Read Kodava ಜ್ಞಾನತ್‌ರ ಪಡಿಮ 29 Bible Online

ಜ್ಞಾನತ್‌ರ ಪಡಿಮ 29 - Kodava bible

ಜ್ಞಾನತ್‌ರ ಪಡಿಮ 29

¹ಒಬ್ಬಂಗ್‌ ದುಂಬಕುರಿ ಎಚ್ಚರ ಮಾಡಿತೂ ಅಂವೊ ತನ್ನ ಕಠಿಣ ಮಾಡಿಯಂಡತೇಂಗಿ ಸಹಾಯಯಿಲ್ಲತೆ ಒಮ್ಮಕೆ ನಾಶ ಆಯಿಪೋಪ.

²ನೀತಿವಂತಯಿಂಗ ಜಾಸ್ತಿ ಆಪಕ ಜನ ಕುಶೀಲ್‌ ಇಪ್ಪ. ದುಷ್ಟನಾನಂವೊ ಆಳ್‌ವಕ ಜನ ಸಂಕಟ ಪಡುವ.

³ಜ್ಞಾನತ್‌ನ ಪ್ರೀತಿ ಮಾಡುವಂವೊ ತಾಂಡ ಅಪ್ಪನ ಕುಶಿಪಡ್‌ತುವ. ಆಚೇಂಗಿ ವೇಶಿಯಡಕೂಡೆ ಸಹವಾಸ ಉಳ್ಳಂವೊ ತಾಂಡ ಆಸ್ತಿನ ನಾಶ ಮಾಡಿರುವ.

⁴ನ್ಯಾಯವಾಯಿತ್‌ ಆಳುವ ರಾಜ ದೇಶತ್‌ನ ಸ್ತಿರಪಡ್‌ತುವ. ಆಚೇಂಗಿ ಲಂಚ ಎಡ್‌ಪಕ್‌ ಕುಶಿಪಡುವಂವೊ ಅದ್‌ನ ನಾಶ ಮಾಡಿರುವ.

⁵ಒಬ್ಬಂಗ್‌ ಕೊಚ್ಚಿ ತಕ್ಕ್‌ ಪರಿಯುವಂವೊ, ಅಂವೊಂಡ ಕಾಲ್ಕೇ ಬಲೆನ ಬಿರ್ಚಂಡುಂಡ್.

⁶ದುಷ್ಟಂಗ ಅಯಿಂಗಡ ಪಾಪತಿಂಜಲೇ ಚಿಕ್ಕಿಯೊವ. ಆಚೇಂಗಿ ನೀತಿವಂತಂವೊ ಕುಶೀಲ್‌ ಪಾಡುವ.

⁷ನೀತಿವಂತಂವೊ ಗರೀಬಂಡ ನ್ಯಾಯತ್‌ನ ಎಚ್ಚರ ಎಡ್‌ತಿತ್‌ ಅರ್‌ಂಜೊವ. ಆಚೇಂಗಿ ದುಷ್ಟ ಅದ್‌ನ ಅರ್‌ಂಜೊಕ್‌ ಕುಶಿಪಡುಲೆ.

⁸ಪರಿಹಾಸ ಮಾಡ್‌ವಯಿಂಗ ಪಟ್ಟಣತ್‌ಲ್‌ ತಿತ್ತ್‌ ಕತ್ತಿಚಿಡುವ. ಆಚೇಂಗಿ ಜ್ಞಾನ ಉಳ್ಳಯಿಂಗ ಚೆಡಿರ ಜ್ವಾಲೆನ ಆರಿಚಿಡುವ.

⁹ಜ್ಞಾನಿಯಾನಂವೊ ಮೂಡಂಡ ಕೂಡೆ ವಾದ ಮಾಡ್‌ವಕ, ಕೂತ್‌ಟ್ಟತೇಂಗಿಯು, ತೆಳಿಚೆತೇಂಗಿಯು ಅಂವೊಂಗ್‌ ಸಮಾದಾನಯಿಲ್ಲೆ.

