Read Kodava ಜ್ಞಾನತ್‌ರ ಪಡಿಮ 17 Bible Online

ಜ್ಞಾನತ್‌ರ ಪಡಿಮ 17 - Kodava bible

ಜ್ಞಾನತ್‌ರ ಪಡಿಮ 17

¹ಜಗಳ ದುಂಬ್‌ನ ಮನೆಲ್ ಬಲ್ಯ ಊಟ ಉಂಬಕಿಂಜಿ ಸಮಾದಾನತ್‌ ತಿಂಬ ಚೆರಿಯ ತುಂಡ್‌ ಒಟ್ಟಿಯೇ ಮೇಲ್.

²ಬುದ್ದಿವಂತ ಅಡಿಯಾಳ್, ಅವಮಾನತ್‌ಲ್‌ ಬಡುಕ್ಕುವ ಮೋಂವೊನ ಆಳುವ. ಅಂವೊಂಡ ಅಣ್ಣತಮ್ಮಣಂಗಡ ಆಸ್ತಿಲ್‌ ಇಂವೊಂಗು ಪಾಲ್‌ ಕ್‌ಟ್ಟುವ.

³ಜನ ಬೊಳ್ಳಿನ ತಿತ್‌ ಬೂಕ್ಕು ಪಾತ್‌ರತ್‌ಲು ಪೊನ್ನ್‌ನ ತಿತ್ತ್‌ ತೊಳೆಯಿಲು ಇಟ್ಟಿತ್‌ ಪರೀಕ್ಷೆ ಮಾಡುವ, ಆಚೇಂಗಿ ಜನಡ ಹೃದಯತ್‌ನ ಪರೀಕ್ಷೆ ಮಾಡ್‌ವಂವೊ ಯೆಹೋವನೇ.

⁴ದುಷ್ಟ ಮೋಸಕಾರಂಗಡ ತಕ್ಕ್‌ಕ್‌ ಕೆಮಿ ಕೊಡ್‌ಪ. ಪೊಟ್ಟ್‌ಮಾರಿ ನಾಶ ಮಾಡುವಂಡ ತಕ್ಕ್‌ಕ್‌ ಕೆಮಿ ಕೊಡ್‌ಪ.

⁵ಗರೀಬನ ಪರಿಹಾಸ ಮಾಡ್‌ವಂವೊ ಅಂವೊನ ಸೃಷ್ಟಿ ಮಾಡ್‌ನಂವೊನ ಅವಮಾನ ಮಾಡ್‌ವ. ಬೋರೆ ಒಬ್ಬ ಅಪಾಯತ್‌ಲ್‌ ಇಪ್ಪದ್‌ನ ಕಂಡಿತ್‌ ಕುಶಿಪಡ್‌ವಂವೊಂಗ್‌ ಶಿಕ್ಷೆ ಕಂಡಿತ.

⁶ಕ್‌ರ್‌ಮಕ್ಕ ವಯಸ್ಸಾನಯಿಂಗಕ್‌ ಕಿರೀಟ. ಮಕ್ಕಡ ಕೀರ್ತಿ ಅಯಿಂಗಳ ಪೆತ್ತಯಿಂಗಳೇ

⁷ಉತ್ತಮವಾನ ತಕ್ಕ್‌ ಮೂಡಂಗ್‌ ಸೆರಿ ಆಪುಲೆ. ಅನ್ನನಾಚೇಂಗಿ ಪೊಟ್ಟ್‌ ಪರಿಯುವದ್‌ ಅದಿಪತಿಯಂಗಕ್‌ ಚೆನ್ನಂಗೂ ಸೆರಿ ಆಪುಲೆ.

⁸ಲಂಚ ಕೊಡ್‌ಪಂವೊಂಡ ದೃಷ್ಟಿಲ್‌ ಅದ್‌ ಮಂತೃತ್‌ರ ಕಲ್ಲುರನೆಕೆ ಇಪ್ಪ; ಅದಂಡ ಮೂಲಕ ಅಯಿಂಗಕ್‌ ಬೋಮಡಿಯಾನ ಎಲ್ಲ ಸಾತ್ಯಮಾಡುವ.

