Read Kodava ಜ್ಞಾನತ್‌ರ ಪಡಿಮ 10 Bible Online

ಜ್ಞಾನತ್‌ರ ಪಡಿಮ 10 - Kodava bible

ಜ್ಞಾನತ್‌ರ ಪಡಿಮ 10

¹ಜ್ಞಾನವುಳ್ಳ ಮೋಂವೊ ಅಪ್ಪನ ಕುಶಿಪಡ್‌ತುವ; ಆಚೇಂಗಿ ಮೂಡತನ ಉಳ್ಳಂವೊ ಅವ್ವನ ದುಃಖ ಪಡ್‌ತ್‌ವ.

²ಅನ್ಯಾಯತ್‌ರ ಬಟ್ಟೆಲ್‌ ಪಡ್‌ಂದ ಐಶ್ವರ್ಯ ಒಂದಂಗು ಪ್ರಯೋಜನ ಆಪುಲೆ. ಆಚೇಂಗಿ ನೀತಿರ ಬದ್‌ಕ್‌ ಚಾವ್ಯಿಂಜ ನಿನ್ನ ಕಾಪಾಡುವ.

³ಯೆಹೋವ ನೀತಿವಂತಂವೊನ ಪಟ್ಟಣಿ ಇಪ್ಪಕ್‌ ಬುಡುಲೆ. ಆಚೇಂಗಿ ದುಷ್ಟ ಜನಕ್‌ ಬೋಂಡಿಯಾನದ್‌ನ ತಪ್ಪುಲೆ.

⁴ಸೋಮಾರಿತನತ್‌ಲ್‌ ಕೆಲಸ ಮಾಡವಂವೊ ಬಡವನಾಪ. ಆಚೇಂಗಿ ಕಷ್ಟಪಟ್ಟಿತ್‌ ಕೆಲಸ ಮಾಡ್‌ವಂವೊ ಐಶ್ವರ್ಯವಂತನಾಪ.

⁵ಕೊಯಿಪಣಿ ಕಾಲತ್‌ ಬೊಳೆನ ಕೂಟಿ ಬೆಪ್ಪಂವೊ ಬುದ್ದಿ ಉಳ್ಳ್ ಮೋಂವೊ. ಆಚೇಂಗಿ ಕೊಯಿಪಣಿರ ಕಾಲತ್‌ ವರಿಯಂಡಿಪ್ಪಂವೊ ಅವಮಾನತ್‌ನ ಕೊಂಡ ಬಪ್ಪ ಮೋಂವೊನಾಯಿತ್‌ಪ್ಪ.

⁶ನೀತಿವಂತಂವೊಂಡ ಮಂಡೆರ ಮೇಲೆ ಆಶೀರ್ವಾದ ಇಪ್ಪ, ಆಚೇಂಗಿ ಹಿಂಸೆ, ದುಷ್ಟಂಡ ಬಾಯಿನ ಅಡಕ್‌ವ.

⁷ನೀತಿವಂತಂವೊಂಡ ಪೆದ ಕ್‍ೕಳಿ ಪೋಯಿತ್‌ ದುಂಬ ಕಾಲಕ್‌ ಇಪ್ಪ. ಆಚೇಂಗಿ ದುಷ್ಟಂಡ ಪೆದತ್‌ನ ಬೆರಿಯ ಮರ್‌ಂದರ್ವ.

⁸ಹೃದಯತ್‌ಲ್‌ ಜ್ಞಾನ ಉಳ್ಳಂವೊ, ಆಜ್ಞೆನ ಸ್ವೀಕಾರ ಮಾಡಿಯೊವ, ಆಚೇಂಗಿ ಹರಟೆ ತಕ್ಕ್‌ ಪರಿಯುವ ಮೂಡಂಗ ಅಂವೊನ ನಾಶ ಮಾಡಿಯೊವ.

⁹ಸತ್ಯತ್‌ಲ್‌ ನಡ್‌ಪಂವೊ ಪೋಡಿಯಿಲ್ಲತೆ ನಡ್‌ಪ. ಆಚೇಂಗಿ ಕಪಟಿಯಂಗಡ ಬಟ್ಟೆಲ್‌ ನಡ್‌ಪಂವೊ ಚಿಕ್ಕಿಪೋಪ.

