Read Kodava ಜ್ಞಾನತ್‌ರ ಪಡಿಮ 26 Bible Online

ಜ್ಞಾನತ್‌ರ ಪಡಿಮ 26 - Kodava bible

ಜ್ಞಾನತ್‌ರ ಪಡಿಮ 26

¹ಬೇನಿ ಕಾಲತ್‌ ಬೂವ ಮಂಜು, ಕೊಯ್ಯಿಪಣಿರ ಕಾಲತ್‌ ಮಳೆಯು ಎನ್ನೆನೆ ಸೆರಿ ಆಪುಲೆಯೊ, ಅನ್ನನೆ ಮೂಡಂಗ್‌ ಗೌರವವು ಸೆರಿ ಆಪುಲೆ.

²ಮನೆಪಕ್ಷಿ ತಿರ್‌ಗಾಡುವನಕೆಯು, ಬೋರೆ ಪಕ್ಷಿಯ ಪಾರಿ ಪೋಯಿತ್‌ ನೆಲಕ್‌ ಮುಟ್ಟತನೆಕೆಯು, ಕಾರಣಯಿಲ್ಲತೆ ಕೊಡ್‌ತ ಶಾಪ ನಿಪ್ಪುಲೆ.

³ಕುದುರೆಕ್‌ ಕೋಲು, ಕತ್ತೆಕ್‌ ಕಡಿವಾಣವು, ಮೂಡಂಡ ಬೆನ್ನ್‌ಕ್ ಪೊಯ್ಯಿತ್‌ ಕ್‌ಟ್ಟುವದು ಸೆರಿ.

⁴ಮೂಡಂಗ್‌ ಅಂವೊಂಡ ದಡ್ಡತನಕ್‌ ಸೆರಿಯಾಯಿತ್‌ ಉತ್ತರ ಕೊಡ್‌ಕತೆ. ಇಲ್ಲತೆ ಪೋಚೇಂಗಿ ನೀನ್‌ ಸಹ ಅಂವೊಂಡನೆಕೆ ಆಪಿಯ.

⁵ದಡ್ಡಂಗ್‌ ಅಂವೊಂಡ ದಡ್ಡತನಕ್‌ ಸೆರಿಯಾಯಿತ್‌ ಉತ್ತರ ಕೊಡ್. ಉತ್ತರ ಕೊಡ್‌ಕತೆ ಪೋಚೇಂಗಿ ತನ್ನ ತಾನೇ ಜ್ಞಾನವುಳ್ಳಂವೊಂದ್‌ ಗೇನ ಮಾಡುವ.

⁶ಮೂಡಂಡ ಮೂಲಕ ಸುದ್ದಿ ಅಯಿಪಂವೊ ತಾಂಡ ಸ್ವಂತ ಕಾಲ್‌ನ ಕತ್ತರಿಚಿಟ್ಟಂಡ್‌ ನಷ್ಟಪಡುವನೆಕೆ ಇಪ್ಪ.

⁷ಕುಂಟಂಡ ಕಾಲ್‌ ಕುಂದಿಪೋಯಿತುಳ್ಳನೆಕೆ, ಮೂಡಂಡ ಬಾಯಿಯಿಂಜ ಬಪ್ಪ ಜ್ಞಾನತ್‌ರ ಪಡಿಮವು ಇಪ್ಪ.

⁸ಮೂಡಂಗ್‌ ಕಾಟುವ ಗೌರವ, ಕವಣೆಕ್‌ ಕೆಟ್ಟ್‌ನ ಕಲ್ಲ್‌ರನೆಕೆ.

⁹ಮೂಡಂಡ ಬಾಯಿಯಿಂಜ ಬಪ್ಪ ಪಡಿಮ, ಕುಡುಕಂಡ ಕೈಯಿಕ್‌ ಕ್‌ಟ್ಟ್‌ನ ಮುಳ್ಳ್‌ರನೆಕೆ ಇಪ್ಪ.

