹಾಮಾನ ಯೆಹೂದ್ಯ ಜನಕ್‌ ಗೇನ ಮಾಡ್‌ನ ಕ್‍ೕಡ್‌ನ ಪಿಂಞ ಅಂವೊ ಯೆಹೂದ್ಯ ಜನತ್‌ನ ನಾಶ ಮಾಡವಕ್‌ ಗೇನ ಮಾಡ್‌ನಾನ ವಾಪಸ್ ಎಡ್‌ಕಂಡೂಂದ್‌ ಬೋಡಿಯಂಡತ್.

⁴ಅಕ್ಕ ರಾಜ ಎಸ್ತೇರಂಡ ಬರಿಕ್‌ ಪೊನ್ನ್‌ರ ಕೋಲ್‌ನ ಕಾಟ್‌ಚಿ. ಅವ ಎದ್ದಿತ್‌ ರಾಜಂಡ ಮಿಂಞತ್‌ ನಿಂದಿತ್,

⁵ರಾಜನ ನೋಟಿತ್: ಓ ರಾಜನೇ, ನಿಂಗಕ್‌ ಕುಶಿ ಉಂಡೇಂಗಿ, ನಾಕ್‍ ನಿಂಗಡ ದಯೆ ಕ್‌ಟ್ಟ್‌ಚೇಂಗಿ, ನಾನ್‌ ಎಣ್ಣ್‌ವ ತಕ್ಕ್‌ನ ನಿಂಗ ಸರೀಂದ್‌ ಕಂಡತೇಂಗಿ, ನನ್ನ ನಿಂಗ ಮೆಚ್ಚಿತೇಂಗಿ, ರಾಜಂಡ ಎಲ್ಲಾ ಪ್ರಾಂತ್ಯತ್‌ ಉಳ್ಳ ಯೆಹೂದ್ಯಂಗಳ ನಾಶ ಮಾಡಂಡೂಂದ್‌ ಅಗಾಗ್‌ ಕುಲಕ್‌ ಕೂಡ್‌ನ ಹಮ್ಮೆದಾತಂಡ ಮೋಂವೊನಾನ ಹಾಮಾನ ಕೆಟ್ಟ ಮನಸ್ಸ್‌ಲ್‌ ಒಳ್‌ದ್‌ಚಿಟ್ಟ ಆಜ್ಞೆನ ರದ್ದ್ ಮಾಡಂಡೂಂದ್‌ ಎಡ್‌ಕಂಡೂಂದ್‌ ಒಳ್‌ದಿತ್‌ ಅಯಿಕಂಡು.

⁶ನಾಡ ಜನಕ್‌ ಬಪ್ಪ ಕ್‍ೕಡ್‌ನ ನಾನ್‌ ಎನ್ನನೆ ನೋಟಿಯಂಡ್‌ ಇಪ್ಪಕಯ್ಯು? ನಾಡ ಜನ ನಾಶ ಆಪದ್‌ನ ನೋಟಿಯಂಡ್‌ ಎನ್ನನೆ ಸಹಿಸಿಯಂಡ್‌ ಇಪ್ಪಕಯ್ಯೂಂದ್‌ ಬೋಡಿಯಂಡತ್.

⁷ಅಕ್ಕ ರಾಜನಾನ ಅಹಷ್ವೇರೋಷ, ಎಸ್ತೇರ್‌ ರಾಣಿನ ಪಿಂಞ ಯೆಹೂದ್ಯನಾನ ಮೊರ್ದೆಕೈನ ನೋಟಿತ್: ಅದಾ, ಹಾಮಾನ ಯೆಹೂದ್ಯಂಗಕ್‌ ವಿರುದ್ದವಾಯಿತ್‌ ಕೈ ಮಾಡ್‌ನಂಗ್‌ ಅಂವೊನ ತೂಕ್‌ಮರಕ್‌ ಇಟ್ಟಿತ್, ಅಂವೊಂಡ ಅರಮನೇನರ ಆಸ್ತಿನ ಎಸ್ತೇರಂಗ್‌ ಕೊಡ್‌ತ.

⁸ಒರ್‌ ಕಾಗದತ್‌ನ ರಾಜಂಡ ಪೆದತ್‌ಲ್‌ ಒಳ್‌ದಿತ್‌ ರಾಜಂಡ ಮೋಯಿರತ್‌ಂಜ ಮುದ್ರೆ ಇಟ್ಟಪಿಂಞ ಅದ್‌ನ ದಾರೂ ವಾಪಸ್ ಎಡ್‌ಪಕಯ್ಯುಲೆ. ಆನಗುಂಡ್‌ ಇಕ್ಕ ನಿಂಗ ಯೆಹೂದ್ಯಂಗಡ ವಿಷಯತ್‌ ನಿಂಗಕ್‌ ಸೆರಿ ಕಾಂಬನೆಕೆ ಬೋರೆ ಒರ್‌ ಆಜ್ಞೆನ ರಾಜಂಡ ಪೆದತ್‌ ಒಳ್‌ದಿತ್‌ ಅದ್‌ಂಗ್‌ ರಾಜಂಡ ಮೋಯಿರತ್‌ಂಜ ಮುದ್ರೆ ಇಡೀಂದ್‌ ಎಣ್ಣ್‌ಚಿ.

