Read Kodava ಜ್ಞಾನತ್‌ರ ಪಡಿಮ 31 Bible Online

ಜ್ಞಾನತ್‌ರ ಪಡಿಮ 31 - Kodava bible

ಜ್ಞಾನತ್‌ರ ಪಡಿಮ 31

¹ಇದ್‌ ರಾಜನಾನ ಲೆಮೂವೇಲಂಡ ಞ್ಜಾನ ತಕ್ಕ್. ಅಂವೊಂಡ ಅವ್ವ ಅಂವೊಂಗ್‌ ಮಾಡ್‌ನ ಬೋದನೆರ ತಕ್ಕ್:

²ನಾಡ ಮೋನೇ, ನಾಡ ಕೆಲತ್‌ಲ್‌ ಪುಟ್ಟ್‌ನ ಮೋನೇ, ನಾನ್‌ ಪ್ರಾರ್ಥಿಚಿಟ್ಟಿತ್‌ ಪಡ್‌ಂದ ಮೋನೇ,

³ನೀಡ ಬಲತ್‌ನ ಪೊಣ್ಣಾಳುವಕಾಯಿತು, ನೀಡ ಬಟ್ಟೆನ ರಾಜಂಗಳ ನಾಶ ಮಾಡುವ ಕಾರ್ಯಕು ಕೊಡ್‌ಕತೆ.

⁴ಲೆಮೂವೇಲನೇ, ಕಳ್ಳ್ ಕುಡಿಪದ್‌ ರಾಜಂಗಕ್‌ ಯೋಗ್ಯವಾನದಿಲ್ಲೆ. ಅದ್‌ ಅದಿದತಿಯಂಗಕ್‌ ಯೋಗ್ಯವಾನದಿಲ್ಲೆ.

⁵ಅನ್ನನೆ ಕುಡಿಚತೇಂಗಿ ದೇವಡ ಕಾನೂನ್ನ ಮರ್‌ಂದಿತ್‌ ಗರೀಬಂಗಡ ಹಕ್ಕ್‌ನೆಲ್ಲ ಬದ್‌ಲ್‌ ಮಾಡಿರುವ.

⁶ಚಾವಕ್‌ ಉಳ್ಳಂವೊಂಗ್‌ ಕಳ್ಳ್‌ನ ಕೊಡ್. ಮನಸ್ಸ್‌ ಬೇಜಾರ್‌ಲ್‌ ಉಳ್ಳಯಿಂಗಕ್‌ ದ್ರಾಕ್ಷಿರಸತ್‌ನ ಕೊಡ್.

⁷ಅಯಿಂಗ ಕುಡ್‌ಚಿತ್‌ ಗರೀಬತನತ್‌ನ ಮರ್‌ಂದಿತ್, ಅಯಿಂಗಡ ಕಷ್ಟತ್‌ನೆಲ್ಲ ಗೇನ ಮಾಡತೆ ಇರಡ್.

⁸ತಾಂಗಾಯಿತ್‌ ತಕ್ಕ್‌ ಪರಿಯೊಕಯ್ಯತ ಜನಕಾಯಿತ್‌ ತಕ್ಕ್‌ ಪರಿ. ಗತಿ ಇಲ್ಲತಯಿಂಗಡ ಹಕ್ಕ್‌ಕಾಯಿತ್‌ ತಕ್ಕ್‌ ಪರಿ.

⁹ಗರೀಂಬಂಗಕು, ಒರ್‌ ಗತಿಯಿಲ್ಲತಯಿಂಗಕಾಯಿತು ತಕ್ಕ್‌ ಪರಿ; ಅಯಿಂಗಕ್‌ ನ್ಯಾಯ ಕ್‌ಟ್ಟ್‌ವನೆಕೆ ಪೇಚಾಡ್.

¹⁰ನಲ್ಲ ಗುಣವುಳ್ಳ ಪೊಣ್ಣ್‌ನ ದಾರ್‌ಕ್‌ ಕಂಡ್‌ಪುಡಿಪಕಯ್ಯು? ಅವ ಮಾಣಿಕ್ಯಕಿಂಜಿ ಬಲ್ಯ ಬೆಲೆ ಉಳ್ಳವ.

