Read Kodava ಜ್ಞಾನತ್‌ರ ಪಡಿಮ 12 Bible Online

ಜ್ಞಾನತ್‌ರ ಪಡಿಮ 12 - Kodava bible

ಜ್ಞಾನತ್‌ರ ಪಡಿಮ 12

¹ಬುದ್ದಿತಕ್ಕ್‌ನ ಪ್ರೀತಿಚಿಡುವಂವೊ, ಅರಿವುನ ಕುಶಿ ಪಡುವ. ಆಚೇಂಗಿ ಎಚ್ಚರ ತಕ್ಕ್‌ನ ದ್ವೇಷ ಮಾಡ್‌ವಂವೊ ಬುದ್ದಿಯಿಲ್ಲತಂವೊನಾಯಿತುಂಡ್.

²ನಲ್ಲ ಮನುಷ್ಯಂಗ್‌ ಯೆಹೋವಂಡ ದಯೆ ಇಪ್ಪ. ಆಚೇಂಗಿ ಕೆಟ್ಟ ಗೇನ ಉಳ್ಳಂವೊಂಗ್‌ ದಂಡನೆ ಕ್‌ಟ್ಟುವ .

³ದುಷ್ಟತನತ್‌ರಗುಂಡ್‌ ಒರ್‌ ಮನುಷ್ಯ ನೆಲೆ ಆಪುಲೆ. ಆಚೇಂಗಿ ನೀತಿವಂತಯಿಂಗಡ ಬೇರ್‌ ಅನ್‌ಂಗ್‌ಲೆ.

⁴ನಲ್ಲ ಗುಣವುಳ್ಳ ಪೊಣ್ಣ್‌ ಅವಡ ವಡಿಯಂಗ್‌ ಕಿರೀಟವಾಯಿತ್‌ಪ್ಪ. ಆಚೇಂಗಿ ಞಾಣ ಇಲ್ಲತ ಪೊಣ್ಣ್‌ ವಡಿಯಂಡ ಮೂಳೆಕ್‌ ಕೀಂಜಿ ಬಂದನೆಕೆ ಇಪ್ಪ.

⁵ನೀತಿವಂತಂವೊಂಡ ಗೇನ ನ್ಯಾಯವಾಯಿತಿಪ್ಪ. ಆಚೇಂಗಿ ದುಷ್ಟ ಜನಡ ಆಲೋಚನೆ ವಂಚನೆ ಉಳ್ಳದಾಯಿತಿಪ್ಪ.

⁶ದುಷ್ಟಂಗಡ ತಕ್ಕ್‌ ಬೋರೆಯಿಂಗಳ ಕೊಲ್ಲ್‌ವಕ್‌ ಪದ್‌ಂಗಿ ಇಪ್ಪನೆಕೆ ಇಪ್ಪ. ಆಚೇಂಗಿ ಸತ್ಯವಂತಯಿಂಗಡ ತಕ್ಕ್‌ ಅಯಿಂಗಳ ಕಾಪಾಡುವ.

⁷ದುಷ್ಟ ಜನ ಪಾಳಾಯಿತ್‌ ಕಾಂಗತೆ ಆಯಿಪೋಪ, ಆಚೇಂಗಿ ನೀತಿವಂತಂಯಿಂಗಡ ಮನೆ ಸ್ತಿರವಾಯಿತ್‌ ನಿಪ್ಪ.

⁸ಬುದ್ದಿವಂತಂವೊಂನ ಅಂವೊಂಡ ಬುದ್ದಿಕ್‌ ತಕ್ಕಂತೆ ಹೊಗೊಳುವ, ಆಚೇಂಗಿ ಕಪಟಿನ ತ್‌ಕ್ಕಾರ ಮಾಡುವ.

⁹ಬಲ್ಯ ಮನುಷ್ಯಂಡನೆಕೆ ಕಾಂಬ್‌ಚಿಟ್ಟಂಡ್‌ ಉಂಬಕ್‌ ಕೂಳಿಲ್ಲತೆ ಇಪ್ಪಕಿಂಜಿ, ಸಾದಾರಣಂವೊನಾಯಿತ್‌ ಇಂಜಂಡ್‌ ಪಣಿಕಾರನಾಯಿತುಳ್ಳಂವೊ ಮೇಲ್.