⁹ಸೀವಾನ್‌ ತಿಂಗ ಎಣ್ಣುವ ಮೂಂದನೆ ತಿಂಗತ್‌ರ ಇಪ್ಪತ ಮೋಂದನೆ ದಿನವಸತ್‌ಲ್, ರಾಜಂಡ ಎಲ್ಲಾ ಒಳ್‌ತ್‌ಕಾರಂಗಳ ಕಾಕ್‌ಚಿಟ್ಟತ್. ಅಯಿಂಗ ಮೊರ್ದೆಕೈಯಂಡ ಆಜ್ಞೆರನೆಕೆ, ಯೆಹೂದ್ಯಂಗಕು, ಹಿಂದುಸ್ಥಾನ ದೇಶತ್‌ಂಜ ಕೂಷ್ ದೇಶಕತ್ತನೆ ಉಳ್ಳ ನೂಟ್ಯ ಇರ್ವತೇಳ್‌ ಪ್ರಾಂತ್ಯತ್‌ರ ಉಪರಾಜಂಗಕು, ದೇಶಾದಿಪತಿಯಕು ಪಿಂಞ ಅದಿಕಾರಿಯಂಗಕು ಕಾಗದತ್‌ನ ಒಳ್‌ದ್‌ಚಿಟ್ಟತ್. ಆ ಕಾಗದ ಓರೋರ್‌ ಪ್ರಾಂತ್ಯತ್‌ರ ಒಳ್‌ತ್‌ಲ್ ಪಿಂಞ ಓರೋರ್‌ ಜನಾಂಗತ್‌ರ ತಕ್ಕ್‌ಲ್‌ ಒಳ್‌ದಿತ್‌ಂಜತ್. ಯೆಹೂದ್ಯಂಗಕ್‌ ಸಹ ಅಯಿಂಗಡ ಒಳ್‌ತ್‌ಲ್ ಪಿಂಞ ತಕ್ಕ್‌ಲ್‌ ಕಾಗದ ಒಳ್‌ದ್‌ಚಿಟ್ಟತ್.

¹⁰ಮೊರ್ದೆಕೈ ರಾಜನಾನ ಅಹಷ್ವೇರೋಷಂಡ ಪೆದತ್‌ಲ್‌ ಒಳ್‌ದ್‌ನ ಆಜ್ಞೆನ ರಾಜಂಡ ಮೋಯಿರತ್‌ಂಜ ಮುದ್ರೆ ಇಟ್ಟತ್. ಅಲ್ಲಿಂಜ ಅಂವೊ ಅರಮನೆಲ್‌ ಚಾಕ್‌ನ ಸವಾರಿ ಕುದ್ರೇರ ಮೇಲೆ ಪತ್ತಿಯಂಡ್‌ ಸುದ್ದಿನ ಬೆರಿಯ ಕೊಂಡ ಪೋಪ ಸೇವಕಂಗಡ ಕೈಲ್‌ ಕೊಡ್‌ತಿತ್‌ ಅಯಿಚತ್.

¹¹ಆ ಕಾಗದತ್‌ಲ್, ಅಹಷ್ವೇರೋಷ ರಾಜ ತಾಂಡ ಎಲ್ಲಾ ಪ್ರಾಂತ್ಯತ್‌ಲ್‌ ಆದಾರ್‌ ತಿಂಗವಾನ ಪನ್ನರಂಡನೆ ತಿಂಗತ್‌ ಪದಿಮೂಂದನೆ ದಿವಸವಾನ ಒರೇ ದಿವಸತ್,

