Read Kodava ಜ್ಞಾನತ್‌ರ ಪಡಿಮ 16 Bible Online

ಜ್ಞಾನತ್‌ರ ಪಡಿಮ 16 - Kodava bible

ಜ್ಞಾನತ್‌ರ ಪಡಿಮ 16

¹ಮನಸ್ಸ್‌ರ ಯೋಜನೆ ಮನುಷ್ಯಂಗಡದ್. ನಾವ್‌ಕ್‌ ಸೆರಿಯಾನ ಜವಾಬ್ ಕೊಡ್‌ಪಂವೊ ಯೆಹೋವನೇ.

²ಒರ್‌ ಮನುಷ್ಯ ಮಾಡುವ ಕಾರ್ಯಯೆಲ್ಲ ಅಂವೊಂಡ ದೃಷ್ಟಿಕ್‌ ಸೆರಿಯಾಯಿತ್‌ ಕಾಂಗು, ಆಚೇಂಗಿ ಯೆಹೋವ ಅಂವೊಂಡ ಉದ್ದೇಶತ್‌ನ ಪರೀಕ್ಷೆ ಮಾಡುವ.

³ನೀಡ ಕಾರ್ಯತ್‌ನೆಲ್ಲ ಯೆಹೋವಂಗ್‌ ಒಪ್ಪ್‌ಚಿಡ್. ಅಕ್ಕ ನೀಡ ಯೋಜನೆಯೆಲ್ಲ ನೆರವೇರುವ.

⁴ಯೆಹೋವ ಎಲ್ಲಾನ ತಾಂಗಾಯಿತ್‌ ಸೃಷ್ಟಿ ಮಾಡ್‌ಚಿ. ದುಷ್ಟನ ಸಹ ಕ್‍ೕಡ್‌ರ ದಿವಸಕಾಯಿತ್‌ ಉಂಟ್‌ಮಾಡ್‌ಚಿ.

⁵ಆಂಗಾರಿಯ ಎಲ್ಲಾ ಯೆಹೋವಂಗ್‌ ಅಸಹ್ಯ. ಅಯಿಂಗಕ್‌ ಶಿಕ್ಷೆ ಕಂಡಿತ.

⁶ಕೃಪೆಯಿಂಜಲು ಸತ್ಯತ್‌ಂಜಲು, ಪಾಪಕ್‌ ಮನ್ನಿಪ್ ಕ್‌ಟ್ಟು. ಯೆಹೋವಂಗ್‌ ಬೊತ್ತಿತ್‌ ನಡ್‌ಂದತೇಂಗಿ ಜನ ಕ್‍ೕಡ್‌ಂಜ ತಪ್ಪುವ.

⁷ಒಬ್ಬಂಡ ನಡ್‌ತೆ ಯೆಹೋವ ಮೆಚ್ಚುವನೆಕೆ ಇಂಜತೇಂಗಿ, ಅಂವೊಂಡ ವಿರೋದಿಯಳ ಸಹ ಅಂವೊಂಡ ಕೂಡೆ ಸಮಾದಾನ ಆಪನೆಕೆ ಮಾಡುವ.

⁸ಅನ್ಯಾಯತ್‌ಲ್‌ ಕ್‌ಟ್ಟ್‌ನ ಬಲ್ಯ ಐಶ್ವರ್ಯಕಿಂಜಿ, ನ್ಯಾಯವಾಯಿತ್‌ ಸಂಪಾದನೆ ಮಾಡ್‌ನ ಚೆನ್ನಂಗೇ ಮೇಲ್.

⁹ಮನುಷ್ಯಂಡ ಮನಸ್ಸ್‌ ಅಂವೊಂಡ ಕಾರ್ಯತ್‌ನ ಗೇನ ಮಾಡುವ. ಆಚೇಂಗಿ ಅಂವೊಂಡ ಬದ್‌ಕ್‌ರ ಬಟ್ಟೆನ ತೀರ್ಮಾನ ಮಾಡ್‌ವಂವೊ ಯೆಹೋವನೇ.

¹⁰ರಾಜ ದೇವಡ ಜ್ಞಾನತಿಂಜ ತಕ್ಕ್‌ ಪರಿಯುವ. ನ್ಯಾಯ ತ್‍ೕಪಕ ಅಂವೊ ಸರಿಯಾನದ್‌ನೇ ಎಣ್ಣುವ.