¹⁰ಸತ್ಯನ ಒಳ್‌ಪ್‌ಚಿಡುವಂವೊ ತೊಂದರೆನ ಉಂಟ್ ಮಾಡುವ. ದೈರ್ಯತ್‌ಲ್‌ ಚೂಕ್‌ಚಿಡ್‌ವೊಂವೊ ಸಮಾದಾನತ್‌ನ ಕೊಂಡ ಬಪ್ಪ.[7]

¹¹ನೀತಿವಂತಂವೊಂಡ ಬಾಯಿ ಜೀವತ್‌ರ ಬುಗ್ಗೆ ಆಯಿತಿಪ್ಪ. ಆಚೇಂಗಿ ಹಿಂಸೆ, ದುಷ್ಟಂಡ ಬಾಯಿನ ಅಡಕ್‌ವ.

¹²ದ್ವೇಷ ವಿರೋದತ್‌ನ ಉಂಟ್‌ಮಾಡುವ. ಆಚೇಂಗಿ ಪ್ರೀತಿ ಎಲ್ಲಾ ಪಾಪತ್‌ನ ಮನ್ನಿಚಿಡುವ.

¹³ವಿವೇಕ ಉಳ್ಳಂವೊಂಡ ಬಾಯಿಯಿಂಜ ಬಪ್ಪ ತಕ್ಕ್‌ ಜ್ಞಾನ ಉಳ್ಳದಾಯಿತ್‌ಪ್ಪ. ಆಚೇಂಗಿ ಬುದ್ದಿ ಇಲ್ಲತಂವೊಂಡ ಬೆನ್ನ್‌ಕ್ ಪೊಯ್ಯಿತ್‌ ಕ್‌ಟ್ಟುವದೇ ಸೆರಿ.

¹⁴ಜ್ಞಾನಿಯ ಅರಿವುನ ಕೂಟಿ ಬೆಚ್ಚೊವ. ಆಚೇಂಗಿ ಮೂಡಂಡ ತಕ್ಕ್‌ ಅಂವೊಂಗ್‌ ನಾಶತ್‌ನ ಕೊಂಡ್‌ ಬಪ್ಪ.

¹⁵ಪಣಕಾರಂಡ ಐಶ್ವರ್ಯ ಅಂವೊಂಗ್‌ ಬಲವಾನ ಕೋಟೆ. ಆಚೇಂಗಿ ಗರೀಬಂಡ ಬಡತನ ಅಂವೊನ ನಾಶ ಮಾಡುವ.

¹⁶ನೀತಿವಂತಂವೊಂಡ ನಯಿಪ್ ಜೀವತ್‌ನೂ, ದುಷ್ಟಂಡ ಆದಾಯ ಪಾಪತ್‌ನೂ ಉಂಟ್ ಮಾಡ್‌ವ.

¹⁷ಬುದ್ದಿ ತಕ್ಕ್‌ನ ಸ್ವೀಕಾರ ಮಾಡ್‌ವಯಿಂಗ ಜೀವತ್‌ರ ಬಟ್ಟೆಲ್‌ ಪೋಪ. ಆಚೇಂಗಿ ಎಚ್ಚರ ತಕ್ಕ್‌ನ ತ್‌ಕ್ಕಾರ ಮಾಡ್‌ವಂವೊ ಬಟ್ಟೆ ತಪ್ಪಿ ಪೋಪ.

¹⁸ದ್ವೇಷತ್‌ನ ಒಳ್‌ಪ್‌ಚಿಡ್‌ವಂವೊ ಪೊಟ್ಟ್‌ಮಾರಿ. ಕುತ್ತ ಪರಂದಂಡ್‌ ನಡಪ್ಪಂವೊ ಮೂಡ.

¹⁹ದುಂಬ ತಕ್ಕ್‌ ಪರಿಯುವಂವೊ ಪಾಪಕ್‌ ಚಿಕ್ಕಿಪೋಪ. ಆಚೇಂಗಿ ತಾಂಡ ಬಾಯಿನ ಅಡಕ್‌ವಂವೊ ಬುದ್ದಿವಂತಂವೊ.

²⁰ನೀತಿವಂತಂವೊಂಡ ತಕ್ಕ್‌ ಶುದ್ದ ಬೊಳ್ಳಿರನೆಕೆ ಇಪ್ಪ. ಆಚೇಂಗಿ ದುಷ್ಟಂಡ ಆಲೋಚನೆಕ್‌ ಚೆನ್ನಂಗು ಬೆಲೆ ಇಪ್ಪುಲೆ.