¹²ಓರೋರ್‌ ಪಟ್ಟಣತ್‌ಲ್‌ ಉಳ್ಳ ಯೆಹೂದ್ಯಂಗ ಒಕ್ಕಚೆ ಕೂಡಿತ್, ಅಯಿಂಗಡ ಜೀವತ್‌ನ ಉಳ್‌ಚಿಡುವಕಾಯಿತು, ಅಯಿಂಗಕ್‌ ವಿರುದ್ದವಾಯಿತ್‌ ಆಯುದ ಪುಡ್‌ಚಂಡ್‌ ಕೂಡಿತ್‌ ಬಪ್ಪ ಎಲ್ಲಾ ಜನಾಂಗತ್‌ರ ಜನಳ, ಪ್ರಾಂತ್ಯತ್‌ರ ಜನಳ, ಅಯಿಂಗಡ ಪೊಣ್ಣ್‌ ಮಕ್ಕಳ ನಾಶ ಮಾಡಿತ್, ಕೊಂದಿತ್‌ ಪಾಳ್‌ ಮಾಡಿತ್‌ ಅಯಿಂಗಡ ಆಸ್ತಿಪಾಸ್ತಿನೆಲ್ಲಾ ಸೂರೆ ಮಾಡ್‌ವಕು, ರಾಜ ಯೆಹೂದ್ಯಂಗಕ್‌ ಆಜ್ಞೆ ಮಾಡ್‌ಚೀಂದ್‌ ಒಳ್‌ದಿತ್‌ಂಜತ್.

¹³ಈ ಕಾಗದತ್‌ರ ಓರೋರ್‌ ಪ್ರತಿನ ಪ್ರತಿಯೋರ್‌ ಪ್ರಾಂತ್ಯತ್‌ಲ್‌ ರಾಜಾಜ್ಞೆ ಎಣ್ಣಿಯಂಡ್‌ ಎಲ್ಲಾ ಜನಕ್‌ ಪ್ರಕಟಿಚಿಡಂಡೂಂದು, ಆ ದಿವಸತ್‌ ಯೆಹೂದ್ಯಂಗ, ಅಯಿಂಗಡ ವಿರೋದಿಯಳ ಮುಯ್ಯ ತ್‍ೕಪಕ್‌ ತಯಾರಾಂಡೂಂದು ಅಪ್ಪಣೆ ಕೊಡ್‌ತಿತ್‌ಂಜತ್.

¹⁴ಅನ್ನನೆ ರಾಜಂಡ ತೀರ್ಮಾನತ್‌ರನೆಕೆ ಆ ಕುದುರೆ ಸೇವಕಂಗ ಕುದುರೆರ ಮೇಲೆ ಪತ್ತಿಯಂಡ್‌ ಕಾಗದತ್‌ನ ಎಡತಂಡ್‌ ಬೆರಿಯ ಪೊರ್‌ಟ್ ಪೋಚಿ. ಆ ಆಜ್ಞೆನ ಶೂಷನ್‌ ಪಟ್ಟತ್‌ಲ್‌ ಸಹ ಪ್ರಕಟ ಮಾಡ್‌ಚಿ.

¹⁵ಅಲ್ಲಿಂಜ ಮೊರ್ದೆಕೈ ನೀಲಿ ಪಿಂಞ ಚೋಂದ ರಾಜ ಉಡ್‌ಪ್‌ನ ಇಟ್ಟಂಡ್, ಬಲ್ಯ ಪೊನ್ನ್‌ರ ಕಿರೀಟತ್‌ನ ಇಟ್ಟಂಡ್, ರೇಶ್ಮೆಯು, ನೈಸಾನ ನೂಲ್‌ಲ್‌ ಮಾಡ್‌ನ ನೀಲಿ ಅಂಗಿನ ಪೊತ್ತಂಡ್‌ ರಾಜಂಡ ಸನ್ನಿದಿಯಿಂಜ ಪೊರ್‌ಟ್ ಪೋಚಿ. ಶೂಷನ್‌ ಪಟ್ಟಣ ಕುಶೀಲ್‌ ಕಳಿಚತ್.

¹⁶ಇನ್ನನೆ ಯೆಹೂದ್ಯಂಗಕ್‌ ನೆಮ್ಮದಿಯು, ಕುಶಿಯು, ಸಂತೋಷವು ಮರ್ಯಾದೆಯು ಕ್‌ಟ್ಟ್‌ಚಿ.

¹⁷ರಾಜಂಡ ತೀರ್ಮಾನ ಪ್ರಕಟ ಆನ ಪ್ರತಿಯೊರ್‌ ಪ್ರಾಂತ್ಯತ್‌ಲ್, ಪಟ್ಟಣತ್‌ಲ್‌ ಇಂಜ ಯೆಹೂದ್ಯಂಗಕ್‌ ಕುಶಿಯು, ಸಂತೋಷವು ಇಂಜತ್. ಅಯಿಂಗ ಕುಶೀಲ್‌ ಪಿಂಞ ಕೊಂಡಾಟತ್‌ಲ್‌ ನಲ್ಲ ಗದ್ದಾಳ ಮಾಡಿತ್‌ ಉಂಡತ್. ದೇಶತ್‌ರ ಸುಮಾರ್‌ ಜನ ಯೆಹೂದ್ಯಂಗಕ್‌ ಪೋಡಿಚಿಟ್ಟಂಡ್‌ ಯೆಹೂದ್ಯ ಮಾರ್‌ಗಕ್‌ ಕೂಡ್‌ಚಿ.