Read Kodava ಜ್ಞಾನತ್‌ರ ಪಡಿಮ 1 Bible Online

ಜ್ಞಾನತ್‌ರ ಪಡಿಮ 1 - Kodava bible

ಜ್ಞಾನತ್‌ರ ಪಡಿಮ 1

¹ದಾವೀದಂಡ ಮೋಂವೊನಾನ ಇಸ್ರಾಯೇಲ್‌ ದೇಶತ್‌ರ ರಾಜನಾಯಿತಿಂಜ ಸೊಲೊಮೋನಂಡ ಜ್ಞಾನತ್‌ರ ಪಡಿಮ.

²ಈ ಜ್ಞಾನತ್‌ರ ಪಡಿಮರ ಮೂಲಕ ಜ್ಞಾನತ್‌ನ, ಬೋದನೆನ ಅರ್‌ಂಜಂಡ್, ಬುದ್ದಿನ ಅರ್ಥ ಮಾಡುವಕ್‌ ಆಪ.

³ಅದ್‌ಲ್ಲತೆ, ವಿವೇಕ, ನೀತಿ, ನ್ಯಾಯ ಪಿಂಞ ನಿದಾನತ್‌ನ ಪಡೆಯುವಕ್‌ ಕಯ್ಯು.

⁴ಈ ಜ್ಞಾನತ್‌ರ ಪಡಿಮ ಸಾದು ಮನುಷ್ಯಂಗಕ್‌ ಬುದ್ದಿನ, ಬಾಲೆಕಾರಂಗಕ್‌ ಅರಿವ್‌ನ ಪಿಂಞ ವಿವೇಕತ್‌ನ ತಪ್ಪ.

⁵ಬುದ್ದಿವಂತಂವೊ ಈ ಜ್ಞಾನತ್‌ರ ಪಡಿಮನ ಕ್‍ೕಟಿತ್‌ ಇಂಞು ಬುದ್ದಿವಂತಂವೊನಾಪ. ವಿವೇಕ ಉಳ್ಳಂವೊಂಗ್‌ ಇಂಞು ಆಲೋಚನೆ ಕ್‌ಟ್ಟ್‌ವ.

⁶ಇದೆಲ್ಲಾ ಜ್ಞಾನತ್‌ರ ಪಡಿಮೆನ, ಆಂಡ ಅರ್ಥತ್‌ನ, ಜ್ಞಾನಿಯಡ ವಾಕ್ಯತ್‌ನ ಪಿಂಞ ಅಯಿಂಗ ಎಣ್ಣ್‌ನ ಒಡ್‌ಪ ಗಾದೆನೆಲ್ಲಾ ಅರ್ಥ ಮಾಡಿಯೊಕ್‌ ಸಹಾಯ ಮಾಡುವ. ಆ

⁷ಯೆಹೋವಂಗ್‌ ಬೊತ್ತಿತ್‌ ನಡ್‌ಪದೇ ಜ್ಞಾನತ್‌ರ ತೊಡಕ; ಆಚೇಂಗಿ ಮೂಡಂಗ ಜ್ಞಾನತ್‌ನ ಪಿಂಞ ಬೋದನೇನ ಕಡೆಗಟ್ಟ್‌ವ.

⁸ನಾಡ ಮೋನೇ, ನೀಡ ಅಪ್ಪಂಡ ಬುದ್ದಿ ತಕ್ಕ್‌ನ ಕ್‍ೕಳ್. ನೀಡ ಅವ್ವಂಡ ಬೋದನೆನ ಕೈ ಬುಡತೆ.

⁹ಅದ್‌ ನೀಡ ಮಂಡೆಕ್‌ ಅಲಂಗಾರವಾನ ಕಿರೀಟವಾಯಿತು, ಬೋಳೆಕ್‌ ಪದಕನೆಕೆಯ ಇಪ್ಪ.

¹⁰ನಾಡ ಮೋನೇ, ಪಾಪಿಯ ನೀಕ್‌ ಸನ್ನ ಕಾಟ್‌ಚೇಂಗಿಯು ಅದಂಗ್‌ ನೀನ್‌ ಒತ್ತೊತೆ.

