Read Kodava ಜ್ಞಾನತ್‌ರ ಪಡಿಮ 25 Bible Online

ಜ್ಞಾನತ್‌ರ ಪಡಿಮ 25 - Kodava bible

ಜ್ಞಾನತ್‌ರ ಪಡಿಮ 25

¹ಇದ್‌ ಯೆಹೂದ ದೇಶತ್‌ ರಾಜನಾನ ಹಿಜ್ಕೀಯಂಡ ಒಳ್‌ತ್‌ಕಾರಂಗ, ನಕಲ್‌ ಮಾಡಿತ್‌ ಒಳ್‌ದ್‌ನ ಇಂಞು ಚೆನ್ನ ಸೊಲೊಮೋನಂಡ ಜ್ಞಾನತ್‌ರ ಪಡಿಮ.

²ಒರ್‌ ಕಾರ್ಯತ್‌ನ ಮುಚ್ಚಿ ಬೆಪ್ಪದ್‌ ದೇವಕ್‌ ಮಹಿಮೆ. ವಿಷಯತ್‌ನ ಸೆರಿಯಾಯಿತ್‌ ಕಾಟೊದ್‌ ರಾಜಂಗ್‌ ಗೌರವ.

³ಬಾನತ್‌ರ ಎತ್ತರ ಪಿಂಞ ಬೂಮಿರ ಆಳತ್‌ರನೆಕೆ ರಾಜಂಡ ಮನಸ್ಸ್‌ನ ದಾರ್‌ಕೂ ಅರ್ಥ ಮಾಡ್‌ವಕ್‌ ಕಯ್ಯುಲೆ.

⁴ಬೊಳ್ಳಿಯಿಂಜ ಕಚ್ಚಡತ್‌ನ ನೀಕಿರ್, ಅದ್‌ಲ್ಲಿಂಜ ತಟ್ಟ ಒರ್‌ ಪಾತ್‌ರತ್‌ನ ಮಾಡುವಕಯ್ಯು.

⁵ಅನ್ನನೆ ರಾಜಂಡ ಮಿಂಞತ್‌ಂಜ ದುಷ್ಟನ ನೀಕಿರ್, ಅಕ್ಕ ಅಂವೊಂಡ ಸಿಂಹಾಸನ ನೀತಿರಗುಂಡ್‌ ಸ್ತಾಪನೆ ಆಪ.

⁶ರಾಜಂಡ ಪ್ರಸನ್ನತ್‌ ನಿನ್ನ ಕೊಚ್ಚಿಯೊತೆ. ಮಕ್ಯಪಟ್ಟಯಿಂಗ ನಿಪ್ಪ ಜಾಗತ್‌ ನಿಕ್ಕತೆ.

⁷ನೀಡ ಕಣ್ಣ್‌ ಕಂಡ ಅದಿದತಿರ ಮಿಂಞತ್‌ ಅವಮಾನಪಡೊದ್‌ ನಲ್ಲದಿಲ್ಲೆ. ಅಂವೊ ನಿನ್ನ ನೋಟಿತ್: ಕೊಡಿಕ್‌ ಬಾಂದ್‌ ಕಾಕ್‌ವದೇ ನಲ್ಲದ್.

⁸ನ್ಯಾಯಾಲಯತ್‌ ಪೋಪಕ್‌ ಆತುರ ಪಡತೆ. ಕಡೇಕ್‌ ನೀಡ ನೆರೆಮನೆಕಾರ ನೀನ್‌ ಎಣ್ಣ್‌ವದ್‌ ಪೊಟ್ಟ್‌ಂದ್‌ ಅವಮಾನ ಪಡ್‌ತ್‌ಚೇಂಗಿ ನೀನ್‌ ಎಂತ್‌ ಮಾಡುವಿಯಾ?

⁹ನೀನ್‌ ನೀಡ ನೆರೆಮನೆಕಾರಂಡ ಕೂಡೆ ಮಾತ್‌ರ ನಿಂಗಡ ವಿಷಯತ್‌ ವಾದ ಮಾಡ್. ಬೋರೆ ಒಬ್ಬಂಡಪಕ್ಕ ಗುಟ್ಟ್‌ನ ಎಣ್ಣಂಡ.