⁹ಕುತ್ತತ್‌ನ ಮನ್ನಿಚಿಡುವಂವೊ ಸ್ನೇಹತ್‌ನ ಕುಶಿ ಪಟ್ಟಂಡುಂಡ್. ಆಚೇಂಗಿ ಆ ವಿಷಯತ್‌ನ ಎಣ್ಣಿಯಂಡೇ ಇಂಜತೇಂಗಿ ಸ್ನೇಹಿತಂಗಳ ಸಹ ಬೋರೆ ಮಾಡಿರುವ.

¹⁰ಮೂಡನ ಅರ್ಥ ಮಾಡ್‌ಚಿಡೊಕ್‌ ನೂರ್‌ ಪೊಯ್ಯಿತ್‌ ಕೊಡ್‌ಪಕಿಂಜಿ ಬುದ್ದಿವಂತಂವೊಂಗ್‌ ಒಮ್ಮ ಚೂಕ್‌ಚಿಟ್ಟತೇಂಗಿ ಮದಿ ಆಪ.

¹¹ದುಷ್ಟ ದಂಗೆ ಏವೊಕೇ ಕುಶಿ ಪಡುವ; ಆಚೇಂಗಿ ಅಯಿಂಗಕ್‌ ಕಠಿಣ ದಂಡನೆ ಕ್‌ಟ್ಟುವನೆಕೆ ಕ್ರೂರದೂತನ ಅಂವೊಂಗ್‌ ವಿರೋದವಾಯಿತ್‌ ಅಯಿಪ.

¹²ತಾಂಡ ದಡ್ಡತನಲ್‌ ಕಳಿಚಂಡುಳ್ಳ ದಡ್ಡನ ಎದಿಕೆ ಕ್‌ಟ್ಟೊಕಿಂಜಿ ತಾಂಡ ಕುಟ್ಟಿಯಳ ಕಳ್‌ಂದಂಡ ಚೆಡಿಲ್‌ ಉಳ್ಳ ಕರಡಿನ ಎದಿಕೆ ಕ್‌ಟ್ಟೊದೇ ನಲ್ಲದ್.

¹³ನಲ್ಲದ್‌ ಮಾಡ್‌ನವೊಂಗ್‌ ಕ್‍ೕಡ್‌ ಮಾಡ್‌ನಂವೊಂಡ ಮನೆನ, ಕ್‍ೕಡ್‌ ಬುಟ್ಟಿತ್‌ ಪೋಪುಲೆ.

¹⁴ವಿವಾದತ್‌ನ ಸುರುಮಾಡ್‌ವದ್‌ ನೀರ್‌ಕಟ್ಟೆನ ತೊರ್‌ಂದನೆಕೆ. ಆನಗುಂಡ್‌ ಅದ್‌ ಬಲ್ಯದಾಪಕ್‌ ಮಿಂಞಲೇ ನಿಪ್ಪ್‌ಚಿಡ್.

¹⁵ಅಪರಾದಿನ ಕುತ್ತಯಿಲ್ಲತಂವೊಂದ್‌ ಎಣ್ಣುವಂವೊನ ಪಿಂಞ ನೀತಿವಂತಂವೊನ ಅಪರಾದೀಂದ್‌ ಎಣ್ಣುವ ದಂಡಾಳ್‌ನೂ ಯೆಹೋವಂಗ್‌ ಅಸಹ್ಯವಾನಯಿಂಗ.

¹⁶ಜ್ಞಾನತ್‌ನ ಕ್ರಯಕ್‌ ಎಡ್‌ಪಕಾಯಿತ್‌ ಮೂಡಂಡ ಕೈಯಿಲ್‌ ದುಡ್ಡ್ ಎನ್ನಂಗ್? ಅದ್‌ಂಡ ವಿಷಯತ್‌ ಅಂವೊಂಗ್‌ ಮನಸ್ಸ್‌ ಇಲ್ಲೆಲ್ಲಾ.

¹⁷ಸ್ನೇಹಿತ ಎಲ್ಲಾ ಸಮಯತ್‌ಲು ಪ್ರೀತಿ ಮಾಡುವ. ಇಕ್ಕಟ್‌ರ ಸಮಯತ್‌ ಸಹಾಯ ಮಾಡುವಕೇ ಅಣ್ಣತಮ್ಮಣಂಗ ಪುಟ್ಟಿತುಂಡ್.