¹⁰ನೀತಿವಂತಂವೊ ಅಂವೊಂಡ ಪ್ರಾಣಿಯಡ ಜೀವತ್‌ನ ಕಾಪಾಡುವ, ಆಚೇಂಗಿ ದುಷ್ಟ ಜನತ್‌ರ ಕನಿಕರ ಕ್ರೂರವಾಯಿತ್‌ಪ್ಪ.

¹¹ತಾಂಡ ಬೇಲ್‌ಲ್‌ ಕಷ್ಟಪಟ್ಟಿತ್‌ ನಯಿಪಂವೊಂಗ್‌ ಬೋಂಡಿಯಚ್ಚಕ್‌ ಆಹಾರ ಇಪ್ಪ. ಆಚೇಂಗಿ ಪ್ರಯೋಜನ ಇಲ್ಲತ ಕಾರ್ಯತ್‌ಲ್‌ ನೇರತ್‌ನ ಕಳೆಯುವಂವೊ ದಡ್ಡ.

¹²ದುಷ್ ಜನ ಅಯಿಂಗಡ ದುಷ್ಟತ್ತನತಿಂಜ ಕ್‌ಟ್ಟುವದ್‌ಲ್‌ ಕುಶಿ ಪಡುವ. ಆಚೇಂಗಿ ನೀತಿವಂತಂವೊಂಡ ಬೇರ್‌ ಫಲ ತಪ್ಪ.

¹³ದುಷ್ಟ ತಾಂಡ ತಕ್ಕ್‌ಯಿಂಜಲೇ ಚಿಕ್ಕಿ ಪೋಪ, ಆಚೇಂಗಿ ನೀತಿವಂತಂವೊ ಇಕ್ಕಟ್ಯಿಂಜ ಬಚಾವ್‌ ಆಪ.

¹⁴ಒಬ್ಬೊಬ್ಬನು ಅಂವೊಂಡ ನಲ್ಲ ತಕ್ಕ್‌ರ ಫಲತ್‌ರಗುಂಡ್‌ ತೃಪ್ತಿಯಾಪ. ಅನ್ನನೆ ಒಬ್ಬೊಬ್ಬ ಕೆಯ್ಯುವ ಪಣಿಕ್‌ ತಕ್ಕ ಫಲ ಅಂವೊಂಗ್‌ ಕ್‌ಟ್ಟುವ.

¹⁵ಒರ್‌ ಮೂಡಂಡ ನಡ್‌ತೆ ಅಂವೊಂಡ ದೃಷ್ಟಿಲ್‌ ಸೆರಿಯಾನದಾಯಿತ್‌ ಇಪ್ಪ. ಆಚೇಂಗಿ ಜ್ಞಾನ ಉಳ್ಳಂವೊ ಅಲೋಚೆನೆಕ್‌ ಕೆಮಿ ಕೊಡ್‌ಪ.

¹⁶ಒರ್‌ ಮೂಡ ತಾಂಡ ಚೆಡಿನ ಬೆರಿಯ ಕಾಟುವ, ಆಚೇಂಗಿ ವಿವೇಕ ಉಳ್ಳಂವೊ ಅವಮಾನತ್‌ನ ಅಡಕ್‌ವ.

¹⁷ಸತ್ಯತ್‌ನೇ ಪರಿಯುವಂವೊ ನೀತಿನ ಕಾಂಬ್‌ಚಿಡುವ. ಆಚೇಂಗಿ ಪೊಟ್ಟ್‌ ಸಾಕ್ಷಿ ಎಣ್ಣ್‌ವಂವೊ ವಂಚನೆನ ಕಾಂಬ್‌ಚಿಡುವ.

¹⁸ದುಡ್‌ಕಿತ್‌ ಪರಿಯುವ ತಕ್ಕ್‌ ಕತ್ತಿರನೆಕೆ ನೊಂಬಲ ತಪ್ಪ, ಆಚೇಂಗಿ ಜ್ಞಾನಿರ ತಕ್ಕ್‌ ಮದ್ದ್‌ರನೆಕೆ ಸೌಕ್ಯ ತಪ್ಪ.