¹⁰ಇಲ್ಲತೆ ಪೋಚೇಂಗಿ ಅದ್‌ನ ಕ್‍ೕಟಯಿಂಗೆಲ್ಲ ನಿನ್ನ ಅವಮಾನಪಡ್‌ತುವ. ಆ ಕೆಟ್ಟ ಪೆದ ನಿನ್ನ ಬುಟ್ಟಿತ್‌ ಪೋಪುಲೆ.

¹¹ತಕ್ಕ ಸಮಯತ್‌ ಎಣ್ಣ್‌ನ ಶಬ್ದ ಬೊಳ್ಳಿರ ತಟ್ಟೆಲ್‌ ಉಳ್ಳ ಪೊನ್ನ್‌ರ ಪಣ್ಣ್‌ಕ್ ಸರಿಸಮ.

¹²ಕ್‍ೕಪಕ್‌ ಕುಶಿ ಉಳ್ಳಂವೊನ ಎಚ್ಚರಿಕೆ ಮಾಡ್‌ವಂವೊ ಪೊನ್ನ್‌ರ ಓಲೆಕು, ಪೊನ್ನ್‌ರ ಮಾಲೆಕು ಸರಿಸಮ.

¹³ಕೊಯ್ಯಿಪಣಿರ ಕಾಲತ್‌ ಮಂಜಿರ ತಂಪ್ ಎನ್ನನೆ ಇಪ್ಪೊ, ಅನ್ನನೆ ನಂಬಿಕಸ್ತನಾನ ದೂತನು ಇಪ್ಪ. ಅಂವೊ ತಾಂಡ ಒಡೆಯಂಡ ಆತ್ಮತ್‌ನ ತಂಪಾಯಿತ್‌ ಮಾಡುವ.

¹⁴ಇನಾಮ್‌ ತಪ್ಪೀಂದ್‌ ಎಣ್ಣಿತ್‌ ಅದ್‌ನ ಕೊಡ್‌ಕತಂವೊ, ಮಳೆ ಇಲ್ಲತ ಮೋಡಕು ಗಾಳಿಕು ಸರಿಸಮ.

¹⁵ದುಂಬ ತಾಳ್ಮೆಯಿಂಜ ಅದಿಪತಿನ ಸಹ ಒತ್ತೊನೆಕೆ ಮಾಡುವಕಯ್ಯು. ಮೊದ್ರವಾನ ತಕ್ಕ್‌ ಮೂಳೆನ ಸಹ ಜಜ್ಜುವ.

¹⁶ತೇನ್‌ ಕ್‌ಟ್ಟ್‌ಚಾ? ಬೋಂಡಿಯಚ್ಚಕ್‌ ತಿನ್ನ್. ಮಿತಿಮೀರಿತ್‌ ತಿಂದತೇಂಗಿ ಕಕ್ಕ್‌ವಿಯ.

¹⁷ನೀಡ ನೆರೆಮನೆಕಾರಂಡ ಮನೆಕ್‌ ಅಕ್ಕಕ್ಕ ಪೋಕತೆ. ಅನ್ನನೆ ಪೋಚೇಂಗಿ ಅಂವೊಂಗ್‌ ಮದಿಯಾಯಿತ್‌ ನಿನ್ನ ದ್ವೇಷ ಮಾಡುವ.

¹⁸ನೆರೆಮನೆಕಾರಂಗ್‌ ವಿರೋದವಾಯಿತ್‌ ಪೊಟ್ಟ್‌ಸಾಕ್ಷಿ ಕೊಡ್‌ಪಂವೊ ದೊಣ್ಣೆಕು, ಕತ್ತಿಕು, ಚೂಪಾನ ಅಂಬ್‌ಕು ಸರಿಸಮ.

¹⁹ಕಷ್ಟಕಾಲತ್‌ ದ್ರೋಹಿರ ಮೇಲೆ ನಂಬಿಕೆ ಬೆಪ್ಪದ್‌ ಒಡ್‌ಂದ ಪಲ್ಲ್‌ಲ್ ಕಡ್‌ಚಿತ್‌ ತಿಂಬನೆಕೆಯು, ಪೊಟ್ಟಿ ಪೋನ ಕಾಲ್‌ಲ್‌ ನಡ್‌ಪನೆಕೆಯು ಇಪ್ಪ.

