Read Kodava ಜ್ಞಾನತ್‌ರ ಪಡಿಮ 23 Bible Online

ಜ್ಞಾನತ್‌ರ ಪಡಿಮ 23 - Kodava bible

ಜ್ಞಾನತ್‌ರ ಪಡಿಮ 23

¹ನೀನ್‌ ಒರ್‌ ಅದಿಪತಿರ ಕೂಡೆ ಉಂಬಕ್‌ ಅಳ್‌ತ್‌ತೇಂಗಿ, ನೀಡ ಮಿಂಞತ್‌ ಉಳ್ಳದ್‌ನ ಎಚ್ಚರತ್‌ಲ್‌ ನೋಟ್.

²ನೀನ್‌ ಹೊಟ್ಟೆಬಾಕೆನಾಯಿತ್‌ ಇಂಜತೇಂಗಿ, ನೀಡ ತೊಂಡೆಲ್‌ ಚಾಕ್‌ನ ಇಡ್.

³ಅಂವೊಂಡ ರಸವುಳ್ಳ ಆಹಾರ ವಸ್ತುನ ಆಸೆ ಪಡತೆ. ಅದ್‌ ನಿನ್ನ ವಂಚನೆ ಮಾಡುವ ಆಹಾರ ಆಯಿತಿಕ್ಕು.

⁴ಐಶ್ವರ್ಯವಂತನಾಂಡೂಂದ್‌ ನಯಿಚಿತ್‌ ಪ್ರಯತ್‌ನ ಪಡತೆ; ನೀಡ ಸ್ವಂತ ಬುದ್ದಿರ ಮೇಲೆ ನಂಬಿಕೆ ಇಡತೆ.

⁵ಕಾಂಗತೆ ಆಯಿ ಪೋಪ ವಸ್ತುರ ಮೇಲೆ ನೀಡ ದೃಷ್ಟಿ ಪಾರುವೋ? ಅದ್‌ ಇಂಜನೆಕೆ, ರೆಕ್ಕೆ ಬಪ್ಪಕ್‌ ಮಾಡಿತ್‌ ಗರುಡಪಕ್ಷಿರನೆಕೆ ಬಾನತ್‌ ಪಾರಿಯಂಡ್‌ ಪೋಪ.

⁶ಕೀಂಜ ಬುದ್ದಿ ಉಳ್ಳಂವೊಂಡ ಆಹಾರತ್‌ನ ಉಂಗತೆ. ಅಂವೊಂಡ ರಸವುಳ್ಳ ಆಹಾರಕ್‌ ಆಸೆ ಪಡತೆ.

⁷ಅಂವೊಂಡ ಹೃದಯತ್‌ರ ಗೇನ ಎಂತೋ, ಅನ್ನನೆ ಅಂವೊನು ಉಂಡ್. ಉಣ್ಣ್, ಕೂಡೀಂದ್‌ ನೀಕ್‌ ಎಣ್ಣ್‌ಚೇಂಗಿಯ, ಅಂವೊಂಡ ಗೇನ ಬೋರೆ.

⁸ನೀನ್‌ ಉಂಡ ಚೆನ್ನದ್‌ನ ಸಹ ಕಕ್ಕ್‌ವಿಯ. ಅಕ್ಕ ನೀಡ ವರ್ಣನೆಯೆಲ್ಲಾ ಪ್ರಯೋಜನೆ ಇಲ್ಲತೆ ಆಪ.

⁹ಮೂಡಂಡ ಕೆಮಿ ಕ್‍ೕಪನೆಕೆ ಪರಿಯತೆ. ಅಂವೊ ನೀಡ ಜ್ಞಾನತ್‌ರ ತಕ್ಕ್‌ನ ತ್‌ಕ್ಕಾರ ಮಾಡುವ.

¹⁰ನೀಡ ಮುತ್ತಜ್ಜಂಗ ಪೂರ್ವ ಕಾಲತ್‌ ಇಟ್ಟ ಅದ್ದ್ ಕಲ್ಲ್‌ನ ಅನ್‌ಂಗತೆ, ಅನಾತ ಮಕ್ಕಡ ಬೂಮಿನ ಬಲಿಕತೆ.

¹¹ಅಯಿಂಗಡ ರಕ್ಷಕ ಶಕ್ಷಿವಂತಂವೊ. ಅಯಿಂಗಕಾಯಿತ್‌ ಅಂವೊ ನೀಡ ಕೂಡೆ ವಾದ ಮಾಡುವ.

