Read Kodava ಜ್ಞಾನತ್‌ರ ಪಡಿಮ 19 Bible Online

ಜ್ಞಾನತ್‌ರ ಪಡಿಮ 19 - Kodava bible

ಜ್ಞಾನತ್‌ರ ಪಡಿಮ 19

¹ಕಪಟವಾಯಿತ್‌ ತಕ್ಕ್‌ ಪರಿವ ಮೂಡಕಿಂಜಿ, ಸತ್ಯತ್‌ಲ್‌ ನಡ್‌ಪ ಗರಿಬನೇ ಮೇಲ್.

²ಮನುಷ್ಯಂಗ್‌ ಅರಿವು ಇಲ್ಲತೆ ಇಪ್ಪದ್‌ ನಲ್ಲದಿಲ್ಲೆ. ದುಡುಕುವ ಕಾಲ್‌ ಬಟ್ಟೆ ತಪ್ಪಿ ಪೋಪ.

³ಮನುಷ್ಯ ದಡ್ಡತನತ್‌ಂಜ ತಾಂಡ ಬದ್‌ಕ್‌ರ ಬಟ್ಟೆನ ಕೆಡ್‌ತಿಯೊವ. ಅಲ್ಲಿಂಜ ಯೆಹೋವಂಡ ಮೇಲೆ ಚೆಡಿ ಮಾಡಿಯೊವ.

⁴ಐಶ್ವರ್ಯ, ದುಂಬ ಸ್ನೇಹಿತಂಗಳ ಕೂಟುವ. ಆಚೇಂಗಿ ಗರಿಬಂಗ್, ಉಳ್ಳ ಸ್ನೇಹಿತನು ಬುಟ್ಟಿತ್‌ ಪೋಪ.

⁵ಪೊಟ್ಟ್‌ ಸಾಕ್ಷಿ ಪರಿಯುವಂವೊಂಗ್‌ ದಂಡನೆ ಕಂಡಿತ. ಪೊಟ್ಟ್‌ ಪರಿಯುವಂವೊನು ತಪ್ಪ್‌ಚಿಡುವಕಯ್ಯುಲೆ.

⁶ಗೌರವ ಉಳ್ಳ ಮನುಷ್ಯಂಡ ದಯೆ ಕ್‌ಟ್ಟ್‌ವಕ್‌ ದುಂಬ ಜನ ಪೇಚಾಡುವ. ಉದಾರಿಯಾನ ಮನುಷ್ಯಂಗ್‌ ಎಲ್ಲಾರು ಸ್ನೇಹಿತ.

⁷ಗರಿಬನ ಅಂವೊಂಡ ಮನೆಕಾರ ಎಲ್ಲಾರು ವಿರೋದ ಮಾಡುವಲ್ಲ. ಅನ್ನನಾಚೇಂಗಿ ಇಂಞು ಎಚ್ಚಕ್‌ ಅಂವೊಂಡ ಸ್ನೇಹಿತಂಗ ದೂರ ಆಪ. ಅಯಿಂಗಡ ಸಹಾಯಕಾಯಿತ್‌ ಅಂವೊ ಬೋಡ್‌ಚೇಂಗಿಯು, ಅಯಿಂಗ ಅಂವೊಂಗ್‌ ಕ್‌ಟ್ಟುಲೆ.

⁸ಜ್ಞಾನತ್‌ನ ಪಡೆಯುವಂವೊ ತಾಂಡ ಆತ್ಮತ್‌ನ ಪ್ರೀತಿಚಿಡುವ. ಬುದ್ದಿನ ಕಾಪಾಡ್‌ವಂವೊ ನಲ್ಲದ್‌ನ ಪಡೆಯುವ.

⁹ಪೊಟ್ಟ್‌ ಸಾಕ್ಷಿ ಪರಿಯುವಂವೊಂಗ್‌ ದಂಡನೆ ಕಂಡಿತ. ಪೊಟ್ಟ್‌ ಪರಿಯುವಂವೊನು ತಪ್ಪ್‌ಚಿಡುವಕಯ್ಯುಲೆ.

¹⁰ಕಂಡಬಟ್ಟೆರ ಬದ್‌ಕ್‌ ಮೂಡಂಗ್‌ ಸೆರಿ ಆಪುಲೆ. ಅನ್ನನಾಚೇಂಗಿ ಗುಲಾಮೆ ರಾಜನ ಆಳ್‌ವಿಕೆ ಮಾಡೊದ್‌ ಇಂಞು ಮೋಸ.

¹¹ಮನುಷ್ಯಂಡ ವಿವೇಕ ಅಂವೊಂಡ ಚೆಡಿನ ಅಡಕುವ. ಕುತ್ತತ್‌ನ ಮನ್ನಿಚಿಡ್‌ವದ್‌ ಅಂವೊಂಗ್‌ ಕೀರ್ತಿ.

¹²ರಾಜಂಡ ಚೆಡಿ ಸಿಂಹ ಕೂತ್‌ಡ್‌ವನೆಕೆ ಇಪ್ಪ. ಆಚೇಂಗಿ ಅಂವೊಂಡ ದಯೆ ಪಿಲ್ಲ್‌ರ ಮೇಲೆ ಪೊಯ್ಯುವ ಮಂಜಿ ತುಳಿರನೆಕೆ ಇಪ್ಪ.

¹³ಮೂಡನಾನ ಮೋಂವೊ ಅಪ್ಪಂಗ್‌ ನಾಶತ್‌ನ ಕೊಂಡ ಬಪ್ಪ. ಜಗಳ ಮಾಡುವ ಪೊಣ್ಣ್‌ ನಿಕ್ಕತೆ ಚೋರುವ ನೀರ್‌ರನೆಕೆ ಇಪ್ಪ.

¹⁴ಮನೆಯು ಆಸ್ತಿಯು ಅಪ್ಪಂಗಡಕಿಂಜ ಕ್‌ಟ್ಟುವ ಬಾದ್ಯತೆ. ಆಚೇಂಗಿ ಬುದ್ದಿ ಉಳ್ಳ ಪೊಣ್ಣ್‌ನ ಯೆಹೋವ ಮಾತ್‌ರ ತಪ್ಪ ಕಯ್ಯು.

¹⁵ಸೋಮಾರಿತನ ವರಿಪೋಯಿತ್‌ ಬುದ್ದ್ ಪೋಪಕ್‌ ಮಾಡುವ, ಆಚೇಂಗಿ ಒಂದು ಪಣಿ ಮಾಡತೆ ಉಳ್ಳಂವು ಕೆಲಪೈಪಿಂಜ ನರಳುವ.

¹⁶ಆಜ್ಞೆಕ್‌ ತಗ್ಗಿತ್‌ ನಡ್‌ಪಂವೊ ತಾಂಡ ಜೀವತ್‌ನ ಕಾಪಾಡುವ. ಆಚೇಂಗಿ ತಾಂಡ ಬಟ್ಟೆಲ್‌ ಎಚ್ಚರಯಿಲ್ಲತೆ ನಡ್‌ಪಂವೊ ಚತ್ತ್‌ ಪೋಪ.

¹⁷ಗರಿಬಂಗ್‌ ದಯೆ ಕಾಟ್‌ವಂವೊ ಯೆಹೋವಂಗ್‌ ಸಾಲ ಕೊಡ್‌ಪ. ಅಂವೊ ಮಾಡ್‌ನ ಕಾರ್ಯಕ್‌ ಯೆಹೋವ ಬಹುಮಾನತ್‌ನ ತಿರಿತ್‌ ತಪ್ಪ.

¹⁸ಚಾಯಿಮಾಡುವಕುಳ್ಳ ಸಮಯ ಇಪ್ಪಕಲೇ ನೀಡ ಮೋಂವೊನ ಚಾಯಿಮಾಪ್ಂದುಳ್ಳ ನಂಬಿಕೇಲ್‌ ಶಿಕ್ಷೆ ಕೊಡ್; ಇಲ್ಲತಪೋಚೇಂಗಿ ಅಂವೊಂಡ ನಾಶಕ್‌ ನೀನ್‌ ಕಾರಣ ಆಪಿಯ.

¹⁹ಮುಂಜೆಡಿ ಉಳ್ಳಂವೊ ದಂಡನೆನ ಅನುಬವಿಚಿಡಂಡು. ಒಮ್ಮ ನೀನ್‌ ಅಂವೊನ ತಪ್ಪುಚಿಡುವಕ್‌ ಮಾಡ್‌ಚೇಂಗಿ, ಪ್ರತಿಕುರಿಯು ನೀನ್‌ ಅನ್ನನೆ ಮಾಡ್‌ವನೆಕೆ ಆಪ.

²⁰ಆಲೋಚೆನೆಕ್‌ ಕೆಮಿಕೊಡ್‌ತಿತ್, ಬುದ್ದಿತಕ್ಕ್‌ನ ಸ್ವೀಕಾರ ಮಾಡ್. ಅಕ್ಕ ಕಡೇ ಕಾಲತ್‌ಲ್‌ ನೀನ್‌ ಜ್ಞಾನಿ ಆಪಿಯ.

²¹ಮನುಷ್ಯಂಡ ಮನಸ್ಸ್‌ಲ್‌ ಅನೇಕ ಯೋಜನೆ, ಆಚೇಂಗಿಯು ಯೆಹೋವಂಡ ಚಿತ್ತವೇ ನೆರವೇರುವ.

²²ತನ್ನ ಎಕ್ಕಾಲು ಪ್ರೀತಿಚಿಡಂಡೂಂದೇ ಮನುಷ್ಯ ಆಸೆ ಪಡುವ. ಪೊಟ್ಟ್‌ ಪರಿಯುವಕಿಂಜಿ ಗರೀಬನಾಯಿತ್‌ ಇಪ್ಪದೇ ಮೇಲ್.

²³ಯೆಹೋವಂಗ್‌ ಬೊತ್ತಿತ್‌ ನಡ್‌ಪಯಿಂಗ ದುಂಬ ಕಾಲ ಬದ್‌ಕುವ. ಅದ್‌ನ ಪಡ್‌ಂದಂವೊ ತೃಪ್ತಿ ಆಯಿತ್‌ ನೆಲೆನಿಪ್ಪ. ಕ್‍ೕಡ್‌ ಅಂವೊಂಡ ಪಕ್ಕ ಬಪ್ಪುಲೆ.

²⁴ಸೋಮಾರಿ ತಾಂಡ ಕೈಯಿನ ತಟ್ಟೆಲ್‌ ಬೆಚ್ಚಿತ್, ಅದ್‌ನ ಪುನಃ ತಾಂಡ ಬಾಯಿಕ್‌ ಸಹ ಎಡ್‌ತಂಡ್‌ ಪೋಪುಲೆ.

²⁵ಪರಿಹಾಸ ಮಾಡ್‌ವಂವೊನ ದಂಡ್‌ಚಿಡ್, ಅಕ್ಕ ಸಾದು ಮನುಷ್ಯ ಬುದ್ದಿವಂತನಾಪ. ವಿವೇಕವುಳ್ಳಂವೊನ ಎಚ್ಚರ ಮಾಡ್‌ಚೇಂಗಿ ಅಂವೊ ಅರಿವುನ ಅರ್ಥಮಾಡಿಯೊವ.

²⁶ಅಪ್ಪನ ಹಿಂಸೆಪಡುತಿತ್‌ ಅವ್ವನ ಓಡ್‌ಚಿಡುವಂವೊ ಞಾಣಕ್‍ೕಡ್‌ನ ಪಿಂಞ ಅವಮಾನತ್‌ನ ಕೊಂಡಬಪ್ಪ.

²⁷ನಾಡ ಮೋನೇ, ನೀನ್‌ ಬುದ್ದಿತಕ್ಕ್‌ಕ್‌ ಕೆಮಿ ಕೊಡ್‌ಕತೆ ಪೋಚೇಂಗಿ, ಅರಿವ್‌ನ ತಪ್ಪ ತಕ್ಕ್‌ಯಿಂಜ ದೂರ ಪೋಪಿಯ.

²⁸ಅನ್ಯಾಯ ಸಾಕ್ಷಿ ನ್ಯಾಯತ್‌ನ ಪರಿಹಾಸ ಮಾಡುವ. ದುಷ್ಟಂಡ ಬಾಯಿ ಕ್‍ೕಡ್‌ನ ಮುಗ್ಗಿರುವ.

²⁹ಪರಿಹಾಸ ಮಾಡ್‌ವಯಿಂಗಕ್‌ ದಂಡನೆಯು, ಮೂಡಂಗಡ ಬೆನ್ನ್‌ಕ್ ಪೊಯ್ತು ತಯಾರಾಯಿತ್ ಉಂಡ್.