Read Kodava ಜ್ಞಾನತ್‌ರ ಪಡಿಮ 2 Bible Online

ಜ್ಞಾನತ್‌ರ ಪಡಿಮ 2 - Kodava bible

ಜ್ಞಾನತ್‌ರ ಪಡಿಮ 2

¹ನಾಡ ಮೋನೇ, ನಾನ್‌ ಎಣ್ಣುವ ತಕ್ಕ್‌ನ ಕ್‍ೕಟಿತ್, ನಾಡ ಆಜ್ಞೆನ ಒರ್‌ ಬಂಡಾರನೆಕೆ ಕಾಪಾಡಿತ್,

²ನಾಡ ಜ್ಞಾನತ್‌ರ ತಕ್ಕ್‌ಕ್‌ ಚಾಯಿತೆ ಕೆಮಿ ಕೊಡ್. ಅದ್‌ನ ಅರ್ಥ ಮಾಡಿಯೊಕ್‌ ದುಂಬ ಪ್ರಯತ್‌ನ ಪಡ್.

³ಬುದ್ದಿ ಕ್‌ಟ್ಟ್‌ವಕಾಯಿತ್‌ ಬೋಡಿಯಂಡ್, ಅರ್ಥ ಮಾಡಿಯೊಕ್‌ ಮೊರೆ ಇಡ್.

⁴ಅದ್‌ನ ಬೊಳ್ಳಿನ ತ್‍ೕಡ್‌ವನೆಕೆ ತ್‍ೕಡ್. ಒಳ್‌ಪ್‌ಚಿಟ್ಟಿತ್‌ ಬೆಚ್ಚ ಬಂಡಾರತ್‌ನ ತ್‍ೕಡ್‌ವನೆಕೆ ತ್‍ೕಡ್‌

⁵ಇದ್‌ನೆಲ್ಲಾ ಮಾಡ್‌ಚೇಂಗಿ, ಯೆಹೋವಂಗ್‌ ಬೊತ್ತ್‌ವದ್‌ ಎಂತ ಎಣ್ಣಿಯಂಡ್‌ ನೀಕ್‌ ಅರ್ಥ ಆಪ, ದೇವಡ ಅರಿವ್‌ ನೀಕ್‌ ಕ್‌ಟ್ಟುವ.

⁶ಯೆಹೋವನೆ ಜ್ಞಾನ ತಪ್ಪಂವೊ. ಅಂವೊಂಡ ತಕ್ಕ್‌ಯಿಂಜ ಅರಿವು ಬುದ್ದಿಯು ಕ್‌ಟ್ಟ್‌ವ.

⁷ಅಂವೊ ನೀತಿವಂತಯಿಂಗಕಾಯಿತ್‌ ನೇರಾನ ಜ್ಞಾನತ್‌ನ ಕೂಟಿ ಬೆಚ್ಚಿತುಂಡ್; ಸತ್ಯತ್‌ಲ್‌ ನಡ್‌ಪಯಿಂಗಕ್‌ ಅಂವೊ ಪಡೆತಟ್ಟೆಯಾಯಿತ್‌ ಇಪ್ಪ.

⁸ಅಂವೊ ನೀತಿವಂತಯಿಂಗಡ ಬಟ್ಟೆನ ಕಾಪಾಡಿತ್, ಅಂವೊಂಡ ಬಕ್ತಂಗಡ ಬದ್‌ಕ್‌ನ ಕಾಪಾಡುವ.

⁹ಅಕ್ಕ ನೀನ್‌ ನೀತಿನ, ನ್ಯಾಯನ ನಲ್ಲದ್‌ನ ಅರ್ಥಮಾಡಿಯಂಡ್, ನೇರಾನ ಬಟ್ಟೇನ ಅರ್‌ಂಜೊವಿಯ.

¹⁰ಅನ್ನನೆ ಜ್ಞಾನ ನೀಡ ಹೃದಯತ್‌ಲ್‌ ಪ್ರವೇಶ ಮಾಡಿತ್, ಅರಿವು ನೀಡ ಆತ್ಮಕ್‌ ಸುಕವಾಯಿತ್‌ಪ್ಪ.

¹¹ನಲ್ಲ ಯೋಚನೆ ನಿನ್ನ ಕಾಪಾಡುವ. ಬುದ್ದಿ ನಿನ್ನ ಬದ್ರವಾಯಿತ್‌ ಬೆಚ್ಚೊವ.

