Read Kodava ಜ್ಞಾನತ್‌ರ ಪಡಿಮ 20 Bible Online

ಜ್ಞಾನತ್‌ರ ಪಡಿಮ 20 - Kodava bible

ಜ್ಞಾನತ್‌ರ ಪಡಿಮ 20

¹ದುಂಬ ಕಳ್ಳ್ ಕುಡಿಪಂವೊ ಪರಿಹಾಸ ಮಾಡುವ, ದುಂಬ ಕುಡ್‌ಕನಾನಂವೊ ಕೂತ್‌ಡ್‌ವ. ಇದ್‌ಲಿಂಜ ಬಟ್ಟೆ ತಪ್ಪಿ ಪೋಪಂವೊ ಜ್ಞಾನ ಉಳ್ಳಂವೊನಾಯಿತ್‌ ಇಪ್ಪುಲೆ.

²ರಾಜಂಡ ಚೆಡಿ ಸಿಂಹತ್‌ರ ಕೂಪಡೆಕ್‌ ಸೆರಿಸಮ. ರಾಜನ ಚೆಡಿಮಾಡ್‌ವಂವೊ ತಾಂಡ ಜೀವತ್‌ನ ಪಾಳ್‌ ಮಾಡಿಯೊವ.

³ವಾದತ್ತಿಂಜ ದೂರ ಇಪ್ಪಂವೊಂಗ್‌ ಗೌರವ. ಆಚೇಂಗಿ ಎಲ್ಲಾ ಮೂಡಂಗಳು ಜಗಳಕ್‌ ಆತುರ ಪಡುವ.

⁴ಸೋಮಾರಿಯಾನಂವೊ ಕುಳ್‌ರ್ ಎಣ್ಣಿಯಂಡ್‌ ಸೆರಿಯಾನ ಕಾಲತ್‌ ಉಪ್ಪ್‌ಲೆ. ಕೊಯ್ಯಿಪಣಿರ ಕಾಲತ್‌ ಬೋಡ್‌ಚೇಂಗಿಯು ಅಂವೊಂಗ್‌ ಒಂದು ಕ್‌ಟ್ಟುಲೆ.

⁵ಮನುಷ್ಯಂಡ ಮನಸ್ಸ್‌ರ ಯೋಜನೆ ಆಳವಾನ ನೀರ್‌ರನೆಕೆ. ಆಚೇಂಗಿ ಬುದ್ದಿ ಉಳ್ಳಂವೊ ಅದ್‌ನ ಬಲಿಪ.

⁶ಎಕ್ಕಾಲು ಪ್ರೀತಿಚಿಡ್‌ವೀಂದ್‌ ಸುಮಾರ್‌ ಜನ ಪ್ರಕಟಿಚಿಡುವ. ಆಚೇಂಗಿ ನಂಬಿಗಸ್ತನಾನ ಒಬ್ಬನ ದಾರ್‌ಕ್‌ ಕಂಡ್‌ಪುಡಿಪಕಯ್ಯು?

⁷ನೀತಿವಂತಂವೊ ಸತ್ಯತ್‌ಲ್‌ ಜೀವನ ಮಾಡುವ. ಅಯಿಂಗಡ ಕಾಲ ಆನ ಪಿಂಞ ಅಂವೊಂಡ ಮಕ್ಕ ಆಶೀರ್ವಾದ ಪಡ್‌ಂದಯಿಂಗಳಾಯಿತ್‌ಪ್ಪ.

⁸ನ್ಯಾಯತೀರ್‌ಪ್‌ ಮಾಡ್‌ವ ಸಿಂಹಾಸನತ್‌ಲ್‌ ಅಳ್‌ತಂಡಿಪ್ಪ ರಾಜ ತಾಂಡ ಕಣ್ಣಿಂಜಲೇ ಎಲ್ಲಾ ಕ್‍ೕಡ್‌ನ ಬೋರೆ ಮಾಡುವ.

⁹ನಾಡ ಹೃದಯತ್‌ನ ಶುದ್ದ ಮಾಡ್‌ನ, ನಾಡ ಪಾಪಯೆಲ್ಲಾ ಪೋಪನೆಕೆ ಶುದ್ದ ಮಾಡ್‌ನ್‍ೕಂದ್‌ ದಾರ್‌ಕ್‌ ಎಣ್ಣುವಕಯ್ಯು?