¹⁰ಮುಟ್ಟಾಳನ ಅಲ್ಲ ಕುಡ್‌ಕ್ಕನೆ ಕೂಲಿಕ್‌ ಮಾಡುವಂವೊ, ಬಟ್ಟೆಲ್‌ ಪೋಪಯಿಂಗಕೆಲ್ಲ ಗಾಯ ಮಾಡುವ ಬಿಲ್ಲ್‌ಗಾರಂಡನೆಕೆ ಆಪ.

¹¹ನಾಯಿ ತಾನ್‌ ಕಕ್ಕ್‌ನನ ನೆಕ್ಕುವಕ್‌ ತಿರ್‌ಗ್‌ವನೆಕೆ, ಮೂಡ ಸಹ ತಾಂಡ ಮೂಡತನಕ್‌ ತಿರ್‌ಗುವ.

¹²ತನ್ನ ತಾನೆ ಜ್ಞಾನೀಂದ್‌ ಗೇನ ಮಾಡ್‌ವಂವೊನ ನೋಟ್, ಅನ್ನನೆ ಉಳ್ಳ ಮನುಷ್ಯಕಿಂಜಿ ಮೂಡಂಡ ಮೇಲೆ ನಿರೀಕ್ಷೆ ಬೆಕ್ಕಲು.

¹³ಬಟ್ಟೆಲ್‌ ಸಿಂಹ ಉಂಡ್, ಬೀದಿಲ್‌ ಸಿಂಹ ಇಪ್ಪಾಂದ್‌ ಸೋಮಾರಿಯಾನಂವೊ ಎಣ್ಣುವ.

¹⁴ಪಡಿ ತಿರ್‌ಗಣೆಲ್‌ ಜೂಂಗಾಡುವನಕೆ, ಸೋಮಾರಿಯು ತಾಂಡ ಮೆತ್ತೆರ ಮೇಲೆ ತಿರುವ.

¹⁵ಸೋಮಾರಿ ತಾಂಡ ಕೈಯಿನ ಪಾತ್‌ರೆಲ್‌ ಬೆಚ್ಚಿತ್, ಅದ್‌ನ ಪುನಃ ತಾಂಡ ಬಾಯಿಕ್‌ ಎಡ್‌ತಂಡ್‌ ಪೋಪಕ್‌ ಕಷ್ಟ ಪಡುವ.

¹⁶ವಿವೇಕತ್‌ಂಜ ಜವಾಬ್ ಕೊಡ್‌ಪಕಯ್ಯುವ ಏಳ್‌ ಜನಕಿಂಜಿ, ತನ್ನ ತಾನೆ ಜ್ಞಾನಿ ಎಣ್ಣಿಯಂಡ್‌ ಸೋಮಾರಿಯಾನಂವೊ ಗೇನ ಮಾಡಿಯೊವ.

¹⁷ಬಟ್ಟೆಲ್‌ ಪೋಯಂಡಿಪ್ಪಕ, ತಾಂಗ್‌ ಸಮ್ಮಂದಯಿಲ್ಲತ ಜಗಳತ್‌ ಮಂಡೆ ಇಡೋದ್, ಬಟ್ಟೆಲ್‌ ಪೋಯಂಡಿಪ್ಪ ನಾಯಿರ ಕೆಮಿನ ಪುಡ್‌ಚಿತ್‌ ಬಲಿಪಂವೊಂಡನೆಕೆ ಇಪ್ಪ.

¹⁸ಕೊಳ್ಳಿನ, ಅಂಬ್‌ನ ಪಿಂಞ ಚಾವನೆಕೆ ಮಾಡ್‌ವ ಎಲ್ಲಾ ಕಾರ್ಯತ್‌ನ ಮಾಡುವ ಪುಚ್ಚ ಎನ್ನನೆ ಇಪ್ಪೊ,

¹⁹ಅನ್ನನೆ ತಾಂಡ ಕೂಡೆ ಉಳ್ಳಂವೊನ ವಂಚನೆ ಮಾಡಿತ್: ನಾನ್‌ ಮುಂಡತೆ ಕಳಿಚಂಡಿಂಜ್ೕಂದ್‌ ಎಣ್ಣುವ ಮನುಷ್ಯನು ಇಪ್ಪ.