¹¹ಅಯಿಂಗ: ನಂಗಡ ಕೂಡೆ ಬಾ, ಕೊಲ್ಲುವಕಾಯಿತ್‌ ನಂಗ ಒಳ್‌ಚಿತ್, ಸಾದು ಮನುಷ್ಯಳ ಪುಡಿಪಕ್‌ ಕಾರಣಯಿಲ್ಲತೆ ಇಂಜತೇಂಗಿಯು ಪಾರಕಾತ್ತಂಡ್‌ ಇಂಜಿತ್‌ ಪುಡಿಕನ.

¹²ಪಾತಾಳ ತಾಂಡ ಒಳ್‌ಕ್‌ ಇಳಿಯುವಯಿಂಗಳ ಮುಗ್ಗ್‌ವನೆಕೆ, ನಂಗ ಇಯಿಂಗಳ ಜೀವಂತವಾಯಿತ್‌ ಮುಗ್ಗನ. ಕುಂಡ್‌ಕ್‌ ಇಳಿಯುವಯಿಂಗಳ ಮುಗ್ಗ್‌ವನೆಕೆ ಪೂರ್ತಿಯಾಯಿತ್‌ ಮುಗ್ಗನ.

¹³ಬೆಲೆಯುಳ್ಳ ಎಲ್ಲಾ ತರ ವಸ್ತುನ ಕಂಡ್‌ಪುಡಿಕನ, ಲೂಟಿ ಮಾಡಿತ್‌[1] ಕ್‌ಟ್ಟ್‌ವ ಐಶ್ವರ್ಯತ್‌ಂಜ ನಂಗಡ ಮನೆನ ದುಂಬ್‌ಚಿಟ್ಟೊನ.

¹⁴ನೀನ್‌ ನಂಗಡ ಕೂಡೆ ಪಾಲ್ದಾರನಾಯಿತ್‌ರ್, ನಂಗ ಎಲ್ಲಾರ್‌ಕು ಒರೇ ಪಣಚೀಲ ಇಪ್ಪಾಂದ್‌ ಅಯಿಂಗ ಎಣ್ಣ್‌ಚೇಂಗಿ,

¹⁵ನಾಡ ಮೋನೇ, ಅಯಿಂಗಡ ಬಟ್ಟೆಲ್‌ ಪೋಕತೆ. ಅಯಿಂಗ ಪೋಪ ಬಟ್ಟೆಯಿಂಜ ನೀಡ ಕಾಲ್‌ನ ದೂರ ಬೆಚ್ಚ.

¹⁶ಅಯಿಂಗಡ ಕಾಲ್‌ ಕ್‍ೕಡ್‌ ಮಾಡ್‌ವಕ್‌ ಅವಸರತ್‌ಲ್‌ ಇಪ್ಪ. ಅಯಿಂಗ ಜನಡ ಚೋರೆನ ಚೆಲ್ಲ್‌ವಕ್‌ ಅವಸರ ಪಡುವ.

¹⁷ಏದ್‌ ತರತ್‌ರ ಪಕ್ಷಿಯಾಚೇಂಗಿಯು ಸೆರಿ ಅದ್‌ಂಡ ಕಣ್ಣ್‌ ಮಿಂಞಲೇ ಬಲೆನೆ ಬೀಜ್‌ತೇಂಗಿ ಅದ್‌ಂಡಗುಂಡ್‌ ಒರ್‌ ಪ್ರಯೋಜನವು ಇಲ್ಲೆ, (ಅದ್‌ಂಜ ದೂರ ಇಪ್ಪಕ್‌ ಅಯಿಂಗಕ್‌ ಗೊತ್ತುಂಡ್).

