Read Kodava ಜ್ಞಾನತ್‌ರ ಪಡಿಮ 11 Bible Online

ಜ್ಞಾನತ್‌ರ ಪಡಿಮ 11 - Kodava bible

ಜ್ಞಾನತ್‌ರ ಪಡಿಮ 11

¹ಮೋಸತ್‌ರ ತಕ್ಕಡಿ ಯೆಹೋವಂಗ್‌ ಅಸಹ್ಯ. ಆಚೇಂಗಿ ನ್ಯಾಯವಾನ ತೂಕ ಅಂವೊಂಗ್‌ ಕುಶಿ.

²ಆಂಗಾರ ಬಪ್ಪಕ ಅವಮಾನ ಬಪ್ಪ. ಆಚೇಂಗಿ ಅಡಕತ್‌ಲ್‌ ಗೇನ ಮಾಡ್‌ವಯಿಂಗಡ ಪಕ್ಕ ಜ್ಞಾನ ಇಪ್ಪ.

³ನೀತಿವಂತಯಿಂಗಡ ಸತ್ಯತ್‌ರ ಗುಣ ಅಯಿಂಗಳ ನಡ್‌ತ್‌ವ. ಆಚೇಂಗಿ ದ್ರೋಹಿಯಡ ಕಪಟತನ ಅಯಿಂಗಳ ನಾಶ ಮಾಡಿರ್ವ.

⁴ದೇವಡ ಚೆಡಿ ಬಪ್ಪಕ ನೀಡ ಐಶ್ವರ್ಯ ಒಂದಂಗು ಪ್ರಯೋಜನ ಆಪುಲೆ, ಆಚೇಂಗಿ ನೀತಿರ ಬದ್‌ಕ್‌ ಚಾವ್ಯಿಂಜ ಕಾಪಾಡುವ.

⁵ಸತ್ಯತ್‌ಲ್‌ ನಡ್‌ಪಂವೊಂಡ ನೀತಿ, ಅಂವೊಂಡ ಬಟ್ಟೆನ ಚಾಯಿ ಮಾಡುವ. ಆಚೇಂಗಿ ದುಷ್ಟ, ತಾಂಡ ದುಷ್ಟತನತ್‌ಂಜ ಬುದ್ದ್ ಪೋಪ.

⁶ಸತ್ಯತ್‌ಲ್‌ ನಡ್‌ಪಯಿಂಗಡ ನೀತಿ ಅಯಿಂಗಳ ಕಾಪಾಡುವ, ಆಚೇಂಗಿ ದ್ರೋಹಿಯಡ ಕೆಟ್ಟ ಆಸೆಯೇ ಅಯಿಂಗಳ ಚಿಕ್ಕ್‌ಚಿಡುವ.

⁷ದುಷ್ಟ ಚಾವೊಕ, ಅಂವೊಂಡ ನಂಬಿಕೆಯು ನಾಶ ಆಯಿಪೋಪ. ಅಂವೊಂಡ ಶಕ್ತಿರ ಮೇಲೆ ಬೆಚ್ಚ ನಿರೀಕ್ಷೆಯೆಲ್ಲಾ ಒಂದೂ ಇಲ್ಲತೆ ಆಯಿಪೋಪ.

⁸ನೀತಿವಂತಂವೊ ಇಕ್ಕಟಿಂಜ ಬಚಾವಾಪ, ಆಚೇಂಗಿ ದುಷ್ಟ ಆ ಇಕ್ಕಟ್‌ಲ್‌ ಚಿಕ್ಕಿ ಪೋಪ.

⁹ದೇವಡ ಮೇಲ ಪೋಡಿಯಿಲ್ಲತಂವೊ ನೆರೆಮನೆಕಾರನ ತಾಂಡ ತಕ್ಕ್‌ಯಿಂಜಲೇ ನಾಶ ಮಾಡಿರುವ, ಆಚೇಂಗಿ ನೀತಿವಂತಂವೊ ಅಂವೊಂಡ ಅರಿವುಯಿಂಜ ತಪ್ಪ್‌ಚಿಡುವ.

¹⁰ನೀತಿವಂತಯಿಂಗ ಸುಖವಾಯಿತ್‌ ಇಂಜತೇಂಗಿ ಇಡೀ ಪಟ್ಟಣವೇ ಕೊಂಡಾಟತ್‌ಲ್‌ ಇಪ್ಪ. ಆಚೇಂಗಿ ದುಷ್ಟಂಗ ನಾಶ ಆಯಿ ಪೋಚೇಂಗಿ ಜನ ಕುಶೀಲ್‌ ಕೂತ್‌ ಕೊಡ್‌ಪ.

