Read Kodava ಜ್ಞಾನತ್‌ರ ಪಡಿಮ 4 Bible Online

ಜ್ಞಾನತ್‌ರ ಪಡಿಮ 4 - Kodava bible

ಜ್ಞಾನತ್‌ರ ಪಡಿಮ 4

¹ನಾಡ ಮಕ್ಕಳೇ, ನಿಂಗಡ ಅಪ್ಪಂಡ ಬೋದನೇನ ಕ್‍ೕಟಿತ್, ಬುದ್ದಿ ತಕ್ಕ್‌ನ ಅರ್ಥ ಮಾಡುವಕ್‌ ಎಚ್ಚರ ಎಡ್‌ತೊಳಿ.

²ಎನ್ನಂಗೆಣ್ಣ್‌ಚೇಂಗಿ ನಾನ್‌ ನಲ್ಲ ಬೋದನೇನ ತಂದಂಡುಳ್ಳ; ನಾಡ ಉಪದೇಶತ್‌ನ ಬುಟ್ಟಿತ್‌ ಪೋಕತಿ.

³ನಾನ್‌ ಸಹ ನಾಡ ಅಪ್ಪಂಗ್‌ ಕೊದಿರ ಮೋಂವೊನಾಯಿತು, ನಾಡ ಅವ್ವಂಗ್‌ ಇಂಞು ಕೊದಿರ ಮೋಂವೊನಾಯಿತ್‌ ಇಂಜ.

⁴ನಾಡ ಅಪ್ಪ ನಾಕ್‍ ಬೋದನೆ ಮಾಡಿತ್: ನಾಡ ತಕ್ಕ್‌ನ ನೀಡ ಹೃದಯತ್‌ ಬೆಚ್ಚ. ನಾಡ ಆಜ್ಞೇರನೆಕೆ ನಡೆ; ಅಕ್ಕ ನೀನ್‌ ಚಾಯಿತೆ ಬದುಕುವಿಯಾಂದ್‌ ಎಣ್ಣ್‌ಚಿ.

⁵ಜ್ಞಾನಿಯಾಯಿತ್‌ ಇಪ್ಪಕು, ನಾಡ ಉಪದೇಶತ್‌ನ ಅರ್ಥ ಮಾಡ್‌ವಕು ನೀನ್‌ ಪಡಿ. ನಾಡ ತಕ್ಕ್‌ನ ಮರೆಕತೆ, ನಾನ್‌ ಎಣ್ಣುವಾನ ಬುಟ್ಟಿತ್‌ ಪೋಕತೆ ಇರ್.

⁶ಜ್ಞಾನತ್‌ನ ಬುಟ್ಟಿತ್‌ ಬೋರೆ ಕಡೆಕ್‌ ತಿರಿತ್‌ ಪೋಕತೆ. ಅದ್‌ ನಿನ್ನ ಕಾಪಾಡುವ. ಅದ್‌ನ ಪ್ರೀತಿ ಮಾಡ್. ಅದ್‌ ನಿನ್ನ ಕಾಪ.

⁷ಜ್ಞಾನವೇ ಎಲ್ಲಾಕಿಂಜ ಮುಕ್ಯವಾನದ್, ಆನಗುಂಡ್‌ ಜ್ಞಾನತ್‌ನ ಸಂಪಾದನೆ ಮಾಡ್; ಎಂತ ಸಂಪಾದನೆ ಮಾಡುಚೇಂಗಿಯು ಬುದ್ದಿನ ಸಂಪಾದನೆ ಮಾಡತೆ ಬುಡತೆ.

⁸ನೀನ್‌ ಜ್ಞಾನತ್‌ನ ಗನಪಡ್‌ತ್, ಅಕ್ಕ ಅದ್‌ ನಿನ್ನ ಬಲ್ಯ ಸ್ತಾನಕ್‌ ಕೊಂಡ ಪೋಪ; ಅದ್‌ನ ಗಟ್ಟಿಯಾಯಿತ್‌ ಪುಡ್‌ಚತ್ತೇಂಗಿ, ಅದ್‌ ನಿನ್ನ ಗನಪಡ್‌ತುವ.

