Read Kodava ಜ್ಞಾನತ್‌ರ ಪಡಿಮ 21 Bible Online

ಜ್ಞಾನತ್‌ರ ಪಡಿಮ 21 - Kodava bible

ಜ್ಞಾನತ್‌ರ ಪಡಿಮ 21

¹ರಾಜಂಡ ಹೃದಯ ಯೆಹೋವಂಡ ಕೈಯಿಲ್‌ ತೋಡುರನೆಕೆ ಉಂಡ್. ಅದ್‌ನ ಅಂವೊಂಡ ಚಿತ್ತತ್‌ರನೆಕೆ ಏದ್‌ ಬರಿಕ್‌ ಬೋಂಡಿಯೇಂಗಿಯು ತಿರ್‌ಕುವ.

²ಒರ್‌ ಮನುಷ್ಯ ಮಾಡುವ ಕಾರ್ಯಯೆಲ್ಲ ಅಂವೊಂಡ ದೃಷ್ಟಿಕ್‌ ಸೆರಿಯಾಯಿತ್‌ ಕಾಂಗು, ಆಚೇಂಗಿ ಯೆಹೋವ ಅಂವೊಂಡ ಉದ್ದೇಶತ್‌ನ ಪರೀಕ್ಷೆ ಮಾಡುವ.

³ಬಲಿ ಕೊಡ್‌ಪಕಿಂಜಿ ನೀತಿನ ಪಿಂಞ ನ್ಯಾಯತ್‌ನ ಮಾಡ್‌ವದೇ ಯೆಹೋವಂಗ್‌ ಕುಶಿ.

⁴ಚೊಕ್ಕ್‌ಲ್‌ ನೋಟ್‌ವ ಕಣ್ಣು, ಆಂಗಾರತ್‌ರ ಹೃದಯ, ದುಷ್ಟಂಡ ಬೊಳ್‌ಚ ಎಲ್ಲಾ ಪಾಪ ಮಾಡ್‌ವಕ್‌ ಬಟ್ಟೆ ಕಾಟುವ.

⁵ಕಷ್ಟಪಟ್ಟಿತ್‌ ಕೆಲಸ ಮಾಡುವಂವೊಂಡ ಯೋಜನೆ ಅಬಿವೃದಿ ಪೊಂದ್ವನೆಕೆ ಮಾಡುವ. ಆತುರತ್‌ಲ್‌ ನಡ್‌ಪಂವೊಂಡ ಯೋಜನೆ ಗರಿಬನಾಪಕ್‌ ಮಾಡುವ.

⁶ಪೊಟ್ಟ್‌ ತಕ್ಕ್‌ಯಿಂಜ ಕ್‌ಟ್ಟ್‌ನ ಐಶ್ವರ್ಯ ಬೆರಿಯ ಇಲ್ಲತನೆಕೆ ಆಪ ಮಂಜ್‌ರನೆಕೆ, ಅದ್‌ ಚಾವ್‌ರ ಕೆಣಿ.

⁷ದುಷ್ಟಂಗ ನ್ಯಾಯತ್‌ನ ಮಾಡ್‌ವಕ್‌ ಮನಸ್ಸಿಲ್ಲತೆ ಇಪ್ಪಗುಂಡ್, ಅಯಿಂಗ ಮಾಡುವ ಹಿಂಸೆಯಿಂಜಲೇ ಅಯಿಂಗ ನಾಶ ಆಯಿಪೋಪ.

⁸ಕುತ್ತ ಉಳ್ಳಂವೊಂಡ ಬದ್‌ಕ್‌ರ ಬಟ್ಟೆ ಕ್‍ೕಡಾನದಾಯಿತ್‌ ಉಂಡ್. ಆಚೇಂಗಿ ಶುದ್ದವಾನಂವೊಂಡ ನಡ್‌ತೆ ನೇರಾನದ್.

⁹ಜಗಳಗಂಟಿರ ಕೂಡೆ ಬಲ್ಯ ಮನೆಲ್ ವಾಸ ಮಾಡೊಕಿಂಜಿ, ಮನೆರ ಕೊಡಿಲ್‌ ಒರ್‌ ಮೂಲೆಲ್‌ ವಾಸ ಮಾಡೊದೇ ಮೇಲ್.