¹¹ಸತ್ಯವಂತಯಿಂಗಡ ಆಶೀರ್ವಾದ ಪಟ್ಟಣತ್‌ನ ಬಲ್ಯ ಸ್ತಾನಕ್‌ ಕೊಂಡ ಪೋಪ. ಆಚೇಂಗಿ ದುಷ್ಟಂಗಡ ತಕ್ಕ್‌ಯಿಂಜ ಪಟ್ಟಣ ಪಾಳಾಯಿ ಪೋಪ.

¹²ದಡ್ಡ ನೆರೆಮನೆಕಾರನ ಪರಿಹಾಸ ಮಾಡ್‌ವ, ಆಚೇಂಗಿ ಬುದ್ದಿವುಳ್ಳಂವೊ ತಾಂಡ ಬಾಯಿನ ಅಡಕಿ ಬೆಚ್ಚೊವ.

¹³ಬೋರೆಯಿಂಗಡ ಮೇಲೆ ಕುತ್ತ ಪರ್‌ಂದಿತ್‌ ತಿರಿಗಿಯಂಡ್‌ ಇಪ್ಪಂವೊ ಗುಟ್ಟ್‌ನ ಬಾಯಿಬುಟ್ಟ್‌ರ್‌ವ. ಆಚೇಂಗಿ ನಂಬಿಕಸ್ತ ವಿಷಯತ್‌ನ ಅಡಕಿ ಬೆಪ್ಪ.

¹⁴ಆಲೋಚನೆ ಇಲ್ಲತ ಜಾಗತ್‌ಲ್‌ ಜನ ಬುದ್ದ್‌ಪೋಪ. ಆಚೇಂಗಿ ಆಲೋಚನೆಕಾರಂಗ ದುಂಬ ಇಂಜತೇಂಗಿ ಸೌಕ್ಯತ್‌ ಇಪ್ಪ.

¹⁵ಬೋರೆ ಒಬ್ಬಂಡ ಸಾಲಕ್‌ ಜಾಮೀನ್‌ ಕೊಡಪಂವೊ ದುಂಬ ಕಷ್ಟಪಡುವ. ಜಾಮೀನ್‌ ಕೊಡ್‌ಪಕ್‌ ದೂರ ನಿಪ್ಪಂವೊ ಸೌಕ್ಯತ್‌ ಇಪ್ಪ.

¹⁶ದಯೆವುಳ್ಳ ಪೊಣ್ಣಾಳ್‌ ಗೌರವತ್‌ನ ಸಂಪಾದನೆ ಮಾಡಿಯೊವ. ಆಚೇಂಗಿ ಕರುಣೆಯಿಲ್ಲತ ಆಣಾಳುವ ಬರೀ ಐಶ್ವರ್ಯತ್‌ನ ಸಂಪಾದನೆ ಮಾಡುವ.

¹⁷ದಯೆವುಳ್ಳ ಮನುಷ್ಯ ತಾಂಡ ಆತ್ಮಕ್‌ ನಲ್ಲದ್‌ ಮಾಡಿಯೊವ. ಆಚೇಂಗಿ ಒರ್‌ ಕ್ರೂರಿ ಅಂವೊಂಡ ತಡಿನ ಅಂವೊನೇ ನೊಂಬಲಪಡ್‌ತಿಯೊವ.

¹⁸ಒರ್‌ ದುಷ್ಟಂಡ ಆದಾಯ ಮೋಸವಾಯಿತ್‌ಪ್ಪ. ಆಚೇಂಗಿ ನೀತಿನ ಬಿತ್ತ್‌ವಂವೊ ಯೋಗ್ಯವಾನ ಫಲತ್‌ನ ಪಡೆಯುವ.

¹⁹ನೀತಿರ ಬಟ್ಟೆಲ್‌ ನಡ್‌ಪಕ್‌ ಸಿದ್ದವಾಯಿತ್‌ ಇಪ್ಪಂವೊಂಗ್‌ ಜೀವ ಕ್‌ಟ್ಟುವ. ಆಚೇಂಗಿ ಕ್‍ೕಡಾನ ಬಟ್ಟೆಲ್‌ ನಡ್‌ಪಂವೊಂಗ್‌ ಚಾವ್.

²⁰ಯೆಹೋವ ಕಪಟ ಹೃದಯ ಉಳ್ಳಯಿಂಗಳ ಅಸಹ್ಯವಾಯಿತ್‌ ಕಾಂಬ. ಆಚೇಂಗಿ ಸತ್ಯತ್‌ಲ್‌ ನಡ್‌ಪಯಿಂಗಳ ಅಂವೊಂಗ್‌ ಕುಶಿ.