¹⁸ಆಚೇಂಗಿ ಇಯಿಂಗ ಅನ್ನನೆ ಇಲ್ಲೆ! ಅಯಿಂಗಡೆ ಚೋರೆನೆ ಚೆಲ್ಲುವಕಾಯಿತೇ ಒಳ್‌ಚಿತ್‌ ಪಾರಕಾತಂಡುಂಡ್, ಅಯಿಂಗಡ ಜೀವಕ್‌ ಅಯಿಂಗಳೇ ಕೆಣಿ ಇಟ್ಟೋಂಡುಂಡ್.

¹⁹ಐಷ್ವರ್ಯತ್‌ರ ಮೇಲೆ ಬೋಂಡತ ಆಸೆ ಬೆಚ್ಚಿತುಳ್ಳಯಿಂಗಡ ಗತಿ ಇನ್ನನೆ ಇಪ್ಪ; ಅಯಿಂಗಡ ಜೀವತ್‌ನ ಅದೇ ಎಡ್‌ತ್‌ರ್‌ವ.

²⁰ಜ್ಞಾನ, ಬೀದೀಲ್‌ ನಿಂದಂಡ್‌ ಕಾಕಿಯಂಡುಂಡ್, ಚತ್ತೇಲ್‌ ಜೋರಾಯಿತ್‌ ಕೂತ್‌ ಕೊಡ್‌ತಂಡುಂಡ್.

²¹ಅದ್‌ ಜನ ದುಂಬಿತುಳ್ಳ ರಸ್ತೆಲ್‌ ಪಿಂಞ ಪಟ್ಟಣತ್‌ರ ಮುಕ್ಯಪಟ್ಟ ಕಂಡಿಲ್‌ ನಿಂದಂಡ್‌ ಕೂತ್ತ್‌ ಕೊಡ್‌ತಿತ್‌ ತಾಂಡ ತಕ್ಕ್‌ನ ವಿವರಿಚಿಟ್ಟಂಡುಂಡ್.

²²ಸಾದು ಜನಳೇ, ಇಂಞು ಎಚ್ಚಕ್‌ ಕಾಲ ನಿಂಗ ಮೂಡತನತ್‌ಲ್‌ ಕುಶಿಪಡುವಿರಾ? ಪರಿಹಾಸ ಮಾಡ್‌ವಯಿಂಗಳೇ, ಇಂಞು ಎಚ್ಚಕ್‌ ಕಾಲ ನಿಂಗ ಪರಿಹಾಸ ಮಾಡ್‌ವದ್‌ಲ್‌ ಕುಶಿಪಡುವಿರಾ? ಮೂಡಂಗಳೇ, ಇಂಞು ಎಚ್ಚಕ್‌ ಕಾಲ ನಿಂಗ ಅರಿವ್‌ನ ದ್ವೇಷ ಮಾಡುವಿರ?

²³ನಾಡ ಎಚ್ಚರ ತಕ್ಕ್‌ಕ್‌ ಕೆಮಿ ಕೊಡಿ; ಇದಾ, ನಾಡ ಆತ್ಮತ್‌ನ[2] ನಾನ್‌ ನಿಂಗಡ ಮೇಲೆ ಬೂಕಿತ್, ನಾಡ ತಕ್ಕ್‌ ನಿಂಗಕ್‌ ಗೊತ್ತಾಪನೆಕೆ ಮಾಡುವಿ.

²⁴ನಾನ್‌ ನಿಂಗಳ ಕಾಕ್‌ಚೇಂಗಿಯು ನಿಂಗ ನನ್ನ ತ್‌ಕ್ಕಾರ ಮಾಡುವಿರ; ನಾನ್‌ ನಾಡ ಕೈಯಿನ ನಿಂಗಡ ಪಕ್ಕ ನ್‍ೕಟ್‌ಚೇಂಗಿಯು, ಅದ್‌ಂಗ್‌ ಎಚ್ಚರ ಎಡ್‌ಪಂವೊ ಒಬ್ಬನು ಇಲ್ಲೆ.

²⁵ನಾಡ ಆಲೋಚನೆನೆಲ್ಲಾ ಎಡ್‌ಕತೆ, ನಾಡ ಚೂಕ್‌ ತಕ್ಕ್‌ನ ತ್‌ಕ್ಕಾರ ಮಾಡಿರ.