¹⁰ತೂಕತ್‌ರ ಕಲ್ಲ್‌ನ ಪಿಂಞ ಅಳ್‌ತೆರ ಪಾತ್‌ರತ್‌ನ ಜಾಸ್ತಿ ಪಿಂಞ ಕಮ್ಮಿ ಮಾಡ್‌ವದು ಯೆಹೋವಂಗ್‌ ಅಸಹ್ಯ.

¹¹ಕುಂಞಿ ಆಚೇಂಗಿಯು, ಅಂವೊ ಮಾಡ್‌ವ ಕೆಲಸ ಶುದ್ದವಾನದಾ, ಸತ್ಯವಾನದಾ ಎಣ್ಣಿಯಂಡ್‌ ಅಂವೊಂಡ ನಡತೆಯಿಂಜಲೇ ಗೊತ್ತಾಪ.

¹²ಕ್‍ೕಪ ಕೆಮಿ, ಕಾಂಬ ಕಣ್ಣ್, ಈ ದಂಡನು ಸೃಷ್ಟಿ ಮಾಡ್‌ನಂವೊ ಯೆಹೋವನೇ.

¹³ವರ್‌ಕ್‌ನ ಪ್ರೀತಿ ಮಾಡತೆ, ಇಲ್ಲತ ಪೋಚೇಂಗಿ ನೀನ್‌ ಗರಿಬನಾಪಿಯ. ಕಣ್ಣ್‌ನ ತೊರ್‌ಂದಿತ್‌ ಇರ್, ಅಕ್ಕ ನೀನ್‌ ಆಹಾರತ್‌ಂಜ ತೃಪ್ತಿ ಆಪಿಯ.

¹⁴ಕ್ರಯಕ್‌ ಎಡ್‌ಪಂವೊ: ಚಾಯಿಲೆ, ಚಾಯಿಲೇಂದ್‌ ಎಣ್ಣುವ. ಅಲ್ಲಿಂಜ ಪೋನ ಪಿಂಞ ಕೊಚ್ಚ್‌ವ.

¹⁵ಪೊನ್ನು ಮಾಣಿಕ್ಯವು ದುಂಬ ಉಂಡ್. ಆಚೇಂಗಿ ಅರಿವು ದುಂಬ್‌ನ ತಕ್ಕ್‌ ಅಪೂರ್ವ ಆಭರಣ.

¹⁶ಒಬ್ಬಂಡ ಸಾಲಕ್‌ ಜಾಮೀನ್‌ ಕೊಡ್‌ತವಂವೊಂಡ ಉಡ್‌ಪ್‌ನ ಎಡ್‌ತ. ಗೊತ್ತಿಲ್ಲತ ಒಬ್ಬಂಡ ತಕ್ಕ್‌ಕಾಯಿತ್‌ ಅಂವೊಂಡ ಕೈಯಿಂಜ ಪನ ಜಾಮೀನ್‌ ಎಡ್‌ತ.

¹⁷ಅನ್ಯಾಯತ್‌ ಸಂಪಾದನೆ ಮಾಡ್‌ನ ಆಹಾರ ಸುರುಲ್‌ ರಸತ್‌ ಉಂಡೇಂಗಿಯು, ಬಯ್ಯ ಬಾಯಿ ದುಂಬ ಮಣ ಇಪ್ಪ.

¹⁸ಆಲೋಚೆನ ಮಾಡ್‌ನ ಯೋಜನೆ ನೆರವೇರುವ. ನಲ್ಲ ಆಲೋಚನೆನ ಕ್‍ೕಟಿತ್‌ ಯುದ್ದ ಮಾಡ್.

¹⁹ಬೋರೆಯಿಂಗಡ ಮೇಲೆ ಕುತ್ತ ಪರ್‌ಂದಿತ್‌ ತಿರಿಗಿಯಂಡ್‌ ಇಪ್ಪಂವೊ ಗುಟ್ಟ್‌ನ ಬಾಯಿಬುಟ್ಟ್‌ರ್‌ವ. ಆನಗುಂಡ್‌ ಮಿತಿಮೀರಿತ್‌ ತಕ್ಕ್‌ ಪರಿಯುವಂವೊಂಡ ಸಹವಾಸ ಮಾಡತೆ.