¹⁹ಸತ್ಯತ್‌ನ ಪರಿವ ತುಟಿ ಎಕ್ಕಾಲು ಉಳಿಯುವ. ಆಚೇಂಗಿ ಪೊಟ್ಟ್‌ಪರಿಯುವ ನಾವ್‌ ಕ್ಷಣತ್‌ ಮಾತ್‌ರ ಇಪ್ಪ.

²⁰ಕ್‍ೕಡ್‌ನ ಗೇನ ಮಾಡುವಯಿಂಗಡ ಹೃದಯತ್‌ಲ್‌ ವಂಚನೆ ಇಪ್ಪ. ಆಚೇಂಗಿ ಸಮಾದಾನ ಪಡ್‌ತುವ ಆಲೋಚನೆಕಾರಂಗಕ್‌ ಸಂತೋಷ ಕ್‌ಟ್ಟುವ.

²¹ನೀತಿವಂತಂವೊಂಗ್‌ ಏದ್‌ ಕ್‍ೕಡ್‌ ಬಪ್ಪುಲೆ, ಆಚೇಂಗಿ ದುಷ್ಟಂಗಕ್‌ ಕಷ್ಟ ದುಂಬಿತ್‌ಪ್ಪ.

²²ಪೊಟ್ಟ್‌ ಪರಿಯುವ ತುಟಿ ಯೆಹೋವಂಗ್‌ ಅಸಹ್ಯವಾನದ್. ಆಚೇಂಗಿ ಸತ್ಯವಂತಯಿಂಗಳ ಅಂವೊಂಗ್‌ ದುಂಬ ಕುಶಿ.

²³ವಿವೇಕ ಉಳ್ಳಂವೊ ಅಂವೊಂಡ ಅರಿವುನ ಅಡಕಿ ಬೆಪ್ಪ. ಆಚೇಂಗಿ ಮೂಡ ತಾನ್‌ ದಡ್ಡ ಎಣ್ಣಿಯಂಡ್‌ ಪ್ರಕಟಿಚಿಡುವ.

²⁴ಎಚ್ಚರತ್‌ಲ್‌ ಕೆಲಸ ಮಾಡ್‌ವಂವೊ ಆಳ್‌ವಿಕೆ ಮಾಡುವ. ಆಚೇಂಗಿ, ಸೋಮಾರಿ ಅಡಿಯಾಳಪ.

²⁵ಬೇಜಾರ್‌ಲ್‌ ಇಪ್ಪ ಮನಸ್ಸ್‌ ಒಬ್ಬನ ತಾತುವ, ಆಚೇಂಗಿ ಕನಿಕರತ್‌ರ ತಕ್ಕ್‌ ಒಬ್ಬನ ಕುಶಿಪಡ್‌ತುವ.

²⁶ನೀತಿವಂತಂವೊ ಕೇಡ್‌ಂಜ ದೂರ ಮಾಡುವ. ಆಚೇಂಗಿ ದುಷ್ಟಂಗಡ ಬದ್‌ಕ್‌ ಅಯಿಂಗಳ ಬಟ್ಟೆ ತಪ್ಪಿ ಪೋಪನೆಕೆ ಮಾಡುವ.

²⁷ಸೋಮಾರಿ ತಾನ್‌ ಬೋಟೆಯಾಡ್‌ನಾನ ಸಹ ಅಡುಗೆ ಮಾಡುಲೆ, ಆಚೇಂಗಿ ಎಚ್ಚರತ್‌ಲ್‌ ಕೆಲಸ ಮಾಡ್‌ವಂವೊಂಗ್‌ ಐಶ್ವರ್ಯ ಕ್‌ಟ್ಟುವ.

²⁸ನೀತಿರ ಬಟ್ಟೆಲ್‌ ಜೀವವುಂಡ್, ಆ ಬಟ್ಟೆಲ್‌ ಚಾವ್‌ ಇಲ್ಲೆ.