¹⁰ದುಷ್ಟಂಡ ಮನಸ್ಸ್‌ ಕ್‍ೕಡ್‌ನ ಮಾಡೊಕ್‌ ಕುಶಿಪಡುವ. ಅಂವೊಂಡ ಕಣ್ಣ್‌ಲ್‌ ನೆರೆಮನೆಕಾರಂಗ್‌ ಕರುಣೆ ಇಲ್ಲೆ.

¹¹ಪರಿಹಾಸ ಮಾಡ್‌ವಂವೊನ ದಂಡ್‌ಚಿಡುವಕ ಸಾದು ಮನುಷ್ಯ ಅರಿವುನ ಪಡ್‌ಂದೊವ. ಬುದ್ದಿವಂತಂವೊನ ಬೋದನೆ ಮಾಡುವಕ ಅಂವೊ ಅರ್ಥಮಾಡಿಯೊವ.

¹²ನೀತಿವಂತಂವೊನಾನ ದೇವ ದುಷ್ಟಂಗಡ ಮನೆನ ಎಚ್ಚರ ಎಡ್‌ತಿತ್‌ ನೋಟಿತ್, ಅಯಿಂಗಳ ನಾಶ ಮಾಡಿರುವ.

¹³ಗರೀಬ ಕೂತ್‌ಡ್‌ವಕ ಕೆಮಿ ಕೊಡ್‌ಕತೆ ಪೋಚೇಂಗಿ, ತಾನ್‌ ಜೋರಾಯಿತ್‌ ಕೂತ್‌ಡುವಕ ದಾರು ಜವಾಬ್ ಕೊಡ್‌ಪ್‌ಲೆ.

¹⁴ಗುಟ್ಟಾಯಿತ್‌ ಕೊಡ್‌ಪ ಇನಾಮ್‌ ಚೆಡಿನ ಶಾಂತ ಪಡ್‌ತುವ. ಮಡ್‌ಲ್‌ ಉಳ್ಳ ಲಂಚ ಬಲ್ಯ ಚೆಡಿನ ಸಮಾದಾನ ಪಡ್‌ತುವ.

¹⁵ನ್ಯಾಯವಾನ ತೀರ್‌ಪ್‌ ನೀತಿವಂತಯಿಂಗಕ್‌ ಕುಶಿ, ಆಚೇಂಗಿ ದುಷ್ಟಂಗಕ್‌ ನಾಶ.

¹⁶ವಿವೇಕತ್‌ರ ಬಟ್ಟೆನ ಬುಟ್ಟಿತ್‌ ಪೋನಂವೊ ಕಡೇಕ್‌ ಚತ್ತಯಿಂಗಡ ಗುಂಪ್‌ಕ್‌ ಕೂಡಿರುವ.

¹⁷ಸುಕಬೋಗತ್‌ನ ಪ್ರೀತಿ ಮಾಡ್‌ವಂವೊ ಗರೀಬನಾಪ. ಕಳ್ಳ್‌ನೆ ಪಿಂಞ ಎಣ್ಣೆ[12] ಪ್ರೀತಿ ಮಾಡ್‌ವಂವೊ ಐಶ್ವರ್ಯವಂತಂವೊನಾಪುಲೆ.

¹⁸ನೀತಿವಂತಂವೊಂಗ್‌ ಬದ್‌ಲ್‌ ದುಷ್ಟನು, ಸತ್ಯವಂತಯಿಂಗಡ ಬದ್‌ಲ್‌ ದ್ರೋಹಿಯು ದಂಡನೆನ ಅನುಪವಿಚಿಡುವ.

¹⁹ಜಗಳಗಂಟಿಯು ಮುಂಜೆಡಿಯು ಉಳ್ಳ ಪೋಣ್ಣಾಳ್‌ರ ಕೂಡೆ ವಾಸ ಮಾಡುವಕಿಂಜಿ ಮಣಬೂಮಿಲ್‌ ವಾಸ ಮಾಡೊದೇ ಮೇಲ್.

²⁰ಜ್ಞಾನಿಯಾನಂವೊಂಡ ಮನೆಲ್ ಬೋಂಡಿಯಾನ ಸಂಪತು ಎಣ್ಣೆಯು ಇಪ್ಪ. ಆಚೇಂಗಿ ಮೂಡನಾನಂವೊ ತಾಂಡ ಪಕ್ಕ ಉಳ್ಳ ಎಲ್ಲಾನ ಮುಗ್ಗಿರುವ.