²⁶ಆಂಗಾಯಿತ್, ನಾನ್‌ ಸಹ ನಿಂಗಡ ಅಪಾಯತ್‌ರ ನೇರತ್‌ಲ್‌ ನಿಂಗಳ ನೋಟಿತ್‌ ತೆಳಿಪಿ, ನಿಂಗಕ್‌ ಕ್‍ೕಡ್‌ ಬಪ್ಪಕ ನಿಂಗಳ ಪರಿಹಾಸ ಮಾಡುವಿ.

²⁷ಬಲ್ಯ ಕ್‍ೕಡ್‌ ನಿಂಗಕ್‌ ಬಿರುಗಾಳಿರನೆಕೆ ಬಪ್ಪಕ, ಅಪಾಯ ಸುಳಿಗಾಳಿರನೆಕೆ ನಿಂಗಳ ಬಡಿಪಕ, ಕಷ್ಟ ಪಿಂಞ ದುಃಖ ನಿಂಗಡ ಮೇಲೆ ಬಲ್ಯ ಬಾರವಾಯಿತಿಪ್ಪಕ, ನಾನ್‌ ಪರಿಹಾಸ ಮಾಡುವಿ.

²⁸ಇದೆಲ್ಲಾ ಆಪಕ, ಅಯಿಂಗ ನನ್ನ ಕಾಕುವ; ಆಚೇಂಗಿ ನಾನ್‌ ಅಯಿಂಗಕ್‌ ಜವಾಬ್ ಕೊಡ್‌ಪುಲೆ; ಅಯಿಂಗ ನನ್ನ ಎಚ್ಚರತ್‌ಲ್‌ ತ್‍ೕಡುವ, ಆಚೇಂಗಿ ಅಯಿಂಗ ನನ್ನ ಕನ್ಡ್ ಪುಡಿಪ್‌ಲೆ.

²⁹ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ಅರಿವ್‌ನ ದ್ವೇಷ ಮಾಡಿತ್, ಯೆಹೋವಂಡಲ್ಲಿ ಪೋಡಿಲ್‌ ಇಪ್ಪಕ್‌ ಆರಿಚಿಟ್ಟಂಡಿತ್‌ಲ್ಲೆ.

³⁰ನಾಡ ಆಲೋಚನೇಲ್‌ ಅಯಿಂಗ ಕುಶಿಪಟ್ಟಿತ್‌ಲ್ಲೆ; ನಾಡ ಚೂಕ್‌ ತಕ್ಕ್‌ನ ಅಯಿಂಗ ತ್‌ಕ್ಕಾರ ಮಾಡಿರ್‌ತ್.

³¹ಆನಗುಂಡ್, ಅಯಿಂಗ ಅಯಿಂಗಡ ನಡತೆರ ಫಲತ್‌ನ ಅನುಬವಿಚಿಡುವ; ಅಯಿಂಗಡ ಯೋಚನೇಲ್‌ ತೃಪ್ತಿಯಾಪ.

³²ಪಾಪ ಜನತ್‌ನ (ಸಾದು ಜನತ್‌ನ) ಅಯಿಂಗಡ ಮೂಡತನವೇ ಕೊಂದ್‌ರ್‌ವ, ಮೂಡಂಗ ಅಯಿಂಗಡ ಎಚ್ಚರಯಿಲ್ಲತ ನಡತೆಯಿಂಜ ನಾಶ ಆಯಿಪೋಪ.

³³ಆಚೇಂಗಿ ನಾಡ ತಕ್ಕ್‌ಕ್‌ ಕೆಮಿ ಕೊಡ್‌ಪಂವೊ ಪೋಡಿ ಇಲ್ಲತೆ, ಕ್‍ೕಡ್‌ಕ್‌ ಬೊತ್ತತೆ, ಸಮಾದಾನತ್‌ಲ್‌ ಬದ್‌ಕ್‌ವ.