¹⁸ಬುದ್ದಿಯಿಲ್ಲತ ಮನುಷ್ಯನೇ ತಾಂಡ ಸ್ನೇಹಿತ ಎಡ್‌ತ ಸಾಲಕ್‌ ಜಾಮೀನ್‌ ಕೊಡ್‌ಪ.

¹⁹ಜಗಳತ್‌ನ ಕುಶಿ ಪಡುವಂವೊ ಪಾಪತ್‌ನ ಕುಶಿ ಪಡುವ. ತಾಂಡ ಪಡಿನ ಎತ್ತರತ್‌ಲ್‌ ಕಟ್ಟ್‌ವಂವೊ ಕ್‍ೕಡ್‌ನ ಬಪ್ಪ್‌ಚಿಡುವ.

²⁰ಕಪಟ ಹೃದಯ ಉಳ್ಳಯಿಂಗ ನಲ್ಲದ್‌ನ ಕಾಂಬುಲೆ. ಪೊಟ್ಟ್‌ ಪರಿಯುವಂವೊಂಗ್‌ ತೊಂದರೆಯೇ ಗತಿ.

²¹ಮೂಡನ ಪೆತ್ತಂವೊಂಗ್‌ ದುಂಬ ದುಃಖ. ಅಂವೊಂಡ ಅಪ್ಪಂಗ್‌ ಕುಶಿ ಇಪ್ಪುಲೆ.

²²ಮನಸ್ಸ್‌ರ ಸಂತೋಷ ಒರ್‌ ನಲ್ಲ ಮದ್ದ್. ಆಚೇಂಗಿ ಆತ್ಮತ್‌ರ ದುಃಖ ಮೂಳೆನ ಕೀವ್‌ಚಿಡುವ.

²³ದುಷ್ಟ, ನ್ಯಾಯತ್‌ನ ಬದ್‌ಲ್‌ ಮಾಡ್‌ವಕ್‌ ಮಡ್‌ಲ್‌ ಉಳ್ಳ ಲಂಚತ್‌ನ ಸ್ವೀಕಾರ ಮಾಡಿಯೊವ.

²⁴ಬುದ್ದಿವಂತಂವೊಂಡ ಮಿಂಞ ಜ್ಞಾನವೇ ಇಪ್ಪ. ಆಚೇಂಗಿ ಮೂಡಂಡ ಕಣ್ಣ್‌ ಈ ಬೂಮಿರ ಕಡೇಕತ್ತನೆ ತಿರ್‌ಗಿಯಂಡಿಪ್ಪ.

²⁵ಮೂಡನಾನ ಮೋಂವೊ ತಾಂಡ ಅಪ್ಪಂಗ್‌ ಬೇಸರ, ಪೆತ್ತ ಅವ್ವೊಂಗ್‌ ಕಯಿಪು ಆಯಿತ್‌ಪ್ಪ.

²⁶ಕುತ್ತಯಿಲ್ಲತಂವೊಂಗ್‌ ದಂಡನೆ ಕೊಡ್‌ಪದು ಗೌರವ ಉಳ್ಳ ಮನುಷ್ಯನ ಪೊಯ್ಯೊದು ನಲ್ಲದಿಲ್ಲೆ.

²⁷ಬುದ್ದಿವುಳ್ಳಂವೊ ತಾಂಡ ಬಾಯಿನ ಅಡಕ್‌ವ. ವಿವೇಕ ಉಳ್ಳಂವೊ ಶಾಂತ ಮನಸ್ಸ್‌ ಉಳ್ಳಂವೊ.

²⁸ಮೌನವಾಯಿತ್‌ ಇಂಜತೇಂಗಿ ಮೂಡನ ಸಹ ಜ್ಞಾನಿರನೆಕೆ ಕಾಂಬ. ತಕ್ಕ್‌ ಪರಿಯತೆ ಪೋಚೇಂಗಿ ವಿವೇಕೀಂದ್‌ ಎಣ್ಣುವ.