¹²ಬುದ್ದಿತಕ್ಕ್‌ನ ನೀಡ ಮನಸ್ಸ್‌ಕ್ ಎಡ್‌ತ, ಅರಿವುರ ತಕ್ಕ್‌ಕ್‌ ಕೆಮಿಕೊಡ್.

¹³ಕುಂಞಿಕ್‌ ಶಿಕ್ಷೆ ಕೊಡ್‌ಕತೆ ಇರತೆ. ಕೋಲ್‌ಲ್‌ ಪೊಜ್ಜತೇಂಗಿ ಅಂವೊ ಚತ್ತ್‌ ಪೋಪುಲೆ.

¹⁴ಕೋಲ್‌ಲ್‌ ಪೊಯ್ಯಿ, ಅಂವೊಂಡ ಜೀವತ್‌ನ ಪಾತಾಳತ್‌ಂಜ ಕಾಪಾಡುವಿಯ.

¹⁵ನಾಡ ಮೋನೇ, ನೀಡ ಹೃದಯ ಜ್ಞಾನವುಳ್ಳದಾಯಿತ್‌ ಇಂಜಚೇಂಗಿ, ನಾಡ ಹೃದಯವು ಕುಶಿ ಪಡುವ.

¹⁶ನೀಡ ಕಿರಿ ಸೆರಿಯಾನದ್‌ನ ತಕ್ಕ್‌ ಪರ್‌ಂದ್‌ತೇಂಗಿ, ನಾಡ ಆಳವಾನ ಮನಸ್ಸ್‌ ಕುಶಿಪಡುವ.

¹⁷ಪಾಪಿಯಳ ನೋಟಿತ್‌ ಹೊಟ್ಟೆಕಿಚ್ಚ್‌ ಪಡಂಡ. ಆಚೇಂಗಿ ಎಲ್ಲಾ ದಿವಸವು ಯೆಹೋವಂಗ್‌ ಬೊತ್ತಿತ್‌ ನಡೆ.

¹⁸ಕಂಡಿತವಾಯಿತ್‌ ನೀಕ್‌ ಒರ್‌ ನಲ್ಲ ಮಿಂಞತ್‌ರ ಬದುಕ್‌ ಉಂಡ್; ನೀಡ ನಿರೀಕ್ಷೆ ಪಾಳಾಪುಲೆ.

¹⁹ನಾಡ ಮೋನೇ, ಕೆಮಿಕೊಡ್‌ತ್‌ ಕ್‍ೕಟಿತ್‌ ಜ್ಞಾನವುಳ್ಳಂವನಾಯಿತ್‌ ಇರ್, ನೀಡ ಹೃದಯತ್‌ನ ಸೆರಿಯಾನ ಬಟ್ಟೆಲ್‌ ನಡ್‌ತ್.

²⁰ಕುಡುಕಂಗಡ ಕೂಡೆಯು, ದುಂಬ ಯರ್ಚಿ ತಿಂಬಯಿಂಗಡ ಕೂಡೆಯು ಸಹವಾಸ ಬೆಚ್ಚೊತೆ.

²¹ಎನ್ನಂಗೆಣ್ಣ್‌ಚೇಂಗಿ ಕುಡುಕನು ಹೊಟ್ಟೆಬಾಕೆನು ಗರಿಬಂಗಳಾಪ. ಕಣ್ಣೊರ್‌ಕ್‌ ಕೀತ್‌ನ ಬಟ್ಟೆನ ಉಡ್‌ಪನೆಕೆ ಮಾಡುವ.

²²ನೀಕ್‌ ಜೀವ ತಂದ ನೀಡ ಅಪ್ಪಂಗ್‌ ಕೆಮಿಕೊಡ್. ನೀಡ ಅವ್ವಂಗ್‌ ವಯಸ್ಸಾಪಕ ಅವಳ ತ್‌ಕ್ಕಾರ ಮಾಡಂಡ.

²³ಸತ್ಯತ್‌ನ ಕ್ರಯಕ್‌ ಎಡ್‌ತ, ಅದ್‌ನ ಮಾರತೆ. ಅನ್ನನೆ ಜ್ಞಾನತ್‌ನ, ಬೋದನೆನ ಪಿಂಞ ಬುದ್ದಿನ ಕ್ರಯಕ್‌ ಎಡ್‌ತ.

²⁴ನೀತಿವಂತಂವೊಂಡ ಅಪ್ಪ ದುಂಬ ಕುಶಿಪಡುವ. ಜ್ಞಾನವುಳ್ಳ ಕುಂಞಿನ ಪೆತ್ತಂವೊ ಅಂವೊನಗುಂಡ್‌ ಸಂತೋಷ ಪಡುವ.

