Read Kodava ಜ್ಞಾನತ್‌ರ ಪಡಿಮ 13 Bible Online

ಜ್ಞಾನತ್‌ರ ಪಡಿಮ 13 - Kodava bible

ಜ್ಞಾನತ್‌ರ ಪಡಿಮ 13

¹ಜ್ಞಾನವುಳ್ಳ ಮೋಂವೊ ತಾಂಡ ಅಪ್ಪಂಡ ಬೋದನೆನ ಕ್‍ೕಪ. ಆಚೇಂಗಿ ಪರಿಹಾಸ ಮಾಡ್‌ವಂವೊನ ಚೂಕ್‌ಚೇಂಗಿ ಅಂವೊ ಕೆಮಿ ಕೊಡ್‌ಪ್‌ಲೆ

²ಒರ್‌ ಮನುಷ್ಯ ತಾಂಡ ನಲ್ಲ ತಕ್ಕ್‌ರ ಫಲತ್‌ರಗುಂಡ್‌ ನಲ್ಲದ್‌ನ ಅನುಬವಿಚಿಡುವ. ಆಚೇಂಗಿ ದ್ರೋಹಿಯ ಕ್ರೂರವಾಯಿತ್‌ ಇಪ್ಪಕೇ ಕುಶಿ ಪಡುವ.

³ತಾಂಡ ಬಾಯಿನ ಕಾಪಂವೊ ತಾಂಡ ಜೀವತ್‌ನ ಕಾಪಾಡಿಯೊವ. ಆಚೇಂಗಿ ಎಚ್ಚರ ಇಲ್ಲತೆ ತಕ್ಕ್‌ ಪರಿಯುವಂವೊ ನಾಶ ಆಯಿಪೋಪ.

⁴ಸೋಮಾರಿ ಕುಶಿಪಡುವ ಏದು ಅಂವೊಂಗ್‌ ಕ್‌ಟ್ಟುಲೆ. ಎಚ್ಚರತ್‌ಲ್‌ ಬದ್‌ಕ್ಕುವಯಿಂಗ ಅಬಿವೃದ್ದಿ ಪೊಂದುವ.

⁵ನೀತಿವಂತಂವೊ ಪೊಟ್ಟ್‌ ತಕ್ಕ್‌ನ ದ್ವೇಷ ಮಾಡುವ. ಆಚೇಂಗಿ ದುಷ್ಟ ಜನ ಞಾಣಕ್‍ೕಡ್‌ ಪಿಂಞ ಅವಮಾನತ್‌ನ ಕೊಂಡಬಪ್ಪ.

⁶ನೀತಿರ ಬದ್‌ಕ್‌ ಸತ್ಯವಂತಂವೊನ ಕಾಪಾಡುವ. ಆಚೇಂಗಿ ದುಷ್ಟತನ ಪಾಪಿನ ನಾಶ ಮಾಡಿರುವ.

⁷ಒಂದು ಇಲ್ಲತಂವೊ ತನ್ನ ಐಶ್ವರ್ಯವಂತಂವೊನಾಯಿತ್‌ ಕಾಂಬ್‌ಚಿಡುವಂವೊನು ಉಂಡ್; ದುಂಬ ಐಶ್ವರ್ಯವ ಉಳ್ಳಂವೊ ತನ್ನ ಗರಿಬಂಡನೆಕೆ ಕಾಂಬ್‌ಚಿಡುವಂವೊನು ಉಂಡ್.

⁸ಒರ್‌ ಐಶ್ವರ್ಯವಂತಂವೊಂಡ ಪಣ ಅಂವೊಂಡ ಜೀವತ್‌ನ ಕಾಪಾಡ್‌ವಕಾಯಿತ್‌ ಪ್ರಯೋಜನ ಆಪ. ಆಚೇಂಗಿ ಗರಿಬನ ದಾರ್‌ ಪೋಡಿಚ್ಚಿಟತೇಂಗಿಯು ಅಂವೊಂಗ್‌ ಪೋಡಿ ಇಲ್ಲೆ.

⁹ನೀತಿವಂತಂವೊಂಡ ಬೊಳಿ ಪ್ರಕಾಶವಾಯಿತ್‌ ಮಿನ್ನ್‌ವ. ಆಚೇಂಗಿ ದುಷ್ಟಂಡ ಬೊಳ್‌ಚ ಆರಿಪೋಪ.

¹⁰ಆಂಗಾರ ಮಾತ್‌ರ ಜಗಳಕ್‌ ಕಾರಣ ಆಪ. ಆಲೋಚನೆಕ್‌ ಕೆಮಿ ಕೊಡ್‌ಪಂವೊಂಡ ಪಕ್ಕ ಜ್ಞಾನ ಇಪ್ಪ.

¹¹ಬಿಟ್ಟಿಲ್‌ ಕ್‌ಟ್ಟ್‌ನ ಐಶ್ವರ್ಯ ಬೆರಿಯ ಕಾಂಗತೆ ಆಯಿಪೋಪ. ಆಚೇಂಗಿ ಕಷ್ಟಪಟ್ಟಿತ್‌ ಕೂಟಿ ಬೆಪ್ಪಂವೊ ಅಬಿವೃದ್ದಿ ಆಯಂಡೇ ಪೋಪ.

¹²ನಿರೀಕ್ಷೆ ಮಾಡ್‌ನದ್‌ ನೆರವೇರುವಕ್‌ ದುಂಬ ತಡೆ ಆಚೇಂಗಿ ಮನಸ್ಸ್‌ ಕುಂದಿ ಪೋಪ. ಆಚೇಂಗಿ ಆಸೆಪಟ್ಟದ್‌ ಕ್‌ಟ್ಟ್‌ವಕ ಜೀವ ತಪ್ಪ ಮರತ್‌ರನೆಕೆ ಇಪ್ಪ.