¹¹ಅವಡ ವಡಿಯಂಗ್‌ ಅವಡ ಮೇಲೆ ಪೂರ್ತಿ ನಂಬಿಕೆ ಉಂಡ್. ಅಂವೊಂಡ ಸಂಪತ್‌ ಕಮ್ಮಿ ಆಪುಲೆ.

¹²ಅವ ಬದ್‌ಕ್‌ವ ಕಾಲಯೆಲ್ಲಾ ಅಂವೊಂಗ್‌ ಕ್‍ೕಡ್‌ ಮಾಡತೆ ನಲ್ಲದ್‌ನೇ ಮಾಡುವ.

¹³ಅವ ಉಣ್ಣೆಯಿಂಜ ಪಿಂಞ ಸೆಣಬ್ರ ನಾರ್‌ನ ಬಟ್ಟೆ ಪೊಲ್ಲುವಕಾಯಿತ್‌ ಎಕ್ಕಾಲು ಕುಶೀಲ್‌ ಕೂಟಿತ್‌ ಬೆಪ್ಪ[18]

¹⁴ಅವ ವ್ಯಾಪಾರತ್‌ರ ಹಡಗ್‌ರನೆಕೆ ದೂರತ್‌ಂಜ ಬೋಂಡಿಯಾನ ಆಹಾರತ್‌ನ ಮನೆಕ್‌ ಕೊಂಡ ಬಪ್ಪ.

¹⁵ಇಂಞು ಇರ್‌ಟಾಯಿತಿಪ್ಪಕಲೇ ಎದ್ದಿತ್‌ ತಾಂಡ ಕುಟುಂಬಕ್‌ ಉಂಬಕ್‌ ಕೂಳ್‌ ತಯಾರ್‌ ಮಾಡಿತ್, ಪಣಿಕಾರ್ತಿಯಕ್‌ ಅಂದೇತ ದಿವಸತ್‌ರ ಪಣಿನ ಎಣ್ಣುವ.

¹⁶ಒರ್‌ ಬೇಲ್‌ನ ವಿಚಾರ ಮಾಡಿತ್‌ ಕ್ರಯಕ್‌ ಎಡ್‌ಪ. ತಾನ್‌ ಸಂಪಾದನೆ ಮಾಡ್‌ನ ಪಣತ್‌ಂಜ ದ್ರಾಕ್ಷಿ ತೋಟತ್‌ನ ಮಾಡುವ.

¹⁷ಅವ ದುಂಬ ಬಲತಿಂಜ ಕೆಲಸ ಮಾಡ್‌ವಕ್‌ ತಯಾರ್‌ ಆಯಿತ್‌ ತಾಂಡ ಕೈಯಿನ ಬಲಪಡ್‌ತುವ.

¹⁸ಅವ ತಾಂಡ ವ್ಯಾಪಾರ ಪ್ರಯೋಜನ ಉಳ್ಳದಾಯಿತುಂಡ್‍ೕಂದ್‌ ಅವಕ್‌ ಅರ್‌ಂಜಿತ್‌ ಬೆಚ್ಚೊವ. ಬಯಿಟ್, ಸುಮಾರ್‌ ನೇರಕತ್ತನೆ ಅವ ಕೆಲಸ ಮಾಡುವ.

¹⁹ತಾಂಡ ಕೈಯಿನ ರಾಟೆಲ್‌ ಬೆಚ್ಚಿತ್, ನೂಲ್‌ ಉಂಡೆನ ಪುಡಿಪ.

²⁰ಅವ ಗರೀಬಂಗ್‌ಕ್ ತಾಂಡ ಕೈಯಿನ ತೊರ್‌ಂದಿತ್, ಕಷ್ಟತ್‌ಲ್‌ ಉಳ್ಳಯಿಂಗಕ್‌ ತಾಂಡ ಕೈಯಿನ ನ್‍ೕಟ್‌ವ.

²¹ತಾಂಡ ಕುಟುಂಬತ್‌ಲ್‌ ಉಳ್ಳಯಿಂಗಕೆಲ್ಲಾ ಬೆಕ್ಕನೆ ಇಪ್ಪಕ್‌ ಉಡ್‌ಪ್ ಉಳ್ಳಗುಂಡ್, ತಾಂಡ ಕುಟುಂಬತ್‌ರ ವಿಷಯತ್‌ ಕುಳುರ್‌ಕಾಲತ್‌ಲ್‌ ಅವಕ್‌ ಪೋಡಿ ಇಲ್ಲೆ.