¹¹ನ್ಯಾಯವಾನ ಅಳತೆ ಪಿಂಞ ತಕ್ಕಡಿ ಯೆಹೋವಂಡದ್. ಚೀಲತ್‌ಲ್‌ ಉಳ್ಳ ತೂಕತ್‌ರ ಕಲ್ಲೆಲ್ಲಾ ಅಂವೊಂಡ ಕೆಲಸವೇ.

¹²ಅನ್ಯಾಯ ಮಾಡುವದ್‌ ರಾಜಂಗಕ್‌ ಅಸಹ್ಯವಾನದ್, ಎನ್ನಂಗೆಣ್ಣ್‌ಚೇಂಗಿ ಅಂವೊಂಡ ಸಿಂಹಾಸನ ನೀತಿರಗುಂಡ್‌ ಸ್ತಾಪನೆ ಮಾಡ್‌ನದ್.

¹³ನೀತಿರ ತಕ್ಕ್‌ನ ರಾಜಂಗ ಮೆಚ್ಚುವ. ಸತ್ಯ ಪರಿಯುವಂವೊನ ಅಯಿಂಗಕ್‌ ಕುಶಿ.

¹⁴ರಾಜಂಡ ಬಲ್ಯ ಚೆಡಿ ಒಬ್ಬನ ಕೊಲ್ಲು. ಆಚೇಂಗಿ ಜ್ಞಾನವುಳ್ಳಂವೊ ಅದ್‌ನ ಶಾಂತ ಪಡ್‌ತುವ.

¹⁵ರಾಜಂಡ ಮೂಡ್‌ರ ತೆಳಿಲ್‌ ಜೀವ ಉಂಡ್; ಅಂವೊಂಡ ದಯೆ ಮೋಡ ಸುರಿಯುವ ಮುಂಗಾರ್‌ ಮಳೆರನೆಕೆ.

¹⁶ಪೊನ್ನ್‌ನ ಸಂಪಾದನೆ ಮಾಡ್‌ವಕಿಂಜಿ ಜ್ಞಾನತ್‌ನ ಸಂಪಾದನೆ ಮಾಡ್‌ವದ್‌ ಎಚ್ಚಕ್‌ ನಲ್ಲದ್‌! ಬೊಳ್ಳಿನ ಸಂಪಾದನೆ ಮಾಡ್‌ವಕಿಂಜಿ ಬುದ್ದಿನ ಸಂಪಾದನೆ ಮಾಡ್‌ವದ್‌ ನಲ್ಲದ್‌!

¹⁷ಸತ್ಯವಂತಯಿಂಗಡ ಬದ್‌ಕ್‌ರ ಬಟ್ಟೆ ಅಯಿಂಗಳ ಕ್‍ೕಡಿಂಜ ದೂರ ಬೆಪ್ಪ. ತಾಂಡ ಬಟ್ಟೆನ ಎಚ್ಚರಿಕೆಲ್‌ ನಡ್‌ತ್‌ವಂವೊ ತಾಂಡ ಆತ್ಮತ್‌ನ ಕಾಪಾಡಿಯೊವ.

¹⁸ನಾಶಕ್‌ ಮಿಂತ ಆಂಗಾರ ಬಪ್ಪ, ಬುದ್ದ್‌ಪೋಪಕ್‌ ಮಿಂಞ ಪೆರುಮೆ ಬಪ್ಪ.

¹⁹ಆಂಗಾರಿಯಡ ಕೂಡೆ ಲೂಟಿನ ಪಾಲ್‌ ಮಾಡಿಯೊಕಿಂಜಿ, ಗರೀಬಂಡ ಕೂಡೆ ತಗ್ಗಿತ್‌ ಇಪ್ಪದೇ ನಲ್ಲದ್.

²⁰ವಿವೇಕತ್‌ಂಜ ಕಾರ್ಯತ್‌ನ ನಡ್‌ತ್‌ವಂವೊ ನಂದಾಪ. ಯೆಹೋವನ ನಂಬುವಂವೊ ಆಶೀರ್ವಾದ ಪಡ್‌ಂದಂವೊನಾಯಿತ್‌ಪ್ಪ.

²¹ಹೃದಯತ್‌ಲ್‌ ಜ್ಞಾನ ಉಳ್ಳಂವೊನ ವಿವೇಕ ಉಳ್ಳಂವೊ ಎಣ್ಣಿಯಂಡ್‌ ಗುರುತ್‌ಚಿಡುವ. ಮೊದರ್ವಾನ ತಕ್ಕ್‌ಯಿಂಜ ಅರಿವು ಜಾಸ್ತಿ ಆಪ.