¹³ಬೋದನೇನ ಅಲ್ಲಗೆಳೆಯುವಂವೊ ನಾಶ ಆಯಿಪೋಪ. ಆಚೇಂಗಿ ಆಜ್ಞೆಕ್‌ ತಗ್ಗಿತ್‌ ನಡ್‌ಪಂವೊಂಗ್‌ ಬಹುಮಾನ ಕ್‌ಟ್ಟುವ.

¹⁴ಜ್ಞಾನಿರ ಬೋದನೆ ಜೀವತ್‌ರ ಬುಗ್ಗೆರನೆಕೆ. ಅದ್‌ ಚಾವ್‌ರ ಬಲೆಕ್‌ ಚಿಕ್ಕಿ ಪೋಕತನೆಕೆ ಕಾಪ.

¹⁵ನಲ್ಲ ಬುದ್ದಿ ದಯೆ ಕ್‌ಟ್ಟುವನೆಕೆ ಮಾಡುವ. ಆಚೇಂಗಿ ದ್ರೋಹಿಯ ಪೋಪ ಬಟ್ಟೆ ಒರಟಾನದಾಯಿತ್‌ಪ್ಪ.

¹⁶ವಿವೇಕ ಉಳ್ಳ ಒಬ್ಬೊಬ್ಬನು ಗೇನ ಮಾಡಿತ್‌ ಕಾರ್ಯ ಮಾಡುವ. ಆಚೇಂಗಿ, ಮೂಡ ತಾಂಡ ಮೂಡತನತ್‌ನ ಪೊರಮೆ ಕಾಟಿರ್ವ.

¹⁷ದುಷಟನಾನ ದೂತ ಕ್‍ೕಡ್‌ಲ್‌ ಚಿಕ್ಕಿ ಪೋಪ. ಆಚೇಂಗಿ ನಂಬಿಕಸ್ತನಾನ ದೂತ ಸುಕ ಕೊಂಡ್‌ ಬಪ್ಪ.

¹⁸ಬುದ್ದಿತಕ್ಕ್‌ನ ಕಡೆಗಣಿಚಿಡ್‌ವಂವೊಂಗ್‌ ಬಡತನ ಪಿಂಞ ಅವಮಾನ ಆಪ. ಎಚ್ಚರ ತಕ್ಕ್‌ನ ಸ್ವೀಕಾರ ಮಾಡ್‌ವಂವೊಂಗ್‌ ಮರ್ಯಾದಿ ಕ್‌ಟ್ಟುವ.

¹⁹ಆಸೆಪಟ್ಟದ್‌ ನೆರವೇರ್ವಕ ಆತ್ಮಕ್‌ ಸುಕ. ಪಾಳ್‌ ಬಟ್ಟೆನ ಬುಟ್ಟಿತ್‌ ಬಪ್ಪದ್‌ ಮೂಡಂಗಕ್‌ ಅಸಹ್ಯ.

²⁰ಜ್ಞಾನಿಯಡ ಸಹವಾಸಿ ಜ್ಞಾನವುಳ್ಳಂವೊನಾಪ; ಮೂಡಂಗಡ ಕೂಟಾಳಿ ಕಷ್ಟಪಡುವ.

²¹ಕ್‍ೕಡ್‌ ಪಾಪಿಯಡ ಬಯ್ಯತ್‌ ಪೋಯಂಡೇ ಇಪ್ಪ. ಆಚೇಂಗಿ ನೀತಿವಂತಂಯಿಂಗಕ್‌ ನಲ್ಲದ್‌ ಫಲವಾಯಿತ್‌ ಕ್‌ಟ್ಟು.

²²ಒರ್‌ ನಲ್ಲ ಮನುಷ್ಯ ತಾಂಡ ಕ್‌ರ್‌ಮಕ್ಕಕ್‌ ಬಾದ್ಯತೆನ ಬೆಚ್ಚಿತ್‌ ಪೋಪ. ಆಚೇಂಗಿ ಪಾಪಿಯಡ ಐಶ್ವರ್ಯ ನೀತಿವಂತಯಿಂಗಕಾಯಿತ್‌ ಕೂಟಿಬೆಚ್ಚನೆಕೆ ಆಪ.

²³ಗರೀಬಂಡ ಉಪ್ಪತ ಬೇಲ್‌ ಬಲ್ಯ ಬೊಳೆ ತಪ್ಪ, ಆಚೇಂಗಿ ಅನ್ಯಾಯ ಅದ್‌ನ ಕೊಚ್ಚಿಯಂಡ್‌ ಪೋಪ[10].

²⁴ಕೋಲ್‌ನ ಉಪಯೋಗಿಚಿಡತಂವೊ ತಾಂಡ ಮೋಂವೊನ ದ್ವೇಷ ಮಾಡುವ; ಆಚೇಂಗಿ ಅಂವೊನ ಪ್ರೀತಿಚಿಡುವಂವೊ ಅಂವೊಂಗ್‌ ಶಿಕ್ಷೆ ಕೊಡ್‌ಪಕ್‌ ಎಚ್ಚರ ಎಡ್‌ತೊವ.

²⁵ನೀತಿವಂತಂವೊ ತಾಂಗ್‌ ತೃಪ್ತಿ ಆಪಚ್ಚಕ್‌ ಉಂಬ; ಆಚೇಂಗಿ ದುಷ್ಟಂಗಕ್‌ ಎಕ್ಕಾಲೂ ಕೆಲಪೈಪ.