¹⁰ಕೊಲೆಗಾರಂಗ ಸತ್ಯತ್‌ಲ್‌ ನಡ್‌ಪಯಿಂಗಳ ದ್ವೇಷ ಮಾಡುವ. ಆಚೇಂಗಿ ನೀತಿವಂತಯಿಂಗ ಅಂವೊಂಡ ಜೀವತ್‌ನ ಕಾಪಾಡುವ.

¹¹ಮೂಡ ತಾಂಡ ಚೆಡಿನೆಲ್ಲ ಕಾಟಿಯೊವ. ಆಚೇಂಗಿ ಜ್ಞಾನವುಳ್ಳಂವೊ ತಾಂಡ ಚೆಡಿನ ತಾಳ್ಮೆಲ್‌ ಅಡಕಿ ಬೆಪ್ಪ.

¹²ಅದಿಪತಿಯಾನಂವೊ ಪೊಟ್ಟ್‌ ತಕ್ಕ್‌ಕ್‌ ಕೆಮಿ ಕೊಡ್‌ತತೇಂಗಿ ಅಂವೊಂಡ ಅದಿಕಾರಿಯೆಲ್ಲ ದುಷ್ಟಂಗಳಾಪ.

¹³ಇದ್‌ ಗರೀಬಂಗು ಹಿಂಸೆಪಡ್‌ತ್‌ವಂವೊಂಗು ಒಂದೇ ಆಯಿತುಂಡ್. ಅಯಿಂಗಡ ದಂಡಾಳ್‌ರ ಕಣ್ಣ್‌ಕ್ ಬೊಳಿ ಕೊಡ್‌ತಂವೊ ಯೆಹೋವನೇ.

¹⁴ಗರೀಬಂಗಳ ನ್ಯಾಯವಾಯಿತ್‌ ವಿಚಾರ ಮಾಡುವ ರಾಜಂಡ ಸಿಂಹಾಸನ ಕಾಲಕಾಲಕು ಸ್ತಿರವಾಯಿತ್‌ ಇಪ್ಪ.

¹⁵ಕೋಲ್‌ ಪಿಂಞ ಚೂಕ್ತಕ್ಕ್‌ ಮಕ್ಕಕ್‌ ಜ್ಞಾನತ್‌ನ ತಪ್ಪ. ತಾನ್‌ ಕುಶಿಪಟ್ಟನೆಕೆ ಬುಟ್ಟ ಕುಂಞಿ ತಾಂಡ ಅವ್ವಂಗ್‌ ಞಾಣಕ್‍ೕಡ್‌ನ ಬಪ್ಪ್‌ಚಿಡುವ.

¹⁶ದುಷ್ಟಂಗ ಆಳ್‌ವಕ ಪಾಪವು ಜಾಸ್ತಿ ಆಪ. ಆಚೇಂಗಿ ನೀತಿವಂತಯಿಂಗ ಅಯಿಂಗ ಬುದ್ದ್‌ಪೋಪದ್‌ನ ಕಾಂಬ.

¹⁷ನೀಡ ಮೋಂವೊಂಗ್‌ ಶಿಕ್ಷೆ ಕೊಡ್, ಅಂವೊ ನಿನ್ನ ಸಮಾದಾನ ಪಡ್‌ತುವ, ನೀಡ ಆತ್ಮಕ್‌ ಸಂತೋಶತ್‌ನ ಉಂಟ್ ಮಾಡುವ.

¹⁸ಪ್ರವಾದನೆ ಇಲ್ಲತ ಜಾಗತ್‌ಲ್‌ ಜನ ನಾಶ ಆಯಿ ಪೋಪ. ಆಚೇಂಗಿ ನ್ಯಾಯಪ್ರಮಾಣಕ್‌ ತಗ್ಗಿತ್‌ ನಡ್‌ಪಂವೊ ಆಶೀರ್ವಾದ ಪಡ್‌ಂದಂವೊ.