²⁰ತಾಂಡ ಅಪ್ಪನ ಆಡ್‌ ಅವ್ವೊನ ಆಡ್‌ ಶಾಪ ಮಾಡುವಂವೊಂಡ ಬೊಳ್‌ಚ ಇರ್‌ಟ್‌ಲ್‌ ಆರಿಪೋಪ.

²¹ಬದ್‌ಕ್‌ರ ಸುರುಲ್‌ ಕ್‌ಟ್ಟ್‌ನ ಬಾದ್ಯತೆಕ್‌ ಕಡೆಲ್‌ ಆಶೀರ್ವಾದತ್‌ನ ತಪ್ಪ್‌ಲೆ.

²²ಕ್‍ೕಡ್‌ ಮಾಡ್‌ನವೊಂಗ್‌ ಕ್‍ೕಡ್‌ ಮಾಡುವೀಂದ್‌ ಎಣ್ಣತೆ. ಯೆಹೋವಂಗ್‌ ಕಾತಂಡಿರ್, ಅಂವೊ ನೀಕ್‌ ಸಹಾಯ ಮಾಡುವ.

²³ತೂಕತ್‌ರ ಕಲ್ಲ್‌ನ ಜಾಸ್ತಿ ಮಾಡ್‌ವದು ಕಮ್ಮಿ ಮಾಡ್‌ವದು ಯೆಹೋವಂಗ್‌ ಅಸಹ್ಯ. ಮೋಸತ್‌ರ ತಕ್ಕಡಿ ನಲ್ಲದಿಲ್ಲೆ.

²⁴ಮನುಷ್ಯಂಡ ಬದ್‌ಕ್‌ರ ಬಟ್ಟೆನ ತೀರ್ಮಾನ ಮಾಡ್‌ವಂವೊ ಯೆಹೋವನೇ. ಆನಗುಂಡ್‌ ಮನುಷ್ಯ ತಾಂಡ ಬಟ್ಟೆನ ಎನ್ನನೆ ಅರ್ಥ ಮಾಡುವಕಯ್ಯು?

²⁵ಗೇನ ಮಾಡತೆ ಬೆರಿಯ ದೇವಕ್‌ ಪರಕೆ ಮಾಡ್‌ವದು, ಪರಕೆ ಮಾಡ್‌ನ ಪಿಂಞ ಗೇನ ಮಾಡುವದು ಮನುಷ್ಯಂಗ್‌ ಕೆಣಿ ಆಯಿತ್‌ಪ್ಪ.

²⁶ಜ್ಞಾನಿಯಾನ ರಾಜ ದುಷ್ಟಂಗಳ ಬೋರೆಮಾಡಿತ್, ಅಯಿಂಗಡ ಮೇಲೆ ಉಳ್‌ಪ ಚಕ್ರತ್‌ನ ಉರ್‌ಟಿರುವ.

²⁷ಮನುಷ್ಯಂಡ ಆತ್ಮ ಯೆಹೋವಂಡ ಬೊಳ್‌ಚ ಆಯಿತುಂಡ್. ಅದ್‌ ಮನಸ್ಸ್‌ರ ಆಳತ್‌ ಉಳ್ಳದ್‌ನೆಲ್ಲಾ ತ್‍ೕಡುವ.

²⁸ಪ್ರೀತಿಯು ಸತ್ಯವು ರಾಜನ ಕಾಪ. ಕರುಣೆರಗುಂಡ್‌ ಅಂವೊಂಡ ಸಿಂಹಾಸನ ನಿಪ್ಪ.

²⁹ಬಾಲೆಕಾರಂಗಡ ಕೀರ್ತಿ ಅಯಿಂಗಡ ತಡೀರತ್‌ರ ಶಕ್ತಿ. ಮುದುಕ್ಕಂಗಡ ಕೀರ್ತಿ ಅಯಿಂಗಡ ತೆಲ್‌ಮಿರ ನೆರೆ.

³⁰ಶಿಕ್ಷೆರಗುಂಡ್‌ ತಡೀಲ್‌ ಆಪ್ಪ ಗಾಯ ತಪ್ಪ್‌ ಮಾಡ್‌ವದ್‌ನ ನಿಪ್ಪ್‌ಚಿಡುವ, ಅದಂಡ ನೊಂಬಲ ಒರ್‌ ಮನುಷ್ಯಂಡ ಮನಸ್ಸ್‌ನ ಬದಲಾಯಿಚಿಡುವ.