⁹ಜ್ಞಾನ ನೀಡ ಮಂಡೆಕ್‌ ಚಿಂಗಾರಮಯವಾನ ಪೂಮಾಲೆನ ಇಡ್‌ವ; ಅದ್‌ ನೀಕ್‌ ಕೀರ್ತಿರ ಕಿರೀಟತ್‌ನ ತಪ್ಪ.

¹⁰ನಾಡ ಮೋನೇ, ನಾನ್‌ ಎಣ್ಣ್‌ವ ತಕ್ಕ್‌ನ ಕ್‍ೕಟಿತ್‌ ಅದ್‌ನ ಸ್ವೀಕಾರ ಮಾಡ್; ಅಕ್ಕ ನೀನ್‌ ದುಂಬ ಕಾಲ ಬದ್‌ಕ್‌ವಿಯ.

¹¹ನಾನ್‌ ನೀಕ್‌ ಜ್ಞಾನತ್‌ರ ಬಟ್ಟೆನ ಎಣ್ಣಿ ತಂದಿತುಳ್ಳ; ನಾನ್‌ ನೇರಾನ ಬಟ್ಟೆಲ್‌ ನಿನ್ನ ನಡ್‌ತಿತುಳ್ಳ.

¹²ನೀನ್‌ ಅದ್‌ ಕಾಟುವ ಬಟ್ಟೆಲ್‌ ನಡ್‌ಪಕ ಏದೂ ನಿನ್ನ ತಡ್‌ಪುಲೆ; ನೀನ್‌ ಅದ್‌ಲ್‌ ಓಡುವಕ ನೀನ್‌ ಅಡಿಕ್‌ ಬೂವುಲೆ.

¹³ಬೋದನೇನ ಗಟ್ಟಿಯಾಯಿತ್‌ ಪುಡ್‌ಚ, ಅದ್‌ನ ಬುಟ್ಟಿತ್‌ ಪೋಕತೆ; ಅದ್‌ನ ಬದ್ರತ್‌ಲ್‌ ಕಾಪಾಡ್, ಅದೇ ನೀಡ ಜೀವ.

¹⁴ದುಷ್ಟಂಗ ಬದ್‌ಕ್‌ವನೆಕೆ ಬದ್‌ಕತೆ. ಕ್‍ೕಡ ಮಾಡುವಯಿಂಗಡ ಬಟ್ಟೆಲ್‌ ಪೋಕತೆ.

¹⁵ಅಯಿಂಗಡ ಬಟ್ಟೆನ ಬುಟ್ಟಿತ್‌ ಕಡೆಗಟ್ಟಿತ್‌ ಪೋ; ಅದ್‌ನ ದಾಟಿತ್‌ ಮಿಂಞಕ್‌ ಪೋ.

¹⁶ಎನ್ನಂಗೆಣ್ಣ್‌ಚೇಂಗಿ, ಕ್‍ೕಡ್‌ ಮಾಡ್‌ವಯಿಂಗಕ್‌ ಕ್‍ೕಡ್‌ ಮಾಡತೆ ವರ್‌ಕ್‌ ಬಪ್ಪುಲೆ; ದಾರ್‌ನಾಚೇಂಗಿ ಬೂವಕ್‌ ಮಾಡ್‌ವಕತ್ತನೆ ಅಯಿಂಗಕ್‌ ಆರಾಮ್‌ಲ್‌ ವರ್ವಕ್‌ ಕಯ್ಯುಲೆ.

¹⁷ದುಷ್ಟತನವೇ ಅಯಿಂಗಡ ಆಹಾರ, ಕ್ರೂರತನವೇ ಅಯಿಂಗಡ ಪಾನ.