²¹ನೀತಿನ ಪಿಂಞ ಪ್ರೀತಿನ ತ್‍ೕಡ್‌ವಂವೊ, ನಲ್ಲ ಬದ್‌ಕ್‌ನ ನೀತಿನ ಪಿಂಞ ಗನತ್‌ನ ಪಡೆಯುವ.

²²ಜ್ಞಾನವುಳ್ಳಂವೊ ಶಕ್ತಿವಂತಯಿಂಗಡ ಪಟ್ಟಣತ್‌ರ ವಿರುದ್ದ ಪೋಯಿತ್‌ ಅಯಿಂಗ ನಂಬ್‌ನ ಬಲವಾನ ಕೋಟೆನ ನಾಶ ಮಾಡುವ.

²³ತಾಂಡ ಬಾಯಿನ ಪಿಂಞ ನಾವ್‌ನ ಕಾಪಂವೊ, ನಾಶತಿಂಜೆಲ್ಲ ಅಂವೊನ ಕಾಪಾಡಿಯೊವ.

²⁴ಬಡಾಯಿಯು ಆಂಗಾರವು ಉಳ್ಳಂವೊಂಗ್‌ ಪರಿಹಾಸಕಾರಂದ್‌ ಪೆದ. ಅಂವೊ ಗರ್ಬತ್‌ಂಜ ಬಲ್ಯ ಚೆಡಿಲ್‌ ನಡ್‌ಪ.

²⁵ಸೋಮಾರಿರ ದಂಡ್‌ ಕೈಯು ಕೆಲಸ ಮಾಡುವಕ್‌ ಒತ್ತತೆ ಪೋನಗುಂಡ್‌ ಅಂವೊಂಡ ಆಸೆ ಅಂವೊನ ಕೊಲ್ಲುವ.

²⁶ಅಂವೊ ದಿವಸಯೆಲ್ಲಾ ಕುಶಿಲ್‌ ಆಸೆಪಟ್ಟಂಡೇ ಉಂಡ್. ಆಚೇಂಗಿ ನೀತಿವಂತ ತಾಂಗಾಯಿತ್‌ ಬೆಕ್ಕತೆ ಉದಾರವಾಯಿತ್‌ ಕೊಡ್‌ಪ.

²⁷ದುಷ್ಟಂಗ ಕೊಡ್‌ಪ ಬಲಿ ಯೆಹೋವಂಗ್‌ ಅಸಹ್ಯವಾಯಿತುಂಡ್. ಅನ್ನನಾಚೇಂಗಿ, ಅದ್‌ನ ಕ್‍ೕಡಾನ ಯೋಜನೆಲ್‌ ಅರ್ಪಿಚಿಟ್ಟತೇಂಗಿ ಇಂಞು ಎಚ್ಚಕ್‌ ಅಸಹ್ಯವಾನದಾಯಿತ್‌ಪ್ಪ?

²⁸ಪೊಟ್ಟ್‌ ಸಾಕ್ಷಿ ಪರಿಯುವಂವೊ ನಾಶ ಆಯಿಪೋಪ. ಆಚೇಂಗಿ ಎಚ್ಚರಿಕೆಯಿಂಜ ಕ್‍ೕಪಂವೊ ಸಾಕ್ಷಿ ಕೊಡ್‌ತಿತ್‌ ಗೆಲ್ಲುವ.

²⁹ದುಷ್ಟ ತಾಂಡ ಮೂಡ್‌ನ ಶೂರಂಡನೆಕೆ ಕಾಂಬ್‌ಚಿಡುವ. ಆಚೇಂಗಿ ಸತ್ಯವಂತಂವೊ ತಾನ್‌ ಪೋಪ ಬಟ್ಟೆರ ವಿಷಯತ್‌ ಎಚ್ಚರಿಕೆಯಿಂಜ ಗೇನ ಮಾಡುವ.

³⁰ಮನುಷ್ಯಂಡ ಜ್ಞಾನವು, ಬುದ್ದಿಯು, ಆಲೋಚನೆಯು ಯೆಹೋವಂಡ ಮಿಂಞ ನಿಪ್ಪುಲೆ.

³¹ಸೈನ್ಯ ಯುದ್ದಕಾಯಿತ್‌ ಕುದುರೆನ ತಯಾರ್‌ ಮಾಡುವಕಾಪ್ಪ, ಆಚೇಂಗಿ ಜಯ ಕ್‌ಟ್ಟೊದ್‌ ಯೆಹೋವಡಿಂಜಲೇ.