²⁰ಮನಸ್ಸ್‌ ದುಃಖತ್‌ಲ್‌ ಉಳ್ಳಂವೊಂಗ್‌ ಕುಶಿರ ಪಾಟ್ ಪಾಡ್‌ವಂವೊ, ಕುಳ್‌ರ್ ಕಾಲತ್‌ಲ್‌ ಬಟ್ಟೆನ ಉತ್ತ್‌ವಂವೊನೆಕೆಯು, ಗಾಯತ್‌ರ ಮೇಲೆ ಬೂಕ್‌ನ ಪುಳಿನೀರ್‌ನೆಕೆಯು ಇಪ್ಪ.

²¹ನೀಡ ವಿರೋದಿಕ್‌ ಕೆಲಪೈಚಿತ್‌ ಉಂಡೇಂಗಿ ಅಂವೊಂಗ್‌ ಉಂಬಕ್‌ ಕೂಳ್‌ ಕೊಡ್. ಅಂವೊಂಗ್‌ ಬಾಯಾರಿಕೆಯಾಯಿತ್‌ ಉಂಡೇಂಗಿ ಕುಡಿಪಕ್‌ ನೀರ್‌ ಕೊಡ್.

²²ಅನ್ನನೆ ಮಾಡ್‌ವಗುಂಡ್, ತಿತ್ತ್‌ರ ಕಂಡ ಅಂವೊಂಡ ಮಂಡೆರ ಮೇಲೆ ಇಟ್ಟನೆಕೆ ಆಪ. ಯೆಹೋವ ಅದ್‌ಂಗ್‌ ಸೆರಿಯಾನ ಪ್ರತಿಫಲ ನೀಕ್‌ ತಪ್ಪ.

²³ಬಡಕ್‌ ದಿಕ್ಕ್‌ಯಿಂಜ ಬಪ್ಪ ಗಾಳಿ ಮಳೆನ, ಚಾಡಿ ಎಣ್ಣುವ ನಾವ್‌ ಚೆಡಿನ ಬಪ್ಪ್‌ಚಿಡುವ.

²⁴ಜಗಳಗಂಟಿರ ಪೊಣ್ಣ್‌ರ ಕೂಡೆ ಬಲ್ಯ ಮನೆಲ್ ವಾಸ ಮಾಡೊಕಿಂಜಿ, ಮನೆರ ಕೊಡಿಲ್‌ ಒರ್‌ ಮೂಲೆಲ್‌ ವಾಸ ಮಾಡೊದೇ ಮೇಲ್.

²⁵ದೂರತ್ತಿಂಜ ಬಪ್ಪ ನಲ್ಲ ಸುದ್ದಿ, ಬಾಯಾರಿಕೆಯಾಯಿತ್‌ ಉಳ್ಳಂವೊಂಗ್‌ ಕ್‌ಟ್ಟುವ ಪಚ್ಚೆ ನೀರ್‌ರನೆಕೆ ಇಪ್ಪ.

²⁶ದುಷ್ಟಂಗ್‌ ತಗ್ಗುವ ನೀತಿವಂತ ಪಾಳಾನ ಬುಗ್ಗೆಕು, ಕಲ್‌ಂಗ್‌ನ ಕಣತೆರಕು ಸರಿಸಮ.

²⁷ತೇನ್ನ ಮಿತಿಮೀರಿತ್‌ ತಿಂಬದ್‌ ನಲ್ಲದಿಲ್ಲೆ. ಅನ್ನನೆ ಜನ ತನ್ನ ಮೆಚ್ಚಿಯಂಡೂಂದ್‌ ಪೇಚಾಡ್‌ವದ್‌ ನಲ್ಲದಿಲ್ಲೆ.

²⁸ತಾಂಡ ಆತ್ಮತ್‌ನ ಅಡಕ್‌ವಕ್‌ ಕಯ್ಯತ ಮನುಷ್ಯ ಗೋಡೆ ಬುದ್ದಿತ್‌ ಪಾಳಾನ ಪಟ್ಟಣತ್‌ರನೆಕೆ ಇಪ್ಪ.