²¹ನೀತಿವಂತಂವೊಂಡ ತಕ್ಕ್‌ ದುಂಬ ಜನತ್‌ನ ಉಂಬ್‌ಚಿಡುವ. ಆಚೇಂಗಿ ಮೂಡಂಗ, ದಡ್ಡತನತ್‌ಂಜ ನಾಶ ಆಯಿ ಪೋಪ.

²²ಯೆಹೋವಂಡ ಆಶೀರ್ವಾದ ಐಶ್ವರ್ಯತ್‌ನ ತಪ್ಪ. ಅದ್‌ಂಡ ಕೂಡೆ ಅಂವೊ ನೊಂಬಲತ್‌ನ ಕೂಟುಲೆ[8].

²³ಕ್‍ೕಡ್‌ ಮಾಡ್‌ವದ್‌ ಮೂಡಂಗ್‌ ಕುಶಿ ತಪ್ಪ. ಆಚೇಂಗಿ ಜ್ಞಾನ ಬುದ್ದಿವಂತಂವೊಂಗ್‌ ಸುಕತ್‌ನ ತಪ್ಪ.

²⁴ದುಷ್ಟ ಪೋಡಿಚಿಡುವ ಕಾರ್ಯ ಅಂವೊಂಗ್‌ ಆಪ. ಆಚೇಂಗಿ ನೀತಿವಂತಂವೊ ಇಷ್ಟಪಡುವ ಕಾರ್ಯ ಅಂವೊಂಗ್‌ ನೆರವೇರುವ.

²⁵ಬಿರ್‌ಗಾಳಿ ಬಪ್ಪಕ, ದುಷ್ಟೆ ನಾಶ ಆಯಿಪೋಪ, ಆಚೇಂಗಿ ನೀತಿವಂತ ದೃಡವಾನ ಅಡಿಪಾಯ ಆಯಿತ್‌ ಇಪ್ಪ.

²⁶ಪಲ್ಲ್‌ಕ್‌ ಪುಳಿನೀರು, ಕಣ್ಣ್‌ಕ್ ಪೊಗೆಯು ಎನ್ನೆನೆ ಇಪ್ಪೊ ಅನ್ನನೆ ಸೋಮಾರಿಯು ಅಂವೊಂಗ್‌ ಪಣಿ ಕೊಡ್‌ತಂವೊಂಗ್‌ ಇಪ್ಪ.

²⁷ಯೆಹೋವಂಗ್‌ ಬೊತ್ತಿತ್‌ ನಡ್‌ಪಯಿಂಗ ದುಂಬ ಕಾಲ ಬದ್‌ಕುವ. ಆಚೇಂಗಿ ದುಷ್ಟಂಗಡ ಬದ್‌ಕ್‌ರ ಕಾಲ ಕಮ್ಮಿ ಆಪ.

²⁸ನೀತಿವಂತಂಯಿಂಗಡ ನಿರೀಕ್ಷೆ ಕುಶಿ ತಪ್ಪ. ದುಷ್ಟಂಗಡ ನಿರೀಕ್ಷೆ ನಾಶ ಆಯಿ ಪೋಪ.

²⁹ಯೆಹೋವಂಡ ಬಟ್ಟೆ ಸತ್ಯತ್‌ ನಡ್‌ಪಯಿಂಗಕ್‌ ಕೋಟೆ. ಆಚೇಂಗಿ ಕ್‍ೕಡ್‌ ಮಾಡುವಯಿಂಗಕ್‌ ನಾಶ.

³⁰ನೀತಿವಂತಂವೊನ ಅನ್‌ಕ್‌ವಕ್‌ ಕೈಯುಲೆ. ದುಷ್ಟೆ ಬೂಮಿಲ್‌ ನೆಲೆನಿಪ್ಪುಲೆ.

³¹ನೀತಿವಂತಂವೊ ಜ್ಞಾನತ್‌ರ ತಕ್ಕ್‌ನ ಪರಿಯುವ. ಕಪಟಿಯಂಡ ನಾವ್‌ನ ಕೆತ್ತಿರ್ವ.

³²ನೀತಿವಂತಂಯಿಂಗ ನಲ್ಲದ್‌ನೆ ತಕ್ಕ್‌ ಪರಿಯುವ. ಆಚೇಂಗಿ ದುಷ್ಟಂಗಡ ತಕ್ಕ್‌ ಕಪಟವಾನದ್.