²²ವಿವೇಕ ಉಳ್ಳಂವೊಂಗ್‌ ವಿವೇಕವೇ ಜೀವತ್‌ರ ಬುಗ್ಗೆ ಆಯಿತ್‌ಪ್ಪ. ಆಚೇಂಗಿ ಮೂಡಂಗಕ್‌ ಅಯಿಂಗಡ ಮೂಡತನತಿಂಜಲೇ ಶಿಕ್ಷೆ ಕ್‌ಟ್ಟುವ.

²³ಜ್ಞಾನಿರ ಹೃದಯ ಅಂವೊಂಡ ಬಾಯಿಕ್‌ ವಿವೇಕತ್‌ನ ಪಡಿಪ್‌ಚಿಡುವ. ಅಯಿಂಗಡ ತಕ್ಕ್‌ ಅರಿವುನ ಜಾಸ್ತಿ ಮಾಡುವ.

²⁴ಮೊದ್ರವಾನ ತಕ್ಕ್‌ ತೇನೆರಿನೆಕೆ ಆತ್ಮಕ್‌ ಮೊದ್ರವಾಯಿತು, ಮೂಳೆಕ್‌ ಆರೋಗ್ಯವಾಯಿತು ಇಪ್ಪ.

²⁵ಮನುಷ್ಯಂಗ್‌ ಸೆರೀಂದ್‌ ಕಾಂಬ ಒರ್‌ ಬಟ್ಟೆ ಉಂಡ್, ಆಚೇಂಗಿ ಕಡೇಕ್‌ ಅದ್‌ ಚಾವ್‌ಕ್‌ ಕೊಂಡ ಪೋಪ.

²⁶ನಯಿಪಂವೊ ತಾಂಗಾಯಿತೇ ನಯಿಪ. ಅಂವೊಂಡ ಬಾಯಿ[11] ಅದ್‌ನ ಮಾಡುವಕ್‌ ಒತ್ತಾಯ ಮಾಡುವ.

²⁷ಒಂದಂಗು ಪ್ರಯೋಜನ ಇಲ್ಲತ ಒರ್‌ ದುಷ್ಟ ಕ್‍ೕಡ್‌ನ ಕಳ್‌ಪ. ಅಂವೊಂಡ ತಕ್ಕ್‌ ಚುಡುವ ತಿತ್ತ್‌ರನೆಕೆ ಇಪ್ಪ.

²⁸ಕಪಟಿ ಜಗಳತ್‌ನ ಬಿತ್ತುವ. ಕುತ್ತ ಪರಿವಂವೊ ನಲ್ಲ ಸ್ನೇಹಿತಂಗಳ ಸಹ ಬೋರೆ ಮಾಡಿರುವ.

²⁹ಹಿಂಸೆ ಪಡುತ್‌ವಂವೊ ತಾಂಡ ನೆರಮನೆಕಾರನ ಚದಿಪ, ಅಂವೊನ ಕ್‍ೕಡಾನ ಬಟ್ಟೆಲ್‌ ಸಹ ನಡ್‌ತುವ.

³⁰ಕಣ್ಣ್‌ಲ್‌ ಸನ್ನ ಮಾಡುವಂವೊ ಕಪಟತ್‌ನ ಗೇನ ಮಾಡ್‌ವಕಾಯಿತ್‌ ಮುಚ್ಚ್‌ವ, ಕಿರಿನ ಕಡಿಪಂವೊ ಕ್‍ೕಡ್‌ನ ಮಾಡ್‌ವಕಾಯಿತ್‌ ಕಡಿಪ.

³¹ನೀತಿರ ಬಟ್ಟೆಲ್‌ ಬಪ್ಪ ನೆರೆ ತೆಲ್‌ಮಿ ಕೀರ್ತಿರ ಕಿರೀಟ.

³²ಶಕ್ತಿವಂತಂವೊಕಿಂಜಿ ಬಲ್ಯ ತಾಳ್ಮೆ ಉಳ್ಳಂವೊ ಮೇಲಾನಂವೊ. ಒರ್‌ ಪಟ್ಟಣತ್‌ನ ಗೆಲ್ಲ್‌ವಂವೊಕಿಂಜಿ ತಾಂಡ ಚೆಡಿನ ಅಡ್‌ಕ್‌ವಂವೊ ಮೇಲಾನಂವೊ.

³³ಚೀಟಿನ ಮಡ್‌ಲ್‌ ಇಡ್‌ವಕಯ್ಯು, ಆಚೇಂಗಿ ಎಲ್ಲಾ ಕಾರ್ಯತ್‌ರ ತೀರ್ಮಾನವು ಯೆಹೋವಯಿಂಡಿಂಜಲೇ ಬಪ್ಪ.