²⁵ನೀಡ ಅಪ್ಪವ್ವ ಕುಶಿ ಪಡಡ್, ನಿನ್ನ ಪೆತ್ತವ ಸಂತೋಷವಾಯಿತಿರಡ್.

²⁶ನಾಡ ಮೋನೇ, ನೀಡ ಹೃದಯತ್‌ನ ನಾಕ್‍ ತಾ. ನೀಡ ಕಣ್ಣ್‌ ನಾಡ ಬಟ್ಟೆಲ್‌ ಪೋಪಕ್‌ ಕುಶಿ ಪಡಡ್.

²⁷ವ್ಯಬಿಚಾರಿ ಆಳವಾನ ಕುಂಡ್; ವೇಶಿ ಇರ್‌ಂಗ್‌ನ ಕಣತರೆರನೆಕೆ.

²⁸ಅವ ಕಳ್ಳಂಡನೆಕೆ ದಾರ್‌ಕು ಗೊತ್ತಿಲ್ಲತ ಪದ್‌ಂಗಿ, ಆಣಾಳುವಡಡೆಲ್‌ ಕಳ್ಳತ್ತನ ಮಾಡುವ ಆಣಾಳ್‌ವಳ ಜಾಸ್ತಿ ಮಾಡುವ.

²⁹ಅಯ್ಯೋ ಎಣ್ಣ್‌ವಯಿಂಗ ದಾರ್? ದಾರ್‌ಕ್‌ ನೊಂಬಲ? ದಾರ್‌ಕ್‌ ಬೇಜಾರ್? ದಾರ್‌ ಜಗಳ ಮಾಡುವ? ದಾರ್‌ ಗೋಳಾಡುವ? ದಾರ್‌ಕ್‌ ಕಾರಣಯಿಲ್ಲತ ಗಾಯ? ದಾರ್‌ಕ್‌ ಚೋಂದ್‌ ಪೋನ ಕಣ್ಣ್?

³⁰ಕಳ್ಳ್‌ನ ಮಿತಿಮೀರಿತ್‌ ಕುಡಿಪಯಿಂಗಳು, ಮಿಶ್ರ ಮಾಡ್‌ನ ಕಳ್ಳ್‌ನ ಕೂಟಿತ್‌ ಕುಡಿಪಯಿಂಗಳು ತಾನೇ.

³¹ಕಳ್ಳ್, ಪಾತ್‌ರತ್‌ಲ್‌ ಚೋಂದ ರಂಗ್‌ಲ್‌ ಪಳಪಳಾಂದ್‌ ಕಾಂಬಕ, ಅದ್‌ನ ನೀನ್‌ ನೋಟಂಡ. ಅದ್‌ ನಯಿಂಗನೆ ಇಳಿಯುವ.

³²ಕಡೇಕ್‌ ಅದ್‌ ಪಾಂಬ್ರನೆಕೆ ಕಡಿಪ, ಅಕ್ಕು, ವಿಷ ಪಾಂಬ್ರನೆಕೆ ಕಡಿಪ.

³³ನೀಡ ಕಣ್ಣ್‌ ವಿಚಿತ್‌ರವಾನದ್‌ನೆಲ್ಲಾ ಕಾಂಬ. ನೀಡ ಮನಸ್ಸ್‌ ತಾರಮಾರ ತಕ್ಕ್‌ನ ಪರಿಯುವ.

³⁴ನೀನ್‌ ಕಡಲ್‌ರ ಮದ್ಯತ್‌ ವರಿಯಂಡಿಪ್ಪಂವೊನೆಕೆಯು, ಬೀಜುವ ಗಾಳಿಲ್‌ ಹಡಗ್‌ರ ಕಂಬತ್‌ರ ತುದಿಲ್‌ ವರಿಯಂಡಿಪ್ಪನೆಕೆಯು ಇಪ್ಪಿಯ.

³⁵ಅಯಿಂಗ ನನ್ನ ಪೊಜ್ಜತ್, ನಾಕ್‍ ನೊಂಬಲ ಆಯಿತ್‌ಲ್ಲೆ. ನನ್ನ ಬಡ್‌ಚತ್‌ ನಾಕ್‍ ಗೊತ್ತಾಯಿತ್‌ಲ್ಲೆ, ಇಕ್ಕ ನಾಕ್‍ ಎಚ್ಚರ ಆಪುಲೆ. ನಾಕ್‍ ಇಂಞು ಕುಡಿಪಕ್ ಬೋಂಡೂಂದ್ ಎಣ್ಣ್‌ವಿಯ.