²¹ದುಷ್ಟ ಜನಕ್‌ ಶಿಕ್ಷೆ ಕಂಡಿತ, ಆಚೇಂಗಿ ನೀತಿವಂತಂವೊಂಡ ಸಂತಾನ ಶಿಕ್ಷೆಯಿಂಜ ಬಚಾವಾಪ.

²²ವಿವೇಕ ಇಲ್ಲತೆ ಚಾಯಿ ಉಳ್ಳ ಪೊಣ್ಣಾಳ್, ಪಂದಿರ ಮೂಕ್ಕ್‌ ಇಟ್ಟಿತುಳ್ಳ ಪೊನ್ನ್‌ ಮೂಕೊತ್ತಿಕ್‌ ಸರಿಸಮ.

²³ನೀತಿವಂತಯಿಂಗಡ ಆಸೆಯೆಲ್ಲ ನಲ್ಲದೇ ಆಯಿತಿಪ್ಪ, ಆಚೇಂಗಿ ದುಷ್ಟಂಗಡ ನಿರೀಕ್ಷೆ ಬಲ್ಯ ಚೆಡಿರ ದಂಡನೆಕ್‌ ಕೊಂಡಪೋಪ.

²⁴ದಾರಾಳವಾಯಿತ್‌ ಕೊಡ್‌ತಿತ್‌ ಇಂಞು ಐಶ್ವರ್ಯನಾನಂವೊ ಉಂಡ್, ಕೊಡಪಕುಳ್ಳದ್‌ನ ಕೊಡ್‌ಕತೆ ಗರೀಬನಾನಂವೊನು ಉಂಡ್.

²⁵ಉದಾರ ಮನಸ್ಸ್‌ ಉಳ್ಳಂವು ಅಬಿವೃದ್ದಿ ಆಪ. ಬೋರೆಯಯಿಂಗಕ್‌ ಸಹಾಯ ಮಾಡ್‌ವಂವೊಂಗ್, ಸಹಾಯ ಕ್‌ಟ್ಟ್‌ವ.

²⁶ಬೆಲೆ ಜಾಸ್ತಿ ಆಂಡೂಂದ್‌ ಆಹಾರ ದಾನ್ಯತ್‌ನ ಕೆಟ್ಟಿ ಬೆಪ್ಪಂವೊಂಗ್‌ ಜನ ಶಾಪ ಇಡುವ. ಆಚೇಂಗಿ ಅದ್‌ನ ಮಾರ್ವಂವೊಂಗ್‌ ಆಶೀರ್ವಾದ ಕ್‌ಟ್ಟುವ.

²⁷ನಲ್ಲದ್‌ನ ಎಚ್ಚರತ್‌ಲ್‌ ತ್‍ೕಡ್‌ವಂವೊಂಗ್‌ ದಯೆ ಕ್‌ಟ್ಟುವ, ಆಚೇಂಗಿ ಕ್‍ೕಡ್‌ನ ತ್‍ೕಡಿಯಂಡ್‌ ಪೋಪಂವೊಂಗ್‌ ಕ್‍ೕಡೇ ಆಪ.

²⁸ತಾಂಡ ಐಶ್ವರ್ಯತ್‌ನ ನಂಬ್‌ವಂವೊ ಬುದ್ದ್ ಪೋಪ. ಆಚೇಂಗಿ ನೀತಿವಂತಂವೊ ಚಿಗ್‌ರೆಲೆರನೆಕೆ ಬೊಳೆಯುವ.

²⁹ತಾಂಡ ಕುಟುಂಬಕ್‌ ತೊಂದರೆ ಎಡ್‌ತಂಡ್‌ ಬಪ್ಪಂವೊಂಡ ಪಾಲ್‌ಕ್‌ ಕ್‌ಟ್ಟೋದ್‌ ಗಾಳಿಯೇ. ಮೂಡ ಜ್ಞಾನ ಉಳ್ಳಂವೊಂಗ್‌ ಸೇವೆ ಮಾಡುವ.

³⁰ನೀತಿವಂತಂವೊಂಡ ಫಲ ಜೀವ ತಪ್ಪ ಮರ. ಜನಳ ಗೆಲ್ಲುವಂಚೊ ಜ್ಞಾನ ಉಲ್ಳಂವೊ.[9]

³¹ಇದಾ! ನೀತಿವಂತಂವೊಂಗ್‌ ಈ ಬೂಮಿಲ್‌ ಅಂವೊಂಡ ಕ್ರಿಯೆಕ್‌ ತಕ್ಕಂತ ಫಲ ಕ್‌ಟ್ಟುವ. ಅನ್ನನಾಚೇಂಗಿ ದುಷ್ಟಂಗು, ಪಾಪಿಕು ದಂಡನೆ ಕ್‌ಟ್ಟೋದ್‌ ಎಚ್ಚಕ್‌ ಕಂಡಿತ.