¹⁸ನೀತಿವಂತಂಯಿಂಗಡ ಬಟ್ಟೆ ಪೊಲಾಕತ್‌ರ ಬೊಳೀರನೆಕೆ ಇಪ್ಪ, ಅದ್‌ ಎನ್ನನೆ ಎಣ್ಣ್‌ಚೇಂಗಿ ಮಜ್ಜಣತ್‌ರ ಬೊಳಿ ಪ್ರಕಾಶ ಆಯಂಡೇ ಇಪ್ಪನೆಕೆ ಜಾಸ್ತಿ ಆಯಿತ್‌ ಇಪ್ಪ.

¹⁹ಆಚೇಂಗಿ ದುಷ್ಟಂಗಡ ಬದ್‌ಕ್‌ ಪೂರ್ತಿ ಇರ್‌ಟಾಯಿತ್‌ಪ್ಪ; ಅಯಿಂಗಳ ತಡ್‌ತಿತ್‌ ಬೂವನೆಕೆ ಮಾಡ್‌ವದ್‌ ಎಂತದ್‍ೕಂದ್‌ ಅಯಿಂಗಕ್‌ ಗೊತ್ತಾಪುಲೆ.

²⁰ನಾಡ ಮೋನೇ, ನಾನ್‌ ಎಣ್ಣುವಾನ ಎಚ್ಚರ ಎಡ್‌ತಿತ್‌ ಕೇಳ್; ನಾಡ ತಕ್ಕ್‌ಕ್‌ ಕೆಮಿ ಕೊಡ್.

²¹ನೀಡ ದೃಷ್ಟಿ ಎಕ್ಕಾಲು ಅದ್‌ಂಡ ಮೇಲೆ ಇರಡ್; ಅದ್‌ನ ನೀಡ ಹೃದಯತ್‌ರ ಆಳತ್‌ ಪತ್‌ರವಾಯಿತ್‌ ಬೆಚ್ಚ.

²²ಅದ್‌ನ ಕಂಡ್‌ ಪುಡಿಪಯಿಂಗಕ್‌ ಅದ್‌ ಜೀವವಾಯಿತ್‌ ಇಪ್ಪ; ಅಯಿಂಗಡ ಪೂರ್ತಿ ತಡಿಕ್‌ ಆರೋಗ್ಯತ್‌ನ ತಪ್ಪ.

²³ನೀಡ ಹೃದಯತ್‌ನ ಜಾಗೃತೆಲ್‌ ಚಾಯಿತೆ ಬೆಚ್ಚ; ಎನ್ನಂಗೆಣ್ಣ್‌ಚೇಂಗಿ ಅದ್‌ಂಜಲೇ ಜೀವತ್‌ರ ಎಲ್ಲಾ ವಿಜಯವು ಜಲನೀರ್‌ರನೆಕೆ ಬಪ್ಪ.

²⁴ಕಪಟ ತಕ್ಕ್‌ನ ನಿನ್ನಿಂಜ ನೀಕಿರ್; ಬಟ್ಟೆತಪ್ಪುವ ತಕ್ಕ್‌ ಪರಿಯುವದ್‌ನ ನಿನ್ನಿಂಜ ದೂರಮಾಡ್.

²⁵ನೀಡ ದೃಷ್ಟಿ ಎಕ್ಕಾಲು ನೇರೆ ಇರಡ್. ನೀಡ ಕಣ್ಣ್‌ ನೀಡ ಮಿಂಞಕ್‌ ಉಳ್ಳದ್‌ನ ನೋಟಿಯಂಡ್‌ ಇರಡ್.

²⁶ನೀನ್‌ ನಡ್‌ಪ ಬಟ್ಟೆಲ್‌ ಎಚ್ಚರ ಎಡ್‌ತ. ಅಕ್ಕ ನೀಡ ಬದ್‌ಕ್‌ ದೃಡವಾಯಿತ್ತಿಪ್ಪ.

²⁷ಬಲ್‌ತ ಬರಿಯಾಡ್‌ ಎಡ್‌ತ ಬರಿಯಾಡ್‌ ತಿರರ್‌ಗತೆ, ಕ್‍ೕಡಾನ ಬಟ್ಟೆಯಿಂಜ ನೀಡ ಕಾಲ್‌ನ ಕಾಪಾಡಿಯ.