¹⁹ಒರ್‌ ಗುಲಾಮಂಗ್‌ ಬರೀ ತಕ್ಕ್‌ಲ್‌ ಎಣ್ಣ್‌ಚೇಂಗಿ ಅಂವೊ ಪಾಠ ಪಡಿಪುಲೆ. ಅಂವೊ ನೀಡ ತಕ್ಕ್‌ನ ಅರ್ಥ ಮಾಡಿಯಂಡತೇಂಗಿಯು, ಅದ್‌ನ ನಡತೆಲ್‌ ಕಾಟುಲೆ.

²⁰ದುಡ್‌ಕಿತ್‌ ತಕ್ಕ್‌ ಪರಿಯುವಂವೊನ ನೀನ್‌ ಕಂಡಿತುಳ್ಳಿಯ? ಅನ್ನನೆ ಉಳ್ಳ ಮನುಷ್ಯಕಿಂಜಿ ಮೂಡಂಡ ಮೇಲೆ ನಂಬಿಕೆ ಇಡಲು.

²¹ಒಬ್ಬ ತಾಂಡ ಗುಲಾಮನ ಚುಮ್ಮಿಯಿಂಜಲೇ ದುಂಬ ಕೊದೀಲ್‌ ಚಾಕ್‌ಚೇಂಗಿ, ಕಡೇಕ್‌ ಅಂವೊ ನೀಡ ಮೋಂವೊನಾಕೊಂಡೂಂದ್‌ ನೀಕ್‌ ಎದ್‌ರ್ ನಿಪ್ಪ.

²²ಮುಂಜೆಡಿ ಉಳ್ಳಂವೊ ಜಗಳತ್‌ನ ಉಂಟ್‌ಮಾಡುವ. ದುಂಬ ಚೆಡಿ ಉಳ್ಳಂವೊ ದುಂಬ ಪಾಪ ಮಾಡುವ.

²³ಮನುಷ್ಯಂಡ ಆಂಗಾರ ಅಂವೊನ ತಗ್ಗ್‌ಚಿಡುವ. ಆಚೇಂಗಿ ಮನಸ್ಸ್‌ ತಗ್ಗಿತ್‌ ಉಳ್ಳಂವೊಂಗ್‌ ಗೌರವ ಕ್‌ಟ್ಟುವ.

²⁴ಕಳ್ಳಂಡಕೂಡೆ ಪಾಲ್ದಾರನಾಯಿತ್‌ ಇಪ್ಪಂವೊ ತಾಂಗ್ತಾನೇ ಶತ್‌ರು ಆಪ. ಅಂವೊ ನ್ಯಾಯಾಸಬೆಲ್‌ ಸತ್ಯ ಎಣ್ಣ್‌ಚೇಂಗಿ ದಂಡನೆ ಕ್‌ಟ್ಟುವ. ಎಣ್ಣತೆ ಪೋಚೇಂಗಿ ದೇವ ಅಂವೊಂಗ್‌ ಶಾಪ ಕೊಡ್‌ಪ.

²⁵ಮನುಷ್ಯಂಗಕ್‌ ಬೊತ್ತ್‌ವದ್‌ ಬಲ್ಯ ಕೆಣಿ, ಆಚೇಂಗಿ ಯೆಹೋವಂಡ ಮೇಲೆ ನಂಬಿಕೆ ಇಡ್‌ವಂವೊ ಸೌಕ್ಯತ್‌ ಇಪ್ಪ.

²⁶ದುಂಬ ಜನ ಅದಿಪತಿರ ದಯೆ ಕ್‌ಟ್ಟ್‌ವಕ್‌ ಪೇಚಾಡುವ. ಆಚೇಂಗಿಯು ಒಬ್ಬೊಬ್ಬಂಡ ನ್ಯಾಯವು ಯೆಹೋವಂಡಿಂಜಲೇ ಕ್‌ಟ್ಟುವ.

²⁷ನೀತಿವಂತಂವೊ ದುಷ್ಟನ ಅಸಹ್ಯವಾಯಿತ್‌ ಕಾಂಬ. ದುಷ್ಟ ಸತ್ಯವಂತಂವೊನ ಅಸಹ್ಯವಾಯಿತ್‌ ಕಾಂಬ.