²⁰ಪುಳ್ಳಿಯಿಲ್ಲತೆ ತಿತ್ತ್‌ ಆರಿ ಪೋಪ. ಅನ್ನನೆ ಚಾಡಿ ಎಣ್ಣ್‌ವಂವೊ ಇಲ್ಲತೆ ಜಗಳ ನಿಂದ್‌ ಪೋಪ.

²¹ಮಸಿಕಂಡೆ ಚುಳ್ಳ್‌ಕು, ಪುಳ್ಳಿ ತಿತ್ತ್‌ಕು ಎನ್ನನೆಯೊ, ಅನ್ನನೆ ಜಗಳಗಂಟ ಜಗಳತ್‌ನ ಸುರುಮಾಡುವಕ್‌ ಸೆರಿಯಾನಂವೊ.

²²ಒಬ್ಬಂಡ ಮೇಲೆ ಎಣ್ಣುವ ಕುತ್ತತ್‌ನ ಕ್‍ೕಪಕ, ಅದ್‌ ರಸವುಳ್ಳ ಊಟತ್‌ರನಕೆ ಇಪ್ಪ. ಅದ್‌ ಮನಸ್ಸ್‌ರ ಆಳತ್‌ ಬೇರೂರಿತ್‌ ಪೋಪ.

²³ಕೆಟ್ಟ ಆಲೋಚನೆನ ಹೃದಯತ್‌ಲ್‌ ಬೆಚ್ಚಂಡ್‌ ಪ್ರೀತಿಯಿಂಜ ತಕ್ಕ್‌ ಪರಿಯೊದ್‌ ಎನ್ನನೆ ಎಣ್ಣ್‌ಚೇಂಗಿ, ಮಣ್ಣ್‌ ಚಟ್ಟಿರ ಮೇಲೆ ಬೊಳ್ಳಿ ಗಿಲೀಟ್ ಇಟ್ಟನೆಕೆ.

²⁴ವಿರೋದಿಯಾನಂವೊ ತಾಂಡ ಮನಸ್ಸ್‌ಲ್‌ ವಂಚನೆನ ಬೆಚ್ಚಂಡ್‌ ಪ್ರೀತಿರ ತಕ್ಕ್‌ನ ಪರಿಯುವ.

²⁵ಅಂವೊ ಪರಿಯುವ ತಕ್ಕ್‌ ಚಾಯಿ ಇಂಜತೇಂಗಿಯು ಅಂವೊನ ನಂಬತೆ. ಅಂವೊಂಡ ಹೃದಯತ್‌ ಏಳ್‌ ಅಸಹ್ಯ ಉಂಡ್.

²⁶ತಾಂಡ ವಿರೋದತ್‌ನ ವಂಚನೆಯಿಂಜ ಒಳ್‌ಪ್‌ಚಿಡ್‌ವಂವೊಂಡ ದುಷ್ಟತನ ಜನಡ ಸಬೆರ ಮಿಂಞತ್‌ ಕಾಂಬ್‌ಚಿಡುವ.

²⁷ಕುಂಡ್‌ ತೋಡುವಂವೊ ತಾನೆ ಅದ್‌ಲ್‌ ಬೂವ. ಬಂಡೆನ ಉರುಳಿಚಿಡುವಂವೊ ಆ ಬಂಡೆಯಿಂಜಲೇ ಜಜ್ಜಿ ಪೋಪ.

²⁸ಪೊಟ್ಟ್‌ ಪರಿಯುವಂವೊ, ಅಂವೊಂಡಗುಂಡ್‌ ಕಷ್ಟಪಟ್ಟಯಿಂಗಳ ದ್ವೇಶ ಮಾಡುವ. ಕೊಚ್ಚಿ ತಕ್ಕ್‌ ಪರಿಯುವ ಬಾಯಿ ನಾಶತ್‌ನ ಉಂಟ್ ಮಾಡುವ.