²²ಅವ ತಾಂಗ್‌ ತಾನೆ ಮೆತ್ತೆ ಬಟ್ಟೆನ ತಯಾರ್‌ ಮಾಡುವ. ನಯವಾನ ನೂಲ್‌ಲ್‌ ಮಾಡ್‌ನ ನೀಲಿ ಅಂಗಿಯೇ ಅವಡ ಉಡ್‌ಪ್ ಆಯಿತ್‌ಂಜತ್.

²³ಅವಡ ವಡಿಯ ಪೇಟೆರ ನ್ಯಾಯಸ್ತಾನತ್‌ಲ್‌ ಅಳ್‌ತಿತ್‌ಪ್ಪಕ ಪೇಟೆರ ಪೆರಿಯಯಿಂಗಡತ್‌ಲ್‌ ಬಲ್ಯಂವೊನಾಯಿತ್‌ಪ್ಪ.

²⁴ಅವ ನಯವಾನ ನೂಲ್‌ಲ್‌ ಮಾಡ್‌ನ ಉಡ್‌ಪ್‌ನ ಮಾರ್ವ. ನಡುಪಟ್ಟಿನ ತಯಾರ್‌ ಮಾಡುವ ವ್ಯಾಪಾರಿಯಡ ಪಕ್ಕ ಕೊಡ್‌ಪ.

²⁵ಬಲವು ಗೌರವು ಅವಡ ಉಡ್‌ಪ ಆಯಿತುಂಡ್. ಮಿಂಞತ್‌ರ ಬದ್‌ಕ್‌ರ ವಿಷಯತ್‌ ಪೋಡಿಯಿಲ್ಲತೆ ಕುಶೀಲ್‌ ಇಪ್ಪ.

²⁶ಅವ ಜ್ಞಾನತ್‌ಂಜ ತಕ್ಕ್‌ ಪರಿಯುವ. ದಯೆವುಳ್ಳ ಬೋದನೆನ ಮಾಡುವ.

²⁷ಅವ ಸೋಮಾರಿತನತರ್‌ ಆಹಾರತ್‌ನ ಉಂಗತೆ, ತಾಂಡ ಮನೆರ ಎಲ್ಲಾ ಕಾರ್ಯತ್‌ನ ಎಚ್ಚರತ್‌ಲ್‌ ನೋಟಿಯೊವ.

²⁸ಅವಡ ಮಕ್ಕ ಎದ್ದ್‌ನಿಂದಿತ್‌ ಅವಳ ಆಶೀರ್ವಾದ ಪಡ್‌ಂದಂವೋಂದ್‌ ಎಣ್ಣುವ. ಅವಡ ವಡಿಯ ಸಹ ಅವಳ ನೋಟಿತ್: ಹೊಗೊಳುವ,

²⁹ಸುಮಾರ್‌ ಪೊಣ್ಣಾಳುವ ನಲ್ಲ ಗುಣವುಳ್ಳಯಿಂಗಳಾಯಿತ್‌ ನಡ್‌ಂದಿತ್‌ ಉಂಡ್. ಆಚೇಂಗಿ, ಅಯಿಂಗ ಎಲ್ಲಾಂಕಿಂಜಿ ನೀನೇ ಮೇಲಾನವ ಎಣ್ಣಿಯಂಡ್‌ ಅವಡ ವಡಿಯ ಅವಳ ಹೊಗಳುವ.

³⁰ಸೌಂದರ್ಯ ವಂಚನೆ ಉಳ್ಳದ್. ಚಾಯಿ ಕಾಂಗತೆ ಆಯಿಪೋಪ. ಆಚೇಂಗಿ ಯೆಹೋವಂಗ್‌ ಬೊತ್ತುವ ಪೊಣ್ಣಾಳೇ ಹೊಗಳಿಕೆಕ್‌ ಯೋಗ್ಯವಾನವ.

³¹ಅವಡ ಎಲ್ಲಾ ಕೈಕೆಲಸಕ್‌ ಸೆರಿಯಾನ ಪ್ರತಿಫಲ ಕೊಡಿ. ಅವ ಮಾಡುವ ಕಾರ್ಯಕೆಲ್ಲಾ ಊರ್‌ರ ಜನ ಅವಳ ಕೊಂಡಾಡಡ್.