¹²ಅನ್ನನಾಯಿತ್‌ ನೀನ್‌ ದುಷ್ಟಂಗ ಪೋಪ ಬಟ್ಟೆಯಿಂಜ, ಪಿಂಞ ಕಪಟಿ ಜನಯಿಂಜ ಬಚಾವ್‌ ಆಪಿಯ.

¹³ಆಚೇಂಗಿ ದುಷ್ಟಂಗ ಇರ್‌ಟ್‌ರ ಬಟ್ಟೆಲ್‌ ನಡ್‌ಕಂಡೂಂದ್‌ ನೀತಿರ ಬಟ್ಟೆನ ಬುಟ್ಟಿತ್‌ ಪೋಯಂಡುಂಡ್.

¹⁴ಅಯಿಂಗ ಕ್‍ೕಡ್‌ ಮಾಡ್‌ವದ್‌ಲ್‌ ಕುಶಿಪಟ್ಟಿತ್, ದುಷ್ಟಂಗಡ ಕಪಟತನತ್‌ನ ನೋಟಿತ್‌ ಸುಕತ್‌ಲ್‌ ಕಳಿಪ.

¹⁵ಅಯಿಂಗಡ ಬಟ್ಟೆ ಕಪಟವಾನದು, ಅಯಿಂಗಡ ನಡತೆ ಕ್‍ೕಡಾನದು ಆಯಿತ್‌ ಉಂಡ್.

¹⁶ತಾಂಡ ಬಾಲ್ಯಕಾಲತ್‌ರ ವಡಿಯನ ಬುಟ್ಟಿತ್, ತಾನ್‌ ದೇವಡ ಮಿಂಜತ್‌ ಮಾಡ್‌ನ ಒಡಂಬಡಿಕೆನ ಮರ್‌ಂದಿತ್,

¹⁷ನೊಣೆ ತಕ್ಕ್‌ ಪರ್‌ಂದಿತ್‌ ತಾಂಡ ಬಲೇಕ್‌ ಬೂವನೆಕೆ ಮಾಡುವ. ವ್ಯಬಿಚಾರಿಯಾನ ಇವಡ ಕೈಯಿಂಜ ಜ್ಞಾನ ನಿನ್ನ ಕಾಪಾಡುವ.

¹⁸ಅವಡ ಮನೆಕ್‌ ಪೋಪದ್, ಚಾವಕ್‌ ಪೋಪನೆಕೆ ಇಪ್ಪ, ಅವ ಪೋಪ ಬಟ್ಟೆ ನರಕಕ್‌ ಪೋಪ ಬಟ್ಟೆಯಾಯಿತುಂಡ್.

¹⁹ಅವಡ ಪಕ್ಕ ಪೋಪಯಿಂಗ ದಾರು ತಿರಿತ್‌ ಬಪ್ಪದು ಇಲ್ಲೆ, ಜೀವತ್‌ರ ಬಟ್ಟೆನ ಪುನಃ ಕಂಡ್‌ ಪುಡಿಪದು ಇಲ್ಲೆ.

²⁰ಆನಗುಂಡ್, ನೀನ್‌ ನಲ್ಲ ಮುನುಷ್ಯಂಗಡ ಬಟ್ಟೆಲ್‌ ನಡ್‌ಂದಿತ್, ನೀತಿವಂತಯಿಂಗಡ ಬದ್‌ಕ್‌ರನೆಕೆ ಬದ್‌ಕೊಂಡು.

²¹ಎನ್ನಂಗೆಣ್ಣ್‌ಚೇಂಗಿ ಸತ್ಯವಂತಯಿಂಗಳೇ ಈ ಬೂಮಿಲ್‌ ವಾಸ ಮಾಡ್‌ವ. ಸತ್ಯತ್‌ಲ್‌ ನಡ್‌ಪಯಿಂಗ ಅದ್‌ಲ್‌ ನೆಲೆಗೊಳ್ಳುವ.

²²ಆಚೇಂಗಿ ದುಷ್ಟಂಗ ಈ ಬೂಮಿಯಿಂಜ ಪಾಳಾಯಿ ಪೋಪ; ದ್ರೋಹಿಯ ಬೂಮಿಲ್‌ ಇಲ್ಲತನೆಕೆ ನಾಶ